ಹೊಸದಿಲ್ಲಿ: ಬಯೋ-ಬಬಲ್ ಒಳಗಡೆ ಕೋವಿಡ್-19 ಪಾಸಿಟಿವ್ ಬಂದ ಕಾರಣ ಹದಿನಾಲ್ಕನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್ ಲೀಗ್(ಐಪಿಎಲ್) ಟೂರ್ನಿಯನ್ನು ಕಳೆದ ಮೇ ತಿಂಗಳ ಆರಂಭದಲ್ಲಿಯೇ ಅರ್ಧಕ್ಕೆ ನಿಲ್ಲಿಸಲಾಗಿತ್ತು. ಇದೀಗ ಟೂರ್ನಿಯ ಇನ್ನುಳಿದ ಭಾಗವನ್ನು ಯುಎಇಯಲ್ಲಿ ಸೆಪ್ಟೆಂಬರ್ 19 ರಿಂದ ಮುಂದುವರಿಸಲಾಗುತ್ತಿದೆ. ಅಂದಹಾಗೆ, ಚೆನ್ನೈ ಸೂಪರ್ ಕಿಂಗ್ಸ್, ಡೆಲ್ಲಿ ಕ್ಯಾಪಿಟಲ್ಸ್ ಸೇರಿದಂತೆ ಕೆಲ ಫ್ರಾಂಚೈಸಿಗಳು ಯುಎಇ ಚರಣಕ್ಕೆ ಸಿದ್ದತೆ ನಡೆಸುತ್ತಿವೆ. ಇದರ ನಡುವೆ ಹಲವು ವಿದೇಶಿ ಆಟಗಾರರು ಸೆಕೆಂಡ್ ಆಫ್ಗೆ ಅಲಭ್ಯರಾಗುತ್ತಿದ್ದಾರೆ. ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ವೇಗಿ ಕೇನ್ ರಿಚರ್ಡ್ಸನ್ ಈಗಾಗಲೇ ಟೂರ್ನಿಯಿಂದ ಔಟ್ ಆಗಿದ್ದಾರೆ. ಮತ್ತೊಂದೆಡೆ ಸ್ಪಿನ್ನರ್ ಆಡಂ ಝಾಂಪ ಕೂಡ ಬಹುತೇಕ ಅನುಮಾನ ಎನ್ನಲಾಗುತ್ತಿದೆ. ಆರ್ಸಿಬಿ ಈ ಬಾರಿ ಯೋಗ್ಯ ಸಂಯೋಜನೆಯನ್ನು ಹೊಂದಿದೆ. ಇದರ ನಡುವೆ ಆಸ್ಟ್ರೇಲಿಯಾ ವೇಗಿ ಕೇನ್ ರಿಚರ್ಡ್ಸನ್ ಹಾಗೂ ಆಡಂ ಝಾಂಪ ಅವರ ಅಲಭ್ಯತೆಯು ಆರ್ಸಿಬಿಗೆ ಭಾರಿ ಹಿನ್ನಡೆ ತಂದೊಡ್ಡುವ ಸಾಧ್ಯತೆ ಇದೆ. ಈ ಹಿನ್ನೆಲೆಯಲ್ಲಿ ಇವರ ಸ್ಥಾನಕ್ಕೆ ಬದಲಿ ಆಟಗಾರರಿಗಾಗಿ ಬೆಂಗಳೂರು ಫ್ರಾಂಚೈಸಿ ಪ್ರಯತ್ನಿಸುತ್ತಿರಬಹುದು. ಆರ್ಸಿಬಿಯಲ್ಲಿ ಈ ಇಬ್ಬರ ಸ್ಥಾನವನ್ನು ಮೂವರು ಆಟಗಾರರು ತುಂಬಬಹುದು. ಎವಿನ್ ಲೆವಿಸ್: ವೆಸ್ಟ್ ಇಂಡೀಸ್ ತಂಡದ ಆಟಗಾರ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಗೆ ಹೊಸ ಆಟಗಾರನಲ್ಲ. ಅವರು 2018 ಮತ್ತು 2019ರಲ್ಲಿಯೇ ಮುಂಬೈ ಇಂಡಿಯನ್ಸ್ ತಂಡವನ್ನು ಪ್ರತಿನಿಧಿಸಿದ್ದರು. 2018ರ ಆವೃತ್ತಿಯಲ್ಲಿ ಮುಂಬೈ ಇಂಡಿಯನ್ಸ್ ಪರ ಆಡಿದ್ದ ಎವಿನ್ ಲೆವಿಸ್, 13 ಪಂದ್ಯಗಳಿಂದ 138 ಸ್ಟ್ರೈಕ್ ರೇಟ್ ನೊಂದಿಗೆ 382 ರನ್ ಗಳಿಸಿದ್ದರು. ಆದರೂ ಅವರು 2021ರ ಆವೃತ್ತಿಯ ಐಪಿಎಲ್ ಆಟಗಾರರ ಹರಾಜಿನಲ್ಲಿ ಅನ್ಸೋಲ್ಡ್ ಆಗಿದ್ದರು. ಸ್ಪೋಟಕ ಹೊಡೆತಗಳ ಸಾಮರ್ಥ್ಯವಿರುವ ಎವಿನ್ ಲೆವಿಸ್ ಅವರನ್ನು ಆರ್ಸಿಬಿ ಸೇರಿಸಿಕೊಂಡರೆ, ದೇವದತ್ ಪಡಿಕ್ಕಲ್ ಜೊತೆಯಲ್ಲಿ ಆರಂಭಿಕನಾಗಿ ಕಣಕ್ಕೆ ಇಳಿಸಬಹುದು. ಒಂದು ವೇಳೆ ಲೆವಿಸ್ ಬಂದರೆ, ವಿರಾಟ್ ಕೊಹ್ಲಿ ಮೂರನೇ ಕ್ರಮಾಂಕಕ್ಕೆ ಮರಳಬಹುದು. ಆ ಮೂಲಕ ಗ್ಲೆನ್ ಮ್ಯಾಕ್ಸ್ವೆಲ್ ಮತ್ತು ಎಬಿ ಡಿ ವಿಲಿಯರ್ಸ್ ಅವರನ್ನೊಳಗೊಂಡಿರುವ ಮಧ್ಯಮ ಕ್ರಮಾಂಕ ಇನ್ನಷ್ಟು ಬಲಿಷ್ಠವಾಗಬಹುದು. : ಪುರುಷರ ಹಂಡ್ರೆಡ್ಸ್ ಸ್ಪರ್ಧೆಯಲ್ಲಿ ಅಗ್ರ ಸ್ಥಾನದಲ್ಲಿರುವ ಸೌಥೆರ್ನ್ ಬ್ರೇವ್ ತಂಡವನ್ನು ಮುನ್ನಡೆಸುತ್ತಿರುವ ಜೇಮ್ಸ್ ವಿನ್ಸ್ ಕೂಡ ಆರ್ಸಿಬಿಗೆ ಸೂಕ್ತ ಆಟಗಾರ. ವಿಶ್ವದಾದ್ಯಂತ ಟಿ20 ಲೀಗ್ಗಳಲ್ಲಿ ವಿನ್ಸ್, ಅಗ್ರ ದರ್ಜೆಯ ಬ್ಯಾಟ್ಸ್ಮನ್ ಆಗಿ ಗುರುತಿಸಿಕೊಂಡಿದ್ದಾರೆ. ಅತ್ಯುತ್ತಮ ಸ್ಟ್ರೋಕ್ ಆಟಗಾರನಾಗಿರುವ ವಿನ್ಸ್, ಹ್ಯಾಂಪ್ಶೈರ್ ಮತ್ತು ಇಂಗ್ಲೆಂಡ್ ತಂಡಗಳ ಪರ ಅಗ್ರ ಸ್ಥಾನದಲ್ಲಿ ಬ್ಯಾಟ್ ಮಾಡಿರುವ ಅನುಭವವನ್ನು ಹೊಂದಿದ್ದಾರೆ. ಈ ಹಿನ್ನೆಲೆಯಲ್ಲಿ ಆರ್ಸಿಬಿಗೆ ಇವರು ಸೂಕ್ತ ಆಯ್ಕೆ ಎಂದು ಹೇಳಬಹುದು. ಜೇಮ್ಸ್ ವಿನ್ಸ್ ಅವರನ್ನು ಆರ್ಸಿಬಿ ಸೇರಿಸಿಕೊಂಡರೆ, ದೇವದತ್ ಪಡಿಕ್ಕಲ್ ಜೊತೆಗೆ ಆರಂಭಿಕನಾಗಿ ಪರಿಗಣಿಸಬಹುದು. ಆ ಮೂಲಕ ನಾಯಕ ವಿರಾಟ್ ಕೊಹ್ಲಿ ಮೂರನೇ ಕ್ರಮಾಂಕಕ್ಕೆ ಮರಳಬಹುದು. ಸದ್ಯ ಅತ್ಯುತ್ತಮ ಬ್ಯಾಟಿಂಗ್ ಫಾರ್ಮ್ನಲ್ಲಿರುವ ವಿನ್ಸ್, ಆರ್ಸಿಬಿಗೆ ಮರಳಿದರೆ, ನಾಯಕ ವಿರಾಟ್ ಕೊಹ್ಲಿ ಮೇಲಿನ ಒತ್ತಡ ಕಡಿಮೆಯಾಗಬಹುದು. ಡೇವಿಡ್ ವಿಲ್ಲೀ: ಕಳೆದ 2019ರ ಐಸಿಸಿ ಏಕದಿನ ವಿಶ್ವಕಪ್ ಟೂರ್ನಿಯ ಇಂಗ್ಲೆಂಡ್ ತಂಡದಿಂದ ಅನಿರೀಕ್ಷಿತವಾಗಿ ಹೊರ ನಡೆದಿದ್ದ ಅವರು ತಮ್ಮ ಸಾಮರ್ಥ್ಯ ಸಾಬೀತುಪಡಿಸಲು ವಿಶ್ವದಾದ್ಯಂತ ಟಿ20 ಲೀಗ್ಗಳಲ್ಲಿ ತೊಡಗಿಕೊಂಡಿದ್ದಾರೆ. ಬೌಲಿಂಗ್ ಆಲ್ರೌಂಡರ್ ಆಗಿರುವ ವಿಲ್ಲೀ, ತಮ್ಮ ಬ್ಯಾಟಿಂಗ್ನಲ್ಲಿ ವಿಶೇಷ ಪ್ರತಿಭೆಯನ್ನು ಹೊಂದಿದ್ದಾರೆ. ಇತ್ತೀಚೆಗೆ ಹಂಡ್ರೆಡ್ ಟೂರ್ನಿಯ ಪಂದ್ಯದಲ್ಲಿ ಐಯಾನ್ ಮಾರ್ಗನ್ ತಂಡದ ವಿರುದ್ಧ ಕೇವಲ 40 ಎಸೆತಗಳಲ್ಲಿ 81 ರನ್ ಚೆಚ್ಚಿದ್ದರು. ಒಂದು ವೇಳೆ ಡೇವಿಡ್ ವಿಲ್ಲೀ ಆರ್ಸಿಬಿಗೆ ಸೇರ್ಪಡೆಯಾದರೆ, ತಂಡದಲ್ಲಿ ಹಲವು ಜವಾಬ್ದಾರಿಯನ್ನು ನಿರ್ವಹಿಸಬಹುದು. ಡೇವಿಡ್ ವಿಲ್ಲೀ ತಂಡದ ಕೆಳ ಮಧ್ಯಮ ಕ್ರಮಾಂಕದಲ್ಲಿ ಫಿನಿಷರ್ ಆಗಿ ಆಡಬಹುದು. ಎಡಗೈ ಹಾರ್ಡ್ ಹಿಟ್ಟಿಂಗ್ ಬ್ಯಾಟ್ಸ್ಮನ್ ಆಗಿರುವ ಹಿನ್ನೆಲೆಯಲ್ಲಿ ವಿಲ್ಲೀ, ಆರ್ಸಿಬಿಗೆ ಬ್ಯಾಟಿಂಗ್ ಡೆಪ್ತ್ ತಂದುಕೊಡಬಹುದು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2W5PPBi
