ಬೆಂಗಳೂರು: ಗೃಹ ಸಚಿವ ಹೇಳಿಕೆಗಳು ಸಾಕಷ್ಟು ವಿವಾದಗಳನ್ನು ಸೃಷ್ಟಿಸುತ್ತಿವೆ. ಗೃಹ ಸಚಿವರಾಗಿ ಜವಾಬ್ದಾರಿಯುತ ಸ್ಥಾನದಲ್ಲಿರುವ ಆರಗ ಜ್ಞಾನೇಂದ್ರ ಅವರು ಪ್ರಕರಣದ ಸಂದರ್ಭದಲ್ಲಿ ಕೊಟ್ಟ ಅಸೂಕ್ಷ್ಮ ಹೇಳಿಕೆ ವಿವಾದವನ್ನು ಸೃಷ್ಟಿ ಮಾಡಿತ್ತು. ಅದಷ್ಟೇ ಮಾತ್ರವಲ್ಲ, ಕೇಂದ್ರ ಸಚಿವ ಭಗವಂತ ಖೂಬಾ ಅವರನ್ನು ಬಂಧೂಕಿನಿಂದ ಗಂಡು ಹಾರಿಸಿ ಸ್ವಾಗತಿಸಿದ ವರ್ತನೆಯ ಬಗ್ಗೆ ಕೊಟ್ಟ ಹೇಳಿಕೆಗೂ ವಿರೋಧಗಳು ವ್ಯಕ್ತವಾಗಿದ್ದವು. ಮೈಸೂರು ಅತ್ಯಾಚಾರ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಾತನಾಡಿದ್ದ ಗೃಹ ಸಚಿವರು ವಿದ್ಯಾರ್ಥಿನಿ 7.30 ನಂತರ ಅಲ್ಲಿಗೆ ಏಕೆ ಹೋಗಿದ್ದಳು ಎಂಬ ಹೇಳಿಕೆಯನ್ನು ನೀಡಿದ್ದರು. ಅಷ್ಟೇ ಅಲ್ಲ, ಘಟನೆಯ ಬಗ್ಗೆ ಆಕ್ರೋಶ ವ್ಯಕ್ತಪಡಿಸಿದ್ದ ಕಾಂಗ್ರೆಸ್ ಪಕ್ಷದ ಮುಖಂಡರನ್ನು ತರಾಟೆಗೆ ತೆಗೆದುಕೊಳ್ಳುವ ಭರದಲ್ಲಿ ಕಾಂಗ್ರೆಸ್‌ನವರು ನನ್ನ ಮೇಲೆಯೇ ರೇಪ್ ಮಾಡುವ ಪ್ರಯತ್ನ ನಡೆಸುತ್ತಿದ್ದಾರೆ ಎಂಬ ಹೇಳಿಕೆಯನ್ನು ನೀಡಿದ್ದರು. ಸಚಿವರ ಈ ಹೇಳಿಕೆ ಭಾರೀ ವಿವಾದಕ್ಕೆ ಕಾರಣವಾಗಿತ್ತು. ಕಾಂಗ್ರೆಸ್ ಸೇರಿದಂತೆ ವಿರೋಧ ಪಕ್ಷಗಳು ಈ ಹೇಳಿಕೆಯನ್ನು ಖಂಡಿಸಿದ್ದವು. ಸಾಮಾಜಿಕ ಜಾಲತಾಣಗಳಲ್ಲೂ ಇದು ವ್ಯಾಪಕ ಟೀಕೆಗೆ ಗುರಿಯಾಗಿತ್ತು. ಕೊನೆಗೆ ಆರಗ ಜ್ಞಾನೇಂದ್ರ ತಮ್ಮ ಹೇಳಿಕೆಯನ್ನು ಹಿಂದಕ್ಕೆ ಪಡೆದುಕೊಂಡಿದ್ದರು. ಇದೊಂದು ಉದಾಹರಣೆ ಮಾತ್ರವಲ್ಲ, ಕೇಂದ್ರ ಸಚಿವ ಭಗವಂತ ಖೂಬಾ ಅವರನ್ನು ಸ್ವಾಗತಿಸುವ ಸಂದರ್ಭದಲ್ಲಿ ಕಾರ್ಯಕರ್ತರು ಗಾಳಿಯಲ್ಲಿ ಗುಂಡು ಹೊಡೆದಿದ್ದರು. ಇದರ ಬಗ್ಗೆ ಮಾಧ್ಯಮಗಳ ಪ್ರಶ್ನೆಗೆ ಉತ್ತರಿಸಿದ ಗೃಹ ಸಚಿವ ಆರಗ ಜ್ಞಾನೇಂದ್ರ ಬಿಜೆಪಿ ಕಾರ್ಯಕರ್ತರ ನಡೆಯನ್ನು ಸಮರ್ಥಿಸಿಕೊಂಡಿದ್ದರು. ಗಾಳಿಯಲ್ಲಿ ಗುಂಡು ಹೊಡೆದು ಸ್ವಾಗತಿಸುವುದು ಸಂಪ್ರದಾಯ ಎಂದು ಕೃತ್ಯವನ್ನು ಸಮರ್ಥಿಸಿಕೊಂಡಿದ್ದರು. ಗೃಹ ಸಚಿವರಾಗಿ ಇಂತಹದೊಂದು ಹೇಳಿಕೆ ಕೊಟ್ಟಿದ್ದು ಹಾಗೂ ಸಂಪ್ರದಾಯದ ಹೆಸರಿನಲ್ಲಿ ಗಾಳಿಯಲ್ಲಿ ಗುಂಡು ಹೊಡೆದಿದ್ದನ್ನು ಸಮರ್ಥಿಸಿದ ನಡೆಗೆ ಕಾಂಗ್ರೆಸ್ ಮಾತ್ರವಲ್ಲ ಸಾಮಾಜಿಕ ಜಾಲತಾಣಗಳಲ್ಲೂ ವಿರೋಧ ವ್ಯಕ್ತವಾಗಿತ್ತು. ಗೃಹ ಸಚಿವರು ತಮ್ಮ ಸ್ಥಾನಕ್ಕೆ ತಕ್ಕುದಾಗಿ ಮಾತನಾಡುತ್ತಿಲ್ಲ ಎಂಬ ಟೀಕೆಯೂ ವ್ಯಕ್ತವಾಗಿತ್ತು. ಒಟ್ಟಿನಲ್ಲಿ ಗೃಹ ಸಚಿವರ ಅಸೂಕ್ಷ್ಮ ಹೇಳಿಕೆಗಳು ಚರ್ಚೆಗೆ ಗ್ರಾಸವಾಗುತ್ತಿದೆ. ಹಲವು ಮಂದಿ ಸಾಮಾಜಿಕ ಜಾಲತಾಣಗಳಲ್ಲಿ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. “ಮೈಸೂರು ಅತ್ಯಾಚಾರದ ಆರೋಪಿಗಳ ಬಂಧನಕ್ಕೆ ಸಂಬಂಧಿಸಿದಂತೆ ಮಾತನಾಡಿದ ನಮ್ಮ ಗೃಹ ಮಂತ್ರಿಗಳು "ಸಂತೋಷವಾಗಿದೆ" "ನಾಡಿಗೆ ಒಳ್ಳೆಯ ಸುದ್ದಿ" ಎಂಬೆಲ್ಲ ಪದ ಬಳಸಿದರು. ನಡೆದುಹೋಗಿರುವ ಪಾಶವೀ ಕೃತ್ಯವೊಂದರ ಸಂಬಂಧದಲ್ಲಿ ಇಂತಹ ಪದ ಬಳಸುವುದು ಸೂಕ್ತವಲ್ಲ. ಬೇಕಿದ್ದರೆ "ಸಮಾಧಾನವಾಗಿದೆ" ಎಂದು ಹೇಳಲಿ, "ಸಂತೋಷವಾಗಿದೆ" ಎಂದಲ್ಲ. ಪೊಲೀಸ್ ಐಜಿಪಿಯಾದರೂ ತುಂಬಾ ಜಾಗರೂಕತೆಯಿಂದ ಪದ ಬಳಸಿದರು. ಖುಷಿಯಾಗಿದೆ ಎಂದು ಅವರು ತಪ್ಪಿಯೂ ಹೇಳಲಿಲ್ಲ. ಯಾಕೆಂದರೆ ಇದು ಖುಷಿಯ ವಿಷಯ ಅಲ್ಲ ಎಂಬುದು ಅವರಿಗೆ ಗೊತ್ತು” ಎಂದು ಶ್ರೀನಿವಾಸ್ ಕಾರ್ಕಳ ಎಂಬುವವರು ತಮ್ಮ ಫೇಸ್ ಬುಕ್‌ನಲ್ಲಿ ವಾಲ್‌ ನಲ್ಲಿ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಗೃಹ ಸಚಿವರ ಸೂಕ್ಷ್ಮ ಸಂವೇದನೆಯ ನರ ಕಿತ್ತು ಹಾಕಿದ್ದಾರೆ ಎಂದು ಇದಕ್ಕೆ ಹರೀಶ್ ಡಿ ಪೂಜಾರಿ ಎಂಬುವವರು ಪ್ರತಿಕ್ರಿಯೆ ನೀಡಿದ್ದಾರೆ. ನಂದಕುಮಾರ್ ಎಂಬುವವರು ಪ್ರತಿಕ್ರಿಯೆ ನೀಡಿ, “ಇಂತಹವರಿಂದ ಕೂಡಲೇ ರಾಜಿನಾಮೆಯನ್ನು ರಾಜ್ಯದ ಜನರು ಪಡೆದುಕೊಳ್ಳಬೇಕು. ಇಲ್ಲವೇ ಅವರಾಗಿಯೇ ರಾಜಿನಾಮೆ ಕೊಟ್ಟು ಹೊರಡಬೇಕು. ಇನ್ನಷ್ಟು ಅವಾಂತರಗಳಾಗೋ ಮೊದಲು ಎಚ್ಚರ ವಹಿಸುವುದು ಅಗತ್ಯ” ಎಂದಿದ್ದಾರೆ. ಒಟ್ಟಿನಲ್ಲಿ ಗೃಹ ಸಚಿವರು ನೀಡುತ್ತಿರುವ ಅಸೂಕ್ಷ್ಮ ಹೇಳಿಕೆಗಳು ಎಡವಟ್ಟುಗಳು ಚರ್ಚೆಗೆ ಗ್ರಾಸವಾಗುತ್ತಿದೆ. ಆರಂಭಿಕ ಹಂತದಲ್ಲಿ ಆಡಳಿತ ನಿರ್ವಹಣೆಯಲ್ಲಿ ಕೆಲವು ಸಮಸ್ಯೆಗಳಾಗುವುದು ಸಹಜ. ಆದರೆ ಹೇಳಿಕೆಗಳು ಗಂಭೀರವಾಗಿರಬೇಕಲ್ಲವೇ ಎಂಬುವುದು ಪ್ರಶ್ನೆ. ಈ ನಿಟ್ಟಿನಲ್ಲಿ ಆರಗ ಜ್ಞಾನೇಂದ್ರ ಅವರೂ ಎಚ್ಚೆತ್ತುಕೊಳ್ಳಬೇಕಿದೆ.
from India & World News in Kannada | VK Polls https://ift.tt/3gHtP6H
