ವಿಜಯವಾಡ: ತಿರುಪತಿಯ ಏಳು ಬೆಟ್ಟಗಳಲ್ಲಿ ಒಂದಾಗಿರುವ ಅಂಜನಾದ್ರಿ ಬೆಟ್ಟವೇ ಹನುಮಂತನ ಜನ್ಮಸ್ಥಳ ಎಂದು ವಾದಿಸುತ್ತಾ ಅಲ್ಲಿ ಆಂಜನೇಯನ ದೇಗುಲ ನಿರ್ಮಾಣಕ್ಕೆ ಮುಂದಾಗಿದ್ದ ತಿರುಮಲ ತಿರುಪತಿ ದೇವಸ್ಥಾನಂ ಮಂಡಳಿಗೆ() ಹಿನ್ನಡೆಯಾಗಿದೆ. ಅಲ್ಲಿ ದೇಗುಲ ನಿರ್ಮಿಸದಂತೆ ಮತ್ತು ಆಂಜನೇಯನ ಪ್ರತಿಮೆಯನ್ನು ನಿರ್ಮಾಣ ಮಾಡದಂತೆ ಆಂಧ್ರಪ್ರದೇಶ ಹೈಕೋರ್ಟ್‌ ಸದ್ಯ ತಡೆಯಾಜ್ಞೆ ನೀಡಿದೆ. ಆದರೆ ನಿಗದಿಯಂತೆ ಅಂಜನಾದ್ರಿ ಬೆಟ್ಟದಲ್ಲಿ ಮಾಘ ಹುಣ್ಣಿಮೆಯಂದು (ಫೆ.16) ಭವ್ಯ ದೇಗುಲ ನಿರ್ಮಾಣಕ್ಕೆ ಭೂಮಿ ಪೂಜೆ ನೆರವೇರಿಸಲಾಗಿದೆ. ದೇಗುಲದ ನೀಲ ನಕ್ಷೆಯನ್ನೂ ಬಿಡುಗಡೆ ಮಾಡಲಾಗಿದ್ದು, ಆಂಜನೇಯ ದೇವರು ಇಲ್ಲಿಯೇ ಹುಟ್ಟಿದ್ದು ಎಂಬುದನ್ನು ಪ್ರತಿಪಾದಿಸುವ ಕೈಪಿಡಿಗಳನ್ನು ಹೊರತರಲಾಗಿದೆ. ಹೈಕೋರ್ಟ್‌ನ ತಡೆಯಾಜ್ಞೆ ಇರುವುದರಿಂದ ಸದ್ಯ ಯಾವುದೇ ನಿರ್ಮಾಣ ಚಟುವಟಿಕೆಗಳನ್ನು ಟಿಟಿಡಿ ನಡೆಸುವಂತಿಲ್ಲ. ಈ ದೇಗುಲ ಸಂಕೀರ್ಣದಲ್ಲಿ 30 ಅಡಿ ಎತ್ತರದ ಹನುಮಂತನ ಮೂರ್ತಿ ಸ್ಥಾಪಿಸಲು ಟಿಟಿಡಿ ಉದ್ದೇಶಿಸಿತ್ತು. ‘ಪುರಾಣಗಳ ಪ್ರಕಾರ ತಿರುಮಲದ ಏಳು ಬೆಟ್ಟದಲ್ಲಿ ಯಾವುದೇ ಪ್ರತಿಮೆ ಸ್ಥಾಪಿಸಬಾರದು. ಜತೆಗೆ ಈ ಅಂಜನಾದ್ರಿಯೇ ಆಂಜನೇಯನ ಜನ್ಮಸ್ಥಳ ಎಂಬುದಕ್ಕೆ ಯಾವುದೇ ಸಾಕ್ಷಿಗಳಿಲ್ಲ. ಹೀಗಾಗಿ ಅಲ್ಲಿ ದೇಗುಲ ನಿರ್ಮಿಸಬಾರದು’ ಎಂದು ಕರ್ನೂಲ್‌ನ ಅಗ್ರಹಾರಂ ರಾಘವೇಂದ್ರ ಮತ್ತಿತರರು ಅಲ್ಲಿಯ ಹೈಕೋರ್ಟ್‌ ಮೊರೆ ಹೋಗಿದ್ದರು. ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯಾಲಯವು ಹೊಸ ದೇಗುಲದ ಮತ್ತು ವಿಗ್ರಹದ ನಿರ್ಮಾಣಕ್ಕೆ ತಡೆ ನೀಡಿದೆ. ಆದರೆ ಯಾವುದೇ ರೀತಿಯ ಅಭಿವೃದ್ಧಿ ಚಟುವಟಿಕೆಗಳನ್ನು ನಡೆಸಲು ಅವಕಾಶ ನೀಡಿದೆ. ಆಂಜನೇಯ ಜನ್ಮಸ್ಥಳವೆಂದು ಸಾಬೀತುಪಡಿಸುವ ದಾಖಲೆಗಳೊಂದಿಗೆ ವಾದ ಮಂಡಿಸಲು ಟಿಟಿಡಿಗೆ ನ್ಯಾಯಾಲಯ ಅವಕಾಶ ನೀಡಿದ್ದು, ವಿಚಾರಣೆಯನ್ನು ಮುಂದೂಡಿದೆ. ಹೀಗಾಗಿ ಆಂಜನೇಯನ ಜನ್ಮಸ್ಥಳ ವಿವಾದ ಈಗ ಅಧಿಕೃತವಾಗಿ ನ್ಯಾಯಾಲಯದ ಮೆಟ್ಟಿಲೆರಿದಂತಾಗಿದೆ. ಮುಂದೇನು?‘ಕಳೆದ ವರ್ಷದ ಜುಲೈನಲ್ಲಿ ನಡೆದ ವಿಚಾರ ಸಂಕಿರಣದಲ್ಲಿ ಅಂಜನಾದ್ರಿಯಲ್ಲಿನ ಆಕಾಶಗಂಗಾ ಹನುಮನ ಜನ್ಮಸ್ಥಳ ಎನ್ನುವುದಕ್ಕೆ ನಮಗೆ ಹಲವು ಅಧಿಕೃತ ಪುರಾವೆಗಳು ಲಭಿಸಿವೆ. ಹೀಗಾಗಿ ಅಂಜನಾದ್ರಿಯನ್ನು ಅಭಿವೃದ್ಧಿಪಡಿಸುವ ಕಾಮಗಾರಿಗಳಿಗೆ ಚಾಲನೆ ನೀಡುತ್ತಿದ್ದೇವೆ’ ಎಂದು ಟಿಟಿಡಿಯ ಹೆಚ್ಚುವರಿ ಕಾರ್ಯನಿರ್ವಾಹಕ ಅಧಿಕಾರಿ ಎ.ವಿ.ಧರ್ಮಾರೆಡ್ಡಿ ಹೇಳಿದ್ದರು. ಹೀಗಾಗಿ ಟಿಟಿಡಿ ನ್ಯಾಯಾಲಯದಲ್ಲಿ ತನ್ನ ಬಳಿ ಇರುವ ದಾಖಲೆಗಳನ್ನು ಹಾಜರು ಪಡಿಸಿ, ವಾದ ಮಂಡಿಸುವ ಸಾಧ್ಯತೆಗಳಿವೆ. ಈ ಸಂದರ್ಭದಲ್ಲಿ ನಮ್ಮ ರಾಜ್ಯದ ‘ಶ್ರೀಹನುಮಾನ್‌ ಜನ್ಮಭೂಮಿ ತೀರ್ಥಕ್ಷೇತ್ರ ಟ್ರಸ್ಟ್‌’ ಕೂಡ ನ್ಯಾಯಾಲಯದ ಮುಂದೆ ತನ್ನ ವಾದ ಮಂಡಿಸಲು ಮುಂದಾಗಿದ್ದು, ಟ್ರಸ್ಟ್‌ ಸ್ಥಾಪಕ ಸ್ವಾಮಿ ಗೋವಿಂದಾ ನಂದ ಸರಸ್ವತಿ ಕೂಡ ಸಿದ್ಧತೆ ಮಾಡಿಕೊಂಡಿದ್ದಾರೆ. ಕೇಂದ್ರದ ನಿಲುವೇನು?ಆಂಧ್ರ ಪ್ರದೇಶದ ರಾಜ್ಯಸಭಾ ಸದಸ್ಯ ವಿ. ವಿಜಯಸಾಯಿರೆಡ್ಡಿ ಸಂಸತ್‌ ಅಧಿವೇಶನದಲ್ಲಿ ಚುಕ್ಕೆ ಪ್ರಶ್ನೆ ಕೇಳಿದ್ದರು. ಟಿಟಿಡಿ ಪ್ರಾಚೀನ ಸಾಹಿತ್ಯದ ಪುರಾವೆಗಳೊಂದಿಗೆ ತಿರಮಲ ಬಳಿಯ ಅಂಜನಾದ್ರಿ ಬೆಟ್ಟದಲ್ಲಿಯೇ ಹನುಮ ಜನಿಸಿದ್ದಾನೆ. ಪುರಾವೆಗಳಿಗಾಗಿ ಶಾಸನ, ಐತಿಹಾಸಕ ಹಾಗೂ ಶಿಲಾಶಾಸನ ದಾಖಲೆಗಳನ್ನು ಒದಗಿಸಿ ಕಿರು ಪುಸ್ತಕ ಬಿಡುಗಡೆಗೊಳಿಸಿರುವುದು ಕೇಂದ್ರ ಸರಕಾರ ಗಮನಕ್ಕೆ ಬಂದಿದೆಯಾ? ರಾಷ್ಟ್ರಮಟ್ಟದಲ್ಲಿ ಅಂಜನಾದ್ರಿ ಜನಿಸಿದ ಸ್ಥಳ ಘೋಷಿಸುವ ಬಗ್ಗೆ ಕ್ರಮ ಕೈಗೊಳ್ಳಲಿದೆಯಾ? ಎಂದು ಚುಕ್ಕೆ ಪ್ರಶ್ನೆಯಲ್ಲಿ ಕೇಳಿದ್ದರು. ಕೇಂದ್ರ ಸಂಸ್ಕೃತಿ ಮತ್ತು ಪ್ರವಾಸೋದ್ಯಮ ಸಚಿವ ಜಿ.ಕಿಶನ್‌ರೆಡ್ಡಿ ಅವರು, ಈ ಚುಕ್ಕೆ ಪ್ರಶ್ನೆಗೆ, ‘ಟಿಟಿಡಿ ಕಿರು ಪುಸ್ತಕ ಬಿಡುಗಡೆಗೊಳಿಸಿರುವುದು ಮಾಧ್ಯಮದ ಮೂಲಕ ಗಮನಕ್ಕೆ ಬಂದಿದೆ. ಆದರೆ ರಾಷ್ಟ್ರ ಮಟ್ಟದಲ್ಲಿ ಹನುಮ ಜನಿಸಿದ ಸ್ಥಳ ಘೋಷಣೆಯ ಕುರಿತು ಯಾವುದೇ ಪ್ರಸ್ತಾವನೆ ಕೇಂದ್ರದ ಮುಂದೆ ಇಲ್ಲ’ ಎಂದು ಪ್ರತಿಕ್ರಿಯಿಸಿದ್ದರು.
from India & World News in Kannada | VK Polls https://ift.tt/eIvHTFO
