ಹೊಸದಿಲ್ಲಿ: ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ಭಾರತ ತಂಡ 2011ರ ವಿಶ್ವಕಪ್ ಗೆದ್ದ ಬಳಿಕ ಮಾಸ್ಟರ್‌ ಬ್ಲಾಸ್ಟರ್‌ ಅವರನ್ನು ಭುಜದ ಮೇಲೆ ಹೊತ್ತು ಒಂದು ಸುತ್ತು ಬರುವ ಮೂಲಕ ಗೌರವ ಸಲ್ಲಿಸಲು ಕಾರಣವೇನೆಂದು ಟೀಮ್‌ ಇಂಡಿಯಾ ನಾಯಕ ಬಹಿರಂಗಪಡಿಸಿದ್ದಾರೆ. ನುವಾನ್‌ ಕುಲಶೇಖರ್‌ ಅವರ ಎಸೆತದಲ್ಲಿ ಮಹೇಂದ್ರ ಸಿಂಗ್‌ ಧೋನಿ ಅವರು ಸಿಕ್ಸರ್‌ ಬಾರಿಸಿದ ಕ್ಷಣವನ್ನು ಕ್ರಿಕೆಟ್ ಪ್ರೇಮಿಗಳೆಂದಿಗೂ ಮರೆಯಲು ಸಾಧ್ಯವಿಲ್ಲ. ನಂತರ, ಸಚಿನ್ ತೆಂಡೂಲ್ಕರ್ ಅವರನ್ನು ಟೀಮ್‌ ಇಂಡಿಯಾ ಆಟಗಾರರು ಭುಜದ ಮೇಲೆ ಹೊತ್ತುಕೊಂಡು ಅಂಗಳದಲ್ಲಿ ಒಂದು ಸುತ್ತು ಬರಲಾಯಿತು. ಸಚಿನ್ ತೆಂಡೂಲ್ಕರ್‌ರ ಸತತ ಪ್ರಯತ್ನಗಳು ಮತ್ತು ಭಾರತೀಯ ಕ್ರಿಕೆಟ್‌ಗೆ ನೀಡಿದ ಹಲವಾರು ಕೊಡುಗೆಗಳಿಗಾಗಿ ವಿಶ್ವಕಪ್ ಪ್ರಶಸ್ತಿಯನ್ನು ಶ್ರೇಷ್ಠ ಆಟಗಾರನ ಗೌರವದ ಮಡಿಲು ನೀಡಬೇಕಿದೆ ಎಂದು ತಂಡವು ಭಾವಿಸಿತು ಎಂದು ತಂಡದ ಭಾಗವಾಗಿದ್ದ ವಿರಾಟ್‌ ಕೊಹ್ಲಿ ಹೇಳಿದರು. ಈ ಹಿಂದೆ ಹಲವು ಬಾರಿ ಸಚಿನ್ ತೆಂಡೂಲ್ಕರ್ ವಿಶ್ವಕಪ್ ಅಭಿಮಾನದಲ್ಲಿ ಭಾಗವಹಿಸಿದ್ದರು. 1999ರ ವಿಶ್ವಕಪ್ ಸೆಮಿಪೈನಲ್‌ನಲ್ಲಿ ಭಾರತ ಸೋತಿತ್ತು, 2003ರಲ್ಲಿ ಫೈನಲ್‌ ಹಣಾಹಣಿಯಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಸೋಲು ಅನುಭವಿಸಿತ್ತು. ಅಂದು 37ರ ಪ್ರಾಯದ ಸಚಿನ್ ತೆಂಡೂಲ್ಕರ್‌ಗೆ ಕೊನೆಯ ವಿಶ್ವಕಪ್ ಟೂರ್ನಿಯಾಗಿತ್ತು. 9 ಪಂದ್ಯಗಳಿಂದ ಅವರು 53.55ರ ಸರಾಸರಿಯಲ್ಲಿ 482 ರನ್‌ ಗಳಿಸಿದ್ದರು ಹಾಗೂ ಇದರಲ್ಲಿ ಎರಡು ಶತಕಗಳು ಹಾಗೂ ಎರಡು ಅರ್ಧ ಶತಕಗಳು ಒಳಗೊಂಡಿದ್ದವು. ಆ ಮೂಲಕ ವಿಶ್ವಕಪ್ ಟೂರ್ನಿಗಳಲ್ಲಿ ಸಚಿನ್ ತೆಂಡೂಲ್ಕರ್ 2278 ರನ್‌ ಸೇರಿಸಿದರು. ವಿಶ್ವಕಪ್ ಟೂರ್ನಿಗಳಲ್ಲಿ ಅತಿ ಹೆಚ್ಚು ರನ್‌ ಗಳಿಸಿದ ಬ್ಯಾಟ್ಸ್‌ಮನ್‌ ಎಂಬ ಖ್ಯಾತಿಗೆ ಸಚಿನ್ ಭಾಜನರಾಗಿದ್ದಾರೆ. ಬಿಸಿಸಿಐನ ವಿಡಿಯೊ ಚಾಟ್‌ನಲ್ಲಿ ಮಯಾಂಕ್‌ ಅಗರ್ವಾಲ್‌ ಜತೆ ಮಾತನಾಡಿದ ವಿರಾಟ್‌ ಕೊಹ್ಲಿ, "ವಿಶ್ವಕಪ್ ಗೆದ್ದಿದ್ದೇವೆಂಬ ಕೃತಜ್ಞತೆಯಿಂದ ಮೊದಲು ನನಗೆ ತುಂಬಾ ಸಂತೋಷವಾಯಿತು. ನಂತರ ಏಕರೂಪವಾಗಿ ಎಲ್ಲರ ಭಾವನೆ ಪಾಜಿ (ಸಚಿನ್ ತೆಂಡೂಲ್ಕರ್) ಸುತ್ತ ಕೇಂದ್ರೀಕೃತವಾಗಿತ್ತು. ಏಕೆಂದರೆ ಅವರಿಗೆ ವಿಶ್ವಕಪ್ ಗೆಲ್ಲುವ ಕೊನೆಯ ಅವಕಾಶ ಇದು ಎಂದು ನಮಗೆ ತಿಳಿದಿತ್ತು," ಎಂದು ತಿಳಿಸಿದರು. ಏಪ್ರಿಲ್ 2 ರ ಸ್ಮರಣೀಯ ಕ್ಷಣ ಕೊಹ್ಲಿಯ ಈ ಸಾಲುಗಳೊಂದಿಗೆ ಇನ್ನಷ್ಟು ವಿಶೇಷವಾಗಿದೆ. 'ಅವರು [ತೆಂಡೂಲ್ಕರ್] 21 ವರ್ಷಗಳಿಂದ ರಾಷ್ಟ್ರದ ಹೊರೆಯನ್ನು ಹೊತ್ತುಕೊಂಡಿದ್ದಾರೆ. ನಾವು ಅವರನ್ನು ನಮ್ಮ ಹೆಗಲ ಮೇಲೆ ಹೊತ್ತುಕೊಂಡ ಸಮಯ ಅದಾಗಿತ್ತು," ಎಂದು ಕೊಹ್ಲಿ ಹೆಳಿದರು. "ಅವರು ನಮಗೆ ಸಾಕಷ್ಟು ಪ್ರೇರಣೆಯನ್ನು ನೀಡಿದ್ದಾರೆ ಹಾಗೂ ಭಾರತದ ಬಹುತೇಕ ಮಕ್ಕಳಿಗೆ ಸ್ಪೂರ್ತಿಯಾಗಿದ್ದಾರೆ. ಈ ಎಲ್ಲಾ ಜನರಿಗೆ ಸಚಿನ್ ತೆಂಡೂಲ್ಕರ್ ಒಂದು ಕೊಡುಗೆ ಎಂದೇ ಹೇಳಬೇಕು. ಏಕೆಂದರೆ, ಎರಡು ದಶಕಗಳಿಗೂ ಹೆಚ್ಚು ಕಾಲ ಭಾರತಕ್ಕೆ ತಮ್ಮದೇ ಆದ ಕೊಡುಗೆಯನ್ನು ನೀಡುತ್ತಲೇ ಬಂದಿದ್ದಾರೆ," ಎಂದು ಕ್ರಿಕೆಟ್ ದೇವರನ್ನು ಕೊಂಡಾಡಿದರು. "ಸುಮಾರು ವರ್ಷಗಳ ಕಾಲ ಅವರು ಕ್ರಿಕೆಟ್ ಅಂಗಳದಲ್ಲಿ ಅನುಭವಿಸಿದ್ದ ಕಠಿಣ ಪರಿಶ್ರಮಕ್ಕೆ ದೊರೆತ ಪ್ರತಿಫಲ ಅದಾಗಿತ್ತು. ಅಂದು ನಮ್ಮೆಲ್ಲರ ಭಾವನೆ ಕೂಡ ಇದೇ ಆಗಿತ್ತು. ಕ್ರಿಕೆಟ್ ದಿಗ್ಗಜನ ಕನಸನ್ನು ನನಸಾದ ಬಗ್ಗೆ ಅವರಿಗೆ ಮನವರಿಕೆ ಮಾಡಲು ತವರು ಅಂಗಳದಲ್ಲಿ ನಾವೆಲ್ಲ ಹೆಗಲ ಮೇಲೆ ಹೊತ್ತುಕೊಂಡು ಒಂದು ಸುತ್ತು ಬಂದೆವು. ಆ ಕ್ಷಣ ಅವರಿಗೆ ಸೂಕ್ತವಾದದ್ದು ಎಂದು ನಾವೆಲ್ಲ ಭಾವಿಸಿದೆವು," ಎಂದು ವಿರಾಟ್‌ ಕೊಹ್ಲಿ 2011ರ ಐತಿಹಾಸಿಕ ಸನ್ನಿವೇಶವನ್ನು ಸ್ಮರಿಸಿಕೊಂಡರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2X7yQM6
