ಹೊಸದಿಲ್ಲಿ: ಯುದ್ಧ ಭೀತಿ ಎದುರಿಸುತ್ತಿರುವ ಉಕ್ರೇನ್‌ನಿಂದ ವಿಶೇಷ ವಿಮಾನವು ಮಂಗಳವಾರ 200ಕ್ಕೂ ಹೆಚ್ಚು ಭಾರತೀಯ ಪ್ರಜೆಗಳನ್ನು ಮರಳಿ ಸ್ವದೇಶಕ್ಕೆ ಕರೆತಂದಿದೆ. ಬೆಳಿಗ್ಗೆ ಹೊಸದಿಲ್ಲಿಯಿಂದ ತೆರಳಿದ್ದ ಬೋಯಿಂಗ್ 787 ವಿಮಾನವು, ಸಂಜೆ 6 ಗಂಟೆ ವೇಳೆಗೆ ಉಕ್ರೇನ್ ರಾಜಧಾನಿ ಕೀವ್‌ನಿಂದ ಹೊರಟು, ಮಧ್ಯರಾತ್ರಿ ರಾಜಧಾನಿ ತಲುಪಿತು. ಏರ್ ಇಂಡಿಯಾ ವಿಮಾನವು ಹೊಸದಿಲ್ಲಿ ವಿಮಾನ ನಿಲ್ದಾಣದಲ್ಲಿ ಇಳಿಯುತ್ತಿದ್ದಂತೆಯೇ ಪ್ರಯಾಣಿಕರು ಹರ್ಷೋದ್ಗಾರ ಮಾಡಿ, ಚಪ್ಪಾಳೆ ತಟ್ಟಿದರು. ವಿಜಯದ ಸಂಕೇತ ಪ್ರದರ್ಶಿಸಿ ಸಂಭ್ರಮಿಸಿದರು. 242 ಮಂದಿ ಪ್ರಯಾಣಿಕರು ಇದ್ದ ವಿಮಾನವು ಇಂದಿರಾ ಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬಂದು ತಲುಪಿತು. ಏರ್ ಇಂಡಿಯಾ ಗುರುವಾರ ಮತ್ತು ಶುಕ್ರವಾರ ಇನ್ನೂ ಎರಡು ರಕ್ಷಣಾ ವಿಮಾನಗಳ ಕಾರ್ಯಾಚರಣೆ ನಡೆಸಲಿದೆ ಎಂದು ವಿಮಾನಯಾನ ಸಂಸ್ಥೆ ತಿಳಿಸಿದೆ. "ಇದಕ್ಕೂ ಮುನ್ನ ಉಕ್ರೇನ್‌ಗೆ ಏರ್ ಇಂಡಿಯಾ ಯಾವುದೇ ವಾಣಿಜ್ಯ ವಿಮಾನಗಳ ಸಂಚಾರ ನಡೆಸಿರಲಿಲ್ಲ. ಆದರೆ ಉಕ್ರೇನ್‌ನಲ್ಲಿ ಸಿಲುಕಿರುವ ಭಾರತೀಯ ಪ್ರಜೆಗಳನ್ನು ರಕ್ಷಿಸಲು ಏರ್ ಇಂಡಿಯಾ ವಿಮಾನ ಹಾರಾಟ ಆರಂಭಿಸಿರುವುದು ಮಾತ್ರವಲ್ಲ, ಭಾರತದ ಇತರೆ ಕೂಡ ಉಕ್ರೇನ್‌ನಲ್ಲಿನ ಬೇಡಿಕೆಗೆ ಅನುಗುಣವಾಗಿ ತಮ್ಮ ವಿಮಾನ ಸೇವೆಗಳನ್ನು ಆರಂಭಿಸುವ ನಿರೀಕ್ಷೆ ಇದೆ" ಎಂದು ನಾಗರಿಕ ವಿಮಾನಯಾನ ಸಚಿವಾಲಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಅಂತಹ ರಕ್ಷಣಾ ವಿಮಾನಗಳ ಸಂಚಾರದ ಕಾರ್ಯಾಚರಣೆ ನಡೆಸುವ ಕುರಿತು ಸರ್ಕಾರ ಮತ್ತು ಖಾಸಗಿ ವಿಮಾನಯಾನ ಸಂಸ್ಥೆಗಳ ನಡುವೆ ಮಾತುಕತೆಗಳು ನಡೆಯುತ್ತಿವೆ. ಇದೇ ಉದ್ದೇಶಕ್ಕೆ ಅವರೂ ಕೂಡ ಶೀಘ್ರದಲ್ಲಿಯೇ ಹಾರಾಟ ನಡೆಸಲಿದ್ದಾರೆ ಎಂದು ಹೇಳಿದ್ದಾರೆ. ಏರ್ ಬಬಲ್ ಒಪ್ಪಂದದ ಅಡಿ ಭಾರತ- ಉಕ್ರೇನ್ ಮಧ್ಯೆ ಇದ್ದ ಸೀಮಿತ ವಿಮಾನಗಳ ಹಾರಾಟದ ನಿರ್ಬಂಧವನ್ನು ಕಳೆದ ವಾರ ತೆರವುಗೊಳಿಸಲಾಗಿತ್ತು. ಅಲ್ಲದೆ, ಸೀಟುಗಳ ಲಭ್ಯತೆ ಮೇಲಿನ ಮಿತಿಯನ್ನು ಕೂಡ ತೆಗೆದು ಹಾಕಲಾಗಿತ್ತು. ರಷ್ಯಾ ಜತೆಗಿನ ಉದ್ವಿಗ್ನ ಪರಿಸ್ಥಿತಿಯ ನಡುವೆ ಸಾವಿರಾರು ಭಾರತೀಯರು ಮರಳಿ ಸ್ವದೇಶಕ್ಕೆ ಬರಲು ಕಾಯುತ್ತಿದ್ದಾರೆ. ಯಾವುದೇ ಸಮಯದಲ್ಲಿ ಬೇಕಾದರೂ ಯುದ್ಧ ಆರಂಭವಾಗುವ ಭೀತಿ ಇದೆ. ಉಕ್ರೇನ್‌ನ ವಿವಿಧ ಭಾಗಗಳಲ್ಲಿ ಸುಮಾರು 20 ಸಾವಿರ ಭಾರತೀಯ ನಾಗರಿಕರು ಇದ್ದಾರೆ ಎನ್ನಲಾಗಿದೆ. ಉಕ್ರೇನ್‌ಗೆ ವಿಮಾನ ಸಂಚಾರ ಆರಂಭಿಸುವ ಆಲೋಚನೆ ಇಲ್ಲ ಎಂದು ವಿಸ್ತಾರಾ ಸಿಇಒ ವಿನೋದ್ ಕಣ್ಣನ್ ತಿಳಿಸಿದ್ದಾರೆ. ವಿಮಾನಗಳ ಮಿತಿಗಳು ಮತ್ತು ಇತರೆ ಕಾರಣಗಳಿಂದಾಗಿ ಉಕ್ರೇನ್‌ಗೆ ವಿಮಾನ ಹಾರಾಟದ ಆಲೋಚನೆ ಮಾಡಿಲ್ಲ ಎಂದು ಅವರು ಹೇಳಿದ್ದಾರೆ.
from India & World News in Kannada | VK Polls https://ift.tt/L6U0dGH
