ಹೊಸದಿಲ್ಲಿ: ಸಂದರ್ಶನದಲ್ಲಿ ಭಾಗವಹಿಸುವಂತೆ ಬೆದರಿಕೆ ಹಾಕಿದ್ದ ಪತ್ರಕರ್ತನ ಹೆಸರು ಬಹಿರಂಗಪಡಿಸಲು ನಿರಾಕರಿಸಿದ ವಿಕೆಟ್‌ ಕೀಪರ್‌ , ಇದೇ.. ಕೊನೇ, ಇನ್ನು ಮುಂದೆ ಈ ರೀತಿ ಮಾಡಬೇಡ. ಒಂದು ವೇಳೆ ಇದನ್ನು ಮುಂದುವರಿಸಿದರೆ ನಿನ್ನನ್ನು ಸುಮ್ಮನೆ ಬಿಡುವುದಿಲ್ಲವೆಂದು ಎಚ್ಚರಿಕೆ ನೀಡಿದ್ದಾರೆ. ಈ ಬಗ್ಗೆ ಮಂಗಳವಾರ ಸರಣಿ ಟ್ವೀಟ್‌ ಮಾಡಿದ ವೃದ್ದಿಮಾನ್ ಸಹಾ, ಮಾನವೀಯತೆ ದೃಷ್ಟಿಯಿಂದ ಒಬ್ಬ ಪತ್ರಕರ್ತನ ವೃತ್ತಿ ಜೀವನಕ್ಕೆ ತೊಂದರೆ ಕೊಡಲು ನನಗೆ ಇಷ್ಟವಿಲ್ಲ. ಏಕೆಂದರೆ ಆತನಿಗೆ ಹಾಗೂ ಆತನ ಕುಟುಂಬಕ್ಕೆ ತನ್ನದೇ ಆದ ಗೌರವವಿರುತ್ತದೆ ಎಂದು ಹೇಳಿದ್ದಾರೆ. "ನನಗೆ ನೋವಾಯಿತು ಮತ್ತು ಮನನೊಂದಿದೆ. ಇಂತಹ ನಡವಳಿಕೆಯನ್ನು ಸಹಿಸಬಾರದು ಎಂದು ನಾನು ಭಾವಿಸುತ್ತೇನೆ ಹಾಗೂ ಈ ರೀತಿ ಬೆದರಿಸುವ ಮೂಲಕ ಯಾರೂ ಮುಂದೆ ಹೋಗಬಾರದು. ಹಾಗಾಗಿ ಸಾರ್ವಜನಿಕವಾಗಿ ಈ ಸಂಭಾಷಣೆಯನ್ನು ಬಹಿರಂಗಪಡಿಸಲು ಬಯಸಿದೆ. ಆದರೆ ಅವರ ಹೆಸರನ್ನು ತಿಳಿಸಲು ನನಗೆ ಇಷ್ಟವಾಗಲಿಲ್ಲ," ಎಂದು ಸಹಾ ಟ್ವೀಟ್‌ ಮಾಡಿದ್ದಾರೆ. "ಯಾರೊಬ್ಬರ ವೃತ್ತಿಜೀವನವನ್ನು ಹಾಳು ಮಾಡಬೇಕೆಂಬ ಮನಸ್ಥಿತಿ ನನಗಿಲ್ಲ. ನನ್ನ ಸ್ವಭಾವವೇ ಇಂತದ್ದು. ಮಾನವೀಯತೆಯಿಂದಾಗಿ ಆತನ ಹಾಗೂ ಆತನ ಕುಂಟುಂಬದ ಗೌರವ ಹಾಳು ಮಾಡಲು ನನಗೆ ಇಷ್ಟವಿಲ್ಲ. ಈ ಕಾರಣದಿಂದಲೇ ನಾನು ಅವರ ಹೆಸರನ್ನು ಬಹಿರಂಗಪಡಿಸಲು ಇಷ್ಟಪಡುತ್ತಿಲ್ಲ. ಒಂದು ವೇಳೆ ಇದು ಪುನರಾವರ್ತನೆಯಾದರೆ, ಖಂಡಿತಾ ಆತನನ್ನು ಸುಮ್ಮನೆ ಬಿಡುವುದಿಲ್ಲ," ಎಂದು ಪತ್ರಕರ್ತನಿಗೆ ಸಹಾ ಎಚ್ಚರಿಕೆ ನೀಡಿದರು. "ನನಗೆ ಬೆಂಬಲಕ್ಕೆ ಹಾಗೂ ನನ್ನ ನೆರವಿಗೆ ನಿಂತ ಪ್ರತಿಯೊಬ್ಬರಿಗೂ ಧನ್ಯವಾದ ಅರ್ಪಿಸಲು ಬಯಸುತ್ತೇನೆ," ಎಂದು ಟೀಮ್‌ ಇಂಡಿಯಾ ಹಿರಿಯ ಆಟಗಾರ ವೃದ್ದಿಮಾನ್ ಸಹಾ ಕೊನೆಯ ಟ್ವೀಟ್‌ನಲ್ಲಿ ಎಲ್ಲರಿಗೂ ಧನ್ಯವಾದ ಅರ್ಪಿಸಿದರು. ಏನಿದು ಪ್ರಕರಣ? ಸಂದರ್ಶನದಲ್ಲಿ ಭಾಗವಹಿಸುವಂತೆ ಪತ್ರಕರ್ತರೊಬ್ಬರು ನನಗೆ ಬೆದರಿಕೆ ಹಾಕುತ್ತಿದ್ದಾರೆಂದು ವೃದ್ದಿಮಾನ್ ಸಹಾ ಸಂದೇಶದ ಸ್ಕ್ರೀನ್‌ ಶಾಟ್‌ ಸಮೇತ ಕಳೆದ ಶನಿವಾರ ತಮ್ಮ ಅಧಿಕೃತ ಟ್ವಿಟರ್‌ನಲ್ಲಿ ತಿಳಿಸಿದ್ದರು. "ಭಾರತೀಯ ಕ್ರಿಕೆಟ್‌ಗೆ ಕೊಡುಗೆ ನೀಡಿರುವ ನನಗೆ, ಗೌರವಾನ್ವಿತ ಎಂದು ಕರೆಸಿಕೊಳ್ಳುವ ಪತ್ರಕರ್ತನಿಂದ ನಾನು ಈ ರೀತಿಯ ಸಮಸ್ಯೆಯನ್ನು ಎದುರಿಸುತ್ತಿದ್ದೇನೆ. ಪತ್ರಿಕೋದ್ಯಮ ತನ್ನ ಸತ್ವವನ್ನು ಕಳೆದುಕೊಂಡಿದೆ ಎಂಬುದು ಇದು ತೋರಿಸುತ್ತಿದೆ," ಎಂದು ವೃದ್ದಿಮಾನ್ ಸಹಾ ಅವರು ಪತ್ರಕರ್ತ ಕಳುಹಿಸಿದ್ದ ಸಂದೇಶದ ಸ್ಕ್ರೀನ್‌ ಶಾಟ್‌ ಪೋಟೋಗಳೊಂದಿಗೆ ಶನಿವಾರ ಟ್ವೀಟ್‌ ಮಾಡಿದ್ದರು. ಖಜಾಂಚಿ ಪ್ರತಿಕ್ರಿಯೆ ವೃದ್ದಿಮಾನ್ ಸಹಾ ಅವರು ಸ್ವೀಕರಿಸಿರುವ ಸಂದೇಶ ಏನು? ಹಾಗೂ ಅವರಿಗೆ ಯಾರು ಸಂದೇಶ ಕಳುಹಿಸಿದ್ದಾರೆಂಬ ಬಗ್ಗೆ ಹಿರಿಯ ಆಟಗಾರನ ಜೊತೆ ಬಿಸಿಸಿಐ ಸಂಭಾಷಣೆ ನಡೆಸಲಿದೆ ಎಂದು ರಾಷ್ಟ್ರೀಯ ಕ್ರಿಕೆಟ್ ಮಂಡಳಿ ಖಾಜಾಂಚಿ ಅರುಣ್‌ ಧುಮಾಲ್ ಪಿಟಿಐ ಸುದ್ದಿ ಸಂಸ್ಥೆಗೆ ತಿಳಿಸಿದ್ದರು. "ಹೌದು, ಟ್ವಿಟ್‌ ಬಗ್ಗೆ ಹಾಗೂ ಇಲ್ಲಿ ನಡೆದಿರುವ ಅಸಲಿ ಸಂಗತಿಯ ಬಗ್ಗೆ ನಾವು ವೃದ್ದಿಮಾನ್ ಸಹಾ ಬಳಿ ಮಾತನಾಡುತ್ತೇವೆ. ಈ ಟ್ವೀಟ್‌ನಲ್ಲಿ ಅವರಿಗೆ ಬೆದರಿಕೆ ಹಾಕಲಾಗಿದೆಯೇ ಎಂಬ ಬಗ್ಗೆ ನಾವು ತಿಳಿದುಕೊಳ್ಳಬೇಕಾದ ಅಗತ್ಯವಿದೆ. ಆದ್ದರಿಂದ ಈ ಬಗ್ಗೆ ನಾನು ಹೆಚ್ಚಾಗಿ ಮಾತನಾಡುವುದಿಲ್ಲ. ಬಿಸಿಸಿಐ ಕಾರ್ಯದರ್ಶಿ ಜಯ ಶಾ ಅವರು ಈ ಬಗ್ಗೆ ವೃದ್ದಿಮಾನ್ ಸಹಾ ಬಳಿ ಮಾತನಾಡುತ್ತಾರೆ," ಎಂದು ಧುಮುಲ್‌ ಹೇಳಿದ್ದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/aSJFCnB
