ಹೊಳೆಹೊನ್ನೂರು: ಪಟ್ಟಣದಿಂದ ಶಿವಮೊಗ್ಗದವರೆಗೆ ರಸ್ತೆ ಸರಿ ಇಲ್ಲ ಎಂದು ಚಿತ್ರದುರ್ಗದಿಂದ ಮೂಲಕ ಶಿವಮೊಗ್ಗಕ್ಕೆ ಇದ್ದ ಹತ್ತಿರದ ಮಾರ್ಗವನ್ನು ಬದಲಿಸಿ ರಾಜ್ಯಪಾಲ ಥಾವರ್‌ ಚಂದ್‌ ಗೆಹ್ಲೋಟ್ ಅವರನ್ನು ಹೊಳಲೂರು ಮಾರ್ಗವಾಗಿ ಕರೆದೊಯ್ಯಲಾಯಿತು. ಶಿವಮೊಗ್ಗದಲ್ಲಿ ಎರಡು ದಿನ ವಿವಿಧ ಕಾರ‍್ಯಕ್ರಮಗಳಲ್ಲಿ ಭಾಗವಹಿಸಲು ಬೆಂಗಳೂರಿನಿಂದ ಚಿತ್ರದುರ್ಗ ಮಾರ್ಗವಾಗಿ ಶಿವಮೊಗ್ಗಕ್ಕೆ ಬುಧವಾರ ಹೋಗಬೇಕಿತ್ತು. ಚಿತ್ರದುರ್ಗದಿಂದ ಶಿವಮೊಗ್ಗಕ್ಕೆ ಹತ್ತಿರದ ಮಾರ್ಗ ಎಂದು ಹೊಳೆಹೊನ್ನೂರು ಮೂಲಕ ಹಾದುಹೋಗಬೇಕು. ಆದರೆ ಹೊಳೆಹೊನ್ನೂರಿನಿಂದ ಶಿವಮೊಗ್ಗದ ತೆರಳುವ ರಸ್ತೆಯಲ್ಲಿ ಗುಂಡಿಗಳು ಬಿದ್ದು ಸಂಪೂರ್ಣ ಹಾಳಾಗಿದೆ. ಇದರಿಂದ ಅಧಿಕಾರಿಗಳು ಹೊಳೆಹೊನ್ನೂರು ಮಾರ್ಗ ಬದಲಾಣೆ ಮಾಡಿ ಅರಹತೊಳಲು ಕೈಮರದಿಂದ ಸುಮಾರು 28 ಕಿ.ಮೀ. ದೂರದ ಹೊಳಲೂರು ಮಾರ್ಗವಾಗಿ ಶಿವಮೊಗ್ಗಕ್ಕೆ ತಲುಪಿಸಿದರು. ಹೆದ್ದಾರಿ ರಸ್ತೆ ದುರಸ್ತಿ ಮಾಡದೆ ನಮ್ಮಲ್ಲಿಎಲ್ಲಾ ಸರಿ ಎಂದು ಬಿಂಬಿಸಿಕೊಳ್ಳಲು ಅಧಿಕಾರಿಗಳು, ಜನಪ್ರತಿನಿಧಿಗಳು ರಾಜ್ಯಪಾಲರ ಮಾರ್ಗವನ್ನೆ ಬದಲಿಸಿರುವುದು ಸಾರ್ವಜನಿಕ ವಲಯದಲ್ಲಿ ತೀರ್ವ ಚರ್ಚೆಗೆ ಗ್ರಾಸವಾಗಿದೆ. ಪ್ರತಿ ದಿನ ಶಿವಮೊಗ್ಗಕ್ಕೆ ಗುಂಡಿಗಳಿಂದ ತುಂಬಿದ ರಸ್ತೆಯಲ್ಲಿ ಸಂಚರಿಸಿ ಬೇಸತ್ತಿರುವ ಕೆಲ ಸ್ಥಳೀಯ ಯುವಕರು ಹೊಳೆಹೊನ್ನೂರು ರಸ್ತೆಯಲ್ಲಿಯೇ ರಾಜ್ಯಪಾಲರನ್ನು ಕರೆದು ಕೊಂಡು ಹೋದರೆ ಇಲ್ಲಿನ ಜನಪ್ರತಿನಿಧಿಗಳ ನಿಜ ಬಣ್ಣ ಬಯಲಾಗುತ್ತದೆ. ಹೊಳಲೂರು ಮಾರ್ಗವಾಗಿ ಹೋಗುವುದಕ್ಕೆ ಬಿಡುವುದಿಲ್ಲ ಎಂದು ಪ್ರತಿಭಟನೆ ನಡೆಸಲು ತಯಾರಿ ಮಾಡಿಕೊಂಡಿದ್ದರು ಎನ್ನಲಾಗುತ್ತಿದೆ. ರಾಜ್ಯಪಾಲರ ಮಾರ್ಗ ಬದಲಾದ ಮಾರ್ಗ ಅರಹತೊಳಲು ಕೈಮರದಿಂದ ಮಲ್ಲಾಪುರದ ವರೆಗಿನ 5-6 ಕಿ.ಮೀ ರಸ್ತೆಯ ಗುಂಡಿಗಳಿಗೆ ಲೋಕೋಪಯೋಗಿ ಅಧಿಕಾರಿಗಳು ಜಲ್ಲಿಕಲ್ಲು ಸುರಿದು ತಾತ್ಕಾಲಿವಾಗಿ ಮುಚ್ಚಿಸಿದ್ದಾರೆ. ಕೈಮರದಿಂದ ಹೊಳಲೂರುವರೆಗಿನ ಮಾರ್ಗದ ಎಲ್ಲಾ ಗ್ರಾಮಗಳಲ್ಲಿ ಬ್ಯಾರಿಕೇಡ್‌ ಹಾಕಿ ಬಂದೊಬಸ್ತ್ ಮಾಡಿದ್ದರು. ಅದರಂತೆ ಮಧ್ಯಾಹ್ನ ಸುಮಾರು 2.30ಕ್ಕೆ ರಾಜ್ಯಪಾಲರು ಕೈಮರ-ಸನ್ಯಾಸಿಕೋಡಮಗ್ಗಿ-ಹೊಳಲೂರು ಮೂಲಕ ಶಿವಮೊಗ್ಗಕ್ಕೆ ತೆರಳಿದರು. ಬಳಿಕ ಶಿವಮೊಗ್ಗದಲ್ಲಿ ಅವರುತ್ಯಾವರೆಕೊಪ್ಪ ಹುಲಿ ಸಿಂಹಧಾಮಕ್ಕೆ ಭೇಟಿ ನೀಡಿ ಪ್ರಾಣಿಗಳನ್ನು ವೀಕ್ಷಿಸಿದರು. ಮೃಗಾಲಯದಲ್ಲಿ ಹುಲಿ, ಸಿಂಹ, ಚಿರತೆ ಮತ್ತು ಇತರೆ ಪ್ರಾಣಿಗಳನ್ನು ನೋಡಿ ಸಂತಸ ವ್ಯಕ್ತಪಡಿಸಿದರು. ಜಿಂಕೆ, ಕೃಷ್ಣಮೃಗಗಳನ್ನು ಕಂಡು ತಮ್ಮ ಭಾಷೆಯಲ್ಲಿ ಅವುಗಳಿಗೆ ಏನೆಂದು ಕರೆಯುತ್ತಾರೆ ಎಂದು ಸಹ ಹೇಳಿದರು. ನೀಲ್‌ಗಾಯ್‌ ನೋಡಿದ ಅವರು ತಮ್ಮ ಭಾಗದಲ್ಲಿ ರೈತರ ಬೆಳೆಗಳ ಹಾನಿಯಲ್ಲಿ ನೀಲ್‌ಗಾಯ್‌ ಪಾತ್ರವೇ ಪ್ರಮುಖವೆಂದು ಹೇಳಿದರು. ಬಳಿಕ ಗೆಹ್ಲೋಟ್ ಅವರು ಜೋಗಕ್ಕೆ ತೆರಳಿ ಬಾಂಬೆ ಅತಿಥಿಗೃಹದಲ್ಲಿ ವಾಸ್ತವ್ಯ ಮಾಡಿದರು. ಗುರುವಾರ ಬೆಳಗ್ಗೆ 8 ಗಂಟೆಗೆ ಜಲಪಾತವನ್ನು ವೀಕ್ಷಿಸಿ ಬಳಿಕ ಶಿವಮೊಗ್ಗಕ್ಕೆ ಮರಳಲಿದ್ದಾರೆ. ನಂತರ ಕೆಳದಿ ಶಿವಪ್ಪನಾಯಕ ವಿಶ್ವವಿದ್ಯಾಲಯದ 6ನೇ ಘಟಿಕೋತ್ಸವದಲ್ಲಿ ಪಾಲ್ಗೊಳ್ಳಲಿದ್ದಾರೆ.
from India & World News in Kannada | VK Polls https://ift.tt/3DS2Q1F
