ರಾಯಪುರ: ಪತಿಯ ವಿರುದ್ಧ ಪತ್ನಿ ಮಾಡಿದ್ದ ಅತ್ಯಾಚಾರ ಆರೋಪವನ್ನು ತಿರಸ್ಕರಿಸಿರುವ ಛತ್ತೀಸ್ಗಢ ಹೈಕೋರ್ಟ್, ಅಧಿಕೃತವಾಗಿ ಮದುವೆಯಾದ ಪತಿ ತನ್ನ ಪತ್ನಿ ಜತೆ ಹೊಂದುವ ಬಲವಂತದ ಲೈಂಗಿಕ ಸಂಪರ್ಕವನ್ನು ಅತ್ಯಾಚಾರ ಎಂದು ಪರಿಗಣಿಸಲಾಗದು ಎಂದು ಅಚ್ಚರಿಯ ತೀರ್ಪು ನೀಡಿದೆ. ಪತ್ನಿಗೆ ಇಷ್ಟ ಇಲ್ಲದಿದ್ದಾಗ ಬಲವಂತವಾಗಿ ಲೈಂಗಿಕ ಸಂಪರ್ಕ ಹೊಂದುವುದು ನೈತಿಕವಾಗಿ ಸರಿಯಿಲ್ಲದೇ ಇರಬಹುದು. ಆದರೆ ಅದನ್ನು ಅತ್ಯಾಚಾರ ಎಂದು ಪರಿಗಣಿಸಲು ಬರುವುದಿಲ್ಲ. ಕಾನೂನುಬದ್ಧ ದಾಂಪತ್ಯದಲ್ಲಿ ಅತ್ಯಾಚಾರ ಎನ್ನುವ ಪದಕ್ಕೆ ಅವಕಾಶ ಇಲ್ಲ ಎಂದು ನ್ಯಾಯಮೂರ್ತಿ ಎನ್.ಕೆ ಚಂದ್ರವಂಶಿ ತಿಳಿಸಿದ್ದಾರೆ. ಕಳೆದ ವರ್ಷ ನವೆಂಬರ್ನಲ್ಲಿ ಮದುವೆಯಾಗಿದ್ದ ಮಹಿಳೆ, ಒಂದೇ ತಿಂಗಳಲ್ಲಿ ಪತಿಯ ಮನೆಯವರ ವಿರುದ್ಧ ತಿರುಗಿಬಿದ್ದಿದ್ದರು. ಗಂಡ ಮತ್ತು ಆತನ ಮನೆಯವರು ತನ್ನನ್ನು ನಿರ್ಬಂಧಿಸುತ್ತಿದ್ದಾರೆ. ವರದಕ್ಷಿಣೆ ತರುವಂತೆ ಪೀಡಿಸುತ್ತಿದ್ದಾರೆ ಎಂದು ದೂರಿದ್ದರು. ಇದಾಗಿ ಜನವರಿಯಲ್ಲಿ ಮಹಾರಾಷ್ಟ್ರದ ಮಹಾಬಲೇಶ್ವರಕ್ಕೆ ಪ್ರವಾಸ ಬಂದಿದ್ದ ದಂಪತಿ ಅಲ್ಲಿಯೂ ಕಿತ್ತಾಟ ಮಾಡಿಕೊಂಡಿದ್ದರು. ‘ಗಿರಿಧಾಮದಲ್ಲಿ ಪತಿ ಬಲವಂತವಾಗಿ ನನ್ನ ಜತೆ ಲೈಂಗಿಕ ಸಂಪರ್ಕ ಹೊಂದಿದ. ಇದಾದ ಬಳಿಕ ನಾನು ಅನಾರೋಗ್ಯಕ್ಕೆ ತುತ್ತಾದೆ. ಸೋಂಟದ ಕೆಳಗೆ ಪಾಶ್ವ ಉಂಟಾಗಿರುವುದಾಗಿ ವೈದ್ಯರು ತಿಳಿಸಿದರು. ಇದಕ್ಕೆಲ್ಲ ಪತಿಯ ವರ್ತನೆಯೇ ಕಾರಣ ಎಂದು ಆರೋಪಿಸಿದ್ದ ಮಹಿಳೆ, ಬಳಿಕ ಪತಿಯ ವಿರುದ್ಧ ಅತ್ಯಾಚಾರದ ದೂರು ದಾಖಲಿಸಿದ್ದರು.
from India & World News in Kannada | VK Polls https://ift.tt/3sOhv9w
