ಆರ್‌.ಶ್ರೀಧರ್‌ ರಾಮನಗರ ಬೆಂಗಳೂರು: ಕೃಷಿ ಪ್ರಧಾನ ರಾಷ್ಟ್ರದಲ್ಲಿ ಈವರೆಗೂ ಉಚಿತವಾಗಿ ದೊರೆಯುತ್ತಿದ್ದ ಪಶು ವೈದ್ಯಕೀಯ ಸೇವೆಗೆ ಪಡಿಸಲು ರಾಜ್ಯ ಸರಕಾರ ಮುಂದಾಗಿದೆ. ಪಶು ಮಾತ್ರವಲ್ಲ ಎಲ್ಲಾ ರೀತಿಯ ಪ್ರಾಣಿಗಳಿಗೂ ಕನಿಷ್ಠ ದರದ ಚಿಕಿತ್ಸಾ ಶುಲ್ಕ ನಿಗದಿ ಪಡಿಸುವ ಸರಕಾರದ ಚಿಂತನೆಗೆ ರೈತರಿಂದ ಮಾತ್ರವಲ್ಲ, ಪಶು ವೈದ್ಯರಿಂದಲೂ ವಿರೋಧ ವ್ಯಕ್ತವಾಗಿದೆ. ಗ್ರಾಮೀಣ ಜನತೆ ತಮ್ಮ ಜೀವನೋಪಾಯಕ್ಕಾಗಿ ವ್ಯವಸಾಯ ಮತ್ತು ಪಶುಪಾಲನೆ ಅವಲಂಬಿಸಿದ್ದಾರೆ. ಜಾನುವಾರು ಸಂಪತ್ತಿಗೆ ಆರೋಗ್ಯ ರಕ್ಷಣೆ ನೀಡುವ ಜವಾಬ್ದಾರಿ ಇಲಾಖೆ ಹೆಗಲ ಮೇಲಿದೆ. ಈ ಕಾರ್ಯವನ್ನು ಸೇವೆಯ ಹೆಸರಿನಲ್ಲಿ ಇಲಾಖೆಯು ನಾನಾ ಸ್ತರದ ಪಶುವೈದ್ಯ ಸಂಸ್ಥೆಗಳ ಜಾಲದ ಮೂಲಕ ಯಶಸ್ವಿಯಾಗಿ ನಿರ್ವಹಿಸುತ್ತಿದೆ. ಆದರೀಗ ಮೂಕ ಪ್ರಾಣಿಗಳ ಹೆಸರಿನಲ್ಲಿಯೂ ಸರಕಾರ ಹಣ ಸಂಪಾದನೆಗೆ ದಾರಿ ಹುಡುಕುತ್ತಿರುವುದು ವಿಪರ್ಯಾಸ. ಈ ಬಗ್ಗೆ ಆದೇಶ ಪ್ರತಿ ಹೊರಬಿದ್ದಿದೆ. ರಾಜ್ಯ ಸರಕಾರದ ಈ ನಡೆ ಸಹಜವಾಗಿಯೇ ರೈತರನ್ನು ಕೆರಳಿಸಿದೆ. ರೋಗಕ್ಕೆ ತುತ್ತಾಗುವ ಯಾವ್ಯಾವ ಪ್ರಾಣಿಗಳಿಗೆ ಎಷ್ಟೆಷ್ಟು ಚಿಕಿತ್ಸಾ ಶುಲ್ಕ ಎಂಬುದು ಇನ್ನೂ ನಿಗದಿಯಾಗಿಲ್ಲ. ಏನಿದರ ಉದ್ದೇಶ? ಪಶು ವೈದ್ಯ ಸಂಸ್ಥೆಗಳಲ್ಲಿ ಪ್ರೋವನ್‌ ಬ್ರೀಡ್‌ ತಳಿಗಳಾದ ಎಚ್‌ಎಫ್‌, ಜರ್ಸಿ, ಅಮೃತ್‌ ಮಹಲ್‌, ಸುರ್ತಿ, ಮುರಾ, ಘನೀಕೃತ ವೀರ್ಯ ನಳಿಕೆಗಳು ಲಭ್ಯವಿದ್ದು, ಪ್ರತಿ ವೀರ್ಯ ನಳಿಕೆಗೆ 15 ರೂ.ನಂತೆ ಸೇವಾ ಶುಲ್ಕವನ್ನು ಮಾತ್ರ ರೈತರಿಂದ ಸಂಗ್ರಹಿಸಿ ಸರಕಾರಕ್ಕೆ ಜಮಾ ಮಾಡಲಾಗುತ್ತಿದೆ. ಆದರೆ, ಈಗ ಸರಕಾರವು ಹಸು, ದನ, ಎಮ್ಮೆ, ಕುರಿ, ಮೇಕೆ, ಹಂದಿ, ಕೋಳಿ , ಬಾತುಕೋಳಿ, ಮೊಲ ಸೇರಿದಂತೆ ಎಲ್ಲ ಪ್ರಾಣಿ ಪಕ್ಷಿಗಳಿಗೆ ಪ್ರತ್ಯೇಕ ಚಿಕಿತ್ಸಾ ದರ ನಿಗದಿ ಮಾಡಲು ಮುಂದಾಗಿದೆ. ಅಲ್ಲದೇ, ಪಶುಪಾಲನಾ ಮತ್ತು ಪಶುವೈದ್ಯ ಸೇವಾ ಇಲಾಖೆಯ ನಾನಾ ಸೇವೆಗಳಿಗೆ ದರ ನಿಗದಿ ಪಡಿಸಲು ಉದ್ದೇಶಿಸಿದೆ. ಏನಿದು ಹೊಸ ರೂಲ್ಸ್‌? ಪಶು ವೈದ್ಯಕೀಯ ಸಂಸ್ಥೆಗಳಿಗೆ ಚಿಕಿತ್ಸೆಗೆ ಬರುವ ಪ್ರಾಣಿಗಳಿಗೆ ಕನಿಷ್ಠ ದರದ ಚಿಕಿತ್ಸಾ ಶುಲ್ಕ ನಿಗದಿ ಪಡಿಸುವ ಹಾಗೂ ಇದರಿಂದ ಸರಕಾರಕ್ಕೆ ಆದಾಯ ನಿರೀಕ್ಷಿಸುವ ಕುರಿತು ಸರಕಾರ ಚಿಂತನೆ ನಡೆಸಿದೆ. ಈ ಬಗ್ಗೆ ಪಶು ಸಂಗೋಪನೆ ಮತ್ತು ಮೀನುಗಾರಿಕೆ ಇಲಾಖೆಯ ಕಾರ್ಯದರ್ಶಿಗಳು, ರಾಜ್ಯ ಪಶು ವೈದ್ಯಕೀಯ ಸಂಘದ ಪದಾಧಿಕಾರಿಗಳೊಂದಿಗೆ ಸಭೆ ನಡೆಸಿ ಚರ್ಚಿಸಿದ್ದಾರೆ. ಅಲ್ಲದೇ, ಈ ವಿಷಯದ ಬಗ್ಗೆ ಪಶುಪಾಲನಾ ಮತ್ತು ಪಶು ವೈದ್ಯಕೀಯ ಸೇವಾ ಇಲಾಖೆ ಆಯುಕ್ತರ ಕಾರ್ಯಾಲಯದ ನಿರ್ದೇಶಕರು, ರಾಜ್ಯದ ಎಲ್ಲಾ ಜಿಲ್ಲೆಗಳ ಪಶುಪಾಲನಾ ಮತ್ತು ಪಶುವೈದ್ಯ ಸೇವಾ ಇಲಾಖೆಯ ಉಪನಿರ್ದೇಶಕರಿಗೆ ಪತ್ರ ಬರೆದಿದ್ದಾರೆ. ನಾನಾ ವೈದ್ಯಕೀಯ ಸೇವೆಗಳಿಗೆ ಎಷ್ಟು ದರ ನಿಗದಿ ಮಾಡಬಹುದು ಮತ್ತು ಈ ಬಗ್ಗೆ ತಮ್ಮ ಅಭಿಪ್ರಾಯದ ವರದಿ ಸಲ್ಲಿಸಿ ಎಂದು ಸೂಚನೆ ನೀಡಿದ್ದಾರೆ. ನಾನಾ ಸೇವೆಗಳಿಗೆ ದರ ನಿಗದಿ ಎಷ್ಟಿರಬೇಕು ಮತ್ತು ಈ ವಿಷಯದ ಬಗ್ಗೆ ನಿಮ್ಮ ಅಭಿಪ್ರಾಯದ ವರದಿಯನ್ನು ಜರೂರಾಗಿ ಸಲ್ಲಿಸಿ ಎಂದು ಇಲಾಖೆಯ ನಿರ್ದೇಶಕರು ಪತ್ರ ಬರೆದಿದ್ದಾರೆ. ಡಾ.ತಿರುಮಲೆಗೌಡ, ಉಪನಿರ್ದೇಶಕ, ಪಶುಪಾಲನಾ ಮತ್ತು ಪಶು ವೈದ್ಯಕೀಯ ಸೇವಾ ಇಲಾಖೆ, ರಾಮನಗರ.
from India & World News in Kannada | VK Polls https://ift.tt/2Wz0eWe
