ಕೊಚ್ಚಿ (): ಸಂಪತ್ತಿನ ಅಧಿ ದೇವತೆ ಕುಬೇರನ ಅಪರೂಪದ 'ದೇವರ ನಾಡು' ಖ್ಯಾತಿಯ ಕೇರಳದಲ್ಲಿ ನಿರ್ಮಾಣಗೊಂಡಿದೆ. ಕುಬೇರನಿಗೆ ದೇಗುಲ ನಿರ್ಮಾಣಗೊಂಡಿರುವುದು ಕೇರಳದಲ್ಲಿ ಇದೇ ಮೊದಲು. ' ಟೆಂಪಲ್ ಆಫ್ ಎಕಾನಾಮಿಕ್ಸ್ (ಕುಟೆಕಾನ್)' ಎಂಬುದು ಈ ದೇಗುಲದ ಹೆಸರಾಗಿದೆ. ಕಾಸರಗೋಡಿನ ಎಡ ನೀರು ಮಠದ ಶ್ರೀ ಸಚ್ಚಿದಾನಂದ ಭಾರತೀ ಸ್ವಾಮೀಜಿ ಅವರ ನೇತೃತ್ವದಲ್ಲಿ ಧಾರ್ಮಿಕ ವಿಧಿ ವಿಧಾನಗಳನ್ನು ನಡೆಸಿ ದೇವಾಲಯವನ್ನು ಉದ್ಘಾಟಿಸಲಾಗಿದೆ. ಚಿನ್ನದ ಬಣ್ಣದ ಮೆರುಗು ಇರುವ ನೆಲ ಮತ್ತು ಚಿನ್ನದ ಬಣ್ಣದ ಗೋಡೆಗಳಿಂದ ಕಂಗೊಳಿಸುವ ಈ ದೇಗುಲದಲ್ಲಿ ಸಂಪತ್ತಿನ ಅಧಿ ದೇವತೆ ಕುಬೇರ ಮತ್ತು ಇತರೆ ದೇವರುಗಳ ಮೂರ್ತಿಗಳಿವೆ. 'ಇದು ಆರಾಧನೆಯ ದೇಗುಲಕ್ಕಿಂತ ಸಂಪತ್ತಿನ ಜ್ಞಾನ ದೇಗುಲವಾಗಿ ಕಾರ್ಯ ನಿರ್ವಹಿಸಲಿದೆ' ಎಂದು ಕುಟೆಕಾನ್ ದೇಗುಲದ ಟ್ರಸ್ಟಿ ಜಿತಿನ್ ಜಯಕೃಷ್ಣನ್ ಹೇಳಿದ್ದಾರೆ. ನವೆಂಬರ್ 5ರಂದು ಶಬರಿಮಲೆಯ ಹಿಂದಿನ ಮುಖ್ಯ ಅರ್ಚಕರಾದ ಉಣ್ಣಿಕೃಷ್ಣನ್ ನಂಬೋದರಿಯವರು ಲಕ್ಷ್ಮಿ ಕುಬೇರ ಪೂಜೆ ಮತ್ತು ಧನ ವಾಹಿನಿ ಪೂಜೆ ಮಾಡಿದ್ದಾರೆ. ನವೆಂಬರ್ 16ರಂದು ಕೊಲ್ಲೂರು ಮೂಕಾಂಬಿಕೆ ದೇಗುಲದ ಮುಖ್ಯ ಅರ್ಚಕರಾದ ಶ್ರೀ ಡಾ. ನರಸಿಂಹ ಅಡಿಗ ಮತ್ತು ಸುಬ್ರಹ್ಮಣ್ಯ ಅಡಿಗರು ಶ್ರೀ ಸೂಕ್ತಂ ಮತ್ತು ಧನ ವಾಹಿನಿ ಪೂಜೆ ನಡೆಸಲಿದ್ದಾರೆ. ಚಿನ್ನದ ಮೆರುಗಿನ ಈ ದೇಗುಲ ಪ್ರವೇಶಿಸಿದಾಗ 20 ಅಡಿ ಎತ್ತರದ ಗಣೇಶ ದೇವರ ಮೂರ್ತಿಯು ಕಾಣಿಸುತ್ತದೆ. ದೊಡ್ಡ ಗಾತ್ರದ ಕುಬೇರ ಮೂರ್ತಿ ಮಾತ್ರವಲ್ಲದೆ ಪಂಚ ಲೋಹದ ಮಹಾಲಕ್ಷ್ಮಿ ಮತ್ತು ಶ್ರೀಕೃಷ್ಣನ ಮೂರ್ತಿಗಳೂ ಇವೆ. 'ಈ ದೇವಾಲಯವು ಉತ್ತರ ಮತ್ತು ದಕ್ಷಿಣದ ತಾಂತ್ರಿಕ ಕೌಶಲ್ಯಗಳ ಸಾಕಾರ. ಇಲ್ಲಿ ನಾವು ಲಕ್ಷ್ಮಿ ವಿನಾಯಕ, ಮಹಾಲಕ್ಷ್ಮಿ, ಶ್ರೀಕೃಷ್ಣ ಮತ್ತು ಕುಬೇರನನ್ನು ಪೂಜಿಸುತ್ತೇವೆ. ಲಕ್ಷ್ಮಿ ವಿನಾಯಕನು ಭಕ್ತರನ್ನು ಸಂಪತ್ತಿನತ್ತ ಮುನ್ನಡೆಸುತ್ತಾರೆ. ಮಹಾಲಕ್ಷ್ಮಿ ದೇವಿಯು ಸಮೃದ್ಧಿಯನ್ನು ಕರುಣಿಸುವರು. ಶ್ರೀಕೃಷ್ಣನು ರಾಜ ಗೋಪಾಲನಾಗಿ ಭಕ್ತರನ್ನು ಸನ್ಮಾರ್ಗದಲ್ಲಿ ನಡೆಸುತ್ತಾನೆ. ಕುಬೇರನು ಹೇರಳ ಸಂಪತ್ತಿನ ಆಶೀರ್ವಾದ ಮಾಡುತ್ತಾನೆ' ಎಂದು ದೇಗುಲದ ಟ್ರಸ್ಟ್ನ ಸದಸ್ಯರಾದ ವಿಕಾಸ್ ನೀಲಕಂಠನ್ ಹೇಳಿದ್ದಾರೆ. ದೇಶದ ಇತರೆ ದೇಗುಲಗಳಿಗೆ ಹೋಲಿಸಿದರೆ ಕುಟೆಕಾನ್ ದೇಗುಲದಲ್ಲಿ ಪೂಜಾ ವಿಧಿಗಳು ಕೊಂಚ ಬೇರೆ ರೀತಿ ಇರುತ್ತದೆ. ಪ್ರತಿ ಶುಕ್ರವಾರ ಧನ ವಾಹಿನಿ ಪೂಜೆ ನಡೆಯಲಿದೆ. ಲಕ್ಷ್ಮಿ ಕುಬೇರ ಪೂಜೆಯೂ ನಡೆಯಲಿದೆ. ಭಕ್ತರು ಬೆಳಗ್ಗೆ 5.30 ರಿಂದ 11.30ರ ವರೆಗೆ ಮತ್ತು ಸಂಜೆ 5.30 ರಿಂದ 7.30 ರವರೆಗೆ ದೇವರ ದರ್ಶನ ಪಡೆಯಬಹುದು.
from India & World News in Kannada | VK Polls https://ift.tt/3k1ZH7K
