ವಾಷಿಂಗ್ಟನ್‌: ಉಕ್ರೇನ್‌ ಗಡಿಯಿಂದ ಭಾಗಶಃ ಸೇನಾಪಡೆಗಳನ್ನು ಸರಕಾರವು ಹಿಂಪಡೆಯುತ್ತಿದೆ ಎಂಬ ಸಮಾಧಾನಕರ ಸಂಗತಿಯ ನಡುವೆಯೇ ಅಮೆರಿಕ ಅಧ್ಯಕ್ಷ ಅವರು ಎಚ್ಚರಿಕೆ ನೀಡಿದ್ದು, ಕೆಲವೇ ದಿನಗಳಲ್ಲಿ ರಷ್ಯಾ ಸೇನೆಯು ದಾಳಿ ನಡೆಸುವುದು ಖಚಿತ ಎಂದಿದ್ದಾರೆ. ಅಮೆರಿಕದ ಶಕ್ತಿ ಕೇಂದ್ರ ಶ್ವೇತಭವನದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಬೈಡೆನ್‌ ಅವರು, "ಎಷ್ಟು ಸೈನಿಕರನ್ನು ಗಡಿಯಿಂದ ಹಿಂಪಡೆಯಲಾಗಿದೆಯೋ ಅದಕ್ಕೂ ಹೆಚ್ಚಿನ ಸೈನಿಕರನ್ನು ಗೌಪ್ಯವಾಗಿ ಉಕ್ರೇನ್‌ ಗಡಿಗೆ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್‌ ಪುಟಿನ್‌ ನುಗ್ಗಿಸಿದ್ದಾರೆ. ವಿಶ್ವದ ಕಣ್ಣಿಗೆ ಮಣ್ಣು ಎರಚುವ ಕುತಂತ್ರ ನಡೆಯುತ್ತಿದೆ. ಈಗಲೂ ಕೂಡ ಪುಟಿನ್‌ ಆದೇಶದಂತೆ ಕೆಲವೇ ದಿನಗಳಲ್ಲಿ ರಷ್ಯಾ ಸೈನಿಕರು ಉಕ್ರೇನ್‌ಗೆ ನುಗ್ಗಿ, ಅಲ್ಲಿನ ಸ್ಥಳಗಳನ್ನು ತಮ್ಮ ವಶಕ್ಕೆ ಪಡೆಯಲು ಸಕಲ ಸಿದ್ಧತೆ ಮಾಡಿಕೊಳ್ಳುತ್ತಿದ್ದಾರೆ. ಉಕ್ರೇನ್‌ನ ಎಲ್ಲ ಗಡಿಗಳನ್ನು ರಷ್ಯಾ ಸುತ್ತುವರಿದಿರುವುದು ಉಪಗ್ರಹದಿಂದ ತೆಗೆಯಲಾದ ಫೋಟೋಗಳಲ್ಲಿ ಸ್ಪಷ್ಟವಾಗಿ ಗೋಚರಿಸುತ್ತಿದೆ,'' ಎಂದಿದ್ದಾರೆ. ಸದ್ಯಕ್ಕೆ ನಾನು ಯಾವುದೇ ಕಾರಣಕ್ಕೂ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್‌ ಪುಟಿನ್‌ ಅವರನ್ನು ಫೋನ್‌ ಕರೆ ಮೂಲಕ ಸಂಪರ್ಕಿಸುವುದಿಲ್ಲ. ಅವರು ಒಂದೊಮ್ಮೆ ರಾಜತಾಂತ್ರಿಕ ಮಾರ್ಗದಲ್ಲಿ ಉಕ್ರೇನ್‌ ಬಿಕ್ಕಟ್ಟು ಶಮನಕ್ಕೆ ಮನಸ್ಸು ಮಾಡಿದಲ್ಲಿ, ಅಮೆರಿಕ ವಿದೇಶಾಂಗ ಸಚಿವ ಆ್ಯಂಟಿನಿ ಬ್ಲಿಂಕನ್‌ ಅವರನ್ನು ಸಂಪರ್ಕಿಸಲು ಮುಕ್ತರಾಗಿದ್ದಾರೆ ಎಂದು ಬೈಡನ್‌ ಅವರು ಪರೋಕ್ಷವಾಗಿ ಉಕ್ರೇನ್‌ಗೆ ಪೂರ್ಣ ಬೆಂಬಲ ನೀಡುವ ಸಂದೇಶ ರವಾನಿಸಿದ್ದಾರೆ. ಹೊಸ ಸೇತುವೆ ನಿರ್ಮಾಣ ರಷ್ಯಾ ಸೇನೆಯು ಸಮರಕ್ಕೆ ಸನ್ನದ್ಧವಾಗಿರುವುದಕ್ಕೆ ಸಾಕ್ಷಿಯನ್ನು ಉಪಗ್ರಹಗಳಿಂದ ಸೆರೆಹಿಡಿಯಲಾದ ಫೋಟೋಗಳಿಂದ ಬಯಲಾಗಿದೆ. ಉಕ್ರೇನ್‌ ಗಡಿಯಿಂದ ಕೇವಲ 6 ಕಿ.ಮೀ ದೂರದಲ್ಲಿ ಪ್ರಿಪ್ಯಾತ್‌ ನದಿಗೆ ರಷ್ಯಾ ಸೇನೆಯು ಹೊಸ ಸೇತುವೆಯನ್ನು ಇತ್ತೀಚೆಗೆ ನಿರ್ಮಿಸಿದೆ. ಈ ಮೂಲಕ ತನ್ನ ಟ್ಯಾಂಕರ್‌ಗಳನ್ನು ತಂದು ನಿಲ್ಲಿಸಿದೆ. ಉಳಿದಂತೆ ರಷ್ಯಾ ಹಾಗೂ ಉಕ್ರೇನ್‌ ನಡುವಿನ ಬೆಲಾರಸ್‌ನಲ್ಲಿ ರಷ್ಯಾ ಸೇನಾಪಡೆಯು 20 ಹೆಲಿಕಾಪ್ಟರ್‌ಗಳ ಹೊಸ ವಾಯುಪಡೆಯೊಂದನ್ನು ಸಿದ್ಧವಾಗಿರಿಸಿಕೊಂಡಿದೆ. ರಾಜತಾಂತ್ರಿಕ ಮಾತುಕತೆ ಮೂಲಕ ಬಿಕ್ಕಟ್ಟು ಶಮನಕ್ಕೆ ಭಾರತ ಒತ್ತಾಯ ಉಕ್ರೇನ್‌ನಲ್ಲಿ ಉದ್ಭವಿಸಿರುವ ಬಿಕ್ಕಟ್ಟನ್ನು ರಷ್ಯಾ ಮತ್ತು ಉಕ್ರೇನ್‌ ಸರಕಾರವು ರಾಜತಾಂತ್ರಿಕ ಮಾತುಕತೆ ಮೂಲಕ ಶೀಘ್ರವೇ ಬಗೆಹರಿಸಿಕೊಳ್ಳಬೇಕು. ಎರಡೂ ರಾಷ್ಟ್ರಗಳು ಸೈನಿಕರನ್ನು ಗಡಿಯಿಂದ ಏಕಕಾಲಕ್ಕೆ ಹಿಂದಕ್ಕೆ ಕರೆಸಿಕೊಳ್ಳಬೇಕು. ಈ ಮೂಲಕ ಶಾಂತಿಗೆ ಆದ್ಯತೆ ನೀಡಬೇಕು ಎಂದು ಭಾರತ ಬಯಸುತ್ತದೆ ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ವಕ್ತಾರ ಅರಿಂಧಮ್‌ ಬಾಗ್ಚಿ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.
from India & World News in Kannada | VK Polls https://ift.tt/c4MzDBm
