ಕಾಬೂಲ್: ಪಡೆಗಳು ಸಂಘರ್ಷ ಪೀಡಿತ ನೆಲದಿಂದ ತನ್ನ ಜನರು ಹಾಗೂ ಸೇನೆಯನ್ನು ಸ್ಥಳಾಂತರಿಸುವ ಕೆಲಸವನ್ನು ಚುರುಕುಗೊಳಿಸುತ್ತಿರುವ ಬೆನ್ನಲ್ಲೇ ರಾಜಧಾನಿ ಕಾಬೂಲ್ ಮೇಲೆ ರಾಕೆಟ್‌ಗಳನ್ನು ಉಡಾಯಿಸಲಾಗಿದೆ. ಆದರೆ ಅವುಗಳನ್ನು ಅಮೆರಿಕ ಕ್ಷಿಪಣಿ ರಕ್ಷಣಾ ವ್ಯವಸ್ಥೆ ನಿಗ್ರಹಿಸಿದೆ. ಕಾಬೂಲ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಬಳಿ ಸೋಮವಾರ ಬೆಳಿಗ್ಗೆಯೇ ಐದು ರಾಕೆಟ್‌ಗಳನ್ನು ಉಡಾಯಿಸಲಾಗಿತ್ತು. ಈ ಎಲ್ಲ ರಾಕೆಟ್‌ಗಳನ್ನೂ ನಿಯಂತ್ರಿಸಲಾಗಿದೆಯೇ ಎನ್ನುವುದು ಸ್ಪಷ್ಟವಾಗಿಲ್ಲ. ಪ್ರಾಥಮಿಕ ವರದಿಯಲ್ಲಿ ಯಾವುದೇ ಸಾವು ನೋವು ವರದಿಯಾಗಿಲ್ಲ. ಆದರೆ ಇದೇ ಸ್ಥಿತಿ ಮುಂದುವರಿಯಲಿದೆ ಎನ್ನಲಾಗದು ಎಂದು ಅಮೆರಿಕ ಸೇನೆಯ ಮೂಲಗಳು ತಿಳಿಸಿವೆ. ಉತ್ತರ ಕಾಬೂಲ್‌ನಲ್ಲಿ ವಾಹನವೊಂದರಿಂದ ಈ ರಾಕೆಟ್‌ಗಳನ್ನು ಉಡಾವಣೆ ಮಾಡಲಾಗಿದೆ. ಕೆಲವು ರಾಕೆಟ್‌ಗಳು ವಿಮಾನ ನಿಲ್ದಾಣದ ಪಕ್ಕದ ಸಲೀಂ ಕರ್ವಾನ್‌ನಲ್ಲಿ ಬಿದ್ದಿವೆ ಎಂದು ಹೇಳಲಾಗಿದೆ. ಈ ರಾಕೆಟ್‌ಗಳನ್ನು ತಾಲಿಬಾನಿಗಳು ಹಾರಿಸಿದ್ದೇ ಅಥವಾ ಐಸಿಸ್-ಕೆ ಸಂಘಟನೆ ಉಡಾವಣೆ ಮಾಡಿದೆಯೇ ಅಥವಾ ಬೇರೆ ಯಾವುದಾದರೂ ಭಯೋತ್ಪಾದನಾ ಸಂಘಟನೆಯ ಕೈವಾಡ ಇದೆ ಎನ್ನುವುದು ಗೊತ್ತಾಗಿಲ್ಲ. ವಿಮಾನ ನಿಲ್ದಾಣದ ಸುತ್ತಲೂ ದಟ್ಟ ಹೊಗೆ ಆವರಿಸಿದ್ದು ಕಂಡುಬಂದಿದೆ. ವಿಮಾನ ನಿಲ್ದಾಣದ ಕ್ಷಿಪಣಿ ರಕ್ಷಣಾ ವ್ಯವಸ್ಥೆಯ ಸದ್ದು ನಿವಾಸಿಗಳಿಗೆ ಕೇಳಿಸಿದೆ. ರಸ್ತೆಗಳ ಮೇಲೆ ಅದರ ತುಂಡುಗಳು ಬಿದ್ದಿರುವುದು ವರದಿಯಾಗಿದೆ. ಸಲೀಂ ಕರ್ವಾನ್‌ನಲ್ಲಿ ಬಿದ್ದ ಬಳಿಕ ಗುಂಡಿನ ಸದ್ದು ಕೇಳಿಸಿದೆ. ಆದರೆ ಯಾರು ಗುಂಡು ಹಾರಿಸಿದ್ದು ಎನ್ನುವುದು ತಿಳಿದುಬಂದಿಲ್ಲ. ಇನ್ನು 24-36 ಗಂಟೆಗಳಲ್ಲಿ ವಿಮಾನ ನಿಲ್ದಾಣದಲ್ಲಿ ಮತ್ತೊಂದು ದಾಳಿ ನಡೆಯುವ ಎಲ್ಲ ಸಾದ್ಯತೆಗಳೂ ಇವೆ ಎಂದು ಅಮೆರಿಕ ಅಧ್ಯಕ್ಷ ಜೋ ಬೈಡನ್ ಭಾನುವಾರ ಹೇಳಿದ್ದರು. ಅದನ್ನು ಸಾಬೀತುಪಡಿಸುವಂತೆ ರಾಕೆಟ್ ದಾಳಿ ಪ್ರಯತ್ನ ನಡೆದಿದೆ.
from India & World News in Kannada | VK Polls https://ift.tt/3mHhof1
