ಹೊಸದಿಲ್ಲಿ: ಭಾರತದ ಆಂತರಿಕ ವಿಚಾರದ ಕುರಿತು ಪಾಕಿಸ್ತಾನವನ್ನು ಒಳಗೊಂಡ ಬಾಹುಳ್ಯದ ದೇಶಗಳ ಸಂಘಟನೆ ನೀಡಿರುವ ಹೇಳಿಕೆಯನ್ನು ಭಾರತ ಬಲವಾಗಿ ಖಂಡಿಸಿದೆ. ಉತ್ತರಾಖಂಡದ ಹರಿದ್ವಾರದಲ್ಲಿನ ಧರ್ಮ ಸಂಸದ್‌ನಲ್ಲಿ ಮಾಡಿದ ದ್ವೇಷ ಭಾಷಣಗಳನ್ನು ಉಲ್ಲೇಖಿಸಿರುವ ಇಸ್ಲಾಮಿಕ್ ಸಹಕಾರ ಸಂಘಟನೆ () 'ಹಿಂದುತ್ವ ಪ್ರತಿಪಾದಕರಿಂದ ಮುಸ್ಲಿಮರ ಹತ್ಯಾಕಾಂಡಕ್ಕೆ ಸಾರ್ವಜನಿಕವಾಗಿ ಕರೆ ನೀಡಿರುವುದು ಕಳವಳಕಾರಿ' ಎಂದು ಹೇಳಿದೆ. ಇದಕ್ಕೆ ಕಠಿಣ ಪದಗಳಿಂದ ಪ್ರತಿಕ್ರಿಯೆ ನೀಡಿರುವ ವಿದೇಶಾಂಗ ಸಚಿವಾಲಯ, ಸಾಂವಿಧಾನಿಕ ಚೌಕಟ್ಟು ಮತ್ತು ಯಾಂತ್ರಿಕತೆಗಳು ಹಾಗೂ ಪ್ರಜಾಸತ್ತಾತ್ಮಕ ತತ್ವಗಳು ಮತ್ತು ರಾಜ್ಯ ವ್ಯವಸ್ಥೆಗಳಿಗೆ ಅನುಗುಣವಾಗಿ ಭಾರತದಲ್ಲಿನ ವಿಚಾರಗಳನ್ನು ಪರಿಗಣಿಸುತ್ತದೆ ಮತ್ತು ಬಗೆಹರಿಸುತ್ತದೆ ಎಂದು ಹೇಳಿದೆ. "ಒಐಸಿ ಕಾರ್ಯಾಲಯದ ಕೋಮುವಾದಿ ಮನಸ್ಥಿತಿಯು ಈ ವಾಸ್ತವ ಅಂಶಗಳ ಸೂಕ್ತ ಪರಿಗಣನೆಗೆ ಅವಕಾಶ ನೀಡುವುದಿಲ್ಲ. ಭಾರತದ ವಿರುದ್ಧದ ಮಹಾಪಾತಕ ಪ್ರಚಾರಗಳನ್ನು ಮುಂದುವರಿಸಲು ಒಐಸಿ ಪಟ್ಟಭದ್ರ ಹಿತಾಸಕ್ತಿಗಳಿಂದ ಹೈಜಾಕ್ ಆಗುವುದು ಮುಂದುವರಿದಿದೆ" ಎಂದು 57 ಸದಸ್ಯ ದೇಶಗಳ ಸಂಘಟನೆಯ ಹೇಳಿಕೆಯನ್ನು ಉಲ್ಲೇಖಿಸಿ ಪ್ರತಿಕ್ರಿಯೆ ನೀಡಿದೆ. "ಭಾರತಕ್ಕೆ ಸಂಬಂಧಿಸಿದ ವಿಚಾರದಲ್ಲಿ ಒಐಸಿ ಮತ್ತೊಂದು ಪ್ರಚೋದಿತ ಹಾಗೂ ತಪ್ಪು ದಾರಿಗೆ ಎಳೆಯುವ ಹೇಳಿಕೆಯನ್ನು ನೀಡಿದೆ. ಇದರ ಫಲಿತಾಂಶವಾಗಿ ಇದು ನಮ್ಮ ಪ್ರತಿಷ್ಠೆಗೆ ಮಾತ್ರ ಹಾನಿ ಮಾಡಿದೆ" ಎಂದು ಎಂಇಎ ಕಿಡಿಕಾರಿದೆ. ಇಸ್ಲಾಮಿಕ್ ದೇಶಗಳ ಒಐಸಿ ಸೆಕ್ರೇಟರಿಯೇಟ್ ಕರ್ನಾಟಕದಲ್ಲಿ ನಡೆಯುತ್ತಿರುವ ಹಿಜಾಬ್ ವಿವಾದವನ್ನೂ ಪ್ರಸ್ತಾಪಿಸಿದೆ. ಮುಸ್ಲಿಮರಿಗೆ ಸಂಬಂಧಿಸಿದಂತೆ ಭಾರತದಲ್ಲಿ ಮಾನವ ಹಕ್ಕುಗಳ ಉಲ್ಲಂಘನೆ ಆಗುತ್ತಿದೆ. ಈ ಬಗ್ಗೆ ವಿಶ್ವ ಸಂಸ್ಥೆ ಪರಿಶೀಲನೆ ನಡೆಸಬೇಕು ಎಂದು ಆಗ್ರಹಿಸಿದೆ. ಒಐಸಿಗೆ ಭಾರತ ತಕ್ಕ ಉತ್ತರ ನೀಡುತ್ತಿರುವುದು ಇದು ಮೊದಲ ಸಲವೇನಲ್ಲ. ಜಮ್ಮು ಮತ್ತು ಕಾಶ್ಮೀರದಲ್ಲಿ 370ನೇ ವಿಧಿಯನ್ನು ಮರಳಿ ಸ್ಥಾಪನೆ ಮಾಡಬೇಕು ಎಂದು ಒಐಸಿ ನೀಡಿದ್ದ ಹೇಳಿಕೆಯನ್ನು ಭಾರತ ತೀಕ್ಷ್ಣವಾಗಿ ಟೀಕಿಸಿತ್ತು.
from India & World News in Kannada | VK Polls https://ift.tt/vlUgQCJ
