Daily News in Kannda: ಕರ್ನಾಟಕಕ್ಕಿಂತ ಮೂರು ಪಟ್ಟು ಕಡಿಮೆ ಕರಾವಳಿ ತೀರ ಹೊಂದಿದ್ದರೂ ಗೋವಾಗೆ ಅಧಿಕ ಲಾಭ!

ಕರ್ನಾಟಕಕ್ಕಿಂತ ಮೂರು ಪಟ್ಟು ಕಡಿಮೆ ಕರಾವಳಿ ತೀರ ಹೊಂದಿದ್ದರೂ ಗೋವಾಗೆ ಅಧಿಕ ಲಾಭ!

ಪ್ರಮೋದ ಹರಿಕಾಂತ ಕಾರವಾರ: ರಾಜ್ಯಕ್ಕಿಂತ ಮೂರು ಪಟ್ಟು ದೊಡ್ಡ ಕರಾವಳಿ ತೀರ ಹೊಂದಿರುವ ಕರ್ನಾಟಕ ರಾಜ್ಯ ಕಡಲ ಉತ್ಪನ್ನ ಆದಾಯದಲ್ಲಿ ಗೋವಾಕ್ಕಿಂತ ಹಿಂದೆ ಉಳಿದಿದ್ದು, ಪ್ರತಿ ವರ್ಷ ನೂರಾರು ಕೋಟಿ ರೂ. ಆದಾಯ ನಷ್ಟ ಅನುಭವಿಸುತ್ತಿದೆ. ಕರ್ನಾಟಕ ರಾಜ್ಯವು 320 ಕಿ.ಮೀ. ಕರಾವಳಿ ತೀರ ಹೊಂದಿದೆ. ಅದರಲ್ಲಿ162 ಕಿ.ಮೀ. ಕರಾವಳಿ ತೀರ ಉತ್ತರ ಕನ್ನಡ ಜಿಲ್ಲೆಯಲ್ಲಿಯೇ ಇದೆ. ನೆರೆಯ ಗೋವಾ ರಾಜ್ಯ ಕೇವಲ 104 ಕಿ.ಮೀ. ಕರಾವಳಿ ತೀರ ಹೊಂದಿದೆ. ಮೀನು ಉತ್ಪಾದನೆಯಲ್ಲಿ ಗೋವಾಕ್ಕಿಂತ ಕರ್ನಾಟಕವೇ ದೊಡ್ಡ ಪಾಲು ಹೊಂದಿದೆ. ಆದರೆ, ಗೋವಾ ರಾಜ್ಯ ಕಡಿಮೆ ಮೀನು ಉತ್ಪಾದನೆ ಮಾಡಿದರೂ ಕರ್ನಾಟಕಕ್ಕಿಂತ ಎರಡು ಪಟ್ಟು ಹೆಚ್ಚು ಲಾಭ ಗಳಿಸುತ್ತಿದೆ. ಇದರಲ್ಲಿ ದಕ್ಷಿಣ ಕನ್ನಡ, ಉಡುಪಿ ತಕ್ಕ ಮಟ್ಟಿನ ಆದಾಯ ಹೊಂದಿದೆ. ಆದರೆ, ಉತ್ತರ ಕನ್ನಡ ಜಿಲ್ಲೆ ಮಾತ್ರ ದೊಡ್ಡ ಕರಾವಳಿ ತೀರ ಇದ್ದರೂ ಸೌಕರ್ಯ ಕೊರತೆಯಿಂದ ವರ್ಷಕ್ಕೆ ಸುಮಾರು 500 ಕೋಟಿ ರೂ. ಅಷ್ಟು ಆದಾಯ ನಷ್ಟ ಎದುರಿಸುತ್ತಿದೆ. ಇತ್ತೀಚೆಗೆ ಬಂದರುಗಳನ್ನು ವಾಣಿಜ್ಯೀಕರಣ ಮಾಡುವ ಯೋಜನೆಗಳು ನಡೆಯುತ್ತಿದ್ದು, ಮೀನುಗಾರಿಕೆ ಮೇಲೆ ಮತ್ತಷ್ಟು ಆತಂಕದ ಛಾಯೆ ಆವರಿಸಿದೆ. ವಾರ್ಷಿಕ 1,700 ಕೋಟಿ ರೂಗೋವಾ, ಉಡುಪಿ, ದಕ್ಷಿಣ ಕನ್ನಡ ಜಿಲ್ಲೆಗಳ ವಾರ್ಷಿಕ ಮೀನು ಉತ್ಪಾದನೆ ಮೌಲ್ಯ ಒಂದು ಸಾವಿರ ಕೋಟಿಯಿಂದ ಒಂದೂವರೆ ಸಾವಿರ ಕೋಟಿ ರೂ. ಇದೆ. ಆದರೆ, ಉತ್ತರ ಕನ್ನಡ ಜಿಲ್ಲೆಯ ಮೀನು ಮೌಲ್ಯ ಕೇವಲ 900 ಕೋಟಿ ರೂ! ಉತ್ತರ ಕನ್ನಡ ಜಿಲ್ಲೆಗಿಂತ ಕಡಿಮೆ ಮೀನು ಉತ್ಪಾದನೆ ಮಾಡುವ ಗೋವಾ ರಾಜ್ಯದ ಮೀನು ಮೌಲ್ಯ ವರ್ಷಕ್ಕೆ 1,700 ಕೋಟಿ ರೂ.ಗೂ ಅಧಿಕ. ರಾಜ್ಯ ಸರಕಾರ ರಾಜ್ಯದ ಕರಾವಳಿ ತೀರದ ಕಡಲ ಮೀನುಗಾರಿಕೆ ಸಂಸ್ಕೃತಿಯನ್ನು ಸಮಗ್ರವಾಗಿ ಬಳಸಿಕೊಳ್ಳದೆ ಇರುವುದೇ ಮೀನು ಮೌಲ್ಯ ಕಳೆದುಕೊಳ್ಳಲು ಕಾರಣ ಎನ್ನುವ ಅಪವಾದ ಇದೆ. ದಕ್ಷಿಣ ಕನ್ನಡ, ಉಡುಪಿ, ಉತ್ತರಕನ್ನಡ ಜಿಲ್ಲೆಗಳ ಕಡಲ ಮೀನುಗಾರಿಕೆಗೆ ಸಮಾನ ಉತ್ತೇಜನ ಕೊಟ್ಟರೆ ಮತ್ಸ್ಯೋದ್ಯಮದಿಂದಲೇ ಸಾವಿರಾರು ಕೋಟಿ ರೂ. ಗಳಿಕೆ ಮಾಡುವ ಅವಕಾಶ ಇದೆ. ಗೋವಾಗೇಕೆ ಹೆಚ್ಚು ಲಾಭ?ದಕ್ಷಿಣ ಕನ್ನಡ, ಉಡುಪಿ ಜಿಲ್ಲೆಗಳು ಮತ್ತು ಗೋವಾ ರಾಜ್ಯದಲ್ಲಿ ಮೀನು ಉತ್ಪನ್ನ ರಫ್ತು ವ್ಯವಸ್ಥೆ ಇದೆ. ಜತೆಗೆ ಕೋಲ್ಡ್‌ ಸ್ಟೋರೇಜ್‌ ವ್ಯವಸ್ಥೆ ಕೂಡ ಇರುವುದರಿಂದ ಮೀನುಗಳಿಗೆ ಹೆಚ್ಚಿನ ಬೆಲೆ ದೊರೆಯುತ್ತದೆ. ಗೋವಾ ರಾಜ್ಯ ಪ್ರತಿ ವರ್ಷ 60-80 ಕೋಟಿ ರೂ. ಮೌಲ್ಯದ ಮತ್ಸ್ಯೋತ್ಪನ್ನವನ್ನು ರಫ್ತು ಮಾಡುತ್ತದೆ. ಯಾಂತ್ರಿಕ ಮೀನುಗಾರಿಕೆಯನ್ನು ಕಂಪನಿ ರೀತಿಯಲ್ಲಿ ನಡೆಸುವ ವ್ಯವಸ್ಥೆ ಇದೆ. ಉತ್ತರಕನ್ನಡ ಜಿಲ್ಲೆಯವರೂ ಮೀನುಗಾರಿಕೆ ಕಾರ್ಮಿಕರಾಗಿ ದುಡಿಯಲು ಗೋವಾಕ್ಕೆ ಹೋಗುತ್ತಾರೆ. ಇದೆಲ್ಲದರ ಬಗ್ಗೆ ವಿಶೇಷ ಅಧ್ಯಯನ ನಡೆಸಿ ರಾಜ್ಯದ ಮೀನುಗಾರಿಕೆ ಸೌಲಭ್ಯದಲ್ಲಿಯೂ ಸುಧಾರಣೆ ಮಾಡಿದರೆ ಹೆಚ್ಚು ಲಾಭ ಗಳಿಸುವ ಅವಕಾಶ ಇದೆ ಎನ್ನುತ್ತಾರೆ ಅಧಿಕಾರಿಗಳು. ಕಡಲ ಮೀನುಗಾರಿಕೆ ಬೆಲೆ ವ್ಯತ್ಯಾಸ (ವಾರ್ಷಿಕ)

ಜಿಲ್ಲೆ/ರಾಜ್ಯ	ಮೀನು ಉತ್ಪಾದನೆ	ಮೌಲ್ಯ (₹)
ಉತ್ತರ ಕನ್ನಡ	1.20 ಲಕ್ಷ ಟನ್‌	900 ಕೋಟಿ
ಉಡುಪಿ	1.44 ಲಕ್ಷ ಟನ್‌	1,498 ಕೋಟಿ
ದಕ್ಷಿಣ ಕನ್ನಡ	1.48 ಲಕ್ಷ ಟನ್‌	1,595 ಕೋಟಿ
ಗೋವಾ	1 ಲಕ್ಷ ಟನ್‌	1,700 ಕೋಟಿ