ಬೆಂಗಳೂರು: ಸಂಘಟಿತ ಪ್ರದರ್ಶನ ನೀಡಿದ ಮಾಜಿ ಚಾಂಪಿಯನ್ಸ್‌ ತಂಡ 8ನೇ ಆವೃತ್ತಿಯ ಟೂರ್ನಿಯಲ್ಲಿ ಸೆಮಿಫೈನಲ್ಸ್‌ ತಲುಪಲು ಯಶಸ್ವಿಯಾಗಿದೆ. ಇಲ್ಲಿನ ಶೆರ್ಟಾನ್‌ ಗ್ರ್ಯಾಂಡ್‌ ಹೋಟೆಲ್‌ನಲ್ಲಿ ಸೋಮವಾರ ನಡೆದ ಎರಡನೇ ಎಲಿಮಿನೇಟರ್‌ ಪಂದ್ಯದಲ್ಲಿ ಅಬ್ಬರಿಸಿದ ಬೆಂಗಳೂರು ಬುಲ್ಸ್ ತಂಡ 49-29 ಅಂಕಗಳಿಂದ ಅಪಾಯಕಾರಿ ತಂಡವನ್ನು ಬಗ್ಗುಬಡಿಯಿತು. ಈ ಮೂಲಕ ಫೆ.23ರಂದು ನಡೆಯಲಿರುವ ದಬಾಂಗ್ ಡೆಲ್ಲಿ ವಿರುದ್ಧದ ಸೆಮಿಫೈನಲ್ಸ್‌ ಪಂದ್ಯಕ್ಕೆ ಬುಲ್ಸ್ ಮುಂದಾಗಿದೆ. ಬುಲ್ಸ್ ನಾಯಕ ಹಾಗೂ ಸ್ಟಾರ್‌ ರೇಡರ್‌ ಪವನ್‌ ಕುಮಾರ್‌ ಸೆಹ್ರಾವತ್‌ ಮತ್ತೊಮ್ಮೆ ಭರ್ಜರಿ ಆಟ ತಂದು ಒಟ್ಟು 13 ಅಂಕಗಳನ್ನು ಕಲೆಹಾಕಿದರು. ಅವರಿಗೆ ಉತ್ತಮ ಸಾಥ್‌ ಕೊಟ್ಟ ಡಿಫೆಂಡರ್‌ ಮಹೇಂದರ್ 5 ಅಂಕಗಳನ್ನು ಹೆಕ್ಕಿಕೊಟ್ಟರು. ಪರಿಣಾಮ ಎಲ್ಲಾ ವಿಭಾಗದಲ್ಲೂ ಗುಜರಾತ್‌ ಜಯಂಟ್ಸ್‌ ಸವಾಲನ್ನು ಮೆಟ್ಟನಿಂತ ಬೆಂಗಳೂರು ಬುಲ್ಸ್ ಪರ, ರೇಡರ್‌ಗಳಾದ ಭರತ್ ಮತ್ತು ಚಂದ್ರನ್‌ ರಂಜಿತ್‌ ಕೂಡ ಗಣನೀಯ ಕೊಡುಗೆ ಸಲ್ಲಿಸಿದರು. ಗುಜರಾತ್‌ ತಂಡ ಎಂದಿನಂತೆ ತನ್ನ ಡಿಫೆನ್ಸ್‌ನಲ್ಲಿ ದುರ್ಬಲವಾಗಿ ಕಂಡುಬಂದಿತು. ಇದರ ಪರಿಣಾಮ ಆರಂಭದಲ್ಲೇ ಭಾರಿ ಹಿನ್ನಡೆಗೆ ಒಳಗಾಗಿಯಿತು. ಹೀಗಾಗಿ ಎಷ್ಟೇ ಪ್ರಯತ್ನ ನಡೆಸಿದರೂ ಅಂತರ ತಗ್ಗಿಸಿ ಸೋಲು ತಪ್ಪಿಸಿಕೊಳ್ಳಲು ಜಯಂಟ್ಸ್‌ಗೆ ಸಾಧ್ಯವಾಗಲೇ ಇಲ್ಲ. ರೇಡರ್‌ ರಾಕೇಶ್ (8) ಮತ್ತು ಮಹೇಂದ್ರ (5) ಮಾತ್ರ ಕೊಂಚ ಹೋರಾಟ ಪ್ರದರ್ಶಿಸಿದರು. ಆರಂಭದಿಂದಲೇ ಅಬ್ಬರಿಸಿದ ಬುಲ್ಸ್‌ಜಯಂಟ್ಸ್‌ ತಂಡದ ದುರ್ಬಲ ಡಿಫೆನ್ಸ್‌ನ ಲಾಭ ತೆಗೆದುಕೊಂಡ ಬೆಂಗಳೂರು ಬುಲ್ಸ್ ಆರಂಭದಲ್ಲೇ ಭಾರಿ ಮುನ್ನಡೆಗಳಿಸುವಲ್ಲಿ ಯಶಸ್ವಿಯಾಯಿತು. ತಂಡದ ಬ್ಯಾಕಪ್‌ ರೇಡರ್‌ ಚಂದ್ರನ್‌ ರಂಜಿತ್‌ ತಂಡಕ್ಕೆ ಉತ್ತಮ ಆರಂಭ ಒದಗಿಸಿಕೊಟ್ಟರು. ಪವನ್‌ ಕುಮಾರ್‌ ಮತ್ತು ಚಂದ್ರನ್‌ ನಡೆಸಿದ ಭರ್ಜರಿ ದಾಳಿಗಳ ಬಲದಿಂದ 14ನೇ ನಿಮಿಷದಲ್ಲಿ ಜಯಂಟ್ಸ್‌ ತಂಡವನ್ನು ಬುಲ್ಸ್ ಆಲ್‌ಔಟ್‌ ಮಾಡುವಲ್ಲಿ ಸಫಲವಾಯಿತು. ಇದರಿಂದ ಬುಲ್ಸ್ ಬಳಗಕ್ಕೆ ಬರೋಬ್ಬರಿ 9 ಅಂಕಗಳ ಭಾರಿ ಮುನ್ನಡೆ ಲಭ್ಯವಾಯಿತು. ಆದರೆ, ಜಯಂಟ್ಸ್‌ ಉತ್ತಮ ಕಮ್‌ಬ್ಯಾಕ್‌ ಮಾಡಿತು. ರಾಕೇಶ್ ಮತ್ತು ಪ್ರದೀಪ್ ಕುಮಾರ್‌ ನಡೆಸಿದ ದಾಳಿಗಳ ಬಲದಿಂದ ಸತತ ಅಂಕಗಳನ್ನು ಹೆಕ್ಕಿ ಹಿನ್ನಡೆಯನ್ನು ಕೇವಲ 2 ಅಂಕಗಳಿಗೆ ತಂದಿಳಿಸಿತು. ಆದರೆ, ಬುಲ್ಸ್ ಡಿಫೆಂಡರ್‌ ಮೊದಲಾರ್ಧದ ಅಂತ್ಯಕ್ಕೆ ಇನ್ನು ಕೆಲವೇ ಕ್ಷಣಗಳು ಬಾಕಿ ಇರುವಾಗ ಸೂಪರ್‌ ಟ್ಯಾಕಲ್‌ ತಂದ ಪರಿಣಾಮ ಬುಲ್ಸ್ 24-17ರ ಅಂತರದ ಮುನ್ನಡೆ ಗಿಟ್ಟಿಸಿತು. ಮೊದಲಾರ್ಧದಲ್ಲಿ ಗುಜರಾತ್‌ ಕೇವಲ ಒಂದು ಟ್ಯಾಕಲ್‌ ಅಂಕ ಮಾತ್ರವೇ ಗಳಿಸಲು ಶಕ್ತವಾಯಿತು. ದ್ವಿತೀಯಾರ್ಧದ ಆರಂಭದಲ್ಲೂ ಮಹೇಂದರ್ ಅವರ ಸೂಪರ್‌ ಟ್ಯಾಕಲ್‌ ನೆರವಿನಿಂದ ಬುಲ್ಸ್ ಆಳ್‌ಔಟ್‌ ಆಘಾತದಿಂದ ಪಾರಾಯಿತು. ಮಹೇಂದರ್ 5 ಅಂಕಗಳನ್ನು ಟ್ಯಾಕಲ್‌ ಮೂಲಕ ತಂದರೆ, ಬ್ಯಾಕಪ್‌ ರೇಡರ್‌ ಭರತ್ ಸೂಪರ್‌ ರೇಡ್‌ ಮೂಲಕ 4 ಅಂಕಗಳ ಕೊಡುಗೆ ಕೊಟ್ಟರು. ಆದರೂ, ದ್ವಿಯಾರ್ಧ ಆರಂಭವಾದ 6 ನಿಮಿಷಗಳ ಬಳಿಕ ಬುಲ್ಸ್ ಮೊದಲ ಬಾರಿ ಆಲ್‌ಔಟ್‌ ಆಘಾತಕ್ಕೊಳಗಾಯಿತು. ನಂತರ ಪವನ್‌ ಕುಮಾರ್‌ ದಾಳಿಯ ಬಲದಿಂದ ಚೇತರಿಸಿದ ಬುಲ್ಸ್ ಮುನ್ನಡೆಯನ್ನು 35-21ಕ್ಕೆ ಹಿಗ್ಗಿಸಿಕೊಂಡಿತು. ಪಂದ್ಯ ಮುಗಿಯಲು ಇನ್ನು 3 ನಿಮಿಷ ಬಾಕಿ ಇರುವಾಗ ಜಯಂಟ್ಸ್‌ ತಂಡವನ್ನು 2ನೇ ಬಾರಿ ಆಲ್‌ಔಟ್‌ ಮಾಡಿದ ಬುಲ್ಸ್ 20 ಅಂಕಗಳ ಅಂತರದ ಭರ್ಜರಿ ಜಯ ತನ್ನದಾಗಿಸಿಕೊಂಡಿತು. ಸೆಮಿಫೈನಲ್ಸ್‌ ವಿವರಫೆ.23 ರಂದು ಮೊದಲ ಸೆಮಿಫೈನಲ್ (ರಾತ್ರಿ 7:30ಕ್ಕೆ) ಪಟನಾ ಪೈರೇಟ್ಸ್‌ vs ಯು.ಪಿ ಯೋಧಾ ಫೆ.23 ರಂದು ಎರಡನೇ ಸೆಮಿಫೈನಲ್ (ರಾತ್ರಿ 8:30ಕ್ಕೆ) ದಬಾಂಗ್ ಡೆಲ್ಲಿ vs ಬೆಂಗಳೂರು ಬುಲ್ಸ್ ಪಂದ್ಯಗಳು ಸ್ಟಾರ್‌ ಸ್ಪೋರ್ಟ್ಸ್‌ ಮತ್ತು ಹಾಟ್‌ಸ್ಟಾರ್‌ನಲ್ಲಿ ನೇರ ಪ್ರಸಾರವಾಗಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/iPrIz4y
