ಕಾಬೂಲ್: ಉಗ್ರರು ಇಡೀ ದೇಶವನ್ನು ತಮ್ಮ ಹಿಡಿತಕ್ಕೆ ಪಡೆದುಕೊಳ್ಳುತ್ತ ಮುನ್ನುಗ್ಗುತ್ತಿರುವ ಬೆನ್ನಲ್ಲೇ ಅಫ್ಘಾನಿಸ್ತಾನ ಮೂರು ಜಿಲ್ಲೆಗಳನ್ನು ತನ್ನ ನಿಯಂತ್ರಣಕ್ಕೆ ಪಡೆದುಕೊಂಡಿರುವುದಾಗಿ ಹೇಳಿಕೊಂಡಿದೆ. ಉಗ್ರರಿಗೆ ಸದಾ ಸವಾಲಾಗಿ ಉಳಿದಿರುವ ಪಂಜ್ಶಿರ್ ಕಣಿವೆಯ ಸಮೀಪ ಮೂರು ಜಿಲ್ಲೆಗಳನ್ನು ವಶಕ್ಕೆ ಪಡೆದುಕೊಂಡಿರುವುದಾಗಿ ಅದು ತಿಳಿಸಿದೆ. ಸರ್ಕಾರದ ಪಡೆಗಳು ಹಾಗೂ ಇತರೆ ಪಡೆಗಳು ಈ ಭಾಗದಲ್ಲಿ ಸೇರಿಕೊಂಡಿವೆ. ತಾಲಿಬಾನ್ಗೆ ಪ್ರತಿರೋಧ ಒಡ್ಡುವುದಾಗಿ ಪ್ರತಿಜ್ಞೆ ಮಾಡಿರುವ ರಕ್ಷಣಾ ಸಚಿವ ಜನರಲ್ ಬಿಸ್ಮಿಲ್ಲಾ ಮೊಹಮ್ಮದಿ, ಪಂಜ್ಶಿರ್ನ ಉತ್ತರದ ಬಘ್ಲಾನ್ ಪ್ರಾಂತ್ಯದ ಪಕ್ಕದಲ್ಲಿರುವ ದೆಹ್ ಸಲೆಹ್, ಬಾನೋ ಮತ್ತು ಪುಲ್- ಹೆಸಾರ್ ಜಿಲ್ಲೆಗಳನ್ನು ತಮ್ಮ ವಶಕ್ಕೆ ಪಡೆದುಕೊಂಡಿರುವುದಾಗಿ ಟ್ವೀಟ್ ಮಾಡಿದ್ದಾರೆ. ಅಫ್ಘಾನಿಸ್ತಾನದಲ್ಲಿ ಸರ್ಕಾರದ ಸೇನಾ ಪಡೆಯಲ್ಲದೆ, ಇನ್ನೂ ಕೆಲವು ಖಾಸಗಿ ಪಡೆಗಳು ತಾಲಿಬಾನ್ ವಿರುದ್ಧವಿದ್ದು, ಯಾವಪಡೆಗಳು ಈ ಮೂರು ಜಿಲ್ಲೆಗಳಲ್ಲಿ ಪ್ರಾಬಲ್ಯ ಸಾಧಿಸಿವೆ ಎನ್ನುವುದು ಸ್ಪಷ್ಟವಾಗಿಲ್ಲ. ಆದರೆ ಇದು ಮಿಂಚಿನ ವೇಗದಲ್ಲಿ ಪ್ರಮುಖ ನಗರಗಳಿಗೆ ಮುತ್ತಿಗೆ ಹಾಕುವ ಮೂಲಕ ಸರ್ಕಾರಕ್ಕೆ ಆಘಾತ ಮೂಡಿಸಿದ್ದ ತಾಲಿಬಾನ್ ವಿರುದ್ಧ ಈಗ ಅದರ ವಿರೋಧಿ ಪಾಳೆಯವು ಜತೆಗೂಡುತ್ತಿರುವ ಸೂಚನೆ ನೀಡಿದೆ. ಸ್ಥಳೀಯ ಭದ್ರತಾ ಪಡೆಗಳು ಬಘ್ಲಾನ್ ಪ್ರಾಂತ್ಯದ ಬಾನೋ ಜಿಲ್ಲೆಯನ್ನು ತೀವ್ರ ಸಾವು ನೋವಿನ ಕದನದ ಬಳಿಕ ಹಿಡಿತಕ್ಕೆ ಪಡೆದುಕೊಂಡಿವೆ ಎಂದು ಸ್ಥಳೀಯ ಪೊಲೀಸ್ ಕಮಾಂಡರ್ ತಿಳಿಸಿದ್ದಾರೆ. ಅಫ್ಘಾನಿಸ್ತಾನ ಉಪಾಧ್ಯಕ್ಷ ಅಮ್ರುಲ್ಲಾ ಸಲೆಹ್ ಮತ್ತು ಸೋವಿಯತ್ ವಿರೋಧಿ ಮುಜಾಹಿದ್ದೀನ್ ಕಮಾಂಡರ್ ಆಗಿದ್ದ ಅಹ್ಮದ್ ಶಾ ಮಸೌದ್ ಅವರ ಮಗ ಇಬ್ಬರೂ ಪಂಜ್ಶಿರ್ನಲ್ಲಿ ನೆಲೆಯೂರಿದ್ದು, ಅಲ್ಲಿಂದ ತಾಲಿಬಾನ್ ವಿರುದ್ಧ ಹೋರಾಡಲು ಸಿದ್ಧತೆ ನಡೆಸಿದ್ದಾರೆ.
from India & World News in Kannada | VK Polls https://ift.tt/3D1fJGV
