ಎಚ್‌.ಪಿ. ಪುಣ್ಯವತಿ ಬೆಂಗಳೂರು: ಅಡುಗೆ ಮಾಡಲು, ಆಟೋ ಓಡಿಸಲು, ನೀರು ಕಾಯಿಸಲು, ವಾಹನ ಚಾಲನೆ ಇತ್ಯಾದಿ ಉದ್ದೇಶಕ್ಕೆ ಬಳಕೆಯಾಗುತ್ತಿದ್ದ ಎಲ್‌ಪಿಜಿ ಗ್ಯಾಸ್‌ ಇದೀಗ ಬಟ್ಟೆ ಇಸ್ತ್ರಿ ಮಾಡಲು ಕೂಡ ಬಳಕೆಯಾಗುತ್ತಿದೆ. ಮಿತ ವ್ಯಯಕಾರಿ, ಪರಿಸರ ಸ್ನೇಹಿಯಾಗಿರುವ ಎಲ್‌ಪಿಜಿ ಐರನ್‌ ಬಾಕ್ಸ್‌ ಬಳಕೆಗೆ ಹೆಚ್ಚು ಶ್ರಮಪಡಬೇಕಿಲ್ಲ. ಹೀಗಾಗಿ ಇಸ್ತ್ರಿ ಕೆಲಸದವರಿಗೆ ಇದು ವರದಾನವಾಗಿದೆ. ಹಲವು ದಶಕಗಳಿಂದ ಇಸ್ತ್ರಿ ಕೆಲಸ ಮಾಡುವವರು ಕಲ್ಲಿದ್ದಲು ಇಸ್ತ್ರಿ ಪೆಟ್ಟಿಗೆಯನ್ನೇ ಬಳಸುತ್ತಿದ್ದಾರೆ. ಕಲ್ಲಿದ್ದಲು ಕೊರತೆ, ಅಧಿಕ ಭಾರ ಎಂಬ ಕಾರಣಕ್ಕೆ ಹಲವರು ವಿದ್ಯುತ್‌ ಇಸ್ತ್ರಿಪೆಟ್ಟಿಗೆ ಬಳಸುತ್ತಿದ್ದಾರೆ. ಇದರ ನಡುವೆ ಎಲ್‌ಪಿಜಿ ಐರನ್‌ ಬಾಕ್ಸ್‌ ಬಳಕೆ ಹೆಚ್ಚಾಗುತ್ತಿದೆ. ಅನುಕೂಲಗಳೇನು?ಇದ್ದಿಲಿನಲ್ಲಿ ಒಮ್ಮೆ ಬೆಂಕಿಯ ಕೆಂಡ ಮಾಡಿಕೊಂಡರೆ 10 ಬಟ್ಟೆ ಮಾಡುವಷ್ಟರಲ್ಲಿ ಬಿಸಿ ಖಾಲಿಯಾಗುತ್ತದೆ. ಅಲ್ಲದೆ ಅದರಿಂದ ಬೂದಿ, ಹೊಗೆಯಿಂದ ಮಾಲಿನ್ಯ ಉಂಟಾಗುತ್ತದೆ. ಜತೆಗೆ ಬೆಂಕಿ ಕಿಡಿಗಳು ಹೊರ ಬಂದು ಬಟ್ಟೆಗಳು ತೂತು ಬೀಳುವ ಸಾಧ್ಯತೆಯೂ ಇದೆ. ಇತ್ತೀಚಿನ ದಿನಗಳಲ್ಲಿ ಕಲ್ಲಿದ್ದಲು ಸಮರ್ಪಕವಾಗಿ ಸಿಗದ ಕಾರಣ ಹಲವರು ವಿದ್ಯುತ್‌ ಐರನ್‌ಬಾಕ್ಸ್‌ ಬಳಸುತ್ತಿದ್ದಾರೆ. ಆದರೆ, ಕರೆಂಟ್‌ ಹೋದರೆ ಕಾಯುವುದು ಅನಿವಾರ್ಯ. ವಿದ್ಯುತ್‌ ಬಿಲ್‌ ಕೂಡ ಹೆಚ್ಚು ಬರುವುದರಿಂದ ಮಿತವ್ಯಯಕಾರಿಯಲ್ಲ. ಕಲ್ಲಿದ್ದಲು, ವಿದ್ಯುತ್‌ ಐರನ್‌ ಬಾಕ್ಸ್‌ಗೆ ಹೋಲಿಸಿದಲ್ಲಿಎಲ್‌ಪಿಜಿ ಐರನ್‌ ಬಾಕ್ಸ್‌ ಹಲವು ಅನುಕೂಲ ಹೊಂದಿದೆ. ಅಡುಗೆ ಸ್ಟೌ ಅನ್ನು ಲೈಟರ್‌ನಲ್ಲಿ ಆನ್‌ ಮಾಡಿದಂತೆ ಐರನ್‌ ಬಾಕ್ಸ್‌ ಅನ್ನು ಆನ್‌ ಮಾಡಿದರಾಯಿತು. 10-20 ಸೆಕೆಂಡ್‌ನಲ್ಲೇ ಬಿಸಿಯಾಗುತ್ತದೆ. ಯಾವ ಮಾದರಿಯ ಬಟ್ಟೆಗೆ ಎಷ್ಟು ಬಿಸಿ ಬೇಕೋ ಅಷ್ಟನ್ನು ಸೆಟ್‌ ಮಾಡಿಕೊಂಡು ಇಸ್ತ್ರಿ ಮಾಡುವ ವ್ಯವಸ್ಥೆ ಇದರಲ್ಲಿದೆ. ಮಾಲಿನ್ಯದ ಕಿರಿಕಿರಿ ಇರದು. ಸಾಮಾನ್ಯವಾಗಿ ಇದ್ದಿಲು ಬಳಸಿ ಒಂದು ಬಟ್ಟೆ ಐರನ್‌ ಮಾಡಲು 1.50 ರೂ. ಬೇಕು. ಕರೆಂಟ್‌ನ ಐರನ್‌ ಬಾಕ್ಸ್‌ ಆದರೆ ಒಂದು ಬಟ್ಟೆಗೆ ಸುಮಾರು 1.70 ರೂ. ಖರ್ಚು ಬರುತ್ತದೆ. ಅದೇ ಎಲ್‌ಪಿಜಿ ಆಧಾರಿತ ಐರನ್‌ ಬಾಕ್ಸ್‌ನಲ್ಲಿ ಒಂದು ಬಟ್ಟೆಗೆ ಕೇವಲ 70 ಪೈಸೆ ವೆಚ್ಚ ತಗಲುತ್ತದೆ. ಹೊಸದಿಲ್ಲಿ ಮೂಲದ ಕಂಪನಿಯೊಂದು ಈ ಇಸ್ತ್ರಿ ಪೆಟ್ಟಿಗೆಯನ್ನು ಮಾರುಕಟ್ಟೆಗೆ ಪರಿಚಯಿಸಿದೆ. ಉದ್ಯಮ್‌ ವ್ಯಾಪಾರ್‌ ಸ್ವಯಂ ಸೇವಾ ಸಂಸ್ಥೆಯು ಬೆಂಗಳೂರಿನಲ್ಲಿಇಸ್ತ್ರಿ ಕೆಲಸದವರಿಗೆ ಕಡಿಮೆ ಬೆಲೆಯಲ್ಲಿಎಲ್‌ಪಿಜಿ ಆಧಾರಿತ ಐರನ್‌ ಬಾಕ್ಸ್‌ಗಳನ್ನು ಒದಗಿಸುತ್ತಿದೆ. ‘ಇಸ್ತ್ರಿ ಕೆಲಸದವರು ಎಲ್‌ಪಿಜಿ ಐರನ್‌ ಬಾಕ್ಸ್‌ಗಳನ್ನು ಮೆಚ್ಚಿಕೊಂಡಿದ್ದಾರೆ. ಹಲಸೂರಿನ ಕೇಂಬ್ರಿಡ್ಜ್‌ ಲೇಔಟ್‌, ಕೋರಮಂಗಲ, ಇಂದಿರಾನಗರ ಹೀಗೆ ಕೆಲವು ಇಸ್ತ್ರಿ ಕೆಲಸದವರು ಎಲ್‌ಪಿಜಿ ಐರನ್‌ ಬಾಕ್ಸ್‌ ಗಳನ್ನು ಬಳಸುತ್ತಿದ್ದಾರೆ’ ಎಂದು ಎಲ್‌ಪಿಜಿ ಐರನ್‌ ಬಾಕ್ಸ್‌ ವಿತರಕರಾದ ಗಾಂ ಬಜಾರ್‌ನ ದೀಪಕ್‌ ಬೊಹರಾ ಹೇಳಿದರು.
from India & World News in Kannada | VK Polls https://ift.tt/FQx6aUe
