ಹೊಸದಿಲ್ಲಿ: ಶೇನ್‌ ವಾರ್ನ್‌ ಮತ್ತು ಮುತ್ತಯ್ಯ ಮುರಳೀಧರನ್‌ ವಿಶ್ವ ಕ್ರಿಕೆಟ್ಟನ್ನು ಆಳಿದ ಇಬ್ಬರು ದಿಗ್ಗಜ ಸ್ಪಿನ್ನರ್‌ಗಳಾಗಿದ್ದಾರೆ. ಲೆಗ್‌ ಸ್ಪಿನ್‌ ಮತ್ತು ಆಫ್‌ ಸ್ಪಿನ್‌ ಮೂಲಕ ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಅತ್ಯಧಿಕ ವಿಕೆಟ್‌ಗಳನ್ನು ಪಡೆದ ಬೌಲರ್‌ಗಳಾಗಿದ್ದಾರೆ. 'ಬಾಲ್‌ ಆಫ್‌ ದಿ ಸೆಂಚುರಿ' ಎಸೆದ ಹೆಗ್ಗಳಿಕೆ ಹೊಂದಿರುವ ಶೇನ್‌ ವಾರ್ನ್‌ ಸಾರ್ವಕಾಲಿಕ ಶ್ರೇಷ್ಠ ಲೆಗ್‌ ಸ್ಪಿನ್ನರ್‌ ಆಗಿದ್ದಾರೆ. ಮತ್ತೊಂದೆಡೆ ವಿಶ್ವ ದಾಖಲೆಯ 800 ಟೆಸ್ಟ್‌ ವಿಕೆಟ್‌ಗಳನ್ನು ಪಡೆದ ಏಕಮಾತ್ರ ಬೌಲರ್‌ ಆಗಿರುವ ಮುತ್ತಯ್ಯ ಮುರಳೀಧರನ್‌ ಮಾದರಿ ಮತ್ತೊಬ್ಬ ಆಫ್‌ ಸ್ಪಿನ್ನರ್‌ ಮೂಡಿ ಬಂದಿಲ್ಲ ಎಂದೇ ಹೇಳಬಹುದು. ಅಂದಹಾಗೆ ವಾರ್ನ್‌ 708 ಟೆಸ್ಟ್‌ ವಿಕೆಟ್‌ಗಳನ್ನು ಪಡೆದಿದ್ದಾರೆ. ಹೀಗಿರುವಾಗ ಇಬ್ಬರಲ್ಲಿ ಯಾರು ಬೆಸ್ಟ್‌ ಎಂದು ನಿರ್ಧರಿಸುವುದು ಬಹಳ ಕಷ್ಟ. ಆದರೆ, ಶ್ರೀಲಂಕಾ ತಂಡದ ಮಾಜಿ ನಾಯಕ ಅವರ ಪ್ರಕಾರ ಶೇನ್‌ ವಾರ್ನ್‌ಗಿಂತಲೂ ಮುರಳೀಧರನ್‌ ಅತ್ಯುತ್ತಮ. ಇದಕ್ಕೆ ಸೂಕ್ತ ಕಾರಣವನ್ನೂ ಮಹೇಲಾ ನೀಡಿದ್ದಾರೆ. ಮುರಳಿ ಅವರಲ್ಲಿ ಇದ್ದಂತಹ ವೈವಿದ್ಯತೆ ಶೇನ್‌ ವಾರ್ನ್‌ ಅವರಲ್ಲಿ ಇರಲಿಲ್ಲ. ಹೀಗಾಗಿ ಮುರಳಿ ಹೆಚ್ಚು ವಿಕೆಟ್‌ಗಳನ್ನು ಪಡೆದರು ಎಂದಿದ್ದಾರೆ. "ಮುರಳಿ ಒಬ್ಬ ಚಾಂಪಿಯನ್‌ ಬೌಲರ್‌. ಉಳಿದೆಲ್ಲಾ ಸ್ಪಿನ್ನರ್‌ಗಳಿಗಿಂತಲೂ ವಿಭಿನ್ನವಾಗಿ ಮೂಡಿಬಂದವರು. ಮುರಳಿ ಅವರಲ್ಲಿ ಇದ್ದಂತಹ ವೈವಿದ್ಯತೆ ವಾರ್ನ್‌ ಬಳಿ ಇರಲಿಲ್ಲ. ಮುರಳಿಗೆ ತಾವು ಏನು ಮಾಡುತ್ತಿದ್ದೇನೆ ಎಂಬ ಅದ್ಭುತ ಜ್ಞಾನವಿತ್ತು. ಬ್ಯಾಟ್ಸ್‌ಮನ್‌ನ ತಾಳ್ಮೆ ಪರೀಕ್ಷಿಸಿ ವಿಕೆಟ್‌ ಪಡೆಯುತ್ತಿದ್ದರು. ಇದಕ್ಕಾಗಿ ಸತತ ಹತ್ತು ಓವರ್‌ಗಳನ್ನು ಎಸೆಯಲು ಅವರು ಕೂಡ ಸಿದ್ಧರಿರುತ್ತಿದ್ದರು," ಎಂದು ಇಎಸ್‌ಪಿಎನ್‌ ಕ್ರಿಕ್‌ಇನ್ಫೋಗೆ ನೀಡಿದ ವಿಡಿಯೋ ಸಂದರ್ಶನದಲ್ಲಿ ಹೇಳಿದ್ದಾರೆ. "ವ್ಯಕ್ತಿತ್ವದಲ್ಲೂ ವಾರ್ನ್‌ ಮತ್ತು ಮುರಳಿ ಸಂಪೂರ್ಣ ವಿಭಿನ್ನ. ವಾರ್ನ್‌ ತಂತ್ರಗಾರಿಕೆ ಕಡೆಗೆ ಹೆಚ್ಚು ಒತ್ತು ನೀಡಿ ಸ್ಥಿರವಾಗಿ ಬೌಲಿಂಗ್‌ ಮಾಡುವ ಮೂಲಕ ವಿಕೆಟ್‌ ಪಡೆಯುತ್ತಾರೆ. ಆದರೆ, ಮುರಳಿ ಬಳಿಯಿರುವ ವೈವಿಧ್ಯತೆ ಅವರಲ್ಲಿ ಇರಲಿಲ್ಲ ಎಂಬುದು ಬಹುಶಃ ವಾರ್ನ್‌ಗೂ ತಿಳಿದಿದೆ," ಎಂದು ಜಯವರ್ಧನೆ ವಿವರಿಸಿದ್ದಾರೆ. 2007 ಮತ್ತು 2011ರಲ್ಲಿ ಸತತ ಎರಡು ವಿಶ್ವಕಪ್‌ ಫೈನಲ್‌ ಆಡಿ, 2014ರಲ್ಲಿ ಐಸಿಸಿ ಟಿ20 ಕ್ರಿಕೆಟ್ ವಿಶ್ವಕಪ್‌ ಕೂಡ ಗೆದ್ದಿರುವ ಜಯವರ್ಧನೆ, ಈಗಿನ ತಲೆಮಾರಿನ ಸ್ಪಿನ್ನರ್‌ಗಳು ವಾರ್ನ್‌ ಮತ್ತು ಮುರಳಿ ಸಾಧನೆಯ ಅಂಕಿ ಅಂಶಗಳನ್ನು ತಲುಪಲಾರರು ಎಂದು ಅಭಿಪ್ರಾಯ ಪಟ್ಟಿದ್ದಾರೆ. "ಈ ದಿಗ್ಗಜರ ಸರಿ ಸಮಾನವಾಗಿ ವಿಕೆಟ್‌ ಪಡೆಯಬಲ್ಲ ಬೌಲರ್‌ಗಳು ಇನ್ನು ಕಾಣಲು ಸಿಕ್ಕಿಲ್ಲ. ಬಹುಶಃ ಈಗಿನ ಸ್ಪಿನ್ನರ್‌ಗಳು ಬಲಿಷ್ಠ ಬ್ಯಾಟ್ಸ್‌ಮನ್‌ಗಳ ಎದುರು ಆಡುತ್ತಿದ್ದಾರೆ. ಹೀಗಾಗಿ ಈ ಹಿಂದಿನ ಸ್ಪಿನ್ನರ್‌ಗಳಿಗೆ ಸಿಕ್ಕಂತಹ ಯಶಸ್ಸು ಇವರಿಗೆ ಸಿಗುವುದು ಅನುಮಾನ. ಇದರ್ಥ ಅವರು ಕೆಟ್ಟ ಬೌಲರ್‌ಗಳು ಎಂದಲ್ಲ," ಎಂದು ವಿವರಿಸಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3ePM7j5
