ಕಾಬೂಲ್: ಅಪ್ಘಾನಿಸ್ತಾನದ ರಾಜಧಾನಿ ಕಾಬೂಲ್ನ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಸಮೀಪ ಸಂಭವಿಸಿದ ಪ್ರಬಲ ಅವಳಿ ಬಾಂಬ್ ಸ್ಫೋಟದಲ್ಲಿ ಕನಿಷ್ಠ 60 ಜನರು ಸಾವನ್ನಪ್ಪಿ, 140 ಮಂದಿ ಗಾಯಗೊಂಡಿದ್ದಾರೆ. ವಿಮಾನ ನಿಲ್ದಾಣದಿಂದ ಜನರ ಸ್ಥಳಾಂತರ ಪ್ರಕ್ರಿಯೆ ಸಮರೋಪಾದಿಯಲ್ಲಿ ನಡೆಯುತ್ತಿರುವಾಗಲೇ ಈ ದಾಳಿ ನಡೆದಿದೆ. ಗುರುವಾರ ನಡೆದ ಈ 'ಸಂಕೀರ್ಣ 'ದಲ್ಲಿ ಅಮೆರಿಕದ ಸೈನಿಕರು ಹಾಗೂ ನಾಗರೀಕರು ಸಾವನ್ನಪ್ಪಿದ್ದಾರೆ ಎಂದು ಪೆಂಟಗಾನ್ (ಅಮೆರಿಕ ರಕ್ಷಣಾ ಕೇಂದ್ರ ಕಚೇರಿ) ಹೇಳಿದೆ. ಇದರಲ್ಲಿ ಕನಿಷ್ಠ 13 ಜನರು ಸಾವನ್ನಪ್ಪಿದ್ದಾರೆ ಎಂದು ತಾಲಿಬಾನ್ ನಾಯಕರು ಹೇಳಿದ್ದಾರೆ. ಇವರಲ್ಲಿ ಮಕ್ಕಳೂ ಸೇರಿದ್ದು, ಘಟನೆಯಲ್ಲಿ ಹಲವರು ಗಾಯಗೊಂಡಿದ್ದಾರೆ ಎಂದು ತಾಲಿಬಾನ್ ತಿಳಿಸಿದೆ. ಕಾಬೂಲ್ ನಗರದ ಪ್ರಮುಖ ತುರ್ತು ಆಸ್ಪತ್ರೆಯು, ತಮ್ಮಲ್ಲಿಗೆ ಕನಿಷ್ಠ 60 ಜನ ಗಾಯಗೊಂಡವರನ್ನು ಕರೆತರಲಾಗಿದೆ ಎಂದು ಟ್ಟಿಟ್ಟರ್ನಲ್ಲಿ ಹೇಳಿದೆ. ಉಳಿದ ಆಸ್ಪತ್ರೆಗಳಿಗೂ ಗಾಯಾಳುಗಳನ್ನು ದಾಖಲಿಸಿರುವ ಸಾಧ್ಯತೆ ಇದ್ದು, ನೂರಾರು ಜನ ಗಾಯಗೊಂಡಿರುವ ಅನುಮಾನಗಳಿವೆ. ಒಂದು ಬಾಂಬ್ ಅಬ್ಬೆ ಗೇಟ್ ಬಳಿ ಸ್ಫೋಟಿಸಿದರೆ, ಇನ್ನೊಂದು ಬ್ಯಾರನ್ ಹೋಟೆಲ್ ಪಕ್ಕ ಸ್ಪೋಟಿಸಿದೆ ಎಂದು ಪೆಂಟಗಾನ್ ವಕ್ತಾರ ಜಾನ್ ಕಿರ್ಬಿ ಹೇಳಿದ್ದಾರೆ. ಎರಡರಲ್ಲಿ ಕನಿಷ್ಠ ಒಂದು ಸ್ಫೋಟ ಆತ್ಮಾಹುತಿ ಬಾಂಬ್ ದಾಳಿಯಂತೆ ಭಾಸವಾಗುತ್ತಿದೆ ಎಂದು ಇಬ್ಬರು ಅಮೆರಿಕ ಅಧಿಕಾರಿಗಳು ಹೇಳಿದ್ದಾರೆ. ಅಬ್ಬೆ ಗೇಟ್ ಪಕ್ಕ ಸಂಭವಿಸಿದ ಸ್ಫೋಟವು ಸಂಕೀರ್ಣ ಸ್ವರೂಪದ್ದಾಗಿದೆ ಎಂಬುವುದನ್ನು ನಾವು ಖಚಿತಪಡಿಸುತ್ತಿದ್ದೇವೆ. ಇದರಲ್ಲಿ ಹಲವಾರು ಅಮೆರಿಕ ಸೈನಿಕರು ಮತ್ತು ನಾಗರೀಕರು ಸಾವನ್ನಪಿದ್ದಾರೆ ಎಂದು ಕಿರ್ಬಿ ಟ್ಟೀಟ್ ಮಾಡಿದ್ದಾರೆ. ಅಲ್ಲಿಂದ ಸ್ವಲ್ಪವೇ ದೂರದಲ್ಲಿರುವ ಬ್ಯಾರನ್ ಹೋಟೆಲ್ ಸಮೀಪವೂ ಇನ್ನೊಂದು ಬಾಂಬ್ ಸ್ಫೋಟಿಸಿದೆ ಎಂದು ಅವರು ಹೇಳಿದ್ದಾರೆ. ಭಾರತ ಖಂಡನೆ ಭಾರತವು ಕಾಬೂಲ್ನಲ್ಲಿ ಬಾಂಬ್ ಸ್ಫೋಟವನ್ನು ತೀವ್ರವಾಗಿ ಖಂಡಿಸಿದೆ. ಇದರಿಂದ ಭಯೋತ್ಪಾದನೆ, ಭಯೋತ್ಪಾದಕರಿಗೆ ಆಶ್ರಯ ನೀಡುವವರ ವಿರುದ್ಧ ಒಗ್ಗಟ್ಟಾಗಿ ನಿಲ್ಲುವ ಅಗತ್ಯ ಮತ್ತಷ್ಟು ಹೆಚ್ಚಾಗಿದೆ ಎಂದು ನವದೆಹಲಿ ಪ್ರತಿಕ್ರಿಯೆ ನೀಡಿದೆ. Update:ಬಾಂಬ್ ಸ್ಫೋಟದಲ್ಲಿನ ಸಾವು ನೋವಿನ ನಿಖರ ಲೆಕ್ಕಾಚಾರ ಇನ್ನಷ್ಟೇ ಸಿಕ್ಕಬೇಕಿದ್ದು, ಕನಿಷ್ಠ 60 ಜನರು ಸಾವನ್ನಪ್ಪಿದ್ದು 140 ಜನರು ಗಾಯಗೊಂಡಿದ್ದಾರೆ ಎಂದು ಹಿರಿಯ ಆರೋಗ್ಯ ಅಧಿಕಾರಿಗಳ ಹೇಳಿಕೆಯನ್ನು ಉಲ್ಲೇಖಿಸಿದ ಬಿಬಿಸಿ ವರದಿ ಮಾಡಿದೆ. ಆದರೆ ಘಟನೆಯ ಸ್ಪಷ್ಟ ಚಿತ್ರಣ ಇನ್ನಷ್ಟೇ ಬಹಿರಂಗವಾಗಬೇಕಿದೆ.
from India & World News in Kannada | VK Polls https://ift.tt/3jkwtBa
