ಸುನಿಲ್‌ ಪೊನ್ನೇಟಿ ಮಡಿಕೇರಿ ಮಡಿಕೇರಿ: ಮೈಸೂರು ದಸರಾದಲ್ಲಿ ಪಾಲ್ಗೊಳ್ಳಲು ಕೊಡಗಿನಿಂದ 7 ಆನೆಗಳನ್ನು ಗುರುತಿಸಲಾಗಿದೆ. ಕುಶಾಲನಗರ ತಾಲೂಕು ದುಬಾರೆ ಸಾಕಾನೆ ಶಿಬಿರದಲ್ಲಿ ಇರುವ ಈ ಆನೆಗಳನ್ನು ಈಗ ವಿಶೇಷ ಕಾಳಜಿಯಿಂದ ನೋಡಿಕೊಳ್ಳಲಾಗುತ್ತಿದೆ. ಕೊರೊನಾ ಹಿನ್ನೆಲೆ ಸೂಕ್ತ ಮುನ್ನೆಚ್ಚರಿಕಾ ಕ್ರಮಗಳನ್ನೂ ತೆಗೆದುಕೊಳ್ಳಲಾಗಿದೆ. ಕಾವೇರಿ ನದಿ ಸೃಷ್ಟಿಸಿರುವ ದ್ವೀಪದಲ್ಲಿರುವ ದುಬಾರೆ ಸಾಕಾನೆ ಶಿಬಿರಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದ ಮೈಸೂರು ವನ್ಯಜೀವಿ ವಿಭಾಗದ ಡಿಎಫ್‌ಒ ವಿ.ಕರಿಕಾಳನ್‌ ನೇತೃತ್ವದ ತಜ್ಞರ ತಂಡ ಮೈಸೂರು ದಸರಾದಲ್ಲಿ ಪಾಲ್ಗೊಳ್ಳಲಿರುವ ಆನೆಗಳನ್ನು ಗುರುತಿಸಿದೆ. ಸಮಗ್ರವಾಗಿ ಪರಿಶೀಲನೆ ನಡೆಸಿದ ನಂತರ ಆನೆಗಳ ಈ ತಂಡವನ್ನು ಶಿಫಾರಸ್ಸು ಮಾಡಲಾಗಿದೆ. ವಿಶ್ವ ವಿಖ್ಯಾತ ಮೈಸೂರು ದಸರಾದ ಪ್ರಮುಖ ಆಕರ್ಷಣೆಯೇ ಜಂಬೂ ಸವಾರಿ. ಅಂಬಾರಿಯನ್ನು ಹೆಗಲಿಗೇರಿಸಿಕೊಂಡ ಗಜರಾಜ ಮತ್ತು ಅದರ ಹಿಂದೆ ಇತರ ಆನೆಗಳು ಗಂಭೀರವಾಗಿ ಹೆಜ್ಜೆ ಹಾಕುತ್ತಿದ್ದರೆ ಅದನ್ನು ಕಣ್ಣು ತುಂಬಿಸಿಕೊಳ್ಳಲು ಎರಡು ಕಣ್ಣು ಕೂಡ ಸಾಲದು. ಆದರೆ, ಕೊರೊನಾ ಕಾರಣದಿಂದ ಕಳೆದ ವರ್ಷ ಅರಮನೆ ಆವರಣದಲ್ಲೇ ಜಂಬೂ ಸವಾರಿ ನಡೆದಿತ್ತು. ಈ ಬಾರಿಯೂ ಅದೇ ದಸರಾ ಪುನರಾವರ್ತನೆ ಆಗಲಿದೆ. ಮೈಸೂರು ದಸರಾದಲ್ಲಿ ಪಾಲ್ಗೊಳ್ಳಬೇಕಿರುವ ಆನೆಗಳನ್ನು ತಜ್ಞರ ತಂಡ ಗುರುತಿಸಿ ಆಯ್ಕೆ ಮಾಡಬೇಕಾಗುತ್ತದೆ. ಈ ವರ್ಷವೂ ಅದೇ ಶಿಷ್ಟಾಚಾರ ಪಾಲಿಸಲಾಗಿದೆ. ಆನೆಗಳ ದೈಹಿಕ ಸಾಮರ್ಥ್ಯ, ಮಾನಸಿಕ ಸ್ಥಿತಿಗತಿ, ಆರೋಗ್ಯ, ಆಹಾರ ಪದ್ಧತಿ, ಜೊತೆಗಾರ ಆನೆಯ ಜೊತೆಗಿನ ಹೊಂದಾಣಿಕೆ, ಮನುಷ್ಯರ ಜೊತೆಗಿನ ವರ್ತನೆ, ಹೊಂದಿಕೊಳ್ಳುವಿಕೆ ಮತ್ತಿತರ ಅಂಶಗಳನ್ನು ಗಮನಿಸಿ ಆನೆಗಳ ಆಯ್ಕೆ ನಡೆಯುತ್ತದೆ ಎನ್ನುತ್ತಾರೆ ತಜ್ಞರು. ಮೈಸೂರು ದಸರಾಕ್ಕೆ ತೆರಳಲಿರುವ ಆನೆಗಳ ತಂಡದ ಸದಸ್ಯರ ಪಟ್ಟಿ ಇದೀಗ ಬಹುತೇಕ ಖಚಿತವಾಗಿದೆ. ಬೆಂಗಳೂರಿನಿಂದ ಹಿರಿಯ ಅಧಿಕಾರಿಗಳು ಈ ಪಟ್ಟಿಯನ್ನು ಅಂತಿಮಗೊಳಿಸಿದ ನಂತರ ಗಜಪಯಣ ಆರಂಭವಾಗಲಿದೆ. ದಸರಾಕ್ಕೆ ಗುರುತಿಸಿರುವ ಆನೆಗಳು ಧನಂಜಯ (42), ಗೋಪಿ (43), ಪ್ರಶಾಂತ್‌ (52), ವಿಕ್ರಮ್‌ (59), ವಿಜಯ (53), ಲಕ್ಷ್ಮಣ (34) ಹಾಗೂ ಕಾವೇರಿ (44) ಸಾಕಾನೆ ಶಿಬಿರದಲ್ಲಿರುವ ದಸರಾ ಆನೆಗಳಿಗೆ ವಿಶೇಷ ಆತಿಥ್ಯ ಇರುವುದಿಲ್ಲ. ಎಲ್ಲಾ ಆನೆಗಳಿಗೆ ಕೊಡುವಂತೆಯೇ ಸಾಮಾನ್ಯ ಆಹಾರವನ್ನೇ ಪ್ರತಿನಿತ್ಯ ಕೊಡಲಾಗುತ್ತದೆ. ನಂತರ ಕಾಡಿಗೆ ಮೇಯಲು ಕಳುಹಿಸಲಾಗುತ್ತದೆ. ಬೆಳಗ್ಗೆ ಸಂಜೆ ನದಿಯಲ್ಲಿ ಸ್ನಾನ ಮಾಡಿಸಲಾಗುತ್ತದೆ. ಆದರೆ ಗಜಪಯಣದ ಮೂಲಕ ಮೈಸೂರು ಸೇರಿಕೊಳ್ಳುವ ದಸರಾ ಆನೆಗಳಗಳನ್ನು ಅಲ್ಲಿ ಕಾಳಜಿಪೂರ್ವಕ ಮುತುವರ್ಜಿಯಿಂದ ನೋಡಿಕೊಳ್ಳಲಾಗುತ್ತದೆ. ವಿಶೇಷ ಆಹಾರ ದುಬಾರೆ ಶಿಬಿರದ ಆನೆಗಳಿಗೆ ವಿಶೇಷವಾದ ಆಹಾರ ತಯಾರಿಸಲಾಗುತ್ತದೆ. ಹೆಸರು ಕಾಳು, ರಾಗಿ, ಹುರುಳಿ, ಅಕ್ಕಿ ಒಟ್ಟಿಗೆ ಬೇಯಿಸಿ ರುಚಿಕರ ಮತ್ತು ಪೌಷ್ಟಿಕ ಆಹಾರ ಸಿದ್ಧಪಡಿಸಲಾಗುತ್ತದೆ. ಜೊತೆಗೆ ಭತ್ತ, ಒಣಹುಲ್ಲು ಕೊಡಲಾಗುತ್ತದೆ. ರಾತ್ರಿ ವೇಳೆ ಆಹಾರಕ್ಕಾಗಿ ಕಾಡಿಗೂ ಕಳಿಸಲಾಗುತ್ತದೆ. ದುಬಾರೆ ಆನೆ ಶಿಬಿರದಿಂದ 7 ಆನೆಗಳನ್ನು ಮೈಸೂರು ದಸರಾಕ್ಕೆ ಗುರುತಿಸಲಾಗಿದೆ. ತಜ್ಞರ ತಂಡ ಈಗಾಗಲೇ ಈ ಆನೆಗಳ ಪರಿಶೀಲನೆ ನಡೆಸಿದೆ. ಬೆಂಗಳೂರಿನಿಂದ ಹಿರಿಯ ಅಧಿಕಾರಿಗಳು ಈ ಪಟ್ಟಿ ಅಂತಿಮಗೊಳಿಸಬೇಕಿದೆ. ಅನನ್ಯಕುಮಾರ್‌, ವಲಯ ಅರಣ್ಯಾಧಿಕಾರಿ, ಕುಶಾಲನಗರ ವಲಯ ಸತತ 8 ವರ್ಷಗಳಿಂದ ನನ್ನ ಆನೆಯನ್ನು ಮೈಸೂರು ದಸರಾಕ್ಕೆ ಕರೆದುಕೊಂಡು ಹೋಗುತ್ತಿದ್ದೇನೆ. ಪ್ರತಿ ವರ್ಷವೂ ಹೊಸ ಅನುಭವ ಸಿಗುತ್ತಿದೆ. ಈ ಬಾರಿಯೂ ಕಾವೇರಿ ಆನೆಯನ್ನು ಗುರುತಿಸಲಾಗಿದೆ. ಡೋಬಿ, ಕಾವೇರಿ ಆನೆಯ ಮಾವುತ
from India & World News in Kannada | VK Polls https://ift.tt/3gHUQqt
