ಹೊಸದಿಲ್ಲಿ: ವಿರುದ್ಧ ಮೂರನೇ ಟೆಸ್ಟ್ ಪ್ರಥಮ ಇನಿಂಗ್ಸ್‌ನಲ್ಲಿ ಭಾರತ ತಂಡ ಕೇವಲ 78 ರನ್‌ಗೆ ಆಲ್‌ಔಟ್‌ ಆಗಿತ್ತು. ಆದರೆ, ಮೂರನೇ ದಿನ ದ್ವಿತೀಯ ಇನಿಂಗ್ಸ್‌ ಆರಂಭಿಸಿದ ಭಾರತ, ಎದುರಾಳಿ ತಂಡಕ್ಕೆ ಕಠಿಣ ಸವಾಲು ನೀಡುತ್ತಿದೆ. ಆದರೆ, ಭಾರತದ ಮಾಜಿ ಆರಂಭಿಕ , ಕೊಹ್ಲಿ ಪಡೆಗೆ ಅಪಶಕುನ ನುಡಿದಿದ್ದಾರೆ. ಲೀಡ್ಸ್‌ನ ಹೆಡಿಂಗ್ಲೆ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಟೆಸ್ಟ್ ಪಂದ್ಯದ ನಾಲ್ಕನೇ ದಿನ ಭಾರತ ತಂಡ ಸರ್ವಪತನ ಕಂಡರೂ ಅಚ್ಚರಿ ಪಡಬೇಕಾಗಿಲ್ಲ ಎಂದು ಆಕಾಶ್‌ ಚೋಪ್ರಾ ಕೊಹ್ಲಿ ಪಡೆಗೆ ಬೇಸರ ತರಿಸುವ ಹೇಳಿಕೆಯನ್ನು ನೀಡಿದ್ದಾರೆ. ದ್ವಿತೀಯ ಇನಿಂಗ್ಸ್‌ನಲ್ಲಿ ಕೆ.ಎಲ್‌ ರಾಹುಲ್‌ ವಿಕೆಟ್‌ ಬಹುಬೇಗ ಉರುಳಿದರೂ ರೋಹಿತ್‌ ಶರ್ಮಾ ಹಾಗೂ ಚೇತೇಶ್ವರ್‌ ಪೂಜಾರ ಜೋಡಿ ಮುರಿಯದ ಎರಡನೇ ವಿಕೆಟ್‌ಗೆ 89 ರನ್ ಗಳಿಸಿ ತಂಡವನ್ನು ಆರಂಭಿಕ ಆಘಾತದಿಂದ ಪಾರು ಮಾಡಿತ್ತು. ಅರ್ಧಶತಕ ಸಿಡಿಸಿದ ಬಳಿಕ ರೋಹಿತ್‌ ಶರ್ಮಾ ಎಲ್‌ಬಿಡಬ್ಲ್ಯು ಬಲೆಗೆ ಬಿದ್ದರು. ನಂತರ ಬಂದ ವಿರಾಟ್ ಕೊಹ್ಲಿ ಅಜೇಯ 45 ರನ್ ಗಳಿಸಿ ಅಜೇಯರಾಗಿ ಉಳಿದಿದ್ದಾರೆ. ಮತ್ತೊಂದು ತುದಿಯಲ್ಲಿ ಅದ್ಭುತ ಬ್ಯಾಟ್‌ ಮಾಡಿದ ಚೇತೇಶ್ವರ್‌ ಪೂಜಾರ 180 ಎಸೆತಗಳಲ್ಲಿ ಅಜೇಯ 91 ರನ್ ಗಳಿಸಿ ನಾಲ್ಕನೇ ದಿನಕ್ಕೆ ಬ್ಯಾಟಿಂಗ್‌ ಕಾಯ್ದುಕೊಂಡಿದ್ದಾರೆ. ಮೂರನೇ ದಿನದಾಟದ ಅಂತ್ಯಕ್ಕೆ ಭಾರತ 215 ರನ್‌ಗಳಿಗೆ ಎರಡು ವಿಕೆಟ್‌ ಕಳೆದುಕೊಂಡಿದೆ ಹಾಗೂ 139 ರನ್ ಹಿನ್ನಡೆಯಲ್ಲಿದೆ. ತಮ್ಮ ಯೂಟ್ಯೂಬ್‌ ಚಾನೆಲ್‌ನಲ್ಲಿ ಮಾತನಾಡಿರುವ ಆಕಾಶ್‌ ಚೋಪ್ರಾ, "ನಾಲ್ಕನೇ ದಿನ ಭಾರತ ತಂಡ ಇನ್ನೂ ಆರು ವಿಕೆಟ್‌ಗಳನ್ನು ಕಳೆದುಕೊಳ್ಳಲಿದೆ. ಈಗಾಗಲೇ ಎರಡು ವಿಕೆಟ್‌ ಕಳೆದುಕೊಂಡಿರುವ ಕೊಹ್ಲಿ ಪಡೆ, ಆಲೌಟಾದರೂ ಅಚ್ಚರಿ ಪಡಬೇಕಿಲ್ಲ. ಬ್ಯಾಟಿಂಗ್‌ ಪರಿಸ್ಥಿತಿ ಉತ್ತಮವಾಗಿದ್ದರೂ ಇದು ಸಂಭವಿಸಬಹುದು," ಎಂದು ಹೇಳಿದ್ದಾರೆ. ಇಂಗ್ಲೆಂಡ್‌ನ ಕ್ರೇಗ್ ಓವರ್ಟನ್‌ ಅತ್ಯುತ್ತಮ ಪ್ರದರ್ಶನ ತೋರಿದ ವೇಗಿಗಳಲ್ಲಿ ಒಬ್ಬರಾಗಲಿದ್ದಾರೆಂದು ಇದೇ ವೇಳೆ ಭಾರತ ತಂಡದ ಮಾಜಿ ಆರಂಭಿಕ ಬ್ಯಾಟ್ಸ್‌ಮನ್‌ ಆಕಾಶ್‌ ಚೋಪ್ರಾ ಹೇಳಿದ್ದಾರೆ. "ಕ್ರೇಗ್ ಓವರ್ಟನ್‌ ಇನ್ನೂ ಎರಡು ವಿಕೆಟ್‌ಗಳನ್ನು ತಮ್ಮ ಖಾತೆಗೆ ಹಾಕಿಕೊಳ್ಳಲಿದ್ದಾರೆ. ಎರಡನೇ ಹೊಸ ಚೆಂಡಿನಲ್ಲಿ ಇನ್ನೂ ಬೌಲ್‌ ಮಾಡಬೇಕಾಗಿದೆ ಹಾಗೂ ತುಂಬಾ ಉದ್ದ ಇರುವ ಕಾರಣ ಕ್ರೈಗ್‌ ಓವರ್ಟನ್‌, ನಾಲ್ಕನೇ ದಿನ ಹೆಚ್ಚುವರಿ ಬೌನ್ಸ್ ಹಾಕಲಿದ್ದಾರೆ," ಎಂದು ಪಂದ್ಯ ವಿವರಣಾಕಾರ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಭಾರತ ತಂಡದ ದ್ವಿತೀಯ ಇನಿಂಗ್ಸ್‌ನಲ್ಲಿ ಆಗಲೇ ಕ್ರೇಗ್ ಓವರ್ಟನ್‌, ಆರಂಭಿಕ ಕೆ.ಎಲ್‌ ರಾಹುಲ್‌ ಅವರ ವಿಕೆಟ್‌ ಅನ್ನು ಉರುಳಿಸಿದ್ದಾರೆ. ಇದಕ್ಕೂ ಮುನ್ನ ಪ್ರಥಮ ಇನಿಂಗ್ಸ್‌ನಲ್ಲಿ ಇಂಗ್ಲೆಂಡ್‌ ವೇಗಿ 14 ರನ್ ನೀಡಿ ಪ್ರಮುಖ ಮೂರು ವಿಕೆಟ್‌ಗಳನ್ನು ಪಡೆದುಕೊಂಡಿದ್ದರು. ಲಾರ್ಡ್ಸ್ ಟೆಸ್ಟ್‌ನಲ್ಲಿ ಚೋಪ್ರಾ ಭವಿಷ್ಯ ಸುಳ್ಳಾಗಿತ್ತು: ಕಳೆದ ಲಾರ್ಡ್ಸ್ ಟೆಸ್ಟ್ ಪಂದ್ಯದ ಐದನೇ ದಿನ ಭಾರತ ತಂಡ ಬಹುಬೇಗ ಆಲೌಟ್‌ ಆಗಲಿದೆ ಹಾಗೂ ಇಂಗ್ಲೆಂಡ್‌ ತಂಡ ಜಯ ದಾಖಲಿಸಲಿದೆ. ಒಂದು ವೇಳೆ ನನ್ನ ಮಾತು ಸುಳ್ಳಾದರೆ, ನೀವು ನನ್ನನ್ನು ಕೊಲ್ಲಬಹುದು ಎಂದು ಆಕಾಶ್‌ ಚೋಪ್ರಾ ಹೇಳಿದ್ದರು. ಆದರೆ, ಕಳೆದ ಪಂದ್ಯದಲ್ಲಿ ಭಾರತ ತಂಡ 151 ರನ್‌ಗಳ ಭರ್ಜರಿ ಜಯ ಗಳಿಸಿತ್ತು. ಇದಾದ ಬಳಿಕ ಆಕಾಶ್‌ ಚೋಪ್ರಾ, ತಮ್ಮ ಹೇಳಿಕೆ ಬಗ್ಗೆ ಯೂಟರ್ನ್‌ ತೆಗೆದುಕೊಂಡಿದ್ದರು. ಲೀಡ್ಸ್‌ ಟೆಸ್ಟ್ ಪಂದ್ಯದ ಸಂಕ್ಷಿಪ್ತ ಸ್ಕೋರ್‌ ಭಾರತ: ಮೊದಲ ಇನಿಂಗ್ಸ್‌ 40.4 ಓವರ್‌ಗಳಲ್ಲಿ 78 ರನ್‌ಗಳಿಗೆ ಆಲ್‌ಔಟ್‌ (ರೋಹಿತ್‌ ಶರ್ಮಾ 19, ಅಜಿಂಕ್ಯ ರಹಾನೆ 18; ಜೇಮ್ಸ್‌ ಆಂಡರ್ಸನ್‌ 6ಕ್ಕೆ 3, ಕ್ರೇಗ್ ಓವರ್ಟರ್ನ್ 14ಕ್ಕೆ 3, ಓಲ್ಲೀ ರಾಬಿನ್ಸನ್ 16ಕ್ಕೆ 2, ಟಾಮ್‌ ಕರ್ರನ್ 27ಕ್ಕೆ 2). ಇಂಗ್ಲೆಂಡ್‌: ಮೊದಲ ಇನಿಂಗ್ಸ್‌ 132.2 ಓವರ್‌ಗಳಲ್ಲಿ 432 ರನ್‌ಗಳಿಗೆ ಆಲ್‌ಔಟ್‌ (ರೋರಿ ಬರ್ನ್ಸ್‌ 61, ಹಸೀಬ್‌ ಹಮೀದ್‌ 68, ಜೋ ರೂಟ್ 121, ಡಾವಿಡ್‌ ಮಲಾನ್ 70; ಮೊಹಮ್ಮದ್‌ ಶಮಿ 95ಕ್ಕೆ 4, ಮೊಹಮ್ಮದ್‌ ಸಿರಾಜ್ 82ಕ್ಕೆ 2, ರವೀಂದ್ರ ಜಡೇಜಾ 88ಕ್ಕೆ 2, ಜಸ್‌ಪ್ರೀತ್‌ ಬುಮ್ರಾ 59ಕ್ಕೆ 2). ಭಾರತ: 80 ಓವರ್‌ಗಳಲ್ಲಿ 2 ವಿಕೆಟ್‌ಗಳ ನಷ್ಟಕ್ಕೆ 215 ರನ್ (ರೋಹಿತ್‌ ಶರ್ಮಾ 59, ಚೇತೇಶ್ವರ್‌ ಪೂಜಾರ 91*, ವಿರಾಟ್ ಕೊಹ್ಲಿ 45*; ಓಲ್ಲೀ ರಾಬಿನ್ಸನ್ 40ಕ್ಕೆ 1, ಕ್ರೇಗ್ ಓವರ್ಟರ್ನ್ 35ಕ್ಕೆ 1). (* ಮೂರನೇ ದಿನದಾಟದ ಅಂತ್ಯಕ್ಕೆ)
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/38kd7FP
