ವೆಂ.ಸುನೀಲ್‌ ಕುಮಾರ್‌ : ಸರಕಾರದಿಂದ ಬಡವರಿಗೆ ನೀಡುವ ಅಕ್ಕಿಯನ್ನು ಪಾಲಿಶ್‌ ಮಾಡಿ ಬ್ರಾಂಡ್‌ಗಳ ಹೆಸರಿನಲ್ಲಿ ಮಾರಾಟ ಮಾಡುವ ದಂಧೆ ಜಿಲ್ಲೆಯಲ್ಲಿ ಎಗ್ಗಿಲ್ಲದೆ ನಡೆಯುತ್ತಿದ್ದು, ಸ್ಥಳೀಯ ಮಟ್ಟದ ಅಧಿಕಾರಿಗಳು ಕ್ರಮಕ್ಕೆ ಮುಂದಾಗದಿರುವುದು ಸಂಶಯಗಳಿಗೆ ಕಾರಣವಾಗಿದೆ. ಗೋದಾಮುಗಳು ಹಾಗೂ ಚಿಲ್ಲರೆ ಮಾರಾಟಗಾರರಿಂದ ಪಡಿತರ ಖರೀದಿಸಿ ಮಿಲ್‌ಗಳಲ್ಲಿ ಪಾಲಿಶ್‌ ಮಾಡಿ ಮಾರಾಟ ಮಾಡುವ ಬಗ್ಗೆ ದೂರುಗಳಿವೆ. ಆದರೆ, ಹೆಚ್ಚಿನ ಸಂದರ್ಭದಲ್ಲಿ ಬೆಂಗಳೂರು ಮಟ್ಟದ ಅಧಿಕಾರಿಗಳೇ ದಾಳಿ ನಡೆಸಿ ದಂಧೆ ಬಯಲಿಗೆಳೆದಿರುವುದು ಅಚ್ಚರಿಯ ಸಂಗತಿಯಾಗಿದೆ. ಬಡವರಿಗೆ ಸರಕಾರದಿಂದ ನೀಡುವ ಅಕ್ಕಿಯನ್ನು ಕಾನೂನು ಬಾಹಿರವಾಗಿ ಖರೀದಿಸುವ ಮಿಲ್ ಮಾಲೀಕರು, ಅಕ್ಕಿಗೆ ಪಾಲಿಶ್‌ ಕೊಟ್ಟು ಬ್ರಾಂಡ್‌ ಹೆಸರಿನಲ್ಲಿ ಹೆಚ್ಚಿನ ಬೆಲೆಗೆ ಮಾರಾಟ ಮಾಡಿ ಲಾಭ ಗಳಿಸುತ್ತಾರೆ. ಪಡಿತರ ಅಕ್ಕಿಯ ಪಾಲಿಷ್‌ ದಂಧೆಯ ಬಗ್ಗೆ ಜಿಲ್ಲಾ ಹಾಗೂ ತಾಲೂಕು ಮಟ್ಟದ ಅಧಿಕಾರಿಗಳಿಗೆ ಮಾಹಿತಿಯಿದ್ದರೂ ಕ್ರಮಕ್ಕೆ ಮುಂದಾಗುವುದಿಲ್ಲ. ದಂಧೆಯ ಬಗ್ಗೆ ಮಾಹಿತಿ ನೀಡಿದ ಸಂದರ್ಭದಲ್ಲಿಇಲಾಖೆಯ ಅಧಿಕಾರಿಗಳೇ ಮಿಲ್‌ನವರಿಗೆ ಮಾಹಿತಿ ನೀಡುವ ಬಗ್ಗೆಯೂ ಆರೋಪಗಳಿವೆ. ಸರಕಾರಿ ಚೀಲ ಸಹಿತ ಅಕ್ಕಿ ರವಾನೆ: ಚಿಲ್ಲರೆ ಮಾರಾಟಗಾರರಿಂದ ಖರೀದಿಸುವುದು ಒಂದೆಡೆಯಾದರೆ, ವಿವಿಧ ಯೋಜನೆಗಳಡಿ ಫಲಾನುಭವಿಗಳಿಗೆ ನೀಡುವ ಪಡಿತರ ಅಕ್ಕಿಯನ್ನು ಸರಕಾರದ ಚೀಲ ಸಹಿತವಾಗಿ ಖಾಸಗಿ ಮಿಲ್ ಹೋಗುತ್ತಿರುವುದು ಹಲವು ಬಾರಿ ಬಯಲಾಗಿದೆ. ಅದರಲ್ಲಿಯೂ ಪ್ರಮುಖವಾಗಿ ಆಂಧ್ರ ಪ್ರದೇಶ ಹಾಗೂ ತಮಿಳುನಾಡು ಗಡಿಗಳಿಗೆ ಹೊಂದಿಕೊಂಡಿರುವ ಕೋಲಾರ ಜಿಲ್ಲೆಯ ಬಂಗಾರಪೇಟೆ, ದಂಧೆಯ ಪ್ರಮುಖ ಅಡ್ಡೆಯಾಗಿ ಪರಿವರ್ತನೆಯಾಗಿದೆ. ಜಿಲ್ಲಾ ಕೇಂದ್ರದಲ್ಲಿಯೂ ದಂಧೆ ಸಕ್ರಿಯವಾಗಿರುವುದು ಅಧಿಕಾರಿಗಳ ದಾಳಿಯಿಂದ ಸಾಬೀತಾಗಿದೆ.
from India & World News in Kannada | VK Polls https://ift.tt/3sWvJ8p
