ಕೋಲ್ಕತಾ: ಈ ವರ್ಷಾರಂಭದಲ್ಲಿ ಅವರ ಜೊತೆ ಸಂಭಾಷಣೆ ನಡೆಸಿದ್ದು ನಿಜ ಎಂದು ಒಪ್ಪಿಕೊಂಡ ಟೀಮ್‌ ಇಂಡಿಯಾ ಹೆಡ್‌ ಕೋಚ್‌ ರಾಹುಲ್ ದ್ರಾವಿಡ್, ಟೀಮ್‌ ಮ್ಯಾನೇಜ್‌ಮೆಂಟ್‌ ಯುವ ವಿಕೆಟ್‌ ಕೀಪರ್‌ ಅನ್ನು ಬೆಳೆಸುವ ಉದ್ದೇಶವನ್ನು ಹೊಂದಿದೆ ಎಂದು ಅವರಿಗೆ ಮನವರಿಕೆ ಮಾಡಿಕೊಡಲಾಗಿತ್ತು ಎಂದಿದ್ದಾರೆ. ಟೆಸ್ಟ್‌ ತಂಡದ ಆಯ್ಕೆಗೆ ನಿಮ್ಮನ್ನು ಪರಿಗಣಿಸುವುದಿಲ್ಲ. ಹಾಗಾಗಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ನಿವೃತ್ತಿ ತೆಗೆದುಕೊಳ್ಳಿ ಎಂದು ಭಾರತ ತಂಡದ ಹೆಡ್‌ ಕೋಚ್‌ ರಾಹುಲ್ ದ್ರಾವಿಡ್ ನನಗೆ ಸಲಹೆ ನೀಡಿದ್ದರು ಎಂದು ವೃದ್ದಿಮಾನ್ ಸಹಾ ಭಾನುವಾರ ಶಾಕಿಂಗ್‌ ಹೇಳಿಕೆ ಕೊಟ್ಟಿದ್ದರು. ವಿರುದ್ಧ ಮೂರನೇ ಟಿ20 ಪಂದ್ಯ ಗೆಲುವಿನ ಬಳಿಕ ಸುದ್ದಿಗೋಷ್ಠಿಯಲ್ಲಿ ಹೆಡ್‌ ಕೋಚ್‌ ರಾಹುಲ್ ದ್ರಾವಿಡ್, "ಯಾರ ಮನಸಿಗೂ ನೋವು ಉಂಟು ಮಾಡುವ ಉದ್ದೇಶ ನನಗಿಲ್ಲ. ವೃದ್ದಿಮಾನ್ ಸಹಾ ಹಾಗೂ ಅವರ ಸಾಧನೆ ಮತ್ತು ಭಾರತೀಯ ಕ್ರಿಕೆಟ್‌ಗೆ ಅವರು ನೀಡಿರುವ ಕೊಡುಗೆಯನ್ನು ನಾನು ಗೌರವಿಸುತ್ತೇನೆ. ಆದರೆ ನಾನು ಅವರ ಜೊತೆ ಸಂಭಾಷಣೆ ನಡೆಸಿದ್ದು ನಿಜ. ಈ ವಿಷಯ ಕುರಿತಂತೆ ಸ್ಪಷ್ಟತೆ ಪಡೆಯಲು ಸಹಾ ಅರ್ಹರಾಗಿದ್ದಾರೆ. ಮಾಧ್ಯಮಗಳಿಂದ ನಾನು ಕಲಿಯುವ ಅಗತ್ಯವಿಲ್ಲ," ಎಂದರು. "ಎಲ್ಲಾ ಆಟಗಾರರ ಜೊತೆ ನನ್ನ ಸಂಭಾಷಣೆ ಸ್ಥಿರವಾಗಿರುತ್ತದೆ. ಆದರೆ ಯಾರ ಮನಸಿಗೂ ನೋವು ಮಾಡುವ ಉದ್ದೇಶ ನನಗಿಲ್ಲ. ನಾನು ಹೇಳಿರುವುದನ್ನು ಒಪ್ಪಿಕೊಳ್ಳುತ್ತೇನೆ ಹಾಗೂ ಇಂಥಾ ಸಂದೇಶವನ್ನು ಕೇಳುವುದು ಆಟಗಾರರಿಗೂ ಯಾವಾಗಲೂ ಇಷ್ಟವಾಗುವುದಿಲ್ಲ," ಎಂದು ತಿಳಿಸಿದರು. "ಆಟಗಾರರ ಜೊತೆ ಯಾವಾಗಲೂ ಕಠಿಣ ಸಂಭಾಷಣೆ ನಡೆಯುತ್ತದೆ. ಹಾಗಾಗಿ ಪ್ರತಿಸಮಯವೂ ಅವರ ಮಾತುಗಳನ್ನು ಒಪ್ಪಲಾಗುವುದಿಲ್ಲ. ಅಂದಹಾಗೆ ಪ್ರತಿಯೊಂದು ಪಂದ್ಯಕ್ಕೂ ಮುನ್ನ ನಾವು ಪ್ಲೇಯಿಂಗ್‌ ಇಲೆವೆನ್‌ ಆಯ್ಕೆ ಮಾಡುವಾಗ ಸಂಭಾಷಣೆ ನಡೆಸುತ್ತೇವೆ. ಪ್ಲೇಯಿಂಗ್‌ ಇಲೆವೆನ್‌ನಲ್ಲಿ ಆಡದೆ ಇರುವ ಆಟಗಾರರ ಬಳಿ ನಾನು ಹಾಗೂ ನಾಯಕ ರೋಹಿತ್‌ ಶರ್ಮಾ ಮಾತನಾಡುತ್ತೇವೆ. ಇದು ಆಟಗಾರರಿಗೆ ಬೇಸರ ತರಿಸುತ್ತದೆ. ಆದರೆ ವೃದ್ದಿಮಾನ್ ಸಹಾ ಅವರನ್ನು ನಾನು ಗೌರವಿಸುತ್ತೇನೆ. ಅವರು ಸ್ಪಷ್ಟತೆ ಪಡೆಯಲು ಅರ್ಹರಾಗಿದ್ದಾರೆ," ಎಂದು ಹೇಳಿದರು. "ವೃದ್ದಿಮಾನ್ ಸಹಾ ಬಗ್ಗೆ ಪ್ರತಿಕ್ರಿಯಿಸಿ, " ರಿಷಭ್‌ ಪಂತ್ ನಮಗೆ ನಂ.1 ವಿಕೆಟ್‌ ಕೀಪರ್‌. ಈ ವರ್ಷ ಕೇವಲ ಮೂರು ಟೆಸ್ಟ್‌ ಪಂದ್ಯಗಳಿರುವ ಹಿನ್ನೆಲೆಯಲ್ಲಿ ನಾವು ಯುವ ವಿಕೆಟ್‌ ಕೀಪರ್‌ ಅನ್ನು ಬೆಳೆಸಲು ಎದುರು ನೋಡುತ್ತಿದ್ದೇವೆ. ವೃದ್ದಿಮಾನ್ ಸಹಾ ಅವರನ್ನು ನಾನು ಗೌರವಿಸುತ್ತೇನೆ. ಆದರೆ ತಂಡದ ಹಿತದೃಷ್ಟಿಯಿಂದ ತಂಡದ ನಿಲುವನ್ನು ಬದಲಿಸಲು ಸಾಧ್ಯವಿಲ್ಲ. ನನ್ನ ಪಾಲಿಗೆ ಸುಲಭ ವಿಧಾನವೇನೆಂದರೆ, ನಾನು ಇಂಥಾ ಸಂಭಾಷಣೆ ನಡೆಸದೆ ಸುಮ್ಮನೆ ಇರುವುದು. ಆದರೆ ಇದು ನನಗೆ ಸೂಕ್ತವಾಗುವುದಿಲ್ಲ. ಒಂದು ಹಂತದಲ್ಲಿ ಆಟಗಾರರು ಇದನ್ನು ಅರ್ಥಮಾಡಿಕೊಳ್ಳುತ್ತಾರೆಂಬ ವಿಶ್ವಾಸವಿದೆ," ಎಂದು ದ್ರಾವಿಡ್ ತಿಳಿಸಿದರು. ಶ್ರೀಲಂಕಾ ವಿರುದ್ಧ ಮುಂಬರುವ ಎರಡು ಪಂದ್ಯಗಳ ಟೆಸ್ಟ್‌ ಸರಣಿಗೆ 18 ಸದಸ್ಯರ ಭಾರತ ತಂಡವನ್ನು ಶನಿವಾರ ಬಿಸಿಸಿಐ ಪ್ರಕಟಿಸಿತ್ತು ಹಾಗೂ ವೃದ್ದಿಮಾನ್ ಸಹಾ, ಚೇತೇಶ್ವರ್‌ ಪೂಜಾರ, ಅಜಿಂಕ್ಯ ರಹಾನೆ ಹಾಗೂ ಇಶಾಂತ್ ಶರ್ಮಾ ಅವರನ್ನು ಕೈ ಬಿಟ್ಟಿತ್ತು. ಇದರ ಜೊತೆಗೆ ರೋಹಿತ್‌ ಶರ್ಮಾ ಅವರನ್ನು ಟೆಸ್ಟ್‌ ತಂಡಕ್ಕೆ ಪೂರ್ಣಪ್ರಮಾಣದ ನಾಯಕನನ್ನಾಗಿ ಬಿಸಿಸಿಐ ನೇಮಿಸಿತ್ತು. ಅಂದಹಾಗೆ ವೆಸ್ಟ್ ಇಂಡೀಸ್‌ ವಿರುದ್ಧ ಮೂರನೇ ಟಿ20 ಪಂದ್ಯದಲ್ಲಿ ಭಾರತ ತಂಡ 17 ರನ್‌ಗಳಿಂದ ಗೆಲುವು ಪಡೆದಿತ್ತು ಹಾಗೂ ಮೂರು ಪಂದ್ಯಗಳ ಟಿ20 ಸರಣಿಯನ್ನು 3-0 ಅಂತರದಲ್ಲಿ ಕ್ಲೀನ್‌ ಸ್ವೀಪ್‌ ಮಾಡಿಕೊಂಡಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/dWcPYyM
