ಬೆಂಗಳೂರು: ಸಚಿವ ಮಾಧುಸ್ವಾಮಿ ರೈತ ಮುಖಂಡರ ಜೊತೆಗಿನ ವಾಗ್ದಾದಕ್ಕೆ ಮಾಜಿ ಸಚಿವ ಹಾಗೂ ಹಿರಿಯ ಕಾಂಗ್ರೆಸ್ ಮುಖಂಡ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಟ್ವಿಟ್ಟರ್‌ನಲ್ಲಿ ಸಚಿವರ ವರ್ತನೆಯನ್ನು ಖಂಡಿಸಿದ ಅವರು ಇದು ಹದ್ದು ಮೀರುತ್ತಿದೆ ಎಂದಿದ್ದಾರೆ. ತುಮಕೂರು ವಿವಿ ಆವರಣದಲ್ಲಿ ಪರಿಸರ ಹೋರಾಟಗಾರರು ಹಾಗೂ ರೈತ ಮುಖಂಡರ ಜೊತೆಗಿನ ವಾಗ್ವಾದದ ವಿಡಿಯೋ ಒಂದು ವೈರಲ್ ಆಗುತ್ತಿದೆ. ವಿಚಾರವೊಂದಕ್ಕೆ ಸಂಬಂಧಿಸಿದಂತೆ ಅಳಲು ತೋಡಿಕೊಳ್ಳಲು ಬಂದಿದ್ದರ ಜೊತೆಗೆ ಮಾಧುಸ್ವಾಮಿ ದರ್ಪದಿಂದ ವರ್ತಿಸಿದ್ದರು. ಸಾಮಾಜಿಕ ಜಾಲತಾಣಗಳಲ್ಲಿ ಈ ವಿಡಿಯೋ ವೈರಲ್ ಆಗುತ್ತಿದ್ದು ಸಾಕಷ್ಟು ಜನರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ಈ ಕುರಿತಾಗಿ ಟ್ವೀಟ್‌ ಮಾಡಿರುವ ಎಚ್‌ಸಿ ಮಹದೇವಪ್ಪ “ರಾಜ್ಯ ಬಿಜೆಪಿ ಸರ್ಕಾರದ ಕಾನೂನು ಸಚಿವರಾದ ಮಾಧುಸ್ವಾಮಿಯವರು ಸಾರ್ವಜನಿಕ ವರ್ತನೆಯು ಹದ್ದು ಮೀರುತ್ತಿದ್ದು ಅವರಲ್ಲಿ ಸಾರ್ವಜನಿಕರ ಅಹವಾಲನ್ನು ಕೇಳುವಂತಹ ತಾಳ್ಮೆ ಉಳಿದಿಲ್ಲ. ಮಾನ್ಯ ಸಚಿವರೇ ಹಿರಿಯ ನಾಯಕರಾಗಿ ಈ ರೀತಿಯ ದರ್ಪದ ವರ್ತನೆ ತೋರುವುದು ಸಾರ್ವಜನಿಕರ ಹಿತ ದೃಷ್ಟಿಯಿಂದ ಉತ್ತಮ ಬೆಳವಣಿಗೆ ಅಲ್ಲ” ಎಂದಿದ್ದಾರೆ. ಈ ಹಿಂದೆ ಕೆರೆ ಒತ್ತುವರಿ ಬಗ್ಗೆ ದೂರು ನೀಡಿದ್ದ ರೈತ ಮಹಿಳೆಯ ವಿರುದ್ಧ ಅವಾಚ್ಯ ಪದ ಬಳಕೆ ಮಾಡಿ ಮಾಧುಸ್ವಾಮಿ ಸುದ್ದಿಯಾಗಿದ್ದರು. ಇಂತಹ ಪದ ಬಳಕೆ ಮಾಡಬಾರದು ಎಂದು ಸ್ವತಃ ಸಿಎಂ ಬಿಎಸ್‌ ಯಡಿಯೂರಪ್ಪ ಎಚ್ಚರಿಕೆಯನ್ನು ನೀಡಿದ್ದರು.
from India & World News in Kannada | VK Polls https://ift.tt/3eSndQ6
