ಟೋಕಿಯೋ: ಇಲ್ಲಿ ನಡೆಯುತ್ತಿರುವ ಪ್ಯಾರಾಲಿಂಪಿಕ್ಸ್ ಕ್ರೀಡಾಕೂಟದಲ್ಲಿ ಭಾರತದ ಅವರು ಮಹಿಳೆಯರ 10 ಮೀಟರ್‌ ಏರ್‌ ರೈಫಲ್‌ ಸ್ಟ್ಯಾಂಡಿಂಗ್‌ ಎಸ್‌ಎಚ್‌1 ವಿಭಾಗದಲ್ಲಿ ಚಿನ್ನದ ಪದಕ ಮುಡಿಗೇರಿಸಿಕೊಂಡಿದ್ದಾರೆ. ಆ ಮೂಲಕ ಪ್ಯಾರಾಲಿಂಪಿಕ್ಸ್ ಕ್ರೀಡಾಕೂಟದಲ್ಲಿ ಚಿನ್ನದ ಪದಕ ಗೆದ್ದ ಭಾರತದ ಮೊದಲ ಮಹಿಳೆ ಎಂಬ ದಾಖಲೆಗೆ ಅವನಿ ಭಾಜನರಾಗಿದ್ದಾರೆ. ಚಿನ್ನದ ಪದಕದ ಜೊತೆಗೆ ಭಾರತದ ಪ್ಯಾರಾ ಶೂಟರ್‌ 249.6 ಪಾಯಿಂಟ್ಸ್‌ಗಳೊಂದಿಗೆ ಪ್ಯಾರಾಲಿಂಪಿಕ್ಸ್ ವಿಶ್ವ ದಾಖಲೆಯನ್ನು ಸರಿಗಟ್ಟಿದ್ದಾರೆ. ಭಾರತದ ಶೂಟರ್‌ಗೆ ಕಠಿಣ ಪೈಪೋಟಿ ನೀಡಿದ್ದ ಚೀನಾದ ಕೂಪಿಂಗ್‌ ಝಾಂಗ್‌ 248.9 ಪಾಯಿಂಟ್ಸ್‌ಗಳೊಂದಿಗೆ ಬೆಳ್ಳಿ ಪದಕ ಪಡದುಕೊಂಡಿದ್ದಾರೆ ಹಾಗೂ ಉಕ್ರೈನ್‌ನ ಇರ್ಯಾನ ಸ್ಕೆಟ್ನಿಕ್‌ ಅವರು ಕಂಚಿನ ಪದಕಕ್ಕೆ ತೃಪ್ತಿಗೊಂಡರು. ಅವನಿ ಲೆಖಾರಾ ಅವರು ಐತಿಹಾಸಿಕ ಚಿನ್ನದ ಪದಕ ಗೆದ್ದ ಕೆಲವೇ ನಿಮಿಷಗಳಲ್ಲಿ ಪುರುಷರ ಡಿಸ್ಕಸ್‌ ಥ್ರೋ ವಿಭಾಗದಲ್ಲಿ ಭಾರತದ ಯೋಗೇಶ್ ಕಥುನಿಯಾ ಬೆಳ್ಳಿ ಪದಕ ತನ್ನದಾಗಿಸಿಕೊಂಡಿದ್ದಾರೆ. ಇದರೊಂದಿಗೆ ಕ್ರೀಡಾಕೂಟದಲ್ಲಿ ಭಾರತದ ಪದಕಗಳ ಪಟ್ಟಿ ಸಾಲಿಗೆ 5ನೇ ಪದಕ ಸೇರಿದಂತಾಗಿದೆ. ಟೋಕಿಯೋ ನ್ಯಾಷನಲ್‌ ಸ್ಟೇಡಿಯಂನಲ್ಲಿ ನಡೆದಿದ್ದ ಡಿಸ್ಕಸ್‌ ಥ್ರೋ ಅಂತಿಮ ಸುತ್ತಿನಲ್ಲಿ ಅವರು 44.38 ಮೀಟರ್‌ ಡಿಸ್ಕಸ್‌ ಎಸೆಯುವ ಮೂಲಕ ಬೆಳ್ಳಿ ಪದಕವನ್ನು ಗೆದ್ದಿದ್ದಾರೆ. ಹಾಲಿ ಚಾಂಪಿಯನ್‌ ಬ್ರೆಜಿಲ್‌ನ ಕ್ಲೌಡಿನಿ ಬಟಿಸ್ಟಾ ಡಾಸ್ ಸ್ಯಾಂಟೋಸ್ ಅವರು 45.33ಮೀಟರ್‌ ದೂರ ಎಸೆಯುವ ಮೂಲಕ ಚಿನ್ನದ ಪದಕಕ್ಕೆ ಮುತ್ತಿಟ್ಟರು. ಫೌಲ್ ಥ್ರೋನೊಂದಿಗೆ ಅಂತಿಮ ಸುತ್ತು ಆರಂಭಿಸಿದ ಯೋಗೇಶ್, ನಂತರ 42.84 ಮೀಟರ್‌ ಡಿಸ್ಕಸ್‌ ಎಸೆದಿದ್ದರು. ತದ ನಂತರ ಅವರು ಎರಡು ಫೌಲ್ ಥ್ರೋಗಳನ್ನು ಮಾಡಿದ್ದರು. ಬಳಿಕ ಎಚ್ಚೆತ್ತುಕೊಂಡ ಯೋಗೇಶ್, 43.55 ಹಾಗೂ 44.38 ಮೀಟರ್‌ ಡಿಸ್ಕಸ್‌ ಎಸೆಯುವ ಮೂಲಕ ಸುಧಾರಣೆ ಕಂಡರು ಹಾಗೂ ಅಂತಿಮವಾಗಿ ಬೆಳ್ಳಿ ಪದಕಕ್ಕೆ ಭಾಜನರಾದರು. ಭಾನುವಾರ ಭಾರತದ ಭಾವಿನಾ ಪಟೇಲ್‌ ಪ್ಯಾರಾಲಿಂಪಿಕ್ಸ್ ಕ್ರೀಡಾಕೂಟದ ಟೇಬಲ್‌ ಟೆನಿಸ್‌ ಕ್ರೀಡೆಯಲ್ಲಿ ಬೆಳ್ಳಿ ಪದಕ ಗೆಲ್ಲುವ ಮೂಲಕ ಈ ಸಾಧನೆ ಮಾಡಿದ ಭಾರತದ ಮೊದಲ ಆಟಗಾರ್ತಿ ಎಂಬ ಇತಿಹಾಸ ಬರೆದಿದ್ದರು. ಕ್ರೀಡಾಕೂಟದಲ್ಲಿ ಮನಮೋಹಕ ಪ್ರದರ್ಶನದೊಂದಿಗೆ ಟೇಬಲ್‌ ಟೆನಿಸ್‌ನ ಕ್ಲಾಸ್‌ 4 ವಿಭಾಗದಲ್ಲಿ ಫೈನಲ್‌ ತಲುಪಿದ್ದ ಭಾವಿನಾ, ಸ್ವರ್ಣ ಪದಕ್ಕಾಗಿ ನಡೆದ ಕಾಳಗದಲ್ಲಿ 0-3 ಅಂತರದಲ್ಲಿ ವಿಶ್ವದ ನಂ.1 ಪ್ಯಾರಾ ಟಿಟಿ ಪಟು ಚೀನಾದ ಯಿಂಗ್‌ ಝೌ ಎದುರು ನಿರಾಶೆ ಅನುಭವಿಸಿದರು. ಗ್ರೂಪ್‌ ಹಂತದ ಮೊದಲ ಪಂದ್ಯದಲ್ಲೂ ಆರು ಬಾರಿಯ ವಿಶ್ವ ಚಾಂಪಿಯನ್‌ ಯಿಂಗ್‌ ಎದುರು ಭಾವಿನಾ ನಿರಾಶೆ ಅನುಭವಿಸಿದ್ದರು. ಎರಡು ಬಾರಿಯ ಗೋಲ್ಡ್‌ ಮೆಡಲಿಸ್ಟ್‌ ಯಿಂಗ್‌ ಎದುರು ಭಾರತೀಯ ಆಟಗಾರ್ತಿ 7-11 5-11 6-11 ಅಂತರದ ಗೇಮ್‌ಗಳಿಂದ ಸೋತು ಬೆಳ್ಳಿ ಪದಕಕ್ಕೆ ತೃಪ್ತಿಪಟ್ಟರು. ಕೇವಲ 19 ನಿಮಿಷಗಳ ಅಂತರದಲ್ಲಿ ಚೀನಾದ ಆಟಗಾರ್ತಿ ಸ್ವರ್ಣ ಪದಕ ತಮ್ಮದಾಗಿಸಿಕೊಂಡಿದ್ದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3Blsg6k
