ಹೊಸದಿಲ್ಲಿ: ವಾಹನ ಚಾಲನೆ ಮಾಡುತ್ತಲೇ ಇಯರ್‌ಫೋನ್‌ ಸಹಾಯದಿಂದ ಮೊಬೈಲ್‌ನಲ್ಲಿ ಮಾತನಾಡುವುದು ಕೆಲವೇ ದಿನಗಳಲ್ಲಿ ಸಕ್ರಮ ಎನಿಸಲಿದೆ ಎಂಬ ಸುಳಿವನ್ನು ಕೇಂದ್ರ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್‌ ಗಡ್ಕರಿ ಕೊಟ್ಟಿದ್ದಾರೆ. ಲೋಕಸಭೆಯಲ್ಲಿ ಮಾತನಾಡುವ ವೇಳೆ ಗಡ್ಕರಿ ಅವರು, ''ಚಾಲಕ (ಡ್ರೈವರ್‌) ಕೈ ಬಳಕೆ ಮಾಡದೇ ಮೊಬೈಲ್‌ನಲ್ಲಿ ಮಾತನಾಡುತ್ತಿದ್ದರೆ ಅದನ್ನು ಅಪರಾಧ ಎಂದು ಪರಿಗಣಿಸಲ್ಲ. ಅಂಥ ಪ್ರಕರಣಗಳಲ್ಲಿ ಸಂಚಾರಿ ಪೊಲೀಸರು (ಟ್ರಾಫಿಕ್‌ ಪೊಲೀಸರು) ದಂಡವನ್ನು ಕೂಡ ಹೇರುವಂತಿಲ್ಲ. ಒಂದು ವೇಳೆ ದಂಡ ಹೇರಲಾದರೆ ಅದನ್ನು ಚಾಲಕ ಕೋರ್ಟ್‌ನಲ್ಲಿ ಪ್ರಶ್ನಿಸಲು ಅವಕಾಶ ನೀಡಲಾಗುವುದು,'' ಎಂದಿದ್ದಾರೆ. ಶೀಘ್ರವೇ ಈ ಸಂಬಂಧ ಅಗತ್ಯವಾದ ತಿದ್ದುಪಡಿಯನ್ನು ಮೋಟಾರು ವಾಹನ ಕಾಯಿದೆಗೆ ತರಲಾಗುವುದು. ಇಯರ್‌ಫೋನ್‌ ಬಳಸಿ ಚಾಲನೆ ಮಾಡುವಾಗ ರಸ್ತೆಯನ್ನು ನೋಡಿಕೊಂಡೇ ಚಾಲಕರು ಚಾಲನೆ ಮಾಡುತ್ತಿರುತ್ತಾರೆ. ಸರಕಾರ ಅಥವಾ ಕಾನೂನಿನ ಮೂಲ ಉದ್ದೇಶ ಇರುವುದು ಚಾಲಕರು ಅಪಘಾತ ಮಾಡಬಾರದು ಹಾಗೂ ಅಪಘಾತಕ್ಕೆ ತುತ್ತಾಗಬಾರದು ಎನ್ನುವುದು ಮಾತ್ರವೇ. ಹಾಗಾಗಿ ಇಯರ್‌ಫೋನ್‌ ಮೂಲಕ ಫೋನ್ ಕರೆಯ ಸಂಭಾಷಣೆಗೆ ಅನುವು ಮಾಡಿಕೊಡಲಾಗುತ್ತಿದೆ. ಈ ಸಂಬಂಧ ಸಚಿವಾಲಯದಲ್ಲಿ ಅಧಿಕಾರಿಗಳು ಸೂಕ್ತ ಕಾನೂನು ಸಿದ್ಧಪಡಿಸುತ್ತಿದ್ದಾರೆ ಎಂದು ಗಡ್ಕರಿ ಅವರ ಕಚೇರಿಯ ಆಪ್ತ ಮೂಲಗಳಿಂದಲೂ ತಿಳಿದುಬಂದಿದೆ. ಫೋನ್ ಜೇಬಿನಲ್ಲಿಇರಬೇಕು ಫೋನ್‌ನಲ್ಲಿ ಮಾತನಾಡುತ್ತಲೇ ಚಾಲನೆ ಮಾಡಬಹುದು ಎಂದ ಮಾತ್ರಕ್ಕೆ ಮೊಬೈಲ್ ಅನ್ನು ನೇರವಾಗಿ ಕಿವಿಗೆ ಇಟ್ಟುಕೊಂಡು ಸಾಗುವುದಕ್ಕೆ ಯಾವತ್ತಿಗೂ ಕೂಡ ಅನುಮತಿ ನೀಡಲ್ಲ. ಮೊಬೈಲ್ ಅಥವಾ ಸ್ಮಾರ್ಟ್‌ಫೋನ್‌ಗಳು ದ್ವಿಚಕ್ರ, ತ್ರಿಚಕ್ರ, ಕಾರು, ಲಾರಿ, ಬಸ್‌ಗಳ ಚಾಲಕರ ಜೇಬಿನಲ್ಲಿ ಇರಬೇಕು. ಇಯರ್‌ಫೋನ್‌ ಅಥವಾ ಹ್ಯಾಂಡ್ಸ್‌ಫ್ರೀ ಸಾಧನಗಳನ್ನು ಬಳಸಿಕೊಂಡು ಜೇಬಿನಲ್ಲಿರುವ ಮೊಬೈಲ್ ಜತೆಗೆ ಸಂಪರ್ಕ ಸಾಧಿಸಿದ ಬಳಿಕ ಕರೆ ಸ್ವೀಕರಿಸಿ ಮಾತನಾಡಲು ಮಾತ್ರವೇ ಅವಕಾಶ ನೀಡಲಾಗುವುದು. ರಸ್ತೆ ಅಪಘಾತಕ್ಕೆ ಅಥವಾ ರಸ್ತೆ ಸಂಚಾರದಲ್ಲಿ ಅಶಿಸ್ತು ಉಂಟುಮಾಡುವ ಯಾವುದೇ ವರ್ತನೆಗೆ ಸಚಿವಾಲಯ ಪ್ರೋತ್ಸಾಹಿಸಲ್ಲಎಂದು ಸಚಿವ ಗಡ್ಕರಿ ಸ್ಪಷ್ಟಪಡಿಸಿದ್ದಾರೆ. ಕಳೆದ ಸೆಪ್ಟೆಂಬರ್‌ನಲ್ಲಿ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯವು ಮಹತ್ವದ ಆದೇಶ ಹೊರಡಿಸಿ, ವಾಹನ ಚಾಲನೆ ವೇಳೆ ಮಾರ್ಗದ ಬಗ್ಗೆ ಮಾಹಿತಿಗೆ (ನ್ಯಾವಿಗೇಷನ್‌- ಗೂಗಲ್ ಮ್ಯಾಪ್ ಮಾದರಿ) ಸ್ಮಾರ್ಟ್‌ಫೋನ್‌ಗಳಲ್ಲಿನ ನ್ಯಾವಿಗೇಷನ್‌ ಆ್ಯಪ್‌ಗಳನ್ನು ಬಳಸಲು ಅನುಮತಿ ನೀಡಿತ್ತು. ಆದರೆ, ಚಾಲಕರ ಗಮನ ಕೆಡದಂತೆ ಚಾಲನಾ ಸ್ನೇಹಿ ಆ್ಯಪ್‌ಗಳನ್ನು ಮಾತ್ರವೇ ಬಳಸುವಂತೆ ಎಚ್ಚರಿಸಲಾಗಿತ್ತು. ಕರ್ನಾಟಕದಲ್ಲಿ ಕೂಡ ಕೆಲವು ತಿಂಗಳ ಹಿಂದೆ ವಾಹನ ಸವಾರರು ಚಾಲನೆ ಮಾಡುವಾಗ ಬ್ಲೂಟೂತ್ ಅಥವಾ ಇಯರ್ ಫೋನ್ ಬಳಸಿ ಮೊಬೈಲ್ ಫೋನ್‌ನಲ್ಲಿ ಮಾತನಾಡುವಂತಿಲ್ಲ ಎಂದು ಸೂಚನೆ ನೀಡಲಾಗಿತ್ತು. ಗೂಗಲ್ ಮ್ಯಾಪ್‌ನಂತಹ ನೇವಿಗೇಷನ್ ಕಾರ್ಯಗಳಿಗೂ ಬ್ಲೂಟೂತ್ ಬಳಸಬಾರದು ಎಂದು ಆದೇಶದಲ್ಲಿ ತಿಳಿಸಲಾಗಿತ್ತು. ಇದಕ್ಕೆ ತೀವ್ರ ಆಕ್ಷೇಪ ವ್ಯಕ್ತವಾಗಿತ್ತು.
from India & World News in Kannada | VK Polls https://ift.tt/Q3Gv48p
