ಬೆಂಗಳೂರು: ಐಟಿ, ಬಿಟಿ ಇನ್ನಿತರ ಉನ್ನತ ಶಿಕ್ಷಣ ಪಡೆದು ವಿದೇಶಕ್ಕೆ ವಲಸೆ ಹೋದವರನ್ನು ವಾಪಸ್‌ ಕರೆತಂದು ಅಂಥವರ ಕೌಶಲ ಬಳಸಿಕೊಳ್ಳುವ ಸಂಬಂಧ 'ಮರಳಿ ತಾಯ್ನಾಡಿಗೆ' ಯೋಜನೆ ಜಾರಿಗೊಳಿಸಲು ರಾಜ್ಯ ಸರಕಾರ ನಿರ್ಧರಿಸಿದೆ. ರಾಜ್ಯಪಾಲರ ಭಾಷಣದಲ್ಲಿ ಈ ಬಗ್ಗೆ ಉಲ್ಲೇಖಿಸಲಾಗಿದೆ. ವಿದೇಶದಲ್ಲಿರುವ ಭಾರತೀಯ ಸಂಜಾತ ಯುವಕರನ್ನು ಇಲ್ಲಿಗೆ ಕರೆಸಿ ಅವರ ಜ್ಞಾನದ ಪ್ರಯೋಜನ ಪಡೆದುಕೊಳ್ಳುವುದೇ ಈ ಯೋಜನೆ ಉದ್ದೇಶ ಎಂದು ಜಂಟಿ ಸದನ ಉದ್ದೇಶಿಸಿ ಭಾಷಣ ಮಾಡಿದ ರಾಜ್ಯಪಾಲ ಥಾವರ್‌ಚಂದ್‌ ಗೆಹ್ಲೋಟ್‌ ವ್ಯಾಖ್ಯಾನಿಸಿದರು. ಸಂಪ್ರದಾಯದಂತೆ ರಾಜ್ಯಪಾಲ ಗೆಹ್ಲೋಟ್‌ ಅವರು ವರ್ಷದ ಮೊದಲ ಅಧಿವೇಶನದ ಪ್ರಾರಂಭದ ದಿನವಾದ ಸೋಮವಾರ ವಿಧಾನಮಂಡಲದ ಉಭಯ ಸದನಗಳ ಸದಸ್ಯರನ್ನು ಉದ್ದೇಶಿಸಿ ಲಿಖಿತ ಭಾಷಣ ವಾಚಿಸಿದರು. ಕನ್ನಡದಲ್ಲೆ ಮಾತು ಪ್ರಾರಂಭಿಸಿ 'ಎಲ್ಲರಿಗೂ ನಮಸ್ಕಾರ' ಎಂದು ಹೇಳಿದ ಅವರು, ನಂತರ ಹಿಂದಿಯಲ್ಲಿ ಭಾಷಣ ಮುಂದುವರಿಸಿದರು. ಸಾಮಾನ್ಯವಾಗಿ ಸರಕಾರ ತನ್ನ ಸಾಧನೆಯನ್ನು ರಾಜ್ಯಪಾಲರ ಭಾಷಣದ ಮೂಲಕ ಬಿಂಬಿಸುವುದು ರೂಢಿ. ಈ ಸಂದರ್ಭದಲ್ಲಿ ಹೊಸ ಯೋಜನೆಗಳ ಬಗ್ಗೆ ಪ್ರಸ್ತಾಪವಾಗುವುದು ವಿರಳ. ಆದರೆ 'ಮರಳಿ ತಾಯ್ನಾಡಿಗೆ' ಎಂಬ ಹೊಸ ಯೋಜನೆ ಬಗ್ಗೆ ಪ್ರಕಟಿಸಿರುವುದು ಅಪರೂಪದ ನಿದರ್ಶನವಾಗಿದೆ. ತಡೆಯಲು ಈ ಕಾರ್ಯಕ್ರಮ ಸಹಕಾರಿಯಾಗುವ ನಿರೀಕ್ಷೆಯಿದೆ. ''ವಿದೇಶದಲ್ಲಿರುವ ಭಾರತೀಯರ ಜ್ಞಾನವನ್ನು ಬಳಕೆ ಮಾಡಿಕೊಳ್ಳುವ ಯೋಜನೆ ಇದಾಗಿದೆ. ಇದಕ್ಕೆ ಸೂಕ್ತ ನೀತಿ ರೂಪಿಸಿ ಅನುದಾನ ಒದಗಿಸಲಾಗುವುದು,'' ಎಂದು ರಾಜ್ಯಪಾಲರಾದ ಬಳಿಕ ರಾಜ್ಯ ವಿಧಾನಮಂಡಲದಲ್ಲಿ ಮೊದಲ ಬಾರಿಗೆ ಭಾಷಣ ಮಾಡಿದ ಥಾವರ್‌ಚಂದ್‌ ಗೆಹ್ಲೋಟ್‌ ಹೇಳಿದರು. ಹೆಚ್ಚುವರಿ ಅಕ್ಕಿ ಪಡಿತರ ವ್ಯವಸ್ಥೆಯಡಿ ಫಲಾನುಭವಿಗಳಿಗೆ ಸದ್ಯಕ್ಕೆ ಉಚಿತವಾಗಿ 5 ಕೆ.ಜಿ ಅಕ್ಕಿ ನೀಡಲಾಗುತ್ತಿದೆ. ಇದನ್ನು 6 ಕೆ.ಜಿ.ಗೆ ಹೆಚ್ಚಿಸುವ ಭರವಸೆಯನ್ನು ರಾಜ್ಯಪಾಲರು ನೀಡಿದರು. ಪಡಿತರ ವ್ಯವಸ್ಥೆಯಲ್ಲಿ ಈಗಿರುವ ಧಾನ್ಯದ ಜತೆ ಹೆಚ್ಚುವರಿ 1 ಕೆ.ಜಿ. ಅಕ್ಕಿ ವಿತರಿಸಲು ಆದೇಶಿಸಲಾಗಿದೆ. ಏ.1 ರಿಂದ ಯೋಜನೆ ಜಾರಿಗೊಳ್ಳಲಿದೆ ಎಂದು ಅವರು ತಿಳಿಸಿದರು. ಕೋವಿಡ್‌ ನಿರ್ವಹಣೆ ಪ್ರಶಂಸೆ ''ಕೋವಿಡ್‌ ಸಂದರ್ಭದಲ್ಲಿ ನಾಗರಿಕರ, ಅದರಲ್ಲೂ ಮಕ್ಕಳ ಯೋಗಕ್ಷೇಮಕ್ಕೆ ಒತ್ತು ನೀಡಲಾಗಿದೆ. 'ಆರೋಗ್ಯ ನಂದನ' ಅಭಿಯಾನ ಮೂಲಕ 70 ಲಕ್ಷ ಹೆಚ್ಚು ಮಕ್ಕಳಿಗೆ ಉಚಿತ ಆರೋಗ್ಯ ತಪಾಸಣೆ ನಡೆಸಲಾಗಿದೆ,'' ಎಂದು ಸರಕಾರದ ಸಾಧನೆ ಬಗ್ಗೆ ರಾಜ್ಯಪಾಲರು ಪ್ರಶಂಸಿಸಿದರು. ''ಕೋವಿಡ್‌ ನಿಯಂತ್ರಣಕ್ಕೆ ಟೆಸ್ಟಿಂಗ್‌, ಟ್ರೇಸಿಂಗ್‌, ಟ್ರ್ಯಾಕಿಂಗ್‌, ಟ್ರಿಟ್‌ಮೆಂಟ್‌ ಮತ್ತು ಟೆಕ್ನಾಲಜಿ (5 ಟಿ) ಬಳಸಿಕೊಳ್ಳಲಾಗುತ್ತಿದೆ. ರಾಜ್ಯ ಸರಕಾರದ ಸಾಧನೆ ಗುತಿಸಿರುವ ಕೇಂದ್ರ ಸರಕಾರ ಇ-ಆಡಳಿತ ಪ್ರಶಸ್ತಿ ನೀಡಿ ಗೌರವಿಸಿದೆ. ರಾಜ್ಯದಲ್ಲಿ6000 ಲಸಿಕಾ ಕೇಂದ್ರಗಳು ಕಾರ್ಯ ನಿರ್ವಹಿಸುತ್ತಿದ್ದು, ಶೇ.100 ಜನರಿಗೆ ಮೊದಲ ಲಸಿಕೆ, ಶೇ.85 ಜನರಿಗೆ ಎರಡನೇ ಲಸಿಕೆ ನೀಡಲಾಗಿದೆ. ಜಿಲ್ಲಾ ಮತ್ತು ತಾಲೂಕು ಆಸ್ಪತ್ರೆಗಳಲ್ಲಿ ವೆಂಟಿಲೇಟರ್‌ ಬೆಡ್‌ಗಳ ಸೌಲಭ್ಯವಿದೆ. 1,200 ಮೆಟ್ರಿಕ್‌ ಟನ್‌ ವೈದ್ಯಕೀಯ ಆಮ್ಲಜನಕ ಉತ್ಪಾದನೆ ವೃದ್ಧಿಗೊಳಿಸಲಾಗಿದೆ. 2.50 ಲಕ್ಷ ಹೋಮ್‌ ಐಸೋಲೇಷನ್‌ ಕಿಟ್‌ ವಿತರಿಸಲಾಗಿದೆ. 2021-22ನೇ ಸಾಲಿಗೆ ಬಿಬಿಎಂಪಿಗೆ 300 ಕೋಟಿ, ಜಿಲ್ಲಾಧಿಕಾರಿಗಳಿಗೆ 512, ಒಳಾಡಳಿತ ಇಲಾಖೆಗೆ 10 ಕೋಟಿ ನೀಡಲಾಗಿದೆ. ಕೋವಿಡ್‌ ಸೋಂಕಿನಿಂದ ಮೃತರ ಕುಟುಂಬಕ್ಕೆ ಪರಿಹಾರ ನೀಡಲು ಒಟ್ಟಾರೆ 280 ಕೋಟಿ ರೂ. ಬಿಡುಗಡೆ ಮಾಡಲಾಗಿದೆ,'' ಎಂದು ರಾಜ್ಯಪಾಲರು ವಿವರಿಸಿದರು. 2024ರೊಳಗೆ ನಲ್ಲಿ ಸಂಪರ್ಕ 2024ರೊಳಗೆ 17.45 ಲಕ್ಷ ಮನೆಗಳಿಗೆ ನಲ್ಲಿ ಸಂಪರ್ಕ ಕಲ್ಪಿಸಿ ನೀರು ಪೂರೈಸಲಾಗುವುದು. ಅಮೃತ ಗ್ರಾಮ ಪಂಚಾಯಿತಿ ಯೋಜನೆಯಡಿ 750 ಗ್ರಾಮಗಳನ್ನು ಗುರುತಿಸಿ ತಲಾ 25 ಲಕ್ಷ ಪ್ರೋತ್ಸಾಹಧನ ನೀಡಲು 187.50 ಕೋಟಿ ರೂ. ನಿಗದಿಗೊಳಿಸಲಾಗಿದೆ. ಕಂದಾಯ ಇಲಾಖೆಯ ಎಲ್ಲ ಸೇವೆಗಳನ್ನು ಗಣಕೀಕೃತಗೊಳಿಸಲಾಗುತ್ತಿದೆ. 14 ಜಿಲ್ಲೆಗಳಲ್ಲಿ ಸ್ವಾಮಿತ್ವ ಯೋಜನೆ ಮೂಲಕ ಗ್ರಾಮೀಣ ನಿವಾಸಿಗರ ವಾಸಸ್ಥಳದ ಆಸ್ತಿಗೆ ಆಸ್ತಿಪತ್ರ ವಿತರಿಸಲಾಗುತ್ತಿದೆ. ನೆರೆ ಹಾವಳಿಯಿಂದ ಹಾನೀಗಿಡಾದ ಪ್ರತಿ ಕುಟುಂಬಕ್ಕೆ ನಿಗದಿತ ಮೊತ್ತಕ್ಕಿಂತ 6200 ರೂ. ಹೆಚ್ಚುವರಿ ಪರಿಹಾರ ನೀಡಲಾಗಿದೆ ಎಂದು ರಾಜ್ಯಪಾಲರು ತಿಳಿಸಿದರು. ಸರಕಾರದ ಸಾಧನೆ, ರಾಜ್ಯಪಾಲರು ಹೇಳಿದ್ದೇನು? - ರಾಯಚೂರು, ಯಾದಗಿರಿ ಜಿಲ್ಲೆಗಳಿಗೆ ನೀತಿ ಆಯೋಗದಿಂದ ತಲಾ 3 ಕೋಟಿ. - ದೇಶದ ಜಿಡಿಪಿಗೆ ರಾಜ್ಯದ ಶೇ. 3.53ರಷ್ಟು ಕೊಡುಗೆ. - 5571 ಗ್ರಾ.ಪಂಗಳಿಗೆ ಘನತಾಜ್ಯ ನಿರ್ವಹಣೆಯ ವಿಸ್ತೃತ ಯೋಜನೆಗೆ ಅನುಮೋದನೆ. - 3.15 ಲಕ್ಷ ಅನರ್ಹ ಫಲಾನುಭವಿಗಳನ್ನು ಗುರುತಿಸಿ ಸರಕಾರಕ್ಕೆ 378 ಕೋಟಿ ಉಳಿತಾಯ ಮಾಡಲಾಗಿದೆ. - ನೆರೆ, ಮಳೆಯಿಂದ ಮನೆ ಹಾನಿಗೆ 400 ಕೋಟಿ ರೂ. ಆರ್ಥಿಕ ನೆರವು. - ಬಿಸಿಯೂಟ, ಕ್ಷೀರಭಾಗ್ಯ ಯೋಜನೆಗೆ 1469 ಕೋಟಿ ರೂ. ಅನುದಾನ. - ಎರಡನೇ ಅಲೆ ಸಂದರ್ಭದಲ್ಲಿ ಕಾರ್ಮಿಕರಿಗೆ ತಲಾ 2 ಸಾವಿರ ರೂ. ಪ್ರೋತ್ಸಾಹಧನ. ಒಟ್ಟು 237.89 ಕೋಟಿ ಅನುದಾನ. - ಬರಪೀಡಿತ 100 ತಾಲೂಕುಗಳ 54658 ಲಕ್ಷ ಹೆಕ್ಟೇರ್‌ ಪ್ರದೇಶವನ್ನು ಸಮಗ್ರ ಜಲಾನಯನ ಪ್ರದೇಶಕ್ಕೆ ಒಳಪಡಿಸಲಾಗಿದೆ. - ರೈತರ ಉತ್ಪನ್ನ ಸಾಗಾಣಿಕೆಗಾಗಿ 'ಕಿಸಾನ್‌ ರೈಲ್‌' ಕಾರ್ಯಕ್ರಮಕ್ಕೆ ಚಾಲನೆ. - ಕೃಷ್ಣಾ ಮೇಲ್ದಂಡೆ 3ನೇ ಹಂತದ ಯೋಜನೆಯಲ್ಲಿ ಮುಳುಗಡೆಯಾದ 20 ಗ್ರಾಮಗಳ ಪುನರ್ವಸತಿಗೆ 2500 ಕೋಟಿ ರೂ.
from India & World News in Kannada | VK Polls https://ift.tt/ObEF9Aw
