ಚಂಡೀಗಢ / ಲಖನೌ: ಪಂಜಾಬ್‌ ವಿಧಾನಸಭೆಯ ಎಲ್ಲ 117 ಕ್ಷೇತ್ರಗಳು ಹಾಗೂ ವಿಧಾನಸಭೆಗೆ ಭಾನುವಾರ ನಡೆದ ಮೂರನೇ ಹಂತದ ಶಾಂತಿಯುತವಾಗಿ ನಡೆದಿದೆ. ಪ್ರಾಥಮಿಕ ವರದಿಗಳ ಪ್ರಕಾರ ಪಂಜಾಬ್‌ನಲ್ಲಿ ಶೇ.64.27 ಹಾಗೂ ಉತ್ತರ ಪ್ರದೇಶದಲ್ಲಿ ಶೇ.60.08ರಷ್ಟು ಮತದಾನವಾಗಿದೆ. ಉತ್ತರ ಪ್ರದೇಶದ 59 ಕ್ಷೇತ್ರಗಳು ಸೇರಿದಂತೆ ಎರಡೂ ರಾಜ್ಯಗಳಲ್ಲಿ ಯಾವುದೇ ಅಹಿತಕರ ಘಟನೆಗಳು ವರದಿಯಾಗಿಲ್ಲ. ಕೆಲವೆಡೆ ವಿದ್ಯುನ್ಮಾನ ಮತಯಂತ್ರದಲ್ಲಿ ಸಣ್ಣ ಪುಟ್ಟ ತಾಂತ್ರಿಕ ಸಮಸ್ಯೆಗಳು ಕಂಡು ಬಂದವು. ಪ್ರತಿಪಕ್ಷಗಳು, 'ಬಿಜೆಪಿಯು ಮತಯಂತ್ರಗಳನ್ನು ದುರ್ಬಳಕೆ ಮಡಿಕೊಂಡಿದೆ' ಎಂದು ಆರೋಪಿಸಿವೆ. ಸಿಧು, ಮಜಿಥಿಯಾ ಭೇಟಿ: ಅಮೃತಸರ ಪೂರ್ವ ಕ್ಷೇತ್ರದಲ್ಲಿ ಸ್ಪರ್ಧಿಸಿರುವ ಪಂಜಾಬ್‌ ಪ್ರದೇಶ ಕಾಂಗ್ರೆಸ್‌ ಸಮಿತಿ ಅಧ್ಯಕ್ಷ ನವಜೋತ್‌ ಸಿಂಗ್‌ ಸಿಧು ಹಾಗೂ ಶಿರೋಮಣಿ ಅಕಾಲಿ ದಳ (ಎಸ್‌ಎಡಿ) ವಿಕ್ರಮ್‌ ಸಿಂಗ್‌ ಮಜಿಥಿಯಾ ಅವರು ಭಾನುವಾರ ಮತಗಟ್ಟೆಯಲ್ಲಿ ಭೇಟಿಯಾಗಿದ್ದು, ಕೆಲ ಹೊತ್ತು ಉಭಯ ಕುಶಲೋಪರಿ ನಡೆಸಿದರು. ಚುನಾವಣೆಗೂ ಮುನ್ನ ಉಭಯ ನಾಯಕರು ಪರಸ್ಪರ ವಾಗ್ದಾಳಿ ನಡೆಸಿದ್ದರೂ ಭೇಟಿ ವೇಳೆ ನಗುನಗುತ್ತಾ ಕುಶಲೋಪರಿ ನಡೆಸಿದರು. ನಗರದ ವರ್ಕಾ ಪ್ರದೇಶದಲ್ಲಿ ಮತದಾನ ಮಾಡಲು ತೆರಳಿದ್ದಾಗ ಇಬ್ಬರು ನಾಯಕರು ಭೇಟಿಯಾದರು. ಕಾನ್ಪುರ ಮೇಯರ್‌ ವಿರುದ್ಧ ಪ್ರಕರಣ ಮತಗಟ್ಟೆಯಲ್ಲಿ ಸೆಲ್ಫಿ ತೆಗೆದುಕೊಂಡ ಹಿನ್ನೆಲೆಯಲ್ಲಿ ನಾಯಕಿ, ಉತ್ತರ ಪ್ರದೇಶದ ಕಾನ್ಪುರ ಮೇಯರ್‌ ಪ್ರಮೀಳಾ ಪಾಂಡೆ ವಿರುದ್ಧ ಪ್ರಕರಣ ದಾಖಲಾಗಿದೆ. ಮೂರನೇ ಹಂತದ ಮತದಾನದ ಹಿನ್ನೆಲೆಯಲ್ಲಿ ಹಡ್ಸನ್‌ ಶಾಲೆಗೆ ತೆರಳಿದ ಅವರು ಮತಗಟ್ಟೆಯಲ್ಲಿ ಸೆಲ್ಫಿ ತೆಗೆದುಕೊಂಡಿದ್ದು, ಈ ಕುರಿತ ವಿಡಿಯೋ ವೈರಲ್‌ ಆದ ಬಳಿಕ ಪ್ರಕರಣ ದಾಖಲಿಸಲಾಗಿದೆ. ಬಿಜೆಪಿಯ ಮತ್ತೊಬ್ಬ ನಾಯಕ ನವಾಬ್‌ ಸಿಂಗ್‌ ಸಹ ಮತಗಟ್ಟೆಯಲ್ಲಿ ವಿಡಿಯೋ ಮಾಡಿದ್ದಾರೆ ಎಂಬ ಆರೋಪ ಕೇಳಿ ಬಂದಿದ್ದು, ಅವರ ವಿರುದ್ಧವೂ ಕ್ರಮ ತಗೆದುಕೊಳ್ಳಲಾಗುತ್ತಿದೆ ಎಂದು ತಿಳಿದುಬಂದಿದೆ. ಸೋನು ಸೂದ್‌ ವಾಹನ ಜಪ್ತಿ ಮತದಾರರ ಮೇಲೆ ಪ್ರಭಾವ ಸೇರಿ ಹಲವು ಶಂಕಾಸ್ಪದ ಚಟುವಟಿಕೆಗಳಲ್ಲಿ ತೊಡಗಿದ ಆರೋಪದಲ್ಲಿ ನಟ, ಸಾಮಾಜಿಕ ಕಾರ್ಯಕರ್ತ ಸೋನು ಸೂದ್‌ ಅವರ ವಾಹನವನ್ನು ಮತಗಟ್ಟೆ ಪ್ರವೇಶಿಸುವುದರಿಂದ ತಡೆದಿದ್ದಲ್ಲದೆ, ಅವರ ಕಾರನ್ನು ಪೊಲೀಸರು ಜಪ್ತಿ ಮಾಡಿದ್ದಾರೆ. ಸೋನು ಸೂದ್‌ ಅವರ ಸಹೋದರಿ ಮಾಳವಿಕಾ ಸೂದ್‌ ಸಾಚರ್‌, ಮೋಗಾ ಕ್ಷೇತ್ರದಿಂದ ಕಾಂಗ್ರೆಸ್‌ ಅಭ್ಯರ್ಥಿಯಾಗಿ ಕಣಕ್ಕಿಳಿದಿದ್ದು, ಹಲವು ದಿನಗಳಿಂದ ಸೋನು ಸೂದ್‌ ಪ್ರಚಾರ ನಡೆಸಿದ್ದಾರೆ. ಆದರೆ, ಇವರು ಶಂಕಾಸ್ಪದ ಚಟುವಟಿಕೆಯಲ್ಲಿ ಭಾಗಿಯಾಗಿದ್ದಾರೆ ಎಂದು ಶಿರೋಮಣಿ ಅಕಾಲಿ ದಳ ಅಭ್ಯರ್ಥಿ ಬರ್ಜಿಂದರ್‌ ಸಿಂಗ್‌ ಅವರ ಬೆಂಬಲಿಗರೊಬ್ಬರು ದೂರು ನೀಡಿದ ಹಿನ್ನೆಲೆಯಲ್ಲಿ ಪೊಲೀಸರು ಕ್ರಮ ತೆಗೆದುಕೊಂಡಿದ್ದಾರೆ. 'ಸೋನು ಸೂದ್‌ ಅವರು ಮತಗಟ್ಟೆ ಪ್ರವೇಶಿಸಲು ಯತ್ನಿಸಿದ ಹಿನ್ನೆಲೆಯಲ್ಲಿ ಅವರನ್ನು ತಡೆದು, ಕಾರು ಜಪ್ತಿ ಮಾಡಿ ಮನೆಗೆ ಕಳುಹಿಸಲಾಗಿದೆ. ಹಾಗೆಯೇ, ಅವರು ಮನೆಯಿಂದ ಹೊರಬರದಂತೆ ಸೂಚಿಸಲಾಗಿದೆ' ಎಂದು ಮೋಗಾ ಜಿಲ್ಲೆ ಸಾರ್ವಜನಿಕ ಸಂಪರ್ಕಾಧಿಕಾರಿ (ಪಿಆರ್‌ಒ) ಪ್ರದೀಪ್‌ ಸಿಂಗ್‌ ತಿಳಿಸಿದ್ದಾರೆ. ಆದರೆ, ಆರೋಪ ನಿರಾಕರಿಸಿರುವ ಸೋನು, 'ನಾನು ಸ್ಥಳೀಯ ನಿವಾಸಿಯಾಗಿದ್ದು, ಯಾವ ಅಭ್ಯರ್ಥಿ ಅಥವಾ ಯಾವುದೇ ಪಕ್ಷದ ಪರ ಮತ ಚಲಾಯಿಸಿ ಎಂದು ಹೇಳಿಲ್ಲ' ಎಂದಿದ್ದಾರೆ. ಮತದಾನ ಮಾಡಿದ ಸಯಾಮಿ ಅವಳಿ ಸಯಾಮಿ ಅವಳಿಗಳಾದ ಸೋಹನ್‌ ಸಿಂಗ್‌ ಹಾಗೂ ಮೋಹನ್‌ ಸಿಂಗ್‌ ಅವರು ಪಂಜಾಬ್‌ನಲ್ಲಿ ಇದೇ ಮೊದಲ ಬಾರಿಗೆ ಮತ ಚಲಾಯಿಸಿದ್ದಾರೆ. ಅಮೃತಸರದ ಪಿಂಗಾಲ್ವರ ನಿವಾಸಿಗಳಾದ ಇವರಿಗೆ ಇತ್ತೀಚೆಗೆ ಬೇರೆ ಬೇರೆ ಚುನಾವಣೆ ಗುರುತಿನ ಚೀಟಿ ನೀಡಲಾಗಿತ್ತು. ಅದರಂತೆ ಅವರು ಮತಗಟ್ಟೆಗೆ ತೆರಳಿ ಇಬ್ಬರೂ ಬೇರೆ ಬೇರೆ ಮತ ಚಲಾಯಿಸಿದ್ದಾರೆ. ಅಲ್ಲದೆ, ಯಾರು ಯಾರಿಗೆ ಮತ ನೀಡಿದರು ಎಂಬುದು ಗೊತ್ತಾಗದಂತೆ ಆಯೋಗವು ವ್ಯವಸ್ಥೆ ಸಹ ಮಾಡಿತ್ತು.
from India & World News in Kannada | VK Polls https://ift.tt/UjSa7vu
