ಫೇಕ್ ನ್ಯೂಸ್‌ ಹಾಕೋದ್ರಲ್ಲಿ ಕುಖ್ಯಾತನಾಗಿರುವ ಟ್ವಿಟ್ಟರ್ ಬಳಕೆದಾರ ಇರ್ಮಾಕ್ ಇದೋಯಾ ಎಂಬಾತ ಇತ್ತೀಚೆಗೆ ಒಂದು ಟ್ವೀಟ್‌ ಮಾಡಿದ್ದರು. ಭಾರತದ ಯುದ್ಧ ವಿಮಾನವನ್ನು ಹೊಡೆದುರುಳಿಸಿದೆ ಎಂದು ಆತ ಬರೆದುಕೊಂಡಿದ್ದ. ನೇಪಾಳದಲ್ಲಿ ಉಗ್ರರ ವಿರುದ್ಧ ಏರ್ಸ್ಟ್ರೈಕ್ ನಡೆಸಲು ಭಾರತದ ವಾಯುಪಡೆ ಗಡಿ ದಾಟಿ ದಾಳಿ ನಡೆಸಿತ್ತು ಎಂದು ಆತ ಬರೆದುಕೊಂಡಿದ್ದ. ಆತ ತನ್ನ ಇಮೇಜ್ ಜೊತೆಗೆ ಹೊತ್ತಿ ಉರಿಯುತ್ತಿರುವ ಜೆಟ್ ವಿಮಾನ ಹಾಗೂ ಅವಶೇಷಗಳ ಫೋಟೋ ಕೂಡಾ ಹಾಕಿದ್ದ. ಭಾರತ-ನೇಪಾಳ ಗಡಿಯಲ್ಲಿ ಇರುವ ಕೋಟ್ ಖಾರಕ್ ಸಿಂಗ್ ಪರ್ನೇವಾನ್ ಎಂಬ ಪ್ರದೇಶದಲ್ಲಿ ಭಾರತ ಸೇನೆ ಏರ್‌ ಸ್ಟ್ರೈಕ್ ನಡೆಸಿತ್ತು. ಇದಕ್ಕೆ ಪ್ರತಿಯಾಗಿ ನೇಪಾಳ ಭಾರತದ ಜೆಟ್ ವಿಮಾನವನ್ನು ಹೊಡೆದುರುಳಿಸಿತ್ತು. ಈ ಘಟನೆಯಲ್ಲಿ ಇಬ್ಬರು ಪೈಲಟ್‌ಗಳು ಜೀವಬಿಟ್ಟಿದ್ದಾರೆ ಎಂದು ಆತ ಬರೆದುಕೊಂಡಿದ್ದ. ಸತ್ಯಾಂಶವೇನೆಂದರೆ, ಈ ಎರಡೂ ಫೋಟೋಗಳೂ ಹಳೆಯವು. ಒಂದು ಲಿಬಿಯಾದ ಫೋಟೋ ಆದರೆ, ಮತ್ತೊಂದು ಬೆಂಗಳೂರಿನ ಫೋಟೋ. ಫೋಟೋ 1ರ ಸತ್ಯಾಂಶವೇನು..? ಗೂಗಲ್‌ ಸರ್ಚ್‌ನಲ್ಲಿ ರಿವರ್ಸ್ ಇಮೇಜ್ ತಂತ್ರಜ್ಞಾನ ಬಳಸಿ ಹುಡುಕಿದಾಗ ಮಾರ್ಚ್ 20, 2011ರ ಒರೆಗಾನಿಯನ್ ಎಂಬ ವೆಬ್‌ ಸೈಟ್‌ನ ಪೋಸ್ಟ್‌ ಲಭ್ಯವಾಯ್ತು. ಈ ವರದಿಯಲ್ಲಿ ಲಿಬಿಯಾ ದೇಶದ ಜೆಟ್ ಒಂದನ್ನು ಬೆಂಗಾಝಿಯಲ್ಲಿ ಹೊಡೆದುರುಳಿಸಿದ ಬಗ್ಗೆ ಬರೆಯಲಾಗಿತ್ತು. ಈ ವೇಳೆ, ಪೈಲಟ್ ತುರ್ತು ನಿರ್ಗಮನದಿಂದ ಹೊರಬಂದು ಪ್ಯಾರಾಚೂಟ್ ಮೂಲಕ ಇಳಿದಿದ್ದ. ಈ ಫೋಟೋಗೆ ಅಸೋಸಿಯೇಟೆಡ್‌ ಪ್ರೆಸ್‌ನ ಕೃಪೆ ಎಂದು ವಿವರಿಸಲಾಗಿತ್ತು. ಫೋಟೋ 2ರ ಸತ್ಯಾಂಶವೇನು..? ಈ ಸಂಬಂಧ ಹುಡುಕಾಟ ನಡೆಸಿದಾಗ ಫೆಬ್ರವರಿ 2, 2019ರ ಸ್ಟೇಟ್ಸ್‌ಮನ್‌ನ ವರದಿ ಲಭ್ಯವಾಯ್ತು. ಇದರಲ್ಲಿ ಹೆಚ್‌ಎಎಲ್‌ಗೆ ಸೇರಿದ ಭಾರತೀಯ ವಾಯುಸೇನೆಯ ಮಿರಾಜ್ 2000 ಫೈಟರ್ ಜೆಟ್ ವಿಮಾನ ಬೆಂಗಳೂರಿನಲ್ಲಿ ದುರಂತಕ್ಕೀಡಾದ ವರದಿ ಇತ್ತು. ಮಿಲಿಟರಿ ಏರ್‌ಪೋರ್ಟ್‌ನಲ್ಲೇ ವಿಮಾನ ದುರಂತಕ್ಕೀಡಾಗಿತ್ತು. ಫೆಬ್ರವರಿ 1, 2019ರಂದು ಈ ಘಟನೆ ನಡೆದಿತ್ತು. ಈ ಚಿತ್ರಕ್ಕೆ ಐಎಎನ್‌ಎಸ್ ಕೃಪೆ ಇತ್ತು. ಫ್ಯಾಕ್ಟ್‌ ಚೆಕ್ ತಂಡ ಈ ಸುದ್ದಿಯ ಬಗ್ಗೆ ಇನ್ನಷ್ಟು ಹುಡುಕಾಟ ನಡೆಸಿದಾಗ ಪ್ರೆಸ್‌ ಇನ್ಫರ್ಮೇಷನ್ ಬ್ಯೂರೋದ ಟ್ವೀಟ್‌ ಕೂಡಾ ಸಿಕ್ಕಿತು. ನೇಪಾಳದಲ್ಲಿ ಭಾರತ ಯಾವುದೇ ರೀತಿಯ ಏರ್ಸ್ಟ್ರೈಕ್ ನಡೆಸಿಲ್ಲ ಎಂದು ಸ್ಪಷ್ಟಪಡಿಸಲಾಗಿತ್ತು. ಟೈಮ್ಸ್‌ ಫ್ಯಾಕ್ಟ್‌ ಚೆಕ್‌ನ ಸಮಗ್ರ ಅಧ್ಯಯನದ ಬಳಿಕ ಹೇಳೋದಾದ್ರೆ, ನೇಪಾಳದಲ್ಲಿ ಭಾರತ ಏರ್‌ ಸ್ಟ್ರೈಕ್ ನಡೆಸುವ ವೇಳೆ ಯುದ್ಧ ವಿಮಾನವನ್ನು ಹೊಡೆದುರುಳಿಸಲಾಗಿದೆ ಎಂಬ ಸುದ್ದಿಯೇ ಸುಳ್ಳು. ಇದು ಲಿಬಿಯಾ ಹಾಗೂ ಬೆಂಗಳೂರಿನ ಘಟನೆಗಳು ಎಂದು ಸ್ಪಷ್ಟವಾಗುತ್ತಿದೆ.
from India & World News in Kannada | VK Polls https://ift.tt/3hHteQi
