ಹೊಸದಿಲ್ಲಿ: ಸ್ಪರ್ಧಾತ್ಮಕ ಕ್ರಿಕೆಟ್‌ಗೆ ಮರಳುವ ತುಡಿತದಲ್ಲಿರುವ ಹಿರಿಯ ವೇಗಿ ಶ್ರೀಶಾಂತ್‌ ಈಗಾಗಲೇ ಅಭ್ಯಾಸವನ್ನು ಆರಂಭಿಸಿದ್ದಾರೆ. ಈ ಕುರಿತು ಕೇರಳ ತಂಡದ ನಾಯಕ ಮಾತನಾಡಿದ್ದು, ಹಿರಿಯ ವೇಗಿ ಬೌಲಿಂಗ್‌ ಸಾಮರ್ಥ್ಯವನ್ನು ಉಳಿಸಿಕೊಂಡಿದ್ದಾರೆ, ಆದರೆ ಅವರು ಇನ್ನೂ ಪಂದ್ಯಕ್ಕೆ ಸಂಪೂರ್ಣ ಫಿಟ್‌ ಆಗಿಲ್ಲ ಎಂದು ಹೇಳಿದ್ದಾರೆ. 2013ರ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ಮ್ಯಾಚ್‌ ಫಿಕ್ಸಿಂಗ್ ಪ್ರಕಣದಿಂದ ಎಸ್‌.ಶ್ರೀಶಾಂತ್‌ ಜೀವಿತಾವಧಿ ಕ್ರಿಕೆಟ್‌ನಿಂದ ಬ್ಯಾನ್‌ ಆಗಿದ್ದರು. ಆದರೆ, ಅವರ ಶಿಕ್ಷೆಯ ಪ್ರಮಾಣವನ್ನು ಸುಪ್ರಿಂ ಕೋರ್ಟ್‌ 7 ವರ್ಷಗಳಿಗೆ ಕಡಿತಗೊಳಿಸಿತ್ತು. ಇದೇ ವರ್ಷ ಸೆಪ್ಟೆಂಬರ್‌ನಲ್ಲಿ ಅವರ ಶಿಕ್ಷೆ ಮುಕ್ತಾಯವಾಗಲಿದೆ. ಹಾಗಾಗಿ, ಕೇರಳ ರಾಜ್ಯ ಕ್ರಿಕೆಟ್ ಸಂಸ್ಥೆಯೂ ಎಸ್‌.ಶ್ರೀಶಾಂತ್‌ ಅವರಿಗೆ ಈ ಬಾರಿ ಆಡಿಸಲು ಅವಕಾಶ ನೀಡಲಾಗುವುದು ಎಂದು ತಿಳಿಸಿದೆ. ಅಭ್ಯಾಸ ಶುರು ಮಾಡಿದ್ದ ಶ್ರೀಶಾಂತ್‌ ತಮ್ಮ ಹಳೆಯ ಬೌಲಿಂಗ್‌ ಲಯಕ್ಕೆ ಮರಳಲು ಪ್ರಯತ್ನಿಸುತ್ತಿದ್ದಾರೆ. ಬಲಗೈ ವೇಗಿ ರಾಜ್ಯ ತಂಡದಲ್ಲಿ ಲಯಕ್ಕೆ ಹಿಂತಿರುಗಲಿದ್ದಾರೆಂದು ಕೇರಳ ಕ್ರಿಕೆಟ್ ಮಂಡಳಿ ನಿರೀಕ್ಷೆ ಇಟ್ಟಿದೆ. ಆದರೆ, ಕೇರಳ ತಂಡದ ನಾಯಕ ಸಚಿನ್‌ ಬೇಬಿ ಈ ಬಗ್ಗೆ ಯಾವುದೇ ಖಚಿತತೆ ತೋರಿಸುತ್ತಿಲ್ಲ. ಅವರಿನ್ನೂ ಪಂದ್ಯಕ್ಕೆ ಸಂಪೂರ್ಣ ಫಿಟ್‌ ಆಗಿಲ್ಲ ಎಂದು ಕ್ರಿಕೆಟ್‌ಅಡಿಕ್ಟರ್‌ಗೆ ತಿಳಿಸಿದ್ದಾರೆ. "ನಾವು ಕಳೆದ ಏಳು ವರ್ಷಗಳಿಂದ ಒಟ್ಟಿಗೆ ಅಭ್ಯಾಸ ನಡೆಸುತ್ತಿದ್ದೇವೆ, ಅದರಂತೆ ಅವರು ಅತ್ಯುತ್ತಮವಾಗಿ ಬೌಲಿಂಗ್‌ ಮಾಡುತ್ತಿದ್ದಾರೆ. ದೇಹವನ್ನು ಕೂಡ ಉತ್ತಮವಾಗಿ ನಿರ್ವಹಿಸಿದ್ದಾರೆ. ಅವರಲ್ಲಿ ಪಂದ್ಯ ಆಡುವಷ್ಟು ಫಿಟ್ನೆಸ್‌ ಇಲ್ಲ, ಆದರೂ ಅವರು ಫಿಟ್‌ ಆಗಿದ್ದಾರೆ ಹಾಗೂ ಬೌಲಿಂಗ್‌ ಕೂಡ ಚೆನ್ನಾಗಿ ಮಾಡುತ್ತಿದ್ದಾರೆ," ಎಂದು ಸಂದರ್ಶನದಲ್ಲಿ ತಿಳಿಸಿದ್ದಾರೆ. "ಅವರಿನ್ನೂ ಕಿಟ್‌ನಲ್ಲಿಯೇ ಇದ್ದು, ನಾವೆಲ್ಲರು ಅವರ ಕಮ್‌ಬ್ಯಾಕ್‌ಗೋಸ್ಕರ ಕಾಯುತ್ತಿದ್ದೇವೆ. ಲಾಕ್‌ಡೌನ್‌ ಬಳಿಕ ಕೇರಳದಲ್ಲಿ ಮಳೆ ಆರಂಭವಾಗಲಿದೆ. ಇದಾದ ಬಳಿಕ ಶ್ರೀಶಾಂತ್‌ ಸಂಪೂರ್ಣ ಫಿಟ್‌ ಆಗಿ ಮರಳಲಿದ್ದಾರೆಂದು ನಂಬಿಕೆ ನನಗಿದೆ. ಇದೀಗ ಅವರು ತುಂಬಾ ಕಠಿಣ ಪರಿಶ್ರಮ ಪಡುತ್ತಿದ್ದಾರೆ," ಎಂದು ಸಚಿನ್‌ ಬೇಬಿ ಹೇಳಿದ್ದಾರೆ. 36ರ ಪ್ರಾಯದ ವೇಗಿ ಭಾರತದ ಪರ 27 ಟೆಸ್ಟ್, 53 ಓಡಿಐ ಹಾಗೂ 10 ಟಿ20 ಪಂದ್ಯಗಳಿಂದ ಒಟ್ಟು 169 ವಿಕೆಟ್‌ಗಳನ್ನು ಪಡೆದಿದ್ದಾರೆ. 2011ರಲ್ಲಿ ಕೊನೆಯ ಬಾರಿ ಭಾರತ ತಂಡವನ್ನು ಪ್ರತಿನಿಧಿಸಿದ್ದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3dL4rsx
