: ಜಿಲ್ಲೆಯಲ್ಲಿ ಅಡುಗೆ ಮಾರಾಟ ಜಾಲ ಆಳವಾಗಿ ಬೇರೂರಿದ್ದು, ನಿರಂತರ ಜಾಗೃತಿ ನಡುವೆಯೂ ಜನರು ಕಲಬೆರಕೆ ಎಣ್ಣೆ ಖರೀದಿಗೆ ಮುಂದಾಗುತ್ತಿರುವುದು ಆತಂಕ ಮೂಡಿಸಿದೆ. ಖರೀದಿಸುವ ಮೊದಲು ಗ್ರಾಹಕರು ಎರಡು ಬಾರಿ ಯೋಚಿಸಬೇಕಿದೆ. ಜಿಲ್ಲೆಯಲ್ಲಿ ಕಳಪೆ ಅಡುಗೆ ಎಣ್ಣೆ ಮಾರಾಟ ಜಾಲ ಸಕ್ರಿಯವಾಗಿದ್ದು, ಹಲವೆಡೆ ದಿನಸಿ ಅಂಗಡಿಗಳಲ್ಲಿ ಕದ್ದುಮುಚ್ಚಿ ಪ್ಯಾಕಿಂಗ್ ಇಲ್ಲದ ಎಣ್ಣೆಯನ್ನು ಚಿಲ್ಲರೆಯಾಗಿ ಮಾರಾಟ ಮಾಡುತ್ತಿರುವುದು ಕಂಡು ಬಂದಿದೆ. ಈಗಾಗಲೇ ಕೆಲವೊಂದು ದಿನಸಿ ಅಂಗಡಿಗಳ ಮೇಲೆ ದಾಳಿ ನಡೆಸಿರುವ ಅಧಿಕಾರಿಗಳು, ಚಿಲ್ಲರೆ ಮಾರಾಟಗಾರರಿಗೆ ದಂಡ ವಿಧಿಸಿ ಎಚ್ಚರಿಕೆ ಕೊಟ್ಟು ಬಂದರೂ, ಮರುದಿನದಿಂದ ಮತ್ತೆ ಮಾರಾಟ ಪ್ರಕ್ರಿಯೆ ಮುಂದುವರಿದಿದೆ. ಅದರಲ್ಲಿಯೂ ಪ್ರಮುಖ ಬ್ರ್ಯಾಂಡ್ಗಳ ಅಡುಗೆ ಎಣ್ಣೆ 150 ರೂ. ದಾಟಿದ ಬಳಿಕ ಬಹುತೇಕ ಬೀದಿ ಬದಿ ಆಹಾರ ವ್ಯಾಪಾರಿಗಳು, ಚಾಟ್ಸ್ ಸೆಂಟರ್ಗಳು ಸೇರಿದಂತೆ ಹಲವರು ಪ್ಯಾಕಿಂಗ್ ಇಲ್ಲದ ಎಣ್ಣೆ ಖರೀದಿಸುತ್ತಿದ್ದು, ಕಲಬೆರಕೆ ಎಣ್ಣೆ ಪರೋಕ್ಷವಾಗಿ ಜನರ ಹೊಟ್ಟೆ ಸೇರುತ್ತಿದೆ. ನೆರೆಯ ಆಂಧ್ರ ಪ್ರದೇಶ, ತಮಿಳುನಾಡು ರಾಜ್ಯಗಳಿಂದ ನಿತ್ಯ ಲೋಡ್ಗಟ್ಟಲೆ ಬರುವ ಕಲಬೆರಕೆ ಎಣ್ಣೆಯನ್ನು ಕೋಲಾರ ಜಿಲ್ಲೆಯಲ್ಲಿರುವ ವ್ಯಾಪಾರಿಗಳು ರಾಜಾರೋಷವಾಗಿ ಮಾರಾಟ ಮಾಡುತ್ತಿದ್ದಾರೆ. ಅಗ್ಗದ ಬೆಲೆಗೆ ಸಿಗುವ ಇಂತಹ ಎಣ್ಣೆ, ಗ್ರಾಹಕರ ಪ್ರಾಣಕ್ಕೆ ಕುತ್ತು ತರುವ ಸಾಧ್ಯತೆಯಿದೆ. ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರದ (ಎಫ್ಎಸ್ಎಸ್ಎಐ) ನಿಯಮದ ಪ್ರಕಾರ ಅಡುಗೆ ಎಣ್ಣೆಯನ್ನು ಕಡ್ಡಾಯವಾಗಿ ಪ್ಯಾಕೆಟ್, ಪ್ಲಾಸ್ಟಿಕ್ ಕ್ಯಾನ್ ಅಥವಾ ಡಬ್ಬದಲ್ಲಿ (ಟಿನ್) ತುಂಬಿಸಿ ಮಾರಾಟ ಮಾಡಬೇಕು. ಇದರೊಂದಿಗೆ ಉತ್ಪಾದನೆ ಮತ್ತು ವಹಿವಾಟಿಗೆ ಭಾರತೀಯ ಪ್ರಮಾಣಿತ ಸಂಸ್ಥೆ (ಬಿಎಸ್ಐ), ಎಸ್ಎಸ್ಎಸ್ಎಐನಿಂದ ವಾಣಿಜ್ಯ ಪರವಾನಗಿ ಪಡೆಯಬೇಕು ಮತ್ತು ಎಣ್ಣೆ ಪ್ಯಾಕೇಟ್ ಅಥವಾ ಟಿನ್ ಮೇಲೆ ಗುಣಮಟ್ಟ ಖಾತ್ರಿಯ ಮುದ್ರೆಯಿರಬೇಕು. ಆದರೆ, ಕಡಿಮೆ ಖರ್ಚಿನಲ್ಲಿ ಹೆಚ್ಚು ಲಾಭ ಗಳಿಸಲು ಮುಂದಾಗಿರುವ ಕೆಲವರು ಅಡ್ಡದಾರಿಯಲ್ಲಿ ಕಲಬೆರಕೆಯಾಗಿರುವ ಎಣ್ಣೆಯನ್ನು ದಿನಸಿ ಅಂಗಡಿಗಳಿಗೆ ಮಾರಾಟ ಮಾಡುತ್ತಿದ್ದಾರೆ. ಅವರೊಂದಿಗೆ ಕೈಜೋಡಿಸುತ್ತಿರುವ ವರ್ತಕರು ಕಲಬೆರಕೆ ಎಣ್ಣೆ ಮಾರಾಟ ಮಾಡುವ ಮೂಲಕ ಗ್ರಾಹಕರ ಜೀವದೊಂದಿಗೆ ಚೆಲ್ಲಾಟವಾಡುತ್ತಿದ್ದಾರೆ. ಕ್ಯಾನ್ಸರ್ ತರುವ ಪ್ಯಾರಾಫಿನ್ ಮಿಶ್ರಣ!: ಚಿಲ್ಲರೆಯಾಗಿ ಮಾರಾಟ ಮಾಡುವ ಎಣ್ಣೆಗೆ ಪೆಟ್ರೋಲಿಯಂ ಉಪ ಉತ್ಪನ್ನವಾದ ಪ್ಯಾರಾಫಿನ್ ರಾಸಾಯನಿಕ ಬೆರಸಲಾಗುತ್ತದೆ. ದ್ರವ ರೂಪದಲ್ಲಿರುವ ಪ್ಯಾರಾಫಿನ್ನ ಬೆಲೆ ಕಡಿಮೆಯಿದ್ದು, ಈ ರಾಸಾಯನಿಕವನ್ನು ಅಡುಗೆ ಎಣ್ಣೆಯಲ್ಲಿ ಬೆರೆಸಿದರೆ ಬರಿಗಣ್ಣಿಗೆ ಪತ್ತೆಯಾಗುವುದಿಲ್ಲ. ಪೆಟ್ರೋಲಿಯಂ ಸಂಸ್ಕರಣೆ ಹಂತದಲ್ಲಿ ಕೊನೆಗೆ ಉಳಿಯುವ ಅನುಪಯುಕ್ತ ವಸ್ತು ಪ್ಯಾರಾಫಿನ್ ರಾಸಾಯನಿಕವಾಗಿದ್ದು, ಎಣ್ಣೆ ಪದಾರ್ಥಗಳ ಕಲಬೆರಕೆಗೆ ಸೂಕ್ತ ಪದಾರ್ಥವಾಗಿದ್ದು, ಇದರ ನಿರಂತರ ಸೇವನೆಯಿಂದ ಕ್ಯಾನ್ಸರ್ ಬರುವ ಸಾಧ್ಯತೆಗಳು ಹೆಚ್ಚಿರುತ್ತವೆ. ಜತೆಗೆ ಕರುಳು ಸಮಸ್ಯೆ, ಬೊಜ್ಜು, ಅಜೀರ್ಣ, ಮೂತ್ರಪಿಂಡ ಸೋಂಕು ಕಾಣಿಸಿಕೊಳ್ಳುವ ಸಾಧ್ಯತೆಯಿರುತ್ತದೆ ಎನ್ನುತ್ತಾರೆ ವೈದ್ಯರು. ಅಗ್ಗದ ದರದಲ್ಲಿ ಕಲಬೆರೆಕೆ ಎಣ್ಣೆ ಲಭ್ಯ: ಕ್ಯಾನ್, ಪ್ಯಾಕೆಟ್ ಹಾಗೂ ಟಿನ್ಗಳಲ್ಲಿ ಬರುವ ಬ್ರಾಂಡೆಂಡ್ ಅಡುಗೆ ಎಣ್ಣೆ ಬೆಲೆಗೆ ಹೋಲಿಸಿದರೆ ಅಗ್ಗದ ದರದಲ್ಲಿ ಕಲಬೆರೆಕೆ ಎಣ್ಣೆ ದೊರೆಯುತ್ತದೆ. ಬಹುಪಾಲು ಬ್ರಾಂಡೆಂಡ್ ಎಣ್ಣೆಯು ಪ್ರತಿ ಲೀಟರ್ಗೆ 150-180 ರೂ.ವರೆಗೆ ಇರುತ್ತದೆ. ಅದರೆ, ಚಿಲ್ಲರೆಯಾಗಿರುವ ದೊರೆಯುವ ಎಣ್ಣೆಯು 110-120 ರೂ. ಗಳಿಗೆ ದೊರೆಯುತ್ತದೆ. ಕಲಬೆರೆಕೆ ಎಣ್ಣೆ ಹೆಚ್ಚು ಬಳಕೆಯಾಗುವುದೆಲ್ಲಿ?: ಹೊರ ರಾಜ್ಯಗಳಿಂದ ಆಮದಾಗಿ ಚಿಲ್ಲರೆಯಾಗಿ ಮಾರಾಟವಾಗುತ್ತಿರುವ ಕಲಬೆರಕೆ ಎಣ್ಣೆ ಫಾಸ್ಟ್ಫುಡ್ ಮಳಿಗೆಗಳು, ಹೋಟೆಲ್ಗಳು, ಬೋಂಡ ಅಂಗಡಿ, ಗೋಬಿ ಮಂಚೂರಿ ಸೇರಿದಂತೆ ಇತರೆ ಫಾಸ್ಟ್ಫುಡ್ ಅಂಗಡಿಗಳಲ್ಲಿ ಹೆಚ್ಚಾಗಿ ಬಳಕೆಯಾಗುತ್ತಿದೆ.
from India & World News in Kannada | VK Polls https://ift.tt/3mHUB2o