ಎಸ್‌. ಜಿ. ಕುರ್ಯ, ಉಡುಪಿ ಹೊಸದಿಲ್ಲಿಯ ಕ್ಯಾಂಪಸ್‌ನಲ್ಲಿ ಐದು ವರ್ಷಗಳ ಹಿಂದೆ ಆರಂಭವಾದ ಕನ್ನಡ ಭಾಷಾ ಪೀಠವೀಗ ಅಳಿವು ಉಳಿವಿನ ಹಾದಿಯಲ್ಲಿದೆ. ಜವಾಹರಲಾಲ್‌ ನೆಹರೂ ವಿವಿಯ ಕನ್ನಡ ಭಾಷಾ ಪೀಠದ ಪ್ರಾಧ್ಯಾಪಕ ಮತ್ತು ಮುಖ್ಯಸ್ಥ ಪ್ರೊ.ಪುರುಷೋತ್ತಮ ಬಿಳಿಮಲೆ(65) ಆ. 20ಕ್ಕೆ ನಿವೃತ್ತರಾಗಲಿದ್ದಾರೆ. ಇವರನ್ನು ಮುಂದುವರಿಸುವ ಯಾವುದೇ ಭರವಸೆ ಇಲ್ಲ. ಕರ್ನಾಟಕ ರಾಜ್ಯ ಸರಕಾರ ಹಣಕಾಸು ನೆರವು ನೀಡಿದರೂ ಪೀಠಕ್ಕೆ ಪ್ರಾಧ್ಯಾಪಕ ಮತ್ತು ಮುಖ್ಯಸ್ಥರ ನೇಮಕವನ್ನು ಜೆಎನ್‌ಯು ಮಾಡಬೇಕು. 3 ತಜ್ಞರ ಸಮಿತಿ ರಚಿಸಿದ್ದರೂ ಕೊರೊನಾ ಹಿನ್ನೆಲೆಯಲ್ಲಿ ದಿಲ್ಲಿಗೆ ಹೋಗಲು ವಿದ್ವಾಂಸರು ಹಿಂದೇಟು ಹಾಕುತ್ತಿದ್ದಾರೆ. ಜೆಎನ್‌ಯು ಶೈಕ್ಷಣಿಕ ಆಡಳಿತ ಮಂಡಳಿ ಸಭೆ ಆಗಸ್ಟ್‌ ಮೂರನೇ ವಾರದಲ್ಲಿ ನಡೆಯಲಿದೆ. ನಿಯೋಜನೆಯಲ್ಲಿರುವ ಆಫೀಸ್‌ ಅಸಿಸ್ಟೆಂಟ್‌, ರಿಸರ್ಚ್ ಅಸಿಸ್ಟೆಂಟ್‌ ಮೂಲ ಇಲಾಖೆಗೆ ತೆರಳಿ ಕಚೇರಿ ಖಾಲಿಯಾಗುತ್ತದೆ. ಅಷ್ಟರೊಳಗೆ ಪ್ರಾಧ್ಯಾಪಕ, ಮುಖ್ಯಸ್ಥರ ನೇಮಕವಾಗದಿದ್ದರೆ ಬೀಗ ಬೀಳಲಿದೆ. ಉದ್ದೇಶವೇನು?: ಆಸಕ್ತ ಕನ್ನಡೇತರರಿಗೆ ಕನ್ನಡ ಕಲಿಕೆ, ಸಂಶೋಧನೆಗೆ ಉತ್ತೇಜನ, ಸಾಹಿತ್ಯ ಮತ್ತು ಸಂಸ್ಕೃತಿ ಅಧ್ಯಯನವೇ ಮುಖ್ಯ ಗುರಿ.ಕರ್ನಾಟಕ ಸರಕಾರ ಪೀಠಕ್ಕೆ ವಾರ್ಷಿಕ 43ಲಕ್ಷ ರೂ. ಅನುದಾನ ಐದು ವರ್ಷ ನೀಡಬೇಕಿದ್ದರೂ 3ವರ್ಷವಷ್ಟೇ ನೀಡಿದ್ದು ಒಪ್ಪಂದ ಕೊನೆಗೊಂಡಿದೆ. ಮರು ಒಪ್ಪಂದ ಮಾಡಿಕೊಳ್ಳದಿದ್ದರೆ ಪೀಠ ಅಸ್ತಿತ್ವ ಕಳೆದುಕೊಳ್ಳಲಿದೆ. ಡಿಜಿಟಲ್ ಗ್ರಂಥಾಲಯಕ್ಕಾಗಿ ನೀಡಿದ 5ಕೋಟಿ ರೂ. ಇಡುಗಂಟು ಜತೆಗಿಟ್ಟು ಪೀಠಕ್ಕೆ ಆರ್ಥಿಕ ಸಮಸ್ಯೆಯಾಗದಂತೆ ವ್ಯವಸ್ಥೆ ಮಾಡಲಾಗಿದೆ. ಪ್ರಕಟಣೆ, ವಿಚಾರ ಸಂಕಿರಣ ಡಿಜಿಟಲ್ ಗ್ರಂಥಾಲಯ ಯೋಜನೆಯ ಮೂಲಕ ಕವಿರಾಜ ಮಾರ್ಗ, ವಡ್ಡಾರಾಧನೆ, ರನ್ನನ ಗದಾಯುದ್ಧ ಸೇರಿದಂತೆ ಹಲವು ಪ್ರಕಟಣೆಗಳನ್ನು ಮಾಡಲಾಗಿದೆ, ವಿಚಾರ ಸಂಕಿರಣ, ಗಳನ್ನು ಆಯೋಜಿಸಲಾಗಿದೆ. ಈ ಕೆಲಸಗಳಲ್ಲೇನೂ ಅನನ್ಯತೆ ಇಲ್ಲ. ಒಟ್ಟಾರೆ ಕನ್ನಡ ಭಾಷಾ ಪೀಠ ಸೇರಿದಂತೆ ರಾಜ್ಯದಲ್ಲಿರುವ ಹತ್ತಾರು ಪೀಠಗಳಿಗೆ ಹೊಸ ಕಾರ್ಯ ಮಾದರಿಯ ಅಗತ್ಯವಿದ್ದೇ ಇದೆ.ಕೇವಲ ಅಲಂಕಾರಿಕ ಮತ್ತು ಕಲ್ಪಿತ ಹಿರಿಮೆಗಳಿಂದ ಯಾವುದೇ ಪ್ರಯೋಜನವಾಗುವುದಿಲ್ಲ. ಜೆಎನ್‌ಯುನಲ್ಲಿ ಕನ್ನಡ ಭಾಷಾ ಪೀಠ ಕನ್ನಡಿಗರಿಗೆ ಹೆಮ್ಮೆಯ ಜತೆಗೆ ಮಹತ್ವದ್ದಾಗಿದೆ. ಜೆಎನ್‌ಯು ಸೂಕ್ತ ನೇಮಕಾತಿ ಮಾಡುವ ನಿಟ್ಟಿನಲ್ಲಿಒತ್ತಡ ಹೇರಲಾಗುವುದು, ಪೀಠ ಮುಚ್ಚೆಲು ಬಿಡೆವು. -ಮನು ಬಳಿಗಾರ್‌, ಅಧ್ಯಕ್ಷರು, ಕನ್ನಡ ಸಾಹಿತ್ಯ ಪರಿಷತ್ತು, ಬೆಂಗಳೂರು. ಅವ್ಯವಹಾರಕ್ಕೆ ಆಸ್ಪದವಿಲ್ಲದೆ ಕನ್ನಡದ ಕೆಲಸ ಮಾಡುವವರನ್ನು ಪೀಠದಲ್ಲಿ ಆ. 20ರೊಳಗೆ ಕೂರಿಸಿ ಎನ್ನುವುದು ನನ್ನ ಬೇಡಿಕೆ, ಆದರೆ ಯಾರೂ ಸ್ಪಂದಿಸುತ್ತಿಲ್ಲ. ಬನಾರಸ್‌, ದಿಲ್ಲಿ ವಿವಿಯಲ್ಲಿದ್ದ ಕನ್ನಡ ಪೀಠಕ್ಕೆ ಬಂದೊಗಿದ ಗತಿ ಮತ್ತೆ ಬರಬಾರದು. -ಪುರುಷೋತ್ತಮ ಬಿಳಿಮಲೆ, ಮುಖ್ಯಸ್ಥರು, ಕನ್ನಡ ಭಾಷಾ ಪೀಠ, ಜವಾಹರಲಾಲ್‌ ನೆಹರೂ ವಿವಿ, ಹೊಸದಿಲ್ಲಿ.ಹೊಸದಿಲ್ಲಿಯ ಜೆಎನ್‌ಯುಗಷ್ಟೇ ಸೀಮಿತವಾದ ಕನ್ನಡ ಭಾಷಾ ಪೀಠ ಉಳಿಯಬೇಕು. -ಡಾ.ಬಿ.ಎ.ವಿವೇಕ್‌ ರೈ, ಕನ್ನಡ ಭಾಷಾ ವಿದ್ವಾಂಸರು, ಹಂಪಿ ವಿವಿಯ ವಿಶ್ರಾಂತ ಕುಲಪತಿ, ಮಂಗಳೂರು ಜೆಎನ್‌ಯು ವಿಸಿಗೆ ಪತ್ರ ಕನ್ನಡ ಮತ್ತು ಸಂಸ್ಕೃತಿ ಸಚಿವ ಸಿ. ಟಿ ರವಿ ಜೂ. 25ರಂದು ಜೆಎನ್‌ಯು ಕುಲಪತಿ ಪ್ರೊ. ಜಗದೀಶ್‌ ಕುಮಾರ್‌ ಅವರಿಗೆ ಪತ್ರ ಬರೆದಿದ್ದು, ಕನ್ನಡ ಭಾಷಾ ಪೀಠವನ್ನು ಉಳಿಸಿ, ಸಂಶೋಧನೆ, ಅಧ್ಯಯನ ಸಹಿತ ಕನ್ನಡ ಪರ ಚಟುವಟಿಕೆ ಮುಂದುವರಿಸಲು ಪ್ರಾಧ್ಯಾಪಕರ ನೇಮಕಕ್ಕೆ ಮನವಿ ಮಾಡಿದ್ದಾರೆ.
from India & World News in Kannada | VK Polls https://ift.tt/309kBYZ
