ಲಂಡನ್: ರಾಜಸ್ಥಾನದ ದೇವಾಲಯವೊಂದರಿಂದ ಕಳ್ಳತನ ಮಾಡಿ ಇಂಗ್ಲೆಂಡ್‌ಗೆ ಸಾಗಿಸಲಾಗಿದ್ದ ಪುರಾತನ ಶಿವನ ಮೂರ್ತಿಯೊಂದು ಮತ್ತೆ ಭಾರತಕ್ಕೆ ಮರಳಿ ಬರಲಿದೆ. 1998ರಲ್ಲಿ ರಾಜಸ್ಥಾನದ ಬರೋಲಿಯಲ್ಲಿರುವ ಗಟೇಶ್ವರ ದೇವಸ್ಥಾನದಿಂದ 9ನೇ ಶತಮಾನದಲ್ಲಿ ನಿರ್ಮಿಸಲಾಗಿದ್ದ ಪ್ರತಿಹಾರ ಶಿವನ ಮೂರ್ತಿಯೊಂದನ್ನು ಕಳ್ಳತನ ಮಾಡಲಾಗಿತ್ತು. ಕಳ್ಳ ಸಾಗಾಣಿಕೆ ಮೂಲಕ ಈ ಮೂರ್ತಿ ಇಂಗ್ಲೆಂಡ್ ತಲುಪಿತ್ತು. ಈ ಮೂರ್ತಿಯನ್ನು ಇಂಗ್ಲೆಂಡ್‌ನ ಆಗರ್ಭ ಶ್ರೀಮಂತನೊಬ್ಬ ಭಾರೀ ಹಣಕ್ಕೆ ಖರೀದಿಸಿದ್ದ. ಆದರೆ ಇದು ಭಾರತದೊಂದಿಗೆ ಆಧ್ಯಾತ್ಮಿಕ ನಂಟು ಹೊಂದಿದೆ ಎಂದು ಅರಿತ ಆತ ಅದನ್ನು ಭಾರತಕ್ಕೆ ಮರಳಿಸಲು ನಿರ್ಧರಿಸಿದ್ದ. ನಂತರ 2005ರಲ್ಲಿ ಹಾಗೂ ಭಾರತೀಯ ಅಧಿಕಾರಿಗಳ ಜಂಟಿ ಪ್ರಯತ್ನದ ಭಾಗವಾಗಿ 4 ಅಡಿ ಎತ್ತರದ ಈ ಲಂಡನ್‌ನಲ್ಲಿರುವ ಭಾರತದ ರಾಯಭಾರ ಕಚೇರಿ ತಲುಪಿತ್ತು. ಅಲ್ಲಿಂದ ಈ ಪುರಾತನ ಮೂರ್ತಿಯನ್ನು ಲಂಡನ್ ನಗರದ ಮಧ್ಯಭಾಗದಲ್ಲಿರುವ ಇಂಡಿಯಾ ಹೌಸ್‌ನಲ್ಲಿ ಸುರಕ್ಷಿತವಾಗಿ ಇಡಲಾಗಿದೆ. 2017ರಲ್ಲಿ ಭಾರತದ ಪುರಾತತ್ವ ಇಲಾಖೆ ಅಧಿಕಾರಿಗಳು ಇಂಡಿಯಾ ಹೌಸ್‌ಗೆ ಭೇಟಿ ನೀಡಿ ಇದು ಬರೋಲಿ ಗಟೇಶ್ವರ ದೇವಸ್ಥಾನದಿಂದ ಕದ್ದ ಶಿವನ ಮೂರ್ತಿ ಎಂದು ಖಚಿತಪಡಿಸಿದ ಬಳಿಕ ಇದನ್ನು ಭಾರತಕ್ಕೆ ಮರಳಿ ತರುವ ಕಾರ್ಯಕ್ಕೆ ಚಾಲನೆ ನೀಡಲಾಯಿತು. ಈ ಶಿವನ ಮೂರ್ತಿ ಸದ್ಯದಲ್ಲೇ ಭಾರತಕ್ಕೆ ಬರಲಿದ್ದು, ಮತ್ತೆ ರಾಜಸ್ಥಾನದ ಬರೋಲಿಯ ಗಟೇಶ್ವರ ದೇವಸ್ಥಾನದಲ್ಲಿ ಈ ಮೂರ್ತಿಯನ್ನು ಮರು ಪ್ರತಿಷ್ಠಾಪನೆ ಮಾಡಲಾಗುವುದು ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.
from India & World News in Kannada | VK Polls https://ift.tt/3i1GFer
