ಎಚ್‌.ಪಿ.ಪುಣ್ಯವತಿ ಬೆಂಗಳೂರು ಬೆಂಗಳೂರು: ಕೊರೊನಾ ಸಂಕಷ್ಟದ ನಡುವೆಯೂ ಕಳೆದ ಒಂದು ತಿಂಗಳಿನಿಂದ ಏರಿಕೆಯಾಗುತ್ತಲೇ ಇದ್ದು, ಹತ್ತು ಗ್ರಾಂಗೆ 53 ಸಾವಿರ ರೂ. ತಲುಪಿದೆ. ದೀಪಾವಳಿ ವೇಳೆಗೆ ಅದು 65 ಸಾವಿರ ತಲುಪುವ ನಿರೀಕ್ಷೆಯಿದೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಚಿನ್ನ ಖರೀದಿ ಪ್ರಮಾಣ ಹಾಗೂ ಚಿನ್ನದ ಮೇಲಿನ ಹೂಡಿಕೆ ಶೇ.30ರಷ್ಟು ಏರಿಕೆಯಾಗಿರುವುದರಿಂದ ಬೇಡಿಕೆ ಹೆಚ್ಚಿದೆ. ಹೀಗಾಗಿ ಸದ್ಯಕ್ಕೆ ದರ ಏರಿಕೆ ನಾಗಲೋಟ ನಿಲ್ಲದು ಎನ್ನುತ್ತಾರೆ ಸ್ವರ್ಣೋದ್ಯಮಿಗಳು. ಜಾಗತಿಕ ಆರ್ಥಿಕತೆ ಮಂದಗತಿಯಲ್ಲಿದೆ. ಏತನ್ಮಧ್ಯೆ, ಅಮೆರಿಕ, ಚೀನಾ ನಡುವಿನ ಮಾರುಕಟ್ಟೆ ಮೇಲಿನ ಹಿಡಿತದ ಕಿತ್ತಾಟವೂ ಜೋರಾಗದೆ. ಷೇರು ಮಾರುಕಟ್ಟೆ, ರಿಯಲ್‌ ಎಸ್ಟೇಟ್‌, ಆಟೊಮೊಬೈಲ್‌ ಕ್ಷೇತ್ರಗಳು ಕಳೆಗುಂದುವ ಜತೆಗೆ ಬ್ಯಾಂಕ್‌ ಬಡ್ಡಿ ದರ ಇಳಿಕೆಯಾಗಿದೆ. ಚೀನಾವಂತೂ ಏಜೆನ್ಸಿಗಳ ಮೂಲಕ ಕೈಗಾರಿಕಾ ಉದ್ದೇಶಕ್ಕಾಗಿ ಚಿನ್ನ ಹಾಗೂ ಬೆಳ್ಳಿಯನ್ನು ಯಥೇಚ್ಛವಾಗಿ ಖರೀದಿಸುತ್ತಿದೆ. ಅಮೆರಿಕವು ಕೊರೊನಾದಿಂದಾದ ಆರ್ಥಿಕ ನಷ್ಟ ತುಂಬಲು ಬ್ಯಾಂಕ್‌ಗಳಲ್ಲಿ ಠೇವಣಿಗಳ ಮೇಲೆ ನಿರ್ವಹಣಾ ಶುಲ್ಕ ವಿಧಿಸುವ ಕಾನೂನು ಜಾರಿಗೆ ತರುವ ಬಗ್ಗೆ ಚಿಂತನೆ ನಡೆಸಿದೆ. ಅದು ಜಾರಿಯಾದರೆ ಅಮೆರಿಕನ್ನರು ಚಿನ್ನದ ಮೇಲೆ ಹೂಡಿಕೆ ಮಾಡಬಹುದು ಎಂದು ಹೇಳಲಾಗುತ್ತಿದ್ದು, ಅದರಿಂದಲೂ ದರ ಏರಿಕೆಯಾಗಲಿದೆ. ಗಣಿಗಾರಿಕೆ ಸ್ಥಗಿತ ಭಾರತಕ್ಕೆ ಶೇ.99ರಷ್ಟು ಚಿನ್ನವನ್ನು ದಕ್ಷಿಣ ಆಫ್ರಿಕಾ, ಯೂರೋಪ್‌ ರಾಷ್ಟ್ರಗಳಿಂದ ಆಮದು ಮಾಡಿಕೊಳ್ಳಲಾಗುತ್ತಿದೆ. ಕೊರೊನಾದಿಂದಾಗಿ ಅಲ್ಲಿನ ಚಿನ್ನದ ಗಣಿಗಳು ಸ್ಥಗಿತಗೊಂಡಿದ್ದು, ಮಾರುಕಟ್ಟೆಯಲ್ಲಿ ಕೊರತೆ ಉಂಟಾಗಿದೆ. ಇದೂ ಕೂಡ ದರ ಗಗನಕ್ಕೇರಲು ಕಾರಣವಾಗಿದೆ. ಶೇ.60ಕ್ಕೇರಿದ ಹೂಡಿಕೆ ''ಬ್ಯಾಂಕ್‌ಗಳಲ್ಲಿ ಠೇವಣಿ ಮೇಲಿನ ಬಡ್ಡಿ ದರ ಇಳಿಕೆಯಾಗಿರುವುದರಿಂದ ಹೂಡಿಕೆದಾರರು ಚಿನ್ನದತ್ತ ಒಲವು ತೋರುತ್ತಿದ್ದಾರೆ. ಹೀಗಾಗಿ ಶೇ.20ರಷ್ಟಿದ್ದ ಹೂಡಿಕೆ ಶೇ. 60ಕ್ಕೇರಿದೆ,'' ಎನ್ನುತ್ತಾರೆ ಕರ್ನಾಟಕ ರಾಜ್ಯ ಆಭರಣ ವರ್ತಕರ ಒಕ್ಕೂಟದ ಪ್ರಧಾನ ಕಾರ್ಯದರ್ಶಿ ಡಾ. ಬಿ. ರಾಮಾಚಾರಿ. ಆಮದು ಸುಂಕ ಪರಿಶೀಲಿಸಿ ಆಮದು ಸುಂಕ ಒಂದು ಗ್ರಾಂಗೆ ಮೂರು ಸಾವಿರ ರೂ. ಇರುವಾಗಲೂ ಶೇ.13ರಷ್ಟಿತ್ತು. ಅದು ಐದು ಸಾವಿರಕ್ಕೆ ತಲುಪಿದಾಗಲೂ ಶೇ.13 ರಷ್ಟಿದೆ. ಇದನ್ನು ಪರಿಶೀಲಿಸಬೇಕು ಎಂದು ಸಾಯಿಗೋಲ್ಡ್‌ ಪ್ಯಾಲೇಸ್‌ ಆಭರಣ ಮಳಿಗೆಯ ಮಾಲೀಕರಾದ ಡಾ. ಟಿ.ಎ. ಶರವಣ ಒತ್ತಾಯಿಸಿದ್ದಾರೆ. ಚಿನ್ನ-ಬೆಳ್ಳಿಯ ಈಗಿನ ದರ ಹತ್ತು ಗ್ರಾಂ ಚಿನ್ನಕ್ಕೆ 53 ಸಾವಿರ ರೂ. ಹಾಗೂ ಒಂದು ಕೆ.ಜಿ. ಬೆಳ್ಳಿ ದರ 65 ಸಾವಿರ ರೂ. ಇದೆ. ಕೆಲವೇ ದಿನಗಳಲ್ಲಿ ಚಿನ್ನದ ದರ 10 ಗ್ರಾಂಗೆ 65 ಸಾವಿರ ಹಾಗೂ ಬೆಳ್ಳಿ ಕೆ.ಜಿ. 70 ಸಾವಿರ ರೂ. ಆಗಲಿದೆ. 4 ತಿಂಗಳಲ್ಲಿ 1650 ಕೆ.ಜಿ. ಚಿನ್ನ, 1,100 ಕೆ.ಜಿ. ಬೆಳ್ಳಿ ಮಾರಾಟ ಏಪ್ರಿಲ್‌ನಿಂದ ಈವರೆಗೆ (ಲಾಕ್‌ಡೌನ್‌ ಸೇರಿ) ರಾಜ್ಯದಲ್ಲಿ ಬರೋಬ್ಬರಿ 1650 ಕೆ.ಜಿ. ಚಿನ್ನ ಮಾರಾಟವಾಗಿದ್ದು, 750 ಕೋಟಿ ವಹಿವಾಟು ನಡೆದಿದೆ. ಬೆಳ್ಳಿಗೂ ಎಲ್ಲಿಲ್ಲದ ಬೇಡಿಕೆ ಬಂದಿದ್ದು, 1,100 ಕೆ.ಜಿ. ಬೆಳ್ಳಿ ಮಾರಾಟವಾಗಿ, 60 ಕೋಟಿ ರೂ.ಗಳ ವಹಿವಾಟು ನಡೆದಿದೆ ಎನ್ನುತ್ತಾರೆ ಕರ್ನಾಟಕ ರಾಜ್ಯ ಆಭರಣ ವರ್ತಕರ ಒಕ್ಕೂಟದ ಪ್ರಧಾನ ಕಾರ್ಯದರ್ಶಿ ಡಾ. ಬಿ. ರಾಮಾಚಾರಿ. ಬೆಲೆ ಏರಿಕೆಯಾಗಿದ್ದರೂ ವಹಿವಾಟು ಹೆಚ್ಚಾಗಿಲ್ಲ. ಈ ದರ ಇನ್ನೂ ಏರಿಕೆಯಾಗಲಿದೆ. ಎಲ್ಲಿಯವರೆಗೆ ಹೂಡಿಕೆದಾರರು ಚಿನ್ನ ಮಾರುವುದಿಲ್ಲವೋ ಅಲ್ಲಿಯವರೆಗೆ ಬೆಲೆ ಇಳಿಕೆಯಾಗದು. ಡಾ. ಟಿ.ಎ. ಶರವಣ, ಶ್ರೀ ಸಾಯಿಗೋಲ್ಡ್‌ ಪ್ಯಾಲೇಸ್‌ ಮಾಲೀಕರು ಹಾಗೂ ಕರ್ನಾಟಕ ಆಭರಣ ವರ್ತಕರ ಸಂಘದ ಅಧ್ಯಕ್ಷರು ರೂಪಾಯಿ ಮೌಲ್ಯ ಕುಸಿತ ವರ್ಷದ ಕೊನೆಗೆ ಒಂದು ಗ್ರಾಂ ಚಿನ್ನದ ಬೆಲೆ 6,500 ದಿಂದ 7,000ದವರೆಗೆ ತಲುಪುವ ಸಾಧ್ಯತೆಯಿದೆ. ಆರ್ಥಿಕ ಪರಿಸ್ಥಿತಿ ಸುಧಾರಣೆಯಾದರೂ ಪ್ರತಿ ಗ್ರಾಂ ಮೇಲೆ 50-100 ರೂ. ನಷ್ಟು ಕಡಿಮೆಯಾಗಬಹುದೇ ಹೊರತು ಚಿನ್ನದ ದರ ಇಳಿಯುವುದಿಲ್ಲ. ಡಾ. ಬಿ. ರಾಮಾಚಾರಿ, ಪ್ರಧಾನ ಕಾರ್ಯದರ್ಶಿ, ಕರ್ನಾಟಕ ರಾಜ್ಯ ಆಭರಣ ವರ್ತಕರ ಒಕ್ಕೂಟ
from India & World News in Kannada | VK Polls https://ift.tt/2X5Ar58
