ಹೊಸದಿಲ್ಲಿ: ಗ್ರಾಹಕರಿಗೆ ಮತ್ತೊಂದು ಆಘಾತ ಎದುರಾಗಿದೆ. ಜನಪ್ರಿಯ ವಾಹನ ಬ್ರ್ಯಾಂಡ್ ತನ್ನ ಎಲ್ಲ ಬಗೆಯ ವಾಹನಗಳ ಬೆಲೆ ಏರಿಕೆಗೆ ತೀರ್ಮಾನಿಸಿದೆ. ತನ್ನ ಎಲ್ಲ ಮಾಡೆಲ್ ವಾಹನಗಳ ದರವನ್ನು ಸೆಪ್ಟೆಂಬರ್‌ನಿಂದ ಹೆಚ್ಚಿಸಲು ಮಾರುತಿ ಸುಜುಕಿ ಮುಂದಾಗಿದೆ. ಇನ್‌ಪುಟ್ ವೆಚ್ಚ ಹೆಚ್ಚಳದ ಹಿನ್ನೆಲೆಯಲ್ಲಿ ಈ ದರ ಏರಿಕೆ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಭಾರತದ ಅತಿ ದೊಡ್ಡ ತಯಾರಕ ಕಂಪೆನಿಯಾಗಿರುವ ಮಾರುತಿ ಸುಜುಕಿ ತನ್ನ ನಿಯಂತ್ರಕ ವರದಿಯಲ್ಲಿ ದರ ಹೆಚ್ಚಳದ ಮಾಹಿತಿ ನೀಡಿದೆ. 'ವಿವಿಧ ಇನ್‌ಪುಟ್ ವೆಚ್ಚಗಳ ಏರಿಕೆಯಿಂದ ಕಳೆದ ಒಂದು ವರ್ಷದಿಂದಲೂ ಕಂಪೆನಿಯ ವಾಹನಗಳ ಮೇಲೆ ಕೆಟ್ಟ ಪರಿಣಾಮ ಉಂಟಾಗುತ್ತಿರುವುದನ್ನು ನಿಮಗೆ ತಿಳಿಸಲು ಬಯಸುತ್ತೇವೆ. ಹೀಗಾಗಿ, ಬೆಲೆ ಏರಿಕೆಯ ಮೂಲಕ ಗ್ರಾಹಕರ ಮೇಲೆ ಹೆಚ್ಚುವರಿ ಹೊರೆ ವರ್ಗಾಯಿಸುವುದು ಅನಿವಾರ್ಯವಾಗಿದೆ' ಎಂದು ಕಂಪೆನಿ ತಿಳಿಸಿದೆ. 2021ರ ಸೆಪ್ಟೆಂಬರ್‌ನಿಂದಲೇ ಮಾರುತಿ ಸುಜುಕಿ ತನ್ನ ಎಲ್ಲ ಮಾಡೆಲ್‌ಗಳ ದರವನ್ನೂ ಹೆಚ್ಚಿಸಲು ಉದ್ದೇಶಿಸಿದೆ. ಆದರೆ ಯಾವ ಮಾಡೆಲ್ ಮೇಲೆ ಎಷ್ಟು ದರ ಏರಿಕೆ ಮಾಡಲಾಗುತ್ತದೆ ಎಂಬ ವಿವರಗಳನ್ನು ಅದು ನೀಡಿಲ್ಲ. ಇನ್‌ಪುಟ್ ವೆಚ್ಚ ಹೆಚ್ಚಳದ ಕಾರಣದಿಂದ ಸ್ವಿಫ್ಟ್ ಹ್ಯಾಚ್‌ಬ್ಯಾಕ್ ಹಾಗೂ ಇತರೆ ಎಲ್ಲ ಸಿಎನ್‌ಜಿ ವಾಹನಗಳ ಮೇಲಿನ ಬೆಲೆಯಲ್ಲಿನ ಬದಲಾವಣೆಯನ್ನು ಮಾರುತಿ ಜುಲೈನಲ್ಲಿ ಪ್ರಕಟಿಸಿತ್ತು. ಈ ಎಲ್ಲ ಮಾಡೆಲ್‌ಗಳ ಎಕ್ಸ್-ಷೋರೂಂ ದರವು ಸುಮಾರು 15,000 ರೂಪಾಯಿವರೆಗೆ ಏರಿಕೆಯಾಗಿದ್ದು, ಅದು ಆಗಸ್ಟ್ 30ರಿಂದ ಜಾರಿಯಾಗಿದೆ ಎಂದು ಕಂಪೆನಿ ತಿಳಿಸಿದೆ. ಪ್ರಸ್ತುತ ಕಂಪೆನಿಯು ಆಲ್ಟೋದಿಂದ ಎಸ್-ಕ್ರಾಸ್‌ವರೆಗೆ 2.99 ಲಕ್ಷ ರೂ. ದಿಂದ 12.39 ಲಕ್ಷ ರೂವರೆಗಿನ ವಿವಿಧ ಶ್ರೇಣಿಯ ಮಾಡೆಲ್ ವಾಹನಗಳನ್ನು ಮಾರಾಟ ಮಾಡುತ್ತಿದೆ. ಇಂಡೋ-ಜಪಾನ್ ಕಾರ್ ತಯಾರಕ ಕಂಪೆನಿಯು ಈ ವರ್ಷದಲ್ಲಿ ಇದು ಮೂರನೇ ಬಾರಿ ಬೆಲೆ ಹೆಚ್ಚಳ ಮಾಡುತ್ತಿರುವುದು. 2021ರ ಜನವರಿಯಲ್ಲಿ ಕೆಲವು ಆಯ್ದ ಮಾಡೆಲ್‌ಗಳ ಬೆಲೆಯನ್ನು 34,000 ರೂವರೆಗೂ ಹೆಚ್ಚಿಸಿತ್ತು. ಏಪ್ರಿಲ್‌ ತಿಂಗಳಲ್ಲಿ ಕೂಡ ಬೆಲೆ ಹೆಚ್ಚಳ ಮಾಡಲಾಗಿತ್ತು. ಈ ಎರಡೂ ಸಂದರ್ಭಗಳಲ್ಲಿ ಕೂಡ ಅದು ಇನ್‌ಪುಟ್ ವೆಚ್ಚ ಹೆಚ್ಚದ ಕಾರಣ ನೀಡಿತ್ತು.
from India & World News in Kannada | VK Polls https://ift.tt/3mJYjZB
