ಹೊಸದಿಲ್ಲಿ: ಮಾಜಿ ಆಟಗಾರರಾದ ಹಾಗೂ ಅವರ ನಡುವಿನ ಸ್ನೇಹದ ಬಗ್ಗೆ ತಮ್ಮೆಲ್ಲರಿಗೂ ಚೆನ್ನಾಗಿ ತಿಳಿದಿದೆ. ಯುವರಾಜ್ ಸಿಂಗ್‌ ಅವರ ಕಠಿಣ ಸಂದರ್ಭಗಳಲ್ಲಿ ಕ್ರಿಕೆಟ್ ದೇವರು ನೆರವಾಗಿರುವುದನ್ನು ಹಲವು ಬಾರಿ ಎಡಗೈ ಬ್ಯಾಟ್ಸ್ಮನ್ ಬಹಿರಂಗ ಪಡಿಸಿದ್ದಾರೆ. ಅದೇ ರೀತಿ ತಾವು ಕ್ಯಾನ್ಸರ್ ಕಾಯಿಲೆಯಿಂದ ಹೋರಾಟ ನಡೆಸಿದ ಬಳಿಕ ಟೀಮ್‌ ಇಂಡಿಯಾಗೆ ಕಮ್‌ಬ್ಯಾಕ್‌ ಮಾಡುವಾಗ ಸಚಿನ್‌ ತೆಂಡೂಲ್ಕರ್ ತುಂಬಿದ ಸ್ಪೂರ್ತಿಯನ್ನು ಯುವಿ ಇತ್ತೀಚಿನ ಸಂದರ್ಶನದಲ್ಲಿ ಸ್ಮರಿಸಿದ್ದಾರೆ. ಕ್ಯಾನ್ಸರ್‌ನಿಂದ ಚೇತರಿಸಿಕೊಂಡು ಬಂದ ಬಳಿಕ ಹಲವು ವರ್ಷಗಳಿಂದ ಯುವರಾಜ್ ಸಿಂಗ್‌ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಿಂದ ದೂರ ಉಳಿದಿದ್ದರು. ಈ ವೇಳೆ ಅವರು 3-4 ವರ್ಷಗಳ ಕಾಲ ದೇಶಿ ಕ್ರಿಕೆಟ್‌ಗೆ ಮರಳಿದ್ದರು. ಸುದೀರ್ಘ ಅವಧಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಆಡಿದ ಬಳಿಕ ದೇಶಿ ಕ್ರಿಕೆಟ್‌ಗೆ ಮರಳುವುದು ಎಷ್ಟು ಕಷ್ಟ ಎಂದು ಯುವಿಗೆ ಪ್ರಶ್ನೆ ಕೇಳಲಾಯಿತು. ಇದಕ್ಕೆ ಉತ್ತರಿಸಿದ ಎಡಗೈ ಬ್ಯಾಟ್ಸ್ಮನ್, ಆ ಅವಧಿಯಲ್ಲಿ ಉಂಟಾಗುತ್ತಿದ್ದ ಏರಿಳಿತಗಳಲ್ಲಿ ಸಚಿನ್‌ ತೆಂಡೂಲ್ಕರ್ ನೆರವಾಗುತ್ತಿದ್ದರು ಎಂಬ ಅಂಶವನ್ನು ಬಹಿರಂಗಪಡಿಸಿದರು. "ಆ ವೇಳೆ ಕೆಲ ಏರಿಳಿತಗಳು ಕಾಣಿಸಿಕೊಂಡಿದ್ದವು. ಸಚಿನ್‌ ತೆಂಡೂಲ್ಕರ್ ಬಳಿ ಮಾತನಾಡುತ್ತಲೇ ಇದ್ದೆ. 'ನಾವು ಏಕೆ ಕ್ರಿಕೆಟ್ ಆಡುತ್ತೇವೆ? ಹೌದು ಅಂತಾರಾಷ್ಟ್ರೀಯ ಕ್ರಿಕೆಟ್ ಆಡಬೇಕು ಎಂದು ಬಯಸುತ್ತೇವೆ ಆದರೆ ಕ್ರಿಕೆಟ್ ಮೇಲಿನ ಪ್ರೀತಿಯಿಂದ ನಾವು ಆಡುತ್ತೇವೆ. ನೀವು ಆಟವನ್ನು ಪ್ರೀತಿ ಮಾಡಿದ್ದೇ ಆದಲ್ಲಿ, ನೀವು ಆಡುತ್ತೀರಿ;," ಎಂದು ಸಚಿನ್‌ ಹೇಳಿದ್ದನ್ನು ಯುವಿ ನೆನಪಿಸಿಕೊಂಡರು. "ಸಚಿನ್‌ ಹೇಳಿದ ಹಾಗೆ,' ಒಂದು ವೇಳೆ ನಾನು ಆ ಸನ್ನಿವೇಶದಲ್ಲಿ ಇದ್ದಿದ್ದರೆ, ಏನು ಮಾಡಬೇಕು ಎಂಬುದರ ಬಗ್ಗೆ ಗೊತ್ತಾಗುತ್ತಿರಲಿಲ್ಲ. ಆದರೆ ನೀವು ಆಟವನ್ನು ಇಷ್ಟಪಟ್ಟರೆ, ನೀವು ಇನ್ನೂ ಆಟವನ್ನು ಆಡುತ್ತಲೇ ಇರುತ್ತೀರಿ ಹಾಗೂ ಯಾವಾಗ ನಿವೃತ್ತಿ ಬೇಕು ಎಂಬುದನ್ನು ನೀವೇ ನಿರ್ಧರಿಸುತ್ತೀರಿ'," ಎಂದು ಯುವರಾಜ್ ಸಿಂಗ್‌ ಸೇರಿಸಿದರು. ಕ್ಯಾನ್ಸರ್ ಚಿಕಿತ್ಸೆಯ ನಂತರ ಅವರ ದೇಹವು ಒಂದೇ ರೀತಿ ಇರಲಿಲ್ಲ ಎಂದು ಯುವರಾಜ್ ಒಪ್ಪಿಕೊಂಡರು. ಆದರೆ ಭಾರತದ ಮಾಜಿ ಬ್ಯಾಟ್ಸ್ಮನ್ ಅವರು ಯಾವುದೇ ಪಶ್ಚಾತ್ತಾಪವನ್ನು ಹೊಂದದೆ, ಕ್ರಿಕೆಟ್ ಮುಂದುವರಿಸಿದ ಬಗ್ಗೆ ಹೇಳಿದರು. "ಸಚಿನ್‌ ತೆಂಡೂಲ್ಕರ್ ಅವರ ಜತೆ ಉತ್ತಮ ಸಂಭಾಷಣೆ ನಡೆಸಿದ್ದೆ. 3-4 ವರ್ಷಗಳ ಕಾಲ ದೇಶಿ ಕ್ರಿಕೆಟ್ ಆಡಿದೆ. ಭಾರತ ತಂಡದ ಹೊರಗೆ-ಒಳಗೆ ಇದ್ದ ನಾನು ಟಿ20 ವಿಶ್ವಕಪ್‌ನಿಂದ ವಂಚಿತನಾದೆ. ಹಲವು ಬಾರಿ ಟೀಮ್‌ ಇಂಡಿಯಾಗೆ ಕಮ್‌ಬ್ಯಾಕ್‌ ಮಾಡಿದೆ, ನಂತರ ಸ್ಥಾನವನ್ನು ಕಳೆದುಕೊಂಡೆ, ಆದರೆ ಕ್ಯಾನ್ಸರ್ ಗೆದ್ದ ಬಳಿಕ ದೇಹ ಸರಿಯಾಗಿ ಸ್ಪಂದಿಸುತ್ತಿರಲಿಲ್ಲ," ಎಂದು ಯುವರಾಜ್ ಸಿಂಗ್‌ ಒಪ್ಪಿಕೊಂಡರು. "ಆದರೆ ತಂಡಕ್ಕೆ ಕಮ್‌ಬ್ಯಾಕ್‌ ಮಾಡಲು ಇನ್ನೂ ನಿರ್ವಹಿಸುತ್ತಲೇ ಇದ್ದೆ ಹಾಗೂ ಹೆಚ್ಚಿನ ರನ್‌ಗಳನ್ನು ಗಳಿಸುತ್ತಿದ್ದೆ. ನನ್ನ ಜೀವನದಲ್ಲಿ ನಾನು ಖುಷಿಯಾಗಿ ಇರಲು ಬಯಸುತ್ತೇನೆ. ನಾನು ಶಾಂತಿಯಿಂದ ಇರಲು ಬಯಸಿದ್ದು ಮತ್ತು ಯಾವುದೇ ಪಶ್ಚಾತ್ತಾಪವಿಲ್ಲದೆ ನಾನು ಮುಂದುವರೆದಿದ್ದೇನೆ, " ಎಂದು ಅವರು ಹೇಳಿದರು. ಯುವರಾಜ್ ಸಿಂಗ್‌ ಭಾರತ ತಂಡದ ಪರ 304 ಓಡಿಐ ಪಂದ್ಯಗಳಾಡಿದ್ದು, 36.55 ಸರಾಸರಿಯಲ್ಲಿ 8,701 ರನ್‌ ಗಳಿಸಿದ್ದಾರೆ. ಭಾರತ ತಂಡ 2007 ಟಿ20 ವಿಶ್ವಕಪ್‌ ಗೆದ್ದಾಗ ಹಾಗೂ 2011ರಲ್ಲಿ ಏಕದಿನ ವಿಶ್ವಕಪ್‌ ಜಯಿಸಿದ್ದ ಭಾರತ ತಂಡದಲ್ಲಿದ್ದರು. 2011 ವಿಶ್ವಕಪ್‌ನಲ್ಲಿ ಯುವರಾಜ್ ಸಿಂಗ್‌ ಟೂರ್ನಿ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾಗಿದ್ದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3hGR6nh
