ಲೀಡ್ಸ್: ಮೂರನೇ ಟೆಸ್ಟ್ ಎರಡನೇ ದಿನ ಬ್ಯಾಟಿಂಗ್ ಗತ ವೈಭವ ಮೆರೆದು ವೃತ್ತಿ ಜೀವನದ 23ನೇ ಶತಕ ಸಿಡಿಸಿದ ನಾಯಕ ಎಲ್ಲರ ಮೆಚ್ಚುಗೆಗೆ ಪಾತ್ರರಾದರು. ಆ ಮೂಲಕ ಇಂಗ್ಲೆಂಡ್ ತಂಡದ 345 ರನ್ಗಳ ಬೃಹತ್ ಮುನ್ನಡೆಗೆ ಕಾರಣರಾದರು. ಜೊತೆಗೆ ದೀರ್ಘ ಕಾಲ ಬ್ಯಾಟ್ ಮಾಡುವ ಮೂಲಕ ಭಾರತೀಯ ಬೌಲರ್ಗಳ ವಿಶ್ವಾಸವನ್ನು ಕುಗ್ಗಿಸಿದರು. ಇಲ್ಲಿನ ಹೆಡಿಂಗ್ಲೆ ಟೆಸ್ಟ್ ಎರಡನೇ ದಿನದಾಟದ ಬಳಿಕ ಮಾತನಾಡಿದ ವೇಗಿ , ಇಂಗ್ಲೆಂಡ್ ನಾಯಕ ಜೋ ರೂಟ್ ರನ್ ಗಳಿಸುವ ಬಗ್ಗೆ ನಾವು ತಲೆ ಕೆಡಿಸಿಕೊಂಡಿಲ್ಲ. ಆದರೆ, ಪಂದ್ಯದ ಅಂತಿಮ ಫಲಿತಾಂಶದ ಬಗ್ಗೆ ನಾವು ಕಾಳಜಿ ವಹಿಸುತ್ತೇವೆ ಎಂದು ಹೇಳಿದ್ದಾರೆ. ಇದಕ್ಕೂ ಮುನ್ನ ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ್ದ ಭಾರತ ತಂಡ ಪ್ರಥಮ ಇನಿಂಗ್ಸ್ನಲ್ಲಿ ಕೇವಲ 78 ರನ್ಗೆ ಆಲ್ಔಟ್ ಆಗಿತ್ತು. ನಂತರ, ಪ್ರಥಮ ಇನಿಂಗ್ಸ್ ಆರಂಭಿಸಿ ಇಂಗ್ಲೆಂಡ್ ತಂಡ ಎರಡನೇ ದಿನದಾಟದ ಅಂತ್ಯಕ್ಕೆ 8 ವಿಕೆಟ್ ನಷ್ಟಕ್ಕೆ 423 ರನ್ ಗಳಿಸಿದ್ದು, 345 ರನ್ಗಳ ಬೃಹತ್ ಮುನ್ನಡೆ ಗಳಿಸಿದೆ. ವರ್ಚುವಲ್ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಶಮಿ, ಇಂಗ್ಲೆಂಡ್ ನಾಯಕ ಜೋ ರೂಟ್ ವಿರುದ್ಧ ಭಾರತೀಯ ಬೌಲರ್ಗಳು ಏಕೆ ವೈಫಲ್ಯ ಅನುಭವಿಸುತ್ತಿದ್ದಾರೆಂಬ ವಿಷಯದ ಬಗ್ಗೆ ಬೆಳಕು ಚೆಲ್ಲಿದ್ದಾರೆ. "ನೀವು ಹೊರಗಡೆ ನಿಂತು ಈ ಬಗ್ಗೆ ನೋಡಬೇಕಾಗುತ್ತದೆ. ಜೋ ರೂಟ್ ಮುಂದೆ ನಮ್ಮ ಬೌಲರ್ಗಳು ಹಿನ್ನಡೆ ಅನುಭವಿಸುತ್ತಿಲ್ಲ, ಬದಲಿಗೆ ಜೋ ರೂಟ್ ಸದ್ಯ ಅದ್ಭುತ ಫಾರ್ಮ್ನಲ್ಲಿದ್ದಾರೆ. ಯಾವುದೇ ಬ್ಯಾಟ್ಸ್ಮನ್ ಫಾರ್ಮ್ನಲ್ಲಿದ್ದರೆ, ಖಂಡಿತಾ ಸಾಕಷ್ಟು ರನ್ ಗಳಿಸುತ್ತಾರೆ. ಇಂತಹ ಸಮಯದಲ್ಲಿ ಅವರನ್ನು ಯಾವುದೇ ಬೌಲರ್ ನಿಯಂತ್ರಿಸಲು ಸಾಧ್ಯವಾಗುವುದಿಲ್ಲ," ಎಂದು ಹೇಳಿದರು. ಜೋ ರೂಟ್ ರನ್ ಹೊಳೆ ಹರಿಸುತ್ತಿದ್ದರೂ ಭಾರತ ತಂಡ ಪ್ರಸ್ತುತ ಐದು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ 1-0 ಮುನ್ನಡೆ ಗಳಿಸಿದೆ ಎಂಬ ಅಂಶವನ್ನು 30ರ ಪ್ರಾಯದ ವೇಗಿ ಒತ್ತಿ ಹೇಳಿದರು. "ಲಾರ್ಡ್ಸ್ ಟೆಸ್ಟ್ ಪಂದ್ಯದಲ್ಲಿ ಜೋ ರೂಟ್ ಶತಕ ಗಳಿಸಿದ ಹೊರತಾಗಿಯೂ ಭಾರತ ಗೆದ್ದಿದೆ. ಅವರು ಹೆಚ್ಚೂ-ಕಡಿಮೆ 200ರ ಸನಿಹ ರನ್ ಗಳಿಸಿದ್ದರು. ಆದರೂ ನಾವು ಸರಣಿಯಲ್ಲಿ 1-0 ಮುನ್ನಡೆ ಕಾಯ್ದುಕೊಂಡಿದ್ದೇವೆ. ರೂಟ್ ರನ್ ಹೊಳೆ ಹರಿಸುತ್ತಿರುವುದಕ್ಕೆ ಅಥವಾ ಬೇರೆ ಯಾವುದೇ ಬ್ಯಾಟ್ಸ್ಮನ್ ಬಗ್ಗೆಯೂ ನಾವು ಚಿಂತಿಸುವುದಿಲ್ಲ. ಆದರೆ, ಪಂದ್ಯದ ಅಂತಿಮ ಫಲಿತಾಂಶದ ಬಗ್ಗೆ ನಾವು ಕಾಳಜಿ ತೋರಿಸುತ್ತೇವೆ," ಎಂದು ತಿಳಿಸಿದ್ದಾರೆ. "ಬ್ಯಾಟ್ಸ್ಮನ್ಗಳು ಹೆಚ್ಚಿನ ರನ್ ಗಳಿಸುವ ಬಗ್ಗೆ ಹೆಚ್ಚಿನದಾಗಿ ಚಿಂತಿಸುವ ಅಗತ್ಯವಿಲ್ಲ. ಇದರ ಹೊರತಾಗಿಯೂ ನಾವು ನಮ್ಮ ಕೌಶಲದ ಮೇಲೆ ನಂಬಿಕೆ ಇಟ್ಟಿದ್ದೇವೆ. ನಮ್ಮನ್ನು ನಾವು ಬೆಂಬಲಿಸುವ ಅಗತ್ಯವಿದೆ. ಹಾಗಾಗಿ, ಬೇರೊಬ್ಬರ ಬಗ್ಗೆ ಜಾಸ್ತಿ ಚಿಂತಿಸುವ ಪ್ರಸಂಗ ಇಲ್ಲ. ಅಷ್ಟೇ ಅಲ್ಲದೆ ಇಂಥಾ ವಿಷಯಗಳ ಬಗ್ಗೆ ಹೆಚ್ಚಿನ ಒತ್ತಡ ಹಾಕಿಕೊಳ್ಳಲು ನಮಗೆ ಇಷ್ಟವಿಲ್ಲ," ಎಂದು ಶಮಿ ಹೇಳಿದರು. ಮೂರಂಕಿ ವೈಯಕ್ತಿಕ ಮೊತ್ತ ದಾಖಲಿಸುವ ಮೂಲಕ ನಾಯಕ ಜೋ ರೂಟ್ ಅತಿ ಹೆಚ್ಚು ಅಂತಾರಾಷ್ಟ್ರೀಯ ಶತಕಗಳನ್ನು ಗಳಿಸಿದ ಇಂಗ್ಲೆಂಡ್ನ ಮೊದಲ ಆಟಗಾರ ಎಂಬ ದಾಖಲೆಗೆ ಭಾಜನರಾದರು. ಆ ಮೂಲಕ ಮಾಜಿ ನಾಯಕ ಆಲ್ಸ್ಟೈರ್ ಕುಕ್ ಅವರನ್ನು ಹಿಂದಿಕ್ಕಿದರು. ಪ್ರಸ್ತುತ ಜೋ ರೂಟ್ 39 ಶತಕಗಳನ್ನು ಗಳಿಸಿದ್ದರೆ, ಆಲ್ಸ್ಟೈರ್ ಕುಕ್ ನಿವೃತ್ತಿ ಪಡೆಯುವ ಹೊತ್ತಿಗೆ 38 ಶತಕಗಳನ್ನು ಗಳಿಸಿದ್ದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3jmRIC4
