ಹೊಸದಿಲ್ಲಿ: ಉಗ್ರರು ತಮ್ಮ ಸೈದ್ಧಾಂತಿಕ ಗುರಿಗಳ ಪೈಕಿ, ಭಾರತದಲ್ಲಿ ತಮ್ಮ ಆಳ್ವಿಕೆಯನ್ನು ಸ್ಥಾಪಿಸುವುದನ್ನೂ ಪ್ರಮುಖವಾಗಿ ಹೊಂದಿದ್ದಾರೆ ಎಂದು ಭಾರತದ ಗುಪ್ತಚರ ಇಲಾಖೆ ಮೂಲಗಳು ತಿಳಿಸಿವೆ. ಅಫ್ಘಾನಿಸ್ತಾನದ ಕಾಬೂಲ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಗುರುವಾರ ಸಂಜೆ ನಡೆದ ಭೀಕರ ಆತ್ಮಾಹುತಿ ಬಾಂಬ್ ದಾಳಿಯ ಹಿಂದೆ ಐಸಿಸ್‌ನ ಘಟಕ ಖೊರಾಸನ್ ಕೈವಾಡ ಇರುವುದು ದೃಢಪಟ್ಟಿತ್ತು. ಇದೇ ಸಂಘಟನೆ ಭಾರತದಲ್ಲಿ ತನ್ನ ನೆಲೆ ಸ್ಥಾಪಿಸಲು ಪ್ರಯತ್ನಗಳನ್ನು ನಡೆಸುತ್ತಿದೆ ಎನ್ನಲಾಗಿದೆ. ಈಗಾಗಲೇ ಅಫ್ಘಾನಿಸ್ತಾನದಲ್ಲಿ ಗಟ್ಟಿಯಾಗಿ ಬೇರೂರುತ್ತಿರುವ ಇಸ್ಲಾಮಿಕ್ ಸ್ಟೇಟ್-ಖೊರಾಸನ್ ಅಥವಾ ಐಸಿಸ್-ಕೆ ಗುಂಪು, ಕೇಂದ್ರ ಏಷ್ಯಾಕ್ಕೆ ಹಾಗೂ ನಂತರ ಭಾರತಕ್ಕೆ ಜಿಹಾದ್ ಅನ್ನು ವಿಸ್ತರಿಸುವ ಬಯಕೆ ಹೊಂದಿದೆ. ಈ ಕಾರ್ಯಕ್ಕಾಗಿ ಸ್ಥಳೀಯರನ್ನು ನೇಮಿಸಿಕೊಳ್ಳುವ ಕಾರ್ಯಕ್ಕೆ ಮುಂದಾಗಿದೆ. ಭಾರತದಲ್ಲಿ ನೆಲೆಯೂರುವ ತಮ್ಮ ಉದ್ದೇಶವನ್ನು ಈಡೇರಿಸಿಕೊಳ್ಳಲು ಭಯೋತ್ಪಾದನಾ ದಾಳಿಗಳನ್ನು ನಡೆಸುವುದು ಮತ್ತು ಯುವಕರನ್ನು ನೇಮಿಸಿಕೊಳ್ಳುವುದು ಅವರ ಅಜೆಂಡಾದ ಪ್ರಮುಖ ಆದ್ಯತೆಗಳಾಗಿವೆ. ಸೈದ್ಧಾಂತಿಕವಾಗಿ ಅವರು ಕ್ಯಾಲಿಫೇಟ್ (ಮುಸ್ಲಿಂ ಮುಖ್ಯಸ್ಥನ ಆಳ್ವಿಕೆ) ಸ್ಥಾಪಿಸುವ ಗುರಿ ಹೊಂದಿದ್ದಾರೆ. ಇದರಲ್ಲಿ ಭಾರತವೂ ಸೇರಿದೆ ಎಂದು ಗುಪ್ತಚರ ಇಲಾಖೆ ಮೂಲಗಳು ತಿಳಿಸಿವೆ. ಈಗಾಗಲೇ ಕೇರಳ ಮತ್ತು ಮುಂಬಯಿ ಮೂಲದ ಅನೇಕ ಯುವಕರು ಸೇರಿಕೊಂಡಿದ್ದು, ಜನರಲ್ಲಿ ಅತೀವ ಉಗ್ರವಾದದ ಆಸಕ್ತಿ ಮತ್ತು ಸೆಳೆತ ಇರುವುದನ್ನು ಭಯೋತ್ಪಾದನಾ ಗುಂಪುಗಳು ಕಂಡುಕೊಂಡಿವೆ. ಅವರ ಯೋಜನೆ ಯಶಸ್ವಿಯಾದರೆ ಭಾರತದಲ್ಲಿ ಅನೇಕ ಘಟಕಗಳು ಸಕ್ರಿಯವಾಗಲಿವೆ ಎಂದು ವರದಿಯಾಗಿದೆ. ಅಫ್ಘನ್ ನೆಲಕ್ಕೆ ಉಗ್ರರ ಸ್ಥಳಾಂತರಅಫ್ಘಾನಿಸ್ತಾನವನ್ನು ತನ್ನ ವಶಕ್ಕೆ ಪಡೆದುಕೊಂಡ ಬೆನ್ನಲ್ಲೇ, ದೇಶವು ವಿವಿಧ ಭಯೋತ್ಪಾದನಾ ಗುಂಪುಗಳನ್ನು ಆಕರ್ಷಿಸತೊಡಗಿದೆ. ಭಾರತದ ಮೇಲೆ ನಿರಂತರ ದಾಳಿಗಳನ್ನು ನಡೆಸುತ್ತಿರುವ ಪಾಕಿಸ್ತಾನ ಮೂಲದ ಜೈಷ್ ಎ ಮೊಹಮ್ಮದ್ ಕೂಡ ಅಫ್ಘಾನಿಸ್ತಾನದ ಕಂದಹಾರ್ ಸಮೀಪದ ಹೆಲ್ಮಾಂಡ್ ಪ್ರಾಂತ್ಯಕ್ಕೆ ತನ್ನ ನೆಲೆಯನ್ನು ವರ್ಗಾಯಿಸಿಕೊಂಡಿದೆ. ಇದೇ ರೀತಿ 2008ರ ಮುಂಬಯಿ ದಾಳಿಗಳಿಗೆ ಕಾರಣವಾಗಿದ್ದ ಲಷ್ಕರ್ ಎ ತಯಬಾ ಪೂರ್ವ ಅಫ್ಘಾನಿಸ್ತಾನದ ಕುನಾರ್‌ಗೆ ಸ್ಥಳಾಂತರಗೊಳ್ಳುತ್ತಿದೆ. ಅಫ್ಘಾನಿಸ್ತಾನದಲ್ಲಿ ಬೇರು ಬಿಟ್ಟ ಐಸಿಸ್ಆದರೆ ಐಸಿಸ್-ಕೆ ಭಾರತದಲ್ಲಿ ತನ್ನ ನೆಲೆಯನ್ನು ಸ್ಥಾಪಿಸಲು ವೇಗವಾಗಿ ಕೆಲಸ ಮಾಡುತ್ತಿದೆ. ತಾಲಿಬಾನ್ ತಾನು ನೀಡಿದ್ದ ಭದ್ರತೆಯ ಭರವಸೆಯನ್ನು ಒದಗಿಸಲು ಅಸಮರ್ಥವಾಗಿದೆ ಎಂಬುದನ್ನು ತೋರಿಸುವ ಸಲುವಾಗಿಯೇ ಐಸಿಸ್ ಕಾಬೂಲ್‌ನಲ್ಲಿ ಈ ದಾಳಿ ನಡೆಸಿದೆ ಎನ್ನಲಾಗಿದೆ. ತಾಲಿಬಾನ್ ಸಿದ್ಧಾಂತಗಳನ್ನು ಐಸಿಸ್ ಬೆಂಬಲಿಸುವುದಿಲ್ಲ. ಅಫ್ಘಾನಿಸ್ತಾನದಲ್ಲಿ ಪ್ರಮುಖವಾಗಿ ಅಧಿಕಾರವನ್ನು ತನ್ನ ಹಿಡಿತಕ್ಕೆ ಪಡೆದುಕೊಳ್ಳಲು ಐಸಿಸ್-ಕೆ ಕೂಡ ಬಯಸಿದೆ. ಅಮೆರಿಕವು ದೇಶದಲ್ಲಿ ತನ್ನ ಹಿಡಿತ ಸಾಧಿಸಿದ್ದ ಸಂದರ್ಭದಲ್ಲಿಯೇ ಐಸಿಸ್-ಕೆ ನಿಧಾನವಾಗಿ ಬೇರೂರಲು ಆರಂಭಿಸಿತ್ತು. ಪೂರ್ವ ಅಫ್ಘಾನಿಸ್ತಾನದಲ್ಲಿ 2014ರ ಕೊನೆಯಲ್ಲಿ ಮೊದಲ ಬಾರಿಗೆ ಕಾಣಿಸಿಕೊಂಡ ಐಸಿಸ್-ಕೆ, ತನ್ನ ಕ್ರೌರ್ಯಗಳ ಮೂಲಕ ಪ್ರತಿಷ್ಠೆ ಹೆಚ್ಚಿಸಿಕೊಳ್ಳುವ ಚಟುವಟಿಕೆಗಳನ್ನು ನಡೆಸಿತ್ತು.
from India & World News in Kannada | VK Polls https://ift.tt/3mGfafK
