ಇಸ್ಲಾಮಾಬಾದ್: ಭಾರತವನ್ನು ಎದುರಿಸುವ ಸಲುವಾಗಿಯೇ ತಾಲಿಬಾನ್‌ಗೆ ಜನ್ಮನೀಡಿದೆ ಎಂದು ಅಫ್ಘಾನಿಸ್ತಾನದ ಮಾಜಿ ರಾಯಭಾರಿಯೊಬ್ಬರು, ಪಾಕ್ ಮಾಜಿ ಅಧ್ಯಕ್ಷ ಜನರಲ್ ಪರ್ವೇಜ್ ಮುಷರಫ್ ಹೇಳಿಕೆಯನ್ನು ಉಲ್ಲೇಖಿಸಿದ್ದಾರೆ. 'ಪರ್ವೇಜ್ ಮುಷರಫ್ ಅವರ ಪ್ರಕಾರ, ಭಾರತಕ್ಕೆ ಎದಿರೇಟು ನೀಡುವುದಕ್ಕಾಗಿಯೇ ಪಾಕಿಸ್ತಾನವು ತಾಲಿಬಾನ್‌ಗೆ ಜನ್ಮನೀಡಿದೆ. ಗುಲಾಮಗಿರಿಯ ಸಂಕೋಲೆಗಳನ್ನು ಒಡೆದಿದೆ ಎಂದು ಇಮ್ರಾನ್ ಖಾನ್ ನಂಬಿದ್ದಾರೆ. ಪಾಕಿಸ್ತಾನದ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಮೊಯೀದ್ ಯೂಸುಫ್ ಮತ್ತು ವಿದೇಶಾಂಗ ಸಚಿವ ಶಾ ಮಹಮೂದ್ ಖುರೇಷಿ ಅವರು ತಾಲಿಬಾನ್ ಜತೆ ಕೈಜೋಡಿಸುವಂತೆ ದೇಶಗಳೊಂದಿಗೆ ಲಾಬಿ ನಡೆಸುತ್ತಿದ್ದಾರೆ' ಎಂದು ಅಫ್ಘಾನಿಸ್ತಾನದ ಮಾಜಿ ಉಪ ವಿದೇಶಾಂಗ ಸಚಿವ ಹಾಗೂ ವಿಶ್ವಸಂಸ್ಥೆ ಮತ್ತು ಆಸ್ಟ್ರೇಲಿಯಾದ ರಾಯಭಾರಿ ಮಹ್ಮೌದ್ ಸಾಯ್ಕಲ್ ಟ್ವೀಟ್ ಮಾಡಿದ್ದಾರೆ. 'ಪಾಕಿಸ್ತಾನದೊಂದಿಗಿನ ಒತ್ತಡ/ ನಿರ್ಬಂಧ ಮತ್ತು ಷರತ್ತು ಆಧಾರಿತ ಕ್ರಮಗಳು ಮಾತ್ರವೇ ಅಫ್ಘಾನಿಸ್ತಾನದಲ್ಲಿ ಸಕಾರಾತ್ಮಕ ಬದಲಾವಣೆಗಳನ್ನು ತರಬಹುದು ಹಾಗೂ ಅಂತಾರಾಷ್ಟ್ರೀಯ ಶಾಂತಿ ಮತ್ತು ಭದ್ರತೆಯನ್ನು ನಿಭಾಯಿಸಬಲ್ಲದು' ಎಂದು ತಿಳಿಸಿದ್ದಾರೆ. ಐಎಸ್ಐಎಲ್-ಕೆ ಮತ್ತು ಅಲ್ ಕೈದಾ ನಡುವೆ ಸಾಂಕೇತಿಕ ಒಪ್ಪಂದ ನಡೆದಿರುವುದನ್ನು ವಿಶ್ವಸಂಸ್ಥೆಯ ಹೊಸ ವರದಿಯೊಂದು ಬಹಿರಂಗಡಿಸಿದೆ ಎಂದು ಸಾಯ್ಕಲ್ ತಿಳಿಸಿದ್ದಾರೆ. ಐಎಸ್ಐಎಲ್-ಕೆ ಮತ್ತು ಅಲ್ ಕೈದಾದ ಬಹುತೇಕ ಎಲ್ಲ ವಿದೇಶಿ ಸದಸ್ಯರೂ ಪಾಕಿಸ್ತಾನದ ಮೂಲಕ ಅಫ್ಘಾನಿಸ್ತಾನವನ್ನು ಪ್ರವೇಶಿಸಿದ್ದಾರೆ. ಅವರ ನಾಯಕರು ಮತ್ತು ತಾಲಿಬಾನ್ ನಾಯಕರು ಪಾಕಿಸ್ತಾನದಲ್ಲಿ ವಾಸಿಸುತ್ತಿದ್ದರು. ಕಾಬೂಲ್ ಅನ್ನು ತಾಲಿಬಾನ್ ವಶಪಡಿಸಿಕೊಂಡಿರುವುದು, ಈಗಾಗಲೇ ಉಗ್ರವಾದ/ತೀವ್ರವಾದ/ ಭಯೋತ್ಪಾದನಾ ಗುಂಪುಗಳನ್ನು ಅಫ್ಘಾನಿಸ್ತಾನಕ್ಕೆ ಬರುವಂತೆ ಆಹ್ವಾನಿಸಿದೆ. ಪಾಕಿಸ್ತಾನದ ಹೆಚ್ಚುತ್ತಿರುವ ಆಕ್ರಮಣತನವು ಅಫ್ಘಾನಿಸ್ತಾನವನ್ನು ಶೀಘ್ರದಲ್ಲಿಯೇ , ಅಂತಾರಾಷ್ಟ್ರೀಯ ಶಾಂತಿ ಮತ್ತು ಭದ್ರತೆಯ ಗೊಂದಲಮಯ ತಾಣವನ್ನಾಗಿ ಪರಿವರ್ತಿಸಲಿದೆ ಎಂದು ಆರೋಪಿಸಿದ್ದಾರೆ.
from India & World News in Kannada | VK Polls https://ift.tt/3zxTciU
