ಹೊಸದಿಲ್ಲಿ: ಕಳೆದ 9 ವರ್ಷಗಳ ಹಿಂದೆ ಅಂತಾರಾಷ್ಟ್ರೀಯ ಕ್ರಿಕೆಟ್ ವಿದಾಯದ ಪಂದ್ಯದ ಬಳಿಕ ನೀಡಿದ್ದ ಬೆಲೆ ಕಟ್ಟಲಾಗದ ಕೊಡುಗೆಯನ್ನು ಇದೀಗ ಸ್ಮರಿಸಿಕೊಂಡ ಮಾಸ್ಟರ್‌ ಬ್ಲಾಸ್ಟರ್‌ , ಅಂದಿನ ದಿನ ಬಲಗೈ ಬ್ಯಾಟ್ಸ್‌ಮನ್‌ನೊಂದಿಗೆ ನಡೆದಿದ್ದ ಸಂಭಾಷಣೆಯನ್ನು ಬಹಿರಂಗಪಡಿಸಿದ್ದಾರೆ. ಬರೋಬ್ಬರಿ ಎರಡೂವರೆ ದಶಕಗಳ ಕಾಲ ಭಾರತ ತಂಡವನ್ನು ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಪ್ರತಿನಿಧಿಸಿರುವ ಸಚಿನ್ ತೆಂಡೂಲ್ಕರ್‌ ಟೆಸ್ಟ್‌, ಓಡಿಐ ಕ್ರಿಕೆಟ್‌ನಲ್ಲಿ ರನ್‌ ಹೊಳೆಯನ್ನೇ ಹರಿಸಿದ್ದಾರೆ. 100 ಶತಕಗಳನ್ನು ಪೂರೈಸಿದ ವಿಶ್ವದ ಮೊದಲ ಬ್ಯಾಟ್ಸ್‌ಮನ್‌ ಎಂಬ ದೊಡ್ಡ ದಾಖಲೆಯನ್ನು ಬರೆದಿದ್ದಾರೆ. ಆ ಮೂಲಕ ಭಾರತೀಯ ಅಭಿಮಾನಿಗಳ ಪಾಲಿಗೆ ಅವರು ಕ್ರಿಕೆಟ್ ಆರಾಧ್ಯ ದೈವರಾಗಿದ್ದಾರೆ. 2013ರಲ್ಲಿ ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ಸಚಿನ್ ತೆಂಡೂಲ್ಕರ್‌ ವೆಸ್ಟ್ ಇಂಡೀಸ್‌ ವಿರುದ್ಧ ಟೆಸ್ಟ್‌ ಪಂದ್ಯದ ಮೂಲಕ ತಮ್ಮ ಕ್ರಿಕೆಟ್ ವೃತ್ತಿ ಜೀವನವನ್ನು ಅಂತ್ಯಗೊಳಿಸಿದ್ದರು. ಈ ಪಂದ್ಯದ ಬಳಿಕ ವಿರಾಟ್‌ ಕೊಹ್ಲಿ ಜೊತೆ ನಡೆದಿದ್ದ ಸಂಭಾಷಣೆಯನ್ನು ಕ್ರಿಕೆಟ್ ದಿಗ್ಗಜ ಇತ್ತೀಚೆಗೆ ಅಮೆರಿಕನ್‌ ಪತ್ರಕರ್ತ ಗ್ರಹಾಮ್ ಬೆನ್‌ ಸಿಂಗರ್‌ ಅವರ ಯೂಟ್ಯೂಬ್‌ ಚಾನೆಲ್‌ನಲ್ಲಿ ಹಂಚಿಕೊಂಡಿದ್ದಾರೆ. "ಹೌದು, ಈಗಲೂ ನನಗೆ ನೆನಪಿದೆ. ವೆಸ್ಟ್ ಇಂಡೀಸ್‌ ವಿರುದ್ಧ ವೃತ್ತಿ ಜೀವನದ ಕೊನೆಯ ಪಂದ್ಯದ ಬಳಿಕ ಕಣ್ಣೀರಿಡುತ್ತಾ ಡ್ರೆಸ್ಸಿಂಗ್‌ ಕೊಠಡಿಗೆ ಮರಳಿದೆ. ಈ ಪಂದ್ಯದ ಮೂಲಕ ನಾನು ಕ್ರಿಕೆಟ್‌ಗೆ ವಿದಾಯ ಹೇಳುತ್ತಿದ್ದೇನೆಂದು ಗೊತ್ತಿತ್ತು. ಕೊನೆಯ ಎಸೆತ ಮುಗಿದ ಬಳಿಕ, 'ನನ್ನ ಕ್ರಿಕೆಟ್ ವೃತ್ತಿ ಜೀವನ ಮುಗಿಯಿತು. ಇನ್ನು ಮುಂದೆ ಅಂತಾರಾಷ್ಟ್ರೀಯ ಕ್ರಿಕೆಟಿಗನಾಗಿ ಮೈದಾನಕ್ಕೆ ಮರಳುವುದಿಲ್ಲವೆಂದು ನನಗೇ ನಾನೇ ಮನಸಿನಲ್ಲಿ ಹೇಳಿಕೊಂಡೆ," ಎಂದರು. "ಈ ವೇಳೆ ತಲೆ ಮೇಲೆ ಟವಲ್ ಹಾಕಿಕೊಂಡು ಡ್ರೆಸ್ಸಿಂಗ್‌ ಕೊಠಡಿಯ ಒಂದು ಕಾರ್ನರ್‌ನಲ್ಲಿ ಕುಳಿತು ಕಣ್ಣೀರಿಡುತ್ತಿದ್ದೆ. ನಿಜವಾಗಲೂ ಆ ಸಂದರ್ಭದಲ್ಲಿ ನಾನು ತುಂಬಾ ಭಾವುಕನಾಗಿದ್ದೆ ಹಾಗೂ ನನ್ನ ಕಣ್ಣೀರನ್ನು ತಡೆಯಲು ಸಾಧ್ಯವಾಗಲೇ ಇಲ್ಲ. ಈ ವೇಳೆ ವಿರಾಟ್‌ ನನ್ನ ಬಳಿ ಬಂದು ಅವರ ತಂದೆ ನೀಡಿದ್ದ ಕೈ ದಾರವನ್ನು ನನಗೆ ಕೊಡುಗೆಯಾಗಿ ನೀಡಿದ್ದರು," ಎಂದು ತಿಳಿಸಿದರು. "ನಾನು ದಾರವನ್ನು ಸ್ವಲ್ಪ ಹೊತ್ತು ಇಟ್ಟುಕೊಂಡಿದ್ದೆ ಹಾಗೂ ತದನಂತರ ಅದನ್ನು ಅವರಿಗೆ ವಾಪಸ್ ಕೊಟ್ಟೆ... ಇದಕ್ಕೆ ಬೆಲೆ ಕಟ್ಟಲು ಸಾಧ್ಯವಿಲ್ಲ. ಹಾಗಾಗಿ ಇದು ನಿಮ್ಮ ಬಳಿಯೇ ಇರಲಿ. ಇದು ನಿನ್ನದು ಮಾತ್ರ, ಬೇರೆ ಯಾರದೂ ಅಲ್ಲ. ನಿಮ್ಮ ಕೊನೆಯ ಉಸಿರು ಇರುವವರೆಗೂ ಇದು ನಿಮ್ಮ ಬಳಿಯೇ ಇರಲಿ ಎಂದಿದ್ದೆ. ಇದು ಯಾವಾಗಲೂ ನನಗೆ ಅದ್ಭುತ ನೆನಪಾಗಿಯೇ ಉಳಿಯಲಿದೆ," ಎಂದು ಸಚಿನ್ ಹೇಳಿಕೊಂಡರು. ಕ್ರಿಕೆಟ್ ದಂತಕತೆ ಸಚಿನ್ ತೆಂಡೂಲ್ಕರ್‌ ಅವರೊಂದಿಗೆ ಡ್ರೆಸ್ಸಿಂಗ್‌ ಕೊಠಡಿಯಲ್ಲಿನ ವಿಶೇಷ ನೆನಪುಗಳನ್ನು ಸುಮಾರು ಎರಡು ವರ್ಷಗಳ ಹಿಂದೆ ವಿರಾಟ್‌ ಕೊಹ್ಲಿ ಕೂಡ ಮೆಲುಕು ಹಾಕಿದ್ದರು. ತಮ್ಮ ಪಾಲಿಗೆ ಕೈ ದಾರ ಎಷ್ಟು ಮುಖ್ಯವಾಗಿದೆ ಎಂಬುದನ್ನು ಅವರು ಹೇಳಿಕೊಂಡಿದ್ದರು. "ನಾವು ಸಾಮಾನ್ಯವಾಗಿ ಕೈಗೆ ದಾರವನ್ನು ಕಟ್ಟಿಕೊಳ್ಳುತ್ತೇವೆ. ಭಾರತದಲ್ಲಿ ಇದನ್ನು ಸಾಕಷ್ಟು ಜನ ಅನುಸರಿಸುತ್ತಾರೆ. ಹಾಗಾಗಿ ನನ್ನ ತಂದೆ ಈ ಹಿಂದೆ ನನಗೆ ಇದನ್ನು ಕೊಟ್ಟಿದ್ದರು. ಹಾಗಾಗಿ ದಾರ ಯಾವಾಗಲೂ ನನ್ನ ಬ್ಯಾಗ್‌ನಲ್ಲಿ ಇದ್ದೇ ಇರುತ್ತದೆ. ನನ್ನ ತಂದೆ ಈ ದಾರವನ್ನು ನನಗೆ ನೀಡಿರುವುದರಿಂದ ಇದು ನನ್ನ ಪಾಲಿಗೆ ಅತ್ಯಂತ ಮೌಲ್ಯಯುತವಾದದ್ದು, ಆದ್ದರಿಂದ ಇದಕ್ಕಿಂತ ಹೆಚ್ಚಿನ ಮೌಲ್ಯವಾದುದ್ದನ್ನು ನೀಡಲು ನನ್ನಿಂದ ಸಾಧ್ಯವಿಲ್ಲ. ಅವರು(ಸಚಿನ್) ನಮಗೆ ಸ್ಪೂರ್ತಿಯಾಗಿದ್ದಾರೆ. ಹಾಗಾಗಿ ನನ್ನ ತಂದೆ ಕೊಟ್ಟಿದ್ದ ದಾರವನ್ನು ಅವರಿಗೆ ಸಣ್ಣ ಕೊಡುಗೆ ನೀಡಲು ನಿರ್ಧರಿಸಿದ್ದೆ," ಎಂದು ವಿರಾಟ್‌ ಕೊಹ್ಲಿ ತಿಳಿಸಿದ್ದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/V9C4HRu
