ಬೆಂಗಳೂರು: ವಿಶ್ವವಿದ್ಯಾಲಯದ ಮಾನಸ ಗಂಗೋತ್ರಿ ಆವರಣದಲ್ಲಿ ಸಂಜೆ 6.30ರ ನಂತರ ಯಾರೂ ಹೆಣ್ಣು ಮಕ್ಕಳು ಓಡಾಡುವಂತಿಲ್ಲ ಎಂಬ ಕುಲಸಚಿವರ ಆದೇಶದ ವಿಚಾರದಲ್ಲಿ ರಾಜ್ಯಪಾಲರು ಮಧ್ಯಪ್ರವೇಶಿಸಬೇಕು ಹಾಗೂ ಕೂಡಲೇ ಕುಲಸಚಿವರನ್ನು ವಜಾಗೊಳಿಸಬೇಕು ಎಂದು ಕೆಪಿಸಿಸಿ ಅಧ್ಯಕ್ಷ ಡಿ.ಕೆ. ಶಿವಕುಮಾರ್‌ ಆಗ್ರಹಿಸಿದರು. ಶನಿವಾರ ಸುದ್ದಿಗಾರರೊಂದಿಗೆ ಮಾತನಾಡಿ, "ಸ್ವತಂತ್ರ ಭಾರತದಲ್ಲಿ ರಾತ್ರಿ ವೇಳೆ ಮಹಿಳೆಯರು ಓಡಾಡುವಂತಿಲ್ಲ ಎಂಬ ಆದೇಶ ಹೊರಡಿಸಿರುವುದು ಸರಿಯಲ್ಲ. ಸಾರ್ವಜನಿಕ ಸ್ಥಳಗಳಲ್ಲಿ ಎಲ್ಲರಿಗೂ ಭದ್ರತೆ ಒದಗಿಸುವುದು ಪೊಲೀಸರ ಕರ್ತವ್ಯವಾಗಿದ್ದು, ಈ ರೀತಿಯ ನಿರ್ಬಂಧ ಹೇರುವುದು ಸರ್ವತಾ ಸಮ್ಮತವಲ್ಲ," ಎಂದು ಹೇಳಿದರು. ''ಮೈಸೂರು ಪ್ರವಾಸಿ ತಾಣ. ನಿತ್ಯ ಲಕ್ಷಾಂತರ ಜನ ಭೇಟಿ ನೀಡುತ್ತಾರೆ. ಹೀಗಿರುವಾಗ ನಿರ್ಬಂಧ ಹೇರಿರುವ ಆದೇಶ ಖಂಡನೀಯ. ಇದರಲ್ಲಿ ಗೃಹ ಸಚಿವರದ್ದು ತಪ್ಪೇ? ಪೊಲೀಸ್‌ ಆಯುಕ್ತರದ್ದು ತಪ್ಪೇ ಅಥವಾ ಕುಲಸಚಿವರದು ತಪ್ಪೇ ಎಂಬುದನ್ನು ನೋಡಬೇಕು. ಈ ರೀತಿಯ ಆದೇಶ ಹೊರಡಿಸಿರುವ ಕುಲಸಚಿವರು ಹುದ್ದೆಯಲ್ಲಿ ಮುಂದುವರಿಯಲು ಅರ್ಹರಲ್ಲ," ಎಂದು ಅವರು ಹೇಳಿದರು. ''ಅತ್ಯಾಚಾರ ಪ್ರಕರಣದ ತನಿಖೆ ವಿಚಾರವಾಗಿ ಪಕ್ಷದ ನಾಯಕರಾದ ವಿ.ಎಸ್‌. ಉಗ್ರಪ್ಪ, ಎಚ್‌.ಎಂ. ರೇವಣ್ಣ ಅವರು ನನ್ನೊಂದಿಗೆ ಮಾತನಾಡಿದ್ದಾರೆ. ನಾವು ಪೊಲೀಸರ ಕೆಲಸ ಕಾರ್ಯದಲ್ಲಿ ಹಸ್ತಕ್ಷೇಪ ಮಾಡುವುದಿಲ್ಲ. ಈ ಹಿಂದೆ ಪೊಲೀಸರು ಯಾವ ರೀತಿ ಏಕಪಕ್ಷೀಯವಾಗಿ ಕಾರ್ಯ ನಿರ್ವಹಿಸಿದ್ದಾರೆ ಎಂದು ನಾವೆಲ್ಲಾ ನೋಡಿದ್ದೇವೆ,'' ಎಂದು ಹೇಳಿದರು. ನಿರ್ಬಂಧ ವಿಧಿಸಬೇಕಿರುವುದು ಗಂಡಿಗೆ, ಹೆಣ್ಣಿಗಲ್ಲ ಮಾನಸ ಗಂಗೋತ್ರಿ ಮತ್ತು ಕುಕ್ಕರಹಳ್ಳಿ ಕೆರೆ ಆವರಣದಲ್ಲಿ ಸಂಜೆ 6.30 ನಂತರ ಹೆಣ್ಣು ಮಕ್ಕಳು ಓಡಾಡಬಾರದು ಎಂದು ಮೈಸೂರು ವಿಶ್ವವಿದ್ಯಾಲಯದ ಸುತ್ತೋಲೆ ಬಾಲಿಶತನದಿಂದ ಕೂಡಿದೆ. ಇದು ಹೆಣ್ಣು ಮಕ್ಕಳ ಸ್ವಾತಂತ್ರ್ಯದ ಹರಣ ಎಂದು ಕರ್ನಾಟಕ ಪ್ರದೇಶ ಮಹಿಳಾ ಕಾಂಗ್ರೆಸ್‌ ಅಧ್ಯಕ್ಷೆ ಡಾ.ಪುಷ್ಪಾ ಅಮರ್‌ನಾಥ್‌ ಕಿಡಿಕಾರಿದರು. ''ಅಫ್ಘಾನಿಸ್ತಾನದಲ್ಲಿ ಮಹಿಳೆಯರು ಹೊರಬಾರದೆಂಬ ಕಾನೂನು ಇದೆ. ಇಲ್ಲಿಯೂ ತರಲು ಹೊರಟಿದ್ದಾರೆ. ನಿರ್ಬಂಧ ವಿಧಿಸಬೇಕಿರುವುದು ಅಪಾಯ ಉಂಟು ಮಾಡುವ ಗಂಡಿಗೆ, ದೌರ್ಜನ್ಯಕ್ಕೆ ಒಳಗಾಗುವ ಹೆಣ್ಣಿಗಿಲ್ಲ. ಅತ್ಯಾಚಾರ ನಡೆಸುವ ಯುವಕರ ಮೇಲೆ ನಿರ್ಬಂಧ ಹೇರಬೇಕೆ ವಿನಃ ವಿದ್ಯಾರ್ಥಿನಿಯರಿಗೆ ಆಚೆ ಬರಬೇಡಿ, ಕೂರಬೇಡಿ, ನಿಲ್ಲಬೇಡಿ ಎನ್ನುವುದು ಎಷ್ಟು ಸರಿ? ಇದು ಮಾನವ ಹಕ್ಕುಗಳ ಉಲ್ಲಂಘನೆ ಆಗಿದೆ,'' ಎಂದು ಅವರು ವಾಗ್ದಾಳಿ ನಡೆಸಿದ್ದಾರೆ.
from India & World News in Kannada | VK Polls https://ift.tt/3sYpaCq
