ಶಶಿಧರ್‌ ಎಸ್‌.ದೋಣಿಹಕ್ಲು, ತುಮಕೂರು: ತಾಲೂಕಿನ ಛೋಟಸಾಬರ ಪಾಳ್ಯದಲ್ಲಿ ನಡೆದಿರುವ ಬರ್ಬರ ಹತ್ಯೆ, ಸಾಮೂಹಿಕ ಅತ್ಯಾಚಾರ ಶಂಕೆ ಪ್ರಕರಣವನ್ನು ವಾರ ಸಮೀಪಿಸಿದರೂ ಭೇದಿಸುವಲ್ಲಿ ಪೊಲೀಸರು ವಿಫಲರಾಗಿದ್ದಾರೆ. ಖಾಕಿಯ ದಿವ್ಯ ನಿರ್ಲಕ್ಷ್ಯ ಜನಾಕ್ರೋಶ ಭುಗಿಲೇಳಲು ನಾಂದಿಯಾಗುತ್ತಿದೆ. ಮೈಸೂರಲ್ಲಿ ವಿದ್ಯಾರ್ಥಿನಿ ಮೇಲಿನ ಸಾಮೂಹಿಕ ಅತ್ಯಾಚಾರ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅಲ್ಲಿನ ಪೊಲೀಸರು ಐದು ದಿನಗಳಲ್ಲಿ ಕ್ರೌರ್ಯಮೆರೆದ ಕಾಮಾಂಧರ ಹೆಡೆಮುರಿಕಟ್ಟಿದ್ದಾರೆ. ಆದರೆ, ಅದೇ ದಿನ (ಆ.24) ತುಮಕೂರಲ್ಲಿ ನಡೆದಿರುವ ರೈತ ಹಂತಕರ ಪತ್ತೆಯಾಗಿಲ್ಲ. ಪ್ರಕರಣದ ಸುತ್ತ ಹಿರೇಹಳ್ಳಿ ಸಮೀಪದ ಛೋಟಸಾಬರ ಪಾಳ್ಯದ ಜಯಲಕ್ಷ್ಮೇ (35) ಮೃತ ದುರ್ದೈವಿ. ಆ.24ರಂದು ಬೆಳಗ್ಗೆ ದನ ಮೇಯಿಸಲು ಸಮೀಪದ ಬೆಟ್ಟಕ್ಕೆ ತೆರಳಿದ್ದರು. ಸಂಜೆಯಾದರೂ ಮನೆಗೆ ವಾಪಸ್ಸಾಗಿರಲಿಲ್ಲ. ಶಾಲೆಯಿಂದ ಬಂದ ಮಗಳು ಸಂಜೆ 5 ಗಂಟೆ ಸುಮಾರಿಗೆ ತಾಯಿಯನ್ನು ಹುಡುಕಿಕೊಂಡು ಹೋದಾಗ, ಹೊಲದಲ್ಲಿ ಟವಲ್‌ ಸಿಕ್ಕಿತ್ತು. ನಂತರ ಕೆಲಸಕ್ಕೆ ಹೋಗಿದ್ದ ಪತಿ ಶಿವಕುಮಾರ್‌ ಬಂದು ಪತ್ನಿಯ ಹುಡುಕಾಟ ನಡೆಸಿದಾಗ ಶವ ಪತ್ತೆಯಾಗಿತ್ತು. ವಿವಸ್ತ್ರಗೊಂಡ ಸ್ಥಿತಿ, ಮೈಮೇಲಿನ ಗಾಯಗಳಿಂದಾಗಿ ಅತ್ಯಾಚಾರವೆಂದು ಶಂಕಿಸಲಾಗಿದೆ. ಅಂದು ಸಂಜೆಯೇ ಕ್ಯಾತ್ಸಂದ್ರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಆದರೆ, ಇದುವರೆಗೆ ಪೊಲೀಸರು ಪ್ರಕರಣ ಭೇದಿಸಿಲ್ಲ. ಗ್ಯಾಂಗ್‌ ರೇಪ್‌ ಶಂಕೆ ಮೃತ ಮಹಿಳೆಯ ಪತ್ನಿ ಶಿವಕುಮಾರ್‌ ಹಾಗೂ ಕೆಲವು ಗ್ರಾಮಸ್ಥರು ಸಾಮೂಹಿಕ ಅತ್ಯಾಚಾರವೆಸಗಿ ಕೊಲೆಗೈದಿರುವ ಶಂಕೆ ವ್ಯಕ್ತಪಡಿಸುತ್ತಿದ್ದಾರೆ. ಜಯಲಕ್ಷ್ಮಿ ಗಟ್ಟಿಯಾಗಿದ್ದರು, ಯಾರಾದರೊಬ್ಬ ಕ್ರೂರಿಯಾಗಿದ್ದರೆ ಅವನಿಂದ ಖಂಡಿತಾ ತಪ್ಪಿಸಿಕೊಳ್ಳುತ್ತಿದ್ದರು ಎಂದು ಸಾಮೂಹಿಕ ಅತ್ಯಾಚಾರ, ಕೊಲೆ ಎಂದು ಅನುಮಾನಿಸುತ್ತಿದ್ದಾರೆ. ಆದರೆ, ಪ್ರಕರಣದ ಬಗ್ಗೆ ಪೊಲೀಸರು ಸ್ಪಷ್ಟ ಮಾಹಿತಿ ನೀಡುತ್ತಿಲ್ಲ. ಪ್ರಕರಣ ತನಿಖೆ ಹಂತದಲ್ಲಿದೆ ಎಂಬುದನ್ನು ಬಿಟ್ಟರೆ ಹೆಚ್ಚಿನ ಮಾಹಿತಿಯನ್ನು ಪೊಲೀಸರು ಹೇಳುತ್ತಿಲ್ಲ. ವಾರ ಕಳೆದರೂ ತನಿಖೆ ಪ್ರಗತಿಯಲ್ಲಿದೆ. ಟವಲ್‌ ಜಾಡು ಹಿಡಿದು..!! ದನ ಮೇಯಿಸಲು ಹೋಗಿದ್ದ ಜಯಲಕ್ಷ್ಮಿ ವಾಪಸ್ಸು ಬರದಿದ್ದಾಗ ಮಗಳು ಹೊಲದ ಬಳಿ ಹುಡುಕಿಕೊಂಡು ಹೋಗಿದ್ದಳು. ಅವಳು ಎಷ್ಟು ಹುಡುಕಿದರೂ, ಕೂಗಿದರು ಜಯಲಕ್ಷ್ಮಿ ಸಿಗಲಿಲ್ಲ. ಕೆಲಸಕ್ಕೆ ಹೋಗಿದ್ದ ನಾನು ಮನೆಗೆ ವಾಪಸ್ಸಾದ ಮೇಲೆ ಹುಡುಕಿಕೊಂಡು ಹೊರಟೆ. ಮಗಳು ಹೊಂಗೆ ಮರದ ಕೆಳಗೆ ಟವಲ್‌ ಬಿದ್ದಿತ್ತು ಎಂಬುದನ್ನು ತಿಳಿಸಿದಳು. ಆ ಟವಲ್‌ ಜಾಡು ಹಿಡಿದು ಹೊರಟಾಗ ಹಸಿರು ಬಳೆ ಸಿಕ್ಕಿತು. ಮುಂದೆ ಹೋಗಿ ನೋಡಿದರೆ ಪತ್ನಿ ಶವವಾಗಿ ಬಿದ್ದಿದ್ದಳು. ವಿವಸ್ತ್ರ ಸ್ಥಿತಿಯಲ್ಲಿ ಶವವಿತ್ತು. ಉಗುರಿನಿಂದ ಪರಿಚಿದ್ದರು, ಚರ್ಮ ಕಿತ್ತು ಹೋಗಿತ್ತು ಎಂದು ಪತ್ನಿಯನ್ನು ನೆನೆದು ಶಿವಕುಮಾರ್‌ ಕಣ್ಣೀರಿಡುತ್ತಿದ್ದಾರೆ. ಬೆಟ್ಟ ಸುತ್ತಿದ 100 ಪೊಲೀಸರುಮಹಿಳೆ ಹತ್ಯೆಯಾಗಿರುವ ಸ್ಥಳಕ್ಕೆ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಘಟನಾ ಸ್ಥಳಕ್ಕೆ ಎಸ್‌ಪಿ ರಾಹುಲ್‌ ಕುಮಾರ್‌ ಶಹಪೂರವಾಡ್‌ ಸೇರಿದಂತೆ ಜಿಲ್ಲಾಮಟ್ಟದ ಪೊಲೀಸ್‌ ಅಧಿಕಾರಿಗಳು ಮಾತ್ರವಲ್ಲದೆ ಐಜಿಪಿ ಎಂ.ಚಂದ್ರಶೇಖರ್‌, ಸಚಿವ ಜೆ.ಸಿ.ಮಾಧುಸ್ವಾಮಿ ಕೂಡ ಭೇಟಿ ನೀಡಿದ್ದಾರೆ. ತನಿಖೆಗೆ 3 ವಿಶೇಷ ತಂಡ ರಚಿಸಲಾಗಿದೆ. ಅಲ್ಲದೆ ಶನಿವಾರ ಸುಮಾರು 100 ಮಂದಿ ಪೊಲೀಸರು ಬೆಟ್ಟ ಸುತ್ತಿದ್ದಾರೆ ಎಂಬುದು ತಿಳಿದುಬಂದಿದೆ. ತಬ್ಬಲಿಗಳಾದ ಮಕ್ಕಳು ಜಯಲಕ್ಷ್ಮಿ -ಶಿವಕುಮಾರ್‌ ದಂಪತಿಗೆ 8 ವರ್ಷ ಹಾಗೂ 4.5 ವರ್ಷದ ಇಬ್ಬರು ಹೆಣ್ಣು ಮಕ್ಕಳಿದ್ದು, ತಾಯಿಯಿಲ್ಲದೆ ತಬ್ಬಲಿಗಳಾದ ಮಕ್ಕಳು ನಿತ್ಯ ಕಣ್ಣೀರಲ್ಲಿ ಕಾಲಕಳೆಯುತ್ತಿದ್ದಾರೆ. ಶ್ವಾನದಳ, ಬೆರಳಚ್ಚು ತಜ್ಞರಿಂದ ಪರಿಶೀಲನೆ ಶ್ವಾನದಳ ಮತ್ತು ಬೆರಳಚ್ಚು ತಜ್ಞರು ಭೇಟಿ ನೀಡಿದ್ದರೂ ಯಾವುದೇ ಪ್ರಯೋಜನವಾಗಿಲ್ಲ ಎನ್ನಲಾಗಿದೆ. ಮಹಿಳೆ ಹತ್ಯೆಯಾದ ಸ್ಥಳದಿಂದ ಹೊರಟ ಶ್ವಾನದಳ ರಿಸಾಲ್‌ ಪಾಳ್ಯದವರೆಗೆ ಹೋಗಿ, ಅಲ್ಲಿ ನಿಂತಿತು. ಅದು ಊರ್ಡಿಗೆರೆ ರಸ್ತೆಯಾಗಿದ್ದು, ಅಲ್ಲಿಂದ ವಾಹನದಲ್ಲಿ ಆರೋಪಿಗಳು ತಪ್ಪಿಸಿಕೊಂಡಿರುವ ಸಾಧ್ಯತೆಯಿದೆ ಎಂದು ಊಹಿಸಲಾಗಿದೆ. ಎರಡು ತಿಂಗಳ ಹಿಂದೆ ಬೆಟ್ಟದಲ್ಲಿ ಅನಾಮಿಕನೊಬ್ಬ ಕಂಡು ಬಂದಿದ್ದ. ಆತ ಅಲ್ಲಿಗೆ ಬಂದು ಮದ್ಯ ಸೇವಿಸಿ, ಊಟ ಮಾಡಿ ಹೋಗುತ್ತಿದ್ದ. ವಿಷಯ ತಿಳಿದ ನಾವು ಅಲ್ಲಿಗೆ ಹೋಗಿ ಆತನನ್ನು ವಿಚಾರಿಸಿ ಬೈದು ಕಳಿಸಿದ್ದೆವು ಎಂದು ಮೃತ ಮಹಿಳೆ ಪತಿ ಶಿವಕುಮಾರ್‌ ಮತ್ತು ಸ್ಥಳೀಯ ಶಿವರುದ್ರಯ್ಯ ತಿಳಿಸಿದ್ದಾರೆ. ಸದ್ಯ ಪೊಲೀಸರು ಆ ಅನಾಮಿಕ ವ್ಯಕ್ತಿಯ ರೇಖಾಚಿತ್ರದ ಮೊರೆ ಹೋಗಿದ್ದಾರೆನ್ನಲಾಗಿದೆ. ಶೂಟ್‌ ಮಾಡಿ ಕೊಲ್ಲಎಂದು ಆಕ್ರೋಶ ಜಯಲಕ್ಷ್ಮಿ ಹತ್ಯೆ ಸ್ಥಳೀಯರನ್ನು ಬೆಚ್ಚಿ ಬೀಳಿಸಿದೆ. ಈ ಭಾಗದಲ್ಲಿ 40-45 ಮನೆಗಳಿವೆ. ಹೆಣ್ಣು ಮಕ್ಕಳು ಮನೆಯಿಂದ ಹೊರ ಹೋಗಲು ಭಯ ಪಡುತ್ತಿದ್ದಾರೆ. ಕ್ರೌರ್ಯ ಮೆರೆದವರಿಗೆ ಶಿಕ್ಷೆಯಾಗಬೇಕು ಎಂದು ಜನ ಒತ್ತಾಯಿಸುತ್ತಿದ್ದಾರೆ. ಪತಿ ಶಿವಕುಮಾರ್‌ ಆದಷ್ಟು ಬೇಗ ತನ್ನ ಪತ್ನಿಯ ಹಂತಕರ ಹೆಡೆಮುರಿ ಕಟ್ಟಲು ಪೊಲೀಸರಿಗೆ ಮನವಿ ಮಾಡಿದ್ದಾರೆ. ಗ್ರಾಮಸ್ಥ ಶಿವರುದ್ರಯ್ಯ ಸೇರಿದಂತೆ ಅನೇಕರು ಹಂತಕರನ್ನು ಶೂಟ್‌ ಮಾಡಿ ಕೊಲ್ಲಬೇಕೆಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಅಷ್ಟೇ ಅಲ್ಲದೆ, ವಾರ ಸಮೀಪಿಸಿದರೂ ಪ್ರಕರಣ ಭೇದಿಸುವಲ್ಲಿ ಪೊಲೀಸರು ವಿಫಲರಾಗಿದ್ದಾರೆ. ಇದು ನಿರ್ಲಕ್ಷ್ಯವೆಂದು ಜನ ಅಸಮಾಧಾನಗೊಂಡಿದ್ದಾರೆ. ಶಾಸಕ ಡಿ.ಸಿ.ಗೌರಿಶಂಕರ್‌ ನೇತೃತ್ವದಲ್ಲಿಈಗಾಲೇ ಎಸ್‌ಪಿ ಕಚೇರಿಗೆ ಮುತ್ತಿಗೆ ಹಾಕಿ ಪ್ರತಿಭಟನೆ ನಡೆಸಲಾಗಿತ್ತು. ಆರೋಪಿಗಳ ಶೀಘ್ರ ಬಂಧನ, ಶಿಕ್ಷೆಗೆ ಆಗ್ರಹಿಸಿ ಸೋಮವಾರ ಮಹಾನಗರ ಪಾಲಿಕೆ ಸದಸ್ಯ ಟಿ.ಕೆ.ನರಸಿಂಹಮೂರ್ತಿ ನೇತೃತ್ವದಲ್ಲಿ ಪ್ರತಿಭಟನೆ ನಡೆಯಲಿದೆ. ತುಮಕೂರು ಪ್ರಕರಣದ ಬಗ್ಗೆ ಮಾಹಿತಿಯಿದೆ. ಅತ್ಯಾಚಾರವೆಸಗಿ ಹತ್ಯೆಗೈದಿರುವ ಶಂಕೆ ವ್ಯಕ್ತವಾಗಿದೆ. ಏನೇ ಆದರೂ ಆರೋಪಿಗಳನ್ನು ಶೀಘ್ರ ಬಂಧಿಸುವಂತೆ ಪೊಲೀಸರಿಗೆ ಸೂಚಿಸಿದ್ದೇನೆ. ಇನ್ನೆರಡು ದಿನಗಳ ಒಳಗೆ ಆರೋಪಿಗಳ ಬಂಧನವಾಗುವ ವಿಶ್ವಾಸವಿದೆ. ಆರಗ ಜ್ಞಾನೇಂದ್ರ, ಗೃಹ ಸಚಿವರು ಪ್ರಕರಣದ ತನಿಖೆಗೆ ಕ್ಯಾತ್ಸಂದ್ರ ಠಾಣೆಗೆ ಮಾತ್ರ ಸೀಮಿತವಾಗಿರದೆ, ಆ ಭಾಗದಲ್ಲಿ ಈ ಹಿಂದೆ ಕೆಲಸ ಮಾಡಿರುವ ಅಧಿಕಾರಿಗಳನ್ನು ಒಳಗೊಂಡ 3 ವಿಶೇಷ ತಂಡಗಳನ್ನು ರಚಿಸಿದ್ದೇವೆ. ತನಿಖೆ ಹಂತದಲ್ಲಿರುವುದರಿಂದ ಸದ್ಯದ ಪ್ರಗತಿ ಬಗ್ಗೆ ಹೇಳಲಾಗದು. ರಾಹುಲ್‌ಕುಮಾರ್‌ ಶಹಾಪೂರವಾಡ್‌, ಎಸ್‌ಪಿ, ತುಮಕೂರು
from India & World News in Kannada | VK Polls https://ift.tt/3gJNWBg
