ಹೊಸದಿಲ್ಲಿ: ಕೋವಿಡ್-19 ಮುಂಜಾಗ್ರತಾ ಕ್ರಮವಾಗಿ ಮುಂಬರುವ ದೇಶಿ ಕ್ರಿಕೆಟ್ ಆವೃತ್ತಿಯಲ್ಲಿ ಪ್ರತಿಯೊಂದು ತಂಡವೂ ಕನಿಷ್ಠ 20 ಆಟಗಾರರು ಹಾಗೂ 10 ಮಂದಿ ಸಹಾಯಕ ಸಿಬ್ಬಂದಿಯನ್ನು ಹೊಂದಿರಬೇಕೆಂದು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ () ನಿರ್ಧರಿಸಿದೆ ಎಂದು ಮೂಲಗಳು ತಿಳಿಸಿವೆ. ಅಕ್ಟೋಬರ್ 27 ರಿಂದ ಮಹಿಳೆಯರ 19 ವಯೋಮಿತಿ ಟೂರ್ನಿ ಹಾಗೂ ಸೈಯದ್ ಮುಷ್ತಾಕ್ ಅಲಿ ಟಿ20 ಟೂರ್ನಿ ಆರಂಭವಾಗಲಿವೆ. ಬಹುನಿರೀಕ್ಷಿತ ಟೂರ್ನಿಯು 2022ರ ಜನವರಿ 5 ರಿಂದ ಶುರುವಾಗಲಿದೆ ಎಂದು ಬಿಸಿಸಿಐ ಉನ್ನತ ಮೂಲಗಳು ಎಎನ್ಐ ಸುದ್ದಿ ಸಂಸ್ಥೆಗೆ ದೃಢಪಡಿಸಿವೆ. ಕೋವಿಡ್-19 ಸಂಬಂಧಿತ ಸಮಸ್ಯೆಗಳನ್ನು ನಿವಾರಿಸುವ ಸಲುವಾಗಿ ಪ್ರತಿಯೊಂದು ತಂಡವೂ ಪ್ರತ್ಯೇಕ ವೈದ್ಯರನ್ನು ಹೊಂದಿರಬೇಕೆಂದು ರಾಜ್ಯ ಕ್ರಿಕೆಟ್ ಮಂಡಳಿಗಳಿಗೆ ಬಿಸಿಸಿಐ ಸೂಚಿಸಿದೆ. ತಂಡದ ಫಿಜಿಯೋಥೆರಪಿಸ್ಟ್ ನಿಂದ ಪ್ರತ್ಯೇಕವಾಗಿರುವ ವೈದ್ಯರು, 10 ಮಂದಿ ಸಹಾಯಕ ಸಿಬ್ಬಂದಿಯಲ್ಲಿ ಒಬ್ಬರಾಗಿರುತ್ತಾರೆ. ಅಂತಾರಾಜ್ಯ ವರ್ಗಾವಣೆ ಮತ್ತು ಅತಿಥಿ ಆಟಗಾರರ ನೋಂದಣಿಗೆ ಕೊನೆಯ ದಿನಾಂಕವು ನಿರ್ದಿಷ್ಟ ಟೂರ್ನಿಯ ಆರಂಭಕ್ಕೂ ಮುನ್ನ 15 ದಿನಗಳಾಗಿರುತ್ತದೆ. ಈ ಅವಧಿ ಒಳಗಾಗಿ ಆಟಗಾರರು ಈ ಪ್ರಕ್ರಿಯೆಯನ್ನು ಮುಗಿಸಿಕೊಳ್ಳಬೇಕಾಗುತ್ತದೆ. ಸೈಯದ್ ಮುಷ್ತಾಕ್ ಅಲಿ ಟಿ20 ಟ್ರೋಫಿ, ರಣಜಿ ಟ್ರೋಫಿ ಹಾಗೂ ವಿಜಯ್ ಹಝಾರೆ ಟ್ರೋಫಿ ಟೂರ್ನಿಯಲ್ಲಿ 5 ಎಲೈಟ್ ಗುಂಪುಗಳನ್ನು ರಚಿಸಲಾಗಿದ್ದು, ಒಂದೊಂದು ಗುಂಪಿನಲ್ಲಿ 6 ತಂಡಗಳು ಸ್ಥಾನ ಪಡೆಯಲಿವೆ. ಇನ್ನು ಒಂದು ಪ್ಲೇಟ್ ಗುಂಪಿನಲ್ಲಿ ಒಟ್ಟು 8 ತಂಡಗಳಿರುತ್ತವೆ. ಎಲೈಟ್ ಗುಂಪಿನ ಎಲ್ಲಾ ತಂಡಗಳು ಐದು ಪಂದ್ಯಗಳಲ್ಲಿ ಸೆಣಸಲಿವೆ. ಐದು ಎಲೈಟ್ ಗುಂಪುಗಳಲ್ಲಿ ವಿನ್ನರ್ ತಂಡಗಳು ನೇರವಾಗಿ ಕ್ವಾರ್ಟರ್ಫೈನಲ್ಸ್ಗೆ ಅರ್ಹತೆ ಪಡೆದುಕೊಳ್ಳಲಿವೆ. ಇನ್ನು ಎಲೈಟ್ ಎಲ್ಲಾ ಗುಂಪಿನಲ್ಲಿ ಎರಡನೇ ಸ್ಥಾನ ಪಡೆದ ತಂಡಗಳು, ಪ್ಲೇಟ್ ಗುಂಪಿನ ವಿನ್ನರ್ ತಂಡಗಳೊಂದಿಗೆ ಮೂರು ಪ್ರೀ ಕ್ವಾರ್ಟರ್ ಫೈನಲ್ಸ್ ಪಂದ್ಯಗಳಲ್ಲಿ ಕಾದಾಟ ನಡೆಸಲಿವೆ. ಈ ಹಂತದಲ್ಲಿ ಗೆದ್ದ ಮೂರು ತಂಡಗಳು ಅಂತಿಮ ಎಂಟರ ಘಟ್ಟಕ್ಕೆ ಲಗ್ಗೆ ಇಡಲಿವೆ. ಇನ್ನು ಹಿರಿಯ ಮಹಿಳೆಯರ ಏಕದಿನ ಮತ್ತು ಟಿ20 ಹಾಗೂ 19 ವಯೋಮಿತಿ ಏಕದಿನ ಟೂರ್ನಿಗಳಲ್ಲಿ ಐದು ಎಲೈಟ್ ಗುಂಪುಗಳನ್ನು ರಚಿಸಲಾಗಿದ್ದು, ಒಂದೊಂದು ಗುಂಪಿನಲ್ಲಿ 6 ತಂಡಗಳು ಇರಲಿವೆ. ಪ್ಲೇಟ್ ಗುಂಪಿನಲ್ಲಿ ಆರು ತಂಡಗಳ ಇರಲಿವೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3glawzM
