ಅಂಬಾಲಾ: ಕಳೆದ ಹಲವು ವರ್ಷಗಳಿಂದ ರಫೇಲ್‌ಗಾಗಿ ಕಾಯುತ್ತಿದ್ದ ಭಾರತೀಯರಿಗೆ ಇಂದು ಸುದಿನ. ಬುಧವಾರ ಮಧ್ಯಾಹ್ನದ ವೇಳೆಗೆ ಐದು ಯುದ್ಧ ವಿಮಾನಗಳು ಹಾರಿಕೊಂಡು ಭಾರತದ ಗೂಡು ಸೇರಲಿದೆ. ಇಡೀ ದೇಶಕ್ಕೆ ದೇಶವೆ ಸಂಭ್ರಮಿಸುವ ಸಮಯ ಅಂದರು ತಪ್ಪಾಗಲ್ಲ. ಇದೀಗ ರಫೇಲ್ ಯುದ್ಧ ವಿಮಾನಗಳು ಆಗಮಿಸುವ ಹಿನ್ನೆಲೆ ಇವುಗಳ ಸ್ವಾಗತಕ್ಕೆ ಹರಿಯಾಣದಲ್ಲಿರುವ ಅಂಬಾಲ ವಾಯುನೆಲೆ ಸಜ್ಜುಗೊಂಡಿದೆ. ಶತ್ರುಗಳ ಹುಟ್ಟಡಗಿಸುವ ರಫೇಲ್ ಯುದ್ಧ ವಿಮಾನಗಳಿಗೆ ಭವ್ಯ ಸ್ವಾಗತ ನೀಡಲು ತಯಾರಿ ನಡೆದಿದೆ. ಕೊರೊನಾ ಸೋಂಕು ಇಲ್ಲದೆ ಇರುತ್ತಿದ್ದರೆ ಈ ಕಾರ್ಯಕ್ರಮಕ್ಕೆ ಇನ್ನಷ್ಟು ಮೆರೆಗು ಬರುತ್ತಿತ್ತೇನೋ? ಆದರೆ ಕೊರೊನಾ ಇರುವುದರಿಂದ ಹಾಗೂ ಬಿಗಿ ಭದ್ರತೆ ಕೈಗೊಳ್ಳುವ ಉದ್ದೇಶದಿಂದ ಅಂಬಾಲದ ಸುತ್ತಮುತ್ತ ನಿಷೇಧಾಜ್ಞೆ ಜಾರಿಗೊಳಿಸಲಾಗಿದೆ. ಅಂಬಾಲ ವಾಯುನೆಲೆಗೆ ಹೊಂದಿಕೊಂಡಿರುವ ನಾಲ್ಕು ಹಳ್ಳಿಗಳಲ್ಲಿ ಸೆಕ್ಷನ್‌ 144 ಜಾರಿಗೊಂಡಿದೆ. ಅಲ್ಲದೇ ಮನೆಯ ಮೇಲ್ಛಾವಣೆಯಲ್ಲಿ ಸೇರುವುದು ಹಾಗೂ ಯುದ್ಧ ವಿಮಾನಗಳ ಫೋಟೋ ತೆಗೆಯುವುದನ್ನ ಈ ಸುತ್ತ ಮುತ್ತಲ ಪ್ರದೇಶದಲ್ಲಿ ನಿಷೇಧಿಸಲಾಗಿದೆ. ಭಾರತ ಫ್ರಾನ್ಸ್‌ನ ಡಸಾಲ್ಟ್‌ ಸಂಸ್ಥೆ ಜೊತೆ ಒಟ್ಟು 36 ರಫೇಲ್ ಯುದ್ಧ ವಿಮಾನಗಳ ಖರೀದಿಸುವ ಸಂಬಂಧ ಒಪ್ಪಂದ ನಡೆದಿತ್ತು. ಇದೀಗ ಈ ಪೈಕಿ ಮೊದಲ ಬ್ಯಾಚ್‌ನ ಐದು ವಿಮಾನಗಳು ಭಾರತಕ್ಕೆ ಬರುತ್ತಿವೆ. ಮಂಗಳವಾರ ಯುಎಇಗೆ ತಲುಪಿದ್ದ ರಫೇಲ್ ಇಂದು ಭಾರತದತ್ತ ಹಾರಾಟ ನಡೆಸಿ ತಲುಪಲಿದೆ. ಈ ಮೂಲಕ ಭಾರತದ ಕನಸು ನನಸಾದಂತೆಯಾಗಲಿದೆ.
from India & World News in Kannada | VK Polls https://ift.tt/3f8q5HG
