ಆದರ್ಶ ಕೋಡಿ ದೊಡ್ಡಬಳ್ಳಾಪುರ: ಗೃಹೋಪಯೋಗಕ್ಕೆ ಬಳಕೆಯಾಗಬೇಕಿದ್ದ ಅಡುಗೆ ಸಿಲಿಂಡರ್‌ಗಳನ್ನು ಅಕ್ರಮವಾಗಿ ವಾಣಿಜ್ಯ ಉಪಯೋಗಕ್ಕೆ ಬಳಸುವವರ ಪ್ರಮಾಣ ಜಿಲ್ಲೆಯಾದ್ಯಂತ ಏರಿಕೆಯಾಗುತ್ತಿದ್ದು, ಆಹಾರ ಇಲಾಖೆ ಕಣ್ಮುಚ್ಚಿ ಕುಳಿತಿದೆ. ವಾಣಿಜ್ಯೋದ್ದೇಶದ ಸಿಲಿಂಡರ್‌ ದರ 1700 ರೂ. ಇದ್ದು, ಗೃಹೋಪಯೋಗಿ ಸಿಲಿಂಡರ್‌ ಒಂದಕ್ಕೆ 1200ರೂ.ಗೆ ಇತರೆ ವಾಣಿಜ್ಯ ಉದ್ಯಮಗಳ ಕೈ ಸೇರುತ್ತಿರುವ ಹಿನ್ನೆಲೆ ಅಕ್ರಮ ಮುಂದುವರಿದಿದೆ. ಜಿಲ್ಲೆಯ ದೊಡ್ಡಬಳ್ಳಾಪುರ, ದೇವನಹಳ್ಳಿ, ನೆಲಮಂಗಲದಲ್ಲಿಹೋಟೆಲ್‌, ಬೇಕರಿ ಹಾಗೂ ಕಾಂಡಿಮೆಂಟ್ಸ್‌ ಉದ್ಯಮ ಹೆಚ್ಚಿದ್ದು, ವಾಣಿಜ್ಯ ಉದ್ದೇಶಕ್ಕೆ ಗೃಹೋಪಯೋಗಿ ಸಿಲಿಂಡರ್‌ಗಳ ಬೇಡಿಕೆ ಹೆಚ್ಚು ಸೃಷ್ಟಿಯಾಗಿದೆ. ಪ್ರಮುಖವಾಗಿ ನಂದಿಬೆಟ್ಡದ ತಪ್ಪಲಿನ ಹೋಟೆಲ್‌ ಉದ್ಯಮ ಸೇರಿ ಇತರೆ ಹೋಟೆಲ್‌, ಬೇಕರಿಗಳಲ್ಲಿ ಕೆಲ ಮನೆಗಳಿಂದ ನಿರಂತರವಾಗಿ ಸಿಲಿಂಡರ್‌ ಪಡೆಯುವ ಸಂಬಂಧ ಮಾಹಿತಿಯಿದ್ದರೂ ಅಧಿಕಾರಿಗಳು ಮಾತ್ರ ಕ್ರಮಕ್ಕೆ ಮುಂದಾಗಿಲ್ಲ. ಇದರಿಂದ ಆದಷ್ಟು ಬೇಗ ಅಧಿಕಾರಿಗಳು ಕ್ರಮ ಕೈಗೊಳ್ಳಬೇಕಾಗಿದೆ. ಹೇಗೆ ಅಕ್ರಮ?: ದಿನದಿಂದ ದಿನಕ್ಕೆ ಅಗತ್ಯ ವಸ್ತುಗಳ ಜತೆಜತೆಗೆ ವಾಣಿಜ್ಯ ಸಿಲಿಂಡರ್‌ನ ಬೆಲೆ ಏರಿಕೆಯಾಗುತ್ತಿದ್ದು, ಅದರ ಬೇಡಿಕೆಯು ಕೂಡ ಹೆಚ್ಚಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಜನರು ಅಲ್ಪ ಲಾಭದಾಸೆಯಿಂದ ಸಬ್ಸಿಡಿ ಸಿಲಿಂಡರ್‌ಗಳನ್ನು ಮಧ್ಯವರ್ತಿಗಳ ಮೂಲಕ ಹೋಟೆಲ್‌, ಬೇಕರಿ ಸೇರಿ ಇತರೆ ಉದ್ಯಮಗಳನ್ನು ತಲುಪುವ ಕೆಲಸ ರಾಜಾರೋಷವಾಗಿ ನಡೆಯುತ್ತಿದೆ. ಆದ್ದರಿಂದ ಗೃಹಪಯೋಗಿ ಸಿಲಿಂಡರ್‌ ವಾಣಿಜ್ಯ ಕೆಲಸಕ್ಕೆ ಬಳಕೆಯಾಗುತ್ತಿದೆ. ವಾಣಿಜ್ಯ ಸಿಲಿಂಡರ್‌ ದುಬಾರಿ: ಹೋಟೆಲ್‌, ಬೇಕರಿ,ಬೀದಿಬದಿ ವ್ಯಾಪಾರ, ಕಾಂಡಿಮೆಂಟ್ಸ್‌ ಗಳು ಸೇರಿ ಇತರೆ ವಾಣಿಜ್ಯ ಕಾರಣಗಳಿಗೆ ಬಳಸುವ ಸಿಲಿಂಡರ್‌ಗಳ ಬೆಲೆ ಕಳೆದ ಕೆಲ ತಿಂಗಳಿಂದ ಏರಿಕೆಯಾಗಿದ್ದು 1500-1700 ವರೆಗೆ ಏರಿಕೆ ಕಂಡಿದೆ.ಇದ್ದರಿಂದ ಉದ್ಯಮದ ಮಾಲೀಕರು ಲಾಭದಾಸೆಯಿಂದ ವಾಣಿಜ್ಯ ಸಿಲಿಂಡರ್‌ಗಳ ಬದಲಾಗಿ 1000-1200 ರೂ.ಗೆ ಸಿಗುವ ಗೃಹೋಪಯೋಗಿ ಸಿಲಿಂಡರ್‌ಗಳನ್ನು ವಾಣಿಜ್ಯ ಉಪಯೋಗಕ್ಕೆ ಬಳಸಲಾಗುತ್ತಿದೆ. ಕಾಳಸಂತೆಯಲ್ಲಿ ಸಿಲಿಂಡರ್‌: ಬಡಕುಟುಂಬಗಳಿಗೆ ಸಹಾಯವಾಗಬೇಕಾಗಿದ್ದ ಗೃಹೋಪಯೋಗಿ ಸಿಲಿಂಡರ್‌ಗಳು ವಾಣಿಜ್ಯ ಉದ್ದೇಶಕ್ಕೆ ಬಳಕೆಯಾಗುತ್ತಿದೆ. ಕೆಲ ವ್ಯಕ್ತಿಗಳು ಏಜೆನ್ಸಿಗಳಿಂದ ಕೆಲ ಕುಟುಂಬಗಳ ಕಾರ್ಡ್‌ಗಳನ್ನು ಬಳಸಿಕೊಂಡು ಸಿಲಿಂಡರ್‌ಗಳನ್ನು ಖರೀದಿ ಮಾಡಿ ನಂತರ ಪ್ರತಿ ಸಿಲಿಂಡರ್‌ಗಳಿಗೆ 100-200 ಗಳ ಹೆಚ್ಚಿನ ಬೆಲೆಯಲ್ಲಿ ಹೋಟೆಲ್‌ ಸೇರಿ ಇತರೆ ಉದ್ಯಮಗಳಿಗೆ ತಲುಪಿಸಲಾಗುತ್ತಿದೆ.ಇದ್ದರಿಂದ ಹೆಚ್ಚಿನ ಪ್ರಮಾಣದಲ್ಲಿ ಲಾಭ ಗಳಿಸುತ್ತಿದ್ದಾರೆ. ಅಧಿಕಾರಿಗಳು ಈ ಕುರಿತು ಆದಷ್ಟು ಬೇಗ ಕ್ರಮಕೈಗೊಳ್ಳಬೇಕಿದೆ.
from India & World News in Kannada | VK Polls https://ift.tt/2WxBRba
