ವಾಷಿಂಗ್ಟನ್: ಅಫ್ಘಾನಿಸ್ತಾನದಿಂದ ನಾಗರಿಕರು ಹಾಗೂ ಸೈನಿಕರನ್ನು ಏರ್‌ಲಿಫ್ಟ್ ಮಾಡುವ ಅಮೆರಿಕದ ಅಂತಿಮ ಹಂತದ ಕಾರ್ಯಾಚರಣೆಗೆ ಆತ್ಮಾಹುತಿ ಬಾಂಬ್ ದಾಳಿಯ ಬೆದರಿಕೆಗಳು ಹಿನ್ನಡೆಯುಂಟುಮಾಡಿವೆ. ಸೇನಾಪಡೆಗಳು ಅಫ್ಘಾನಿಸ್ತಾನದಿಂದ ತೆರವುಗೊಳ್ಳಲು ನೀಡಿದ್ದ ಗಡುವು ಪೂರ್ಣಗೊಳ್ಳಲು ಎರಡು ದಿನಗಳು ಮಾತ್ರ ಬಾಕಿ ಇವೆ. ಆದರೆ ಅಷ್ಟರೊಳಗೆ ಮತ್ತೊಂದು ಭೀಕರ ದಾಳಿ ನಡೆಯುವ ಸಾಧ್ಯತೆ ಇದೆ ಎಂದು ಅಧ್ಯಕ್ಷ ಎಚ್ಚರಿಕೆ ನೀಡಿದ್ದಾರೆ. ಎರಡು-ಮೂರು ವಾರಗಳ ಹಿಂದೆ ಉಗ್ರರು ದೇಶವನ್ನು ಅತಿಕ್ರಮಿಸಿಕೊಳ್ಳಲು ಆರಂಭಿಸಿದ ಸಮಯದಿಂದ ಈವರೆಗೂ ಅಮೆರಿಕ ಸುಮಾರು 1,12,000 ಜನರನ್ನು ಸ್ಥಳಾಂತರ ಮಾಡಿದೆ. ಇನ್ನೂ ಸಾವಿರಾರು ಜನರು ದೇಶದಲ್ಲಿಯೇ ಇದ್ದಾರೆ ಎಂದು ಅಮೆರಿಕ ಹಾಗೂ ಅದರ ಮಿತ್ರಪಡೆಗಳು ಹೇಳುತ್ತಿವೆ. ಆದರೆ ಏರ್ ಲಿಫ್ಟ್ ಕಾರ್ಯಾಚರಣೆ ತೀವ್ರ ನಿಧಾನಗತಿ ಪಡೆದಿದೆ. ಗುರುವಾರ ಸಂಜೆ ಅಮೆರಿಕದ ಪಡೆಗಳನ್ನು ಗುರಿಯನ್ನಾಗಿಸಿ ಐಸಿಸ್-ಕೆ ನಡೆಸಿದ ಭಯಾನಕ ಆತ್ಮಾಹುತಿ ಬಾಂಬ್ ದಾಳಿಯಲ್ಲಿ ಜನಸಾಮಾನ್ಯರು ಹಾಗೂ ತಾಲಿಬಾನ್ ಉಗ್ರರು ಕೂಡ ಮೃತಪಟ್ಟಿದ್ದರು. ಇದರಿಂದ ವಿಮಾನ ನಿಲ್ದಾಣದ ಹೊರಭಾಗದಲ್ಲಿ ಭಾರಿ ಆತಂಕದ ವಾತಾವರಣ ಸೃಷ್ಟಿಯಾಗಿದೆ. ಸ್ಥಳಾಂತರದ ಹತಾಶೆಯ ಪ್ರಯತ್ನಗಳು ರಕ್ತಪಾತದ ಸನ್ನಿವೇಶಕ್ಕೆ ಸಾಕ್ಷಿಯಾಗಿದೆ. ವಿಮಾನ ನಿಲ್ದಾಣದೊಳಗೆ ಸಾವಿರಾರು ಸಂಖ್ಯೆಯಲ್ಲಿ ಜನರು ತುಂಬಿದ್ದು, ಹೊರಭಾಗದಲ್ಲಿಯೂ ಜನರು ಸೇರಿಕೊಂಡಿದ್ದಾರೆ. 'ಸ್ಥಳದಲ್ಲಿನ ಪರಿಸ್ಥಿತಿ ಇನ್ನೂ ಅಪಾಯಕಾರಿಯಾಗಿಯೇ ಇದೆ. ವಿಮಾನ ನಿಲ್ದಾಣದ ಮೇಲಿನ ಉಗ್ರರ ಸಂಭಾವ್ಯ ದಾಳಿಯ ಬೆದರಿಕೆ ಅಧಿಕವಾಗಿದೆ. ಮುಂದಿನ 24-36 ಗಂಟೆಗಳಲ್ಲಿ ಮತ್ತೊಂದು ದಾಳಿ ನಡೆಯುವ ಸಾಧ್ಯತೆ ಹೆಚ್ಚಾಗಿದೆ ಎಂದು ನಮ್ಮ ಸೇನಾಧಿಕಾರಿಗಳು ನನಗೆ ಮಾಹಿತಿ ನೀಡಿದ್ದಾರೆ' ಎಂದು ಜೋ ಬೈಡನ್ ಹೇಳಿದ್ದಾರೆ. ಗುರುವಾರದ ದಾಳಿಯ ಬೆನ್ನಲ್ಲೇ ಪ್ರತೀಕಾರದ ಕ್ರಮ ಅನುಸರಿಸಿದ್ದ ಅಮೆರಿಕ, ತನ್ನ ಡ್ರೋನ್‌ ದಾಳಿಗಳು ಪೂರ್ವ ಅಫ್ಘಾನಿಸ್ತಾನದಲ್ಲಿನ ಸಂಘಟನೆಯ ಇಬ್ಬರು ಪ್ರಮುಖ ಜಿಹಾದಿಗಳನ್ನು ಹತ್ಯೆ ಮಾಡಿವೆ ಎಂದು ತಿಳಿಸಿದೆ. ಆದರೆ ಇಷ್ಟಕ್ಕೆ ಐಸಿಸ್ ಸುಮ್ಮನಾಗುವುದಿಲ್ಲ. ಅದು ಮತ್ತೆ ದಾಳಿ ನಡೆಸಲಿದೆ ಎಂದು ಅಮೆರಿಕ ಎಚ್ಚರಿಕೆ ನೀಡಿದೆ. ದಾಳಿಯಲ್ಲಿ ತಮ್ಮ ಸೈನಿಕರು ಬಲಿಯಾಗಿದ್ದರಿಂದ ಆಕ್ರೋಶಗೊಂಡಿದ್ದ ಅಮೆರಿಕ ಅಧ್ಯಕ್ಷ ಜೋ ಬೈಡನ್, 'ನಾವು ನಿಮ್ಮನ್ನು ಹೊಡೆದುರುಳಿಸುತ್ತೇವೆ. ನೀವು ಮಾಡಿದ ತಪ್ಪಿಗೆ ದಂಡ ತೆರುವಂತೆ ಮಾಡುತ್ತೇವೆ' ಎಂದು ಉಗ್ರರನ್ನು ಬೇಟೆಯಾಡುವ ಶಪಥ ಮಾಡಿದ್ದರು. ಈ ಹೇಳಿಕೆ ಬೆನ್ನಲ್ಲೇ, ದಾಳಿಯ ಹಿಂದಿನ ಮುಖ್ಯ ಸಂಚುಕೋರರನ್ನು ಪತ್ತೆಹಚ್ಚಿ ಅವರನ್ನು ಹತ್ಯೆ ಮಾಡುವಂತೆ ಬೈಡನ್ ಆದೇಶಿಸಿದ್ದರು ಎನ್ನಲಾಗಿದೆ.
from India & World News in Kannada | VK Polls https://ift.tt/3jokjHb
