ವಾಷಿಂಗ್ಟನ್: ಗುರುವಾರ ಸಂಜೆ ಕಾಬೂಲ್ ವಿಮಾನ ನಿಲ್ದಾಣದಲ್ಲಿ ಆತ್ಮಾಹುತಿ ಬಾಂಬ್ ದಾಳಿಗಳನ್ನು ನಡೆಸಿದ ಇಸ್ಲಾಮಿಕ್ ಸ್ಟೇಟ್- ಖೊರಾಸನ್ ಸಂಘಟನೆಯ ಸಂಚುಕೋರನ ಮೇಲೆ ಡ್ರೋನ್ ದಾಳಿ ನಡೆಸಿರುವುದಾಗಿ ಸೇನೆ ತಿಳಿಸಿದೆ. 'ಅಫ್ಘಾನಿಸ್ತಾನದ ನಂಗರ್ಹಾರ್ ಪ್ರಾಂತ್ಯದಲ್ಲಿ ಶುಕ್ರವಾರ ಮಾನವರಹಿತ ವೈಮಾನಿಕ ದಾಳಿ ನಡೆಸಲಾಗಿದ್ದು, ನಾವು ನಮ್ಮ ಗುರಿಯನ್ನು ಹತ್ಯೆ ಮಾಡಿದ್ದೇವೆ ಎಂದು ಪ್ರಾಥಮಿಕ ಮಾಹಿತಿಗಳು ತಿಳಿಸಿವೆ. ಈ ದಾಳಿಯಲ್ಲಿ ಯಾವುದೇ ನಾಗರಿಕರ ಸಾವು ನೋವು ಸಂಭವಿಸಿಲ್ಲ' ಎಂದು ಕೇಂದ್ರ ಕಮಾಂಡ್‌ನ ಕ್ಯಾಪ್ಟನ್ ಬಿಲ್ ಅರ್ಬನ್ ಹೇಳಿದ್ದಾರೆ. ಕಾಬೂಲ್ ವಿಮಾನ ನಿಲ್ದಾಣದಲ್ಲಿ ಇಸ್ಲಾಮಿಕ್ ಸ್ಟೇಟ್‌ನ ಆತ್ಮಾಹುತಿ ಬಾಂಬ್ ದಾಳಿಕೋರ ತನ್ನನ್ನು ತಾನು ಸ್ಫೋಟಿಸಿಕೊಂಡ ಪರಿಣಾಮ ನೂರಾರು ಅಫ್ಘನ್ ಮಂದಿ ಹಾಗೂ 13 ಅಮೆರಿಕನ್ ಸೇನೆಯ ಸೈನಿಕರು ಬಲಿಯಾಗಿದ್ದರು. ಸ್ಫೋಟದ ಬಳಿಕ ಕೆಲವು ಬಂದೂಕುಧಾರಿಗಳು ಮನಬಂದಂತೆ ಗುಂಡಿನ ದಾಳಿ ನಡೆಸಿದ್ದರು. ಈ ಘಟನೆ ನಡೆದ 48 ಗಂಟೆಗಳ ಒಳಗೆ ಅಮೆರಿಕ ಪ್ರತೀಕಾರದ ದಾಳಿ ನಡೆದಿದೆ. ಈ ದಾಳಿಯಲ್ಲಿ 169 ಮಂದಿ ಪ್ರಜೆಗಳು ಸಾವಿಗೀಡಾಗಿದ್ದಾರೆ ಎನ್ನಲಾಗಿದೆ. ಸಾವಿನ ಸಂಖ್ಯೆ ಮತ್ತಷ್ಟು ಹೆಚ್ಚುವ ಸಾಧ್ಯತೆ ಇದೆ. ದಾಳಿಯಲ್ಲಿ ತಮ್ಮ ಸೈನಿಕರು ಬಲಿಯಾಗಿದ್ದರಿಂದ ಆಕ್ರೋಶಗೊಂಡಿದ್ದ ಅಮೆರಿಕ ಅಧ್ಯಕ್ಷ ಜೋ ಬೈಡನ್, 'ನಾವು ನಿಮ್ಮನ್ನು ಹೊಡೆದುರುಳಿಸುತ್ತೇವೆ. ನೀವು ಮಾಡಿದ ತಪ್ಪಿಗೆ ದಂಡ ತೆರುವಂತೆ ಮಾಡುತ್ತೇವೆ' ಎಂದು ಉಗ್ರರನ್ನು ಬೇಟೆಯಾಡುವ ಶಪಥ ಮಾಡಿದ್ದರು. ಈ ಹೇಳಿಕೆ ಬೆನ್ನಲ್ಲೇ, ದಾಳಿಯ ಹಿಂದಿನ ಮುಖ್ಯ ಸಂಚುಕೋರರನ್ನು ಪತ್ತೆಹಚ್ಚಿ ಅವರನ್ನು ಹತ್ಯೆ ಮಾಡುವಂತೆ ಬೈಡನ್ ಆದೇಶಿಸಿದ್ದರು ಎನ್ನಲಾಗಿದೆ. ಆಗಸ್ಟ್ 31ರ ಒಳಗೆ ಅಮೆರಿಕವು ತನ್ನ ಎಲ್ಲ ನಾಗರಿಕರನ್ನೂ ಅಫ್ಘಾನಿಸ್ತಾನದಿಂದ ಹೊರಗೆ ಸ್ಥಳಾಂತರ ಮಾಡಲು ಬಯಸಿದೆ. ಆದರೆ ಅದರೊಳಗೆ ಮತ್ತಷ್ಟು ಭೀಕರ ದಾಳಿಗಳು ನಡೆಯುವ ಸಾಧ್ಯತೆಯನ್ನು ಅಮೆರಿಕ ಊಹಿಸಿದೆ. ಹೀಗಾಗಿ ವಿಮಾನ ನಿಲ್ದಾಣದ ಹೊರಗಿನ ಭಾಗ ಹಾಗೂ ದ್ವಾರಗಳಿಂದ ದೂರ ಇರುವಂತೆ ಅದು ತನ್ನ ಪ್ರಜೆಗಳಿಗೆ ಮನವಿ ಮಾಡಿದೆ. ಎರಡು ಕಡೆ ಬಾಂಬ್ ದಾಳಿಗಳು ನಡೆದಿವೆ ಎಂದು ಆರಂಭದಲ್ಲಿ ವರದಿಯಾಗಿತ್ತು. ಆದರೆ ವಿಮಾನ ನಿಲ್ದಾಣದ ಅಬ್ಬೆ ಗೇಟ್‌ನಲ್ಲಿ ಮಾತ್ರ ನಡೆದಿದೆ. ಅದರ ಬಳಿಕ ಗುಂಡಿನ ದಾಳಿ ನಡೆಸಲಾಗಿದೆ ಎಂದು ಅಮೆರಿಕ ಹೇಳಿಕೆಯನ್ನು ತಿದ್ದಿತ್ತು. ಬಾರೋನ್ ಹೋಟೆಲ್ ಬಳಿ ಎರಡನೆಯ ದಾಳಿ ನಡೆದಿದೆ ಎಂಬ ವರದಿಗಳು ಸತ್ಯವಲ್ಲ ಎಂದು ಮೇಜರ್ ಜನರಲ್ ಹಾಂಕ್ ಟೇಲರ್ ಹೇಳಿದ್ದಾರೆ.
from India & World News in Kannada | VK Polls https://ift.tt/3yzvT73
