ಹೊಸದಿಲ್ಲಿ: ಇಡೀ ವಿಶ್ವವನ್ನು ಹಿಂಡಿ ಹಿಪ್ಪೆ ಮಾಡಿರುವ ಮಹಾಮಾರಿ ಕೊರೊನಾ ವೈರಸ್ಗೆ ಲಸಿಕೆ ಕಂಡುಹಿಡಿಯಲು ನಿರಂತರ ಪ್ರಯತ್ನ ನಡೆಯುತ್ತಿದೆ. ಭಾರತದಲ್ಲೂ ಕೋವಿಡ್ ಅಬ್ಬರ ಮುಗಿಲುಮುಟ್ಟಿದೆ. ದೇಶದಲ್ಲಿಯೂ ಕೊರೊನಾ ಲಸಿಕೆಗೆ ಸಂಶೋಧನೆಗಳು ನಡೆಯುತ್ತಲೇ ಇದೆ. ಈಗ ಶುಭ ಸುದ್ದಿ ಎಂದರೆ ಭಾರತದ ಆರು ನಗರದಲ್ಲಿ ಕೋವಿಡ್ ಲಸಿಕೆ ಪ್ರಯೋಗ ಗಣನೀಯವಾಗಿ ಪ್ರಗತಿ ಸಾಧಿಸಿದೆ. ಕರ್ನಾಟಕದ ಬೆಳಗಾವಿಯಲ್ಲೂ ಕೋವಿಡ್ ಲಸಿಕೆ ಪ್ರಯೋಗ ಈಗ ನಡೆಯಲಿದೆ. ಭಾರತದ ಸಂಸ್ಥೆಗಳಾದ ಭಾರತ್ ಬಯೋಟೆಕ್ ಮತ್ತು ಝೈಡಸ್ ಕ್ಯಾಡಿಲಾ ಸಂಸ್ಥೆಗಳು ಈಗ ಎರಡು ಲಸಿಕೆ ಪ್ರಯೋಗಿಸಿದ್ದು, ಅದರ ಮಾನವ ಪ್ರಯೋಗಕ್ಕೆ ಚಾಲನೆ ಕೂಡ ಸಿಕ್ಕಿದೆ. ಭಾರತ್ ಬಯೋಟೆಕ್ನ ಕೊವಾಕ್ಸಿನ್ ಲಸಿಕೆಯನ್ನು ಶುಕ್ರವಾರ ಹೊಸದಿಲ್ಲಿಯ ಏಮ್ಸ್ನಲ್ಲಿ 30 ವರ್ಷದ ವ್ಯಕ್ತಿಯ ಮೇಲೆ ಪ್ರಯೋಗಿಸಲಾಗಿದೆ. ಇಂಟ್ರಾ ಮಸ್ಕೂಲರ್ ಇಂಜೆಕ್ಷನ್ ರೂಪದಲ್ಲಿ ಕೊವಾಕ್ಸಿನ್ ಲಸಿಕೆ ನೀಡಲಾಗಿದೆ. ಏಮ್ಸ್ ವೈದ್ಯರಾದ ಡಾ. ಸಂಜಯ್ ರೈ ಈ ಕುರಿತು ಪ್ರತಿಕ್ರಿಯೆ ನೀಡಿದ್ದಾರೆ. ಲಸಿಕೆ ನೀಡಿ ಕೆಲವು ಗಂಟೆಗಳ ಕಾಲ ಅವರನ್ನು ನಿಗಾದಲ್ಲಿಡಲಾಗಿತ್ತು. ಯಾವುದೇ ಅಡ್ಡ ಪರಿಣಾಮಗಳು ಕಂಡು ಬರಲಿಲ್ಲ ಎಂದು ಸಂಜಯ್ ರೈ ತಿಳಿಸಿದ್ದಾರೆ. ಕೆಲವು ದಿನಗಳ ಕಾಲ ನಿಗಾದಲ್ಲಿಟ್ಟು ಮತ್ತೆ ಅಧ್ಯಯನ ನಡೆಸಲಾಗುವುದು ಎಂದು ವೈದ್ಯರು ಮಾಹಿತಿ ನೀಡಿದ್ದಾರೆ. ಗಮನಾರ್ಹ ವಿಷಯ ಎಂದರೆ ಬೆಳಗಾವಿಯಲ್ಲಿಯೂ ಈ ಲಸಿಕೆಯ ಪ್ರಯೋಗ ಆರಂಭವಾಗಲಿದೆ. ಇಲ್ಲಿನ ಜೀವನ ರಕ್ಷಾ ಆಸ್ಪತ್ರೆಯಲ್ಲಿ 200 ಮಂದಿಯ ಮೇಲೆ ಪ್ರಯೋಗ ನಡೆಯಲಿದೆ. ಈಗಾಗಲೇ ಜುಲೈ 15ರಂದು ಈ ಎರಡೂ ಸಂಸ್ಥೆಗಳು ಸ್ವಯಂ ಪ್ರೇರಿತರಾಗಿ ಮುಂದೆ ಬಂದ ವ್ಯಕ್ತಿಗಳ ಮೇಲೆ ಲಸಿಕೆ ಪ್ರಯೋಗ ಮಾಡಿದೆ. ಹೊಸದಿಲ್ಲಿ, ಹೈದರಾಬಾದ್, ಪಟನಾ, ಕಾಂಚೀಪುರಂ, ರೋಹ್ಟಕ್, ನಾಗಪುರ, ಭುವನೇಶ್ವರ, ಗೋರಖ್ಪುರ, ಕಾನ್ಪುರ, ಗೋವಾ ಮತ್ತು ವಿಶಾಖಪಟ್ಟಣಂನಲ್ಲಿ ಪ್ರಯೋಗ ನಡೆಯಲಿದೆ. ಮೊದಲ ಹಂತದಲ್ಲಿ 500 ಮಂದಿಯ ಮೇಲೆ ಪ್ರಯೋಗ ನಡೆಯಲಿದೆ ಎಂದು ಕಂಪನಿಯ ಮೂಲಗಳು ತಿಳಿಸಿವೆ. ಕೆಲವು ವ್ಯಕ್ತಿಗಳಿಗೆ ಚರ್ಮದ ಮೇಲೆ ಕೆಂಪು ಆಗಿದೆ. ಕೆಲವರಿಗೆ ಸ್ವಲ್ಪ ನೋವು ಮತ್ತು ಜ್ವರ ಇದೆ. ಇದು ಪ್ರಯೋಗ ಮಾಡುವ ಸಂದರ್ಭದಲ್ಲಿ ಆಗುತ್ತದೆ. ಮುಂದಿನ ದಿನಗಳಲ್ಲಿ ಇದು ಸರಿ ಹೋಗಲಿದೆ ಎಂದು ವೈದ್ಯರು ತಿಳಿಸಿದ್ದಾರೆ. ಇನ್ನು ಝೈಡಸ್ ಕಂಪನಿಯ ಝೈಕೋವ್-ಡಿ ಲಸಿಕೆ ಸದ್ಯ ಸಂಶೋಧನಾ ಕೇಂದ್ರದಲ್ಲಿ ಪ್ರಯೋಗಕ್ಕೆ ಸೀಮಿತವಾಗಿದೆ. ಅತಿ ಶೀಘ್ರದಲ್ಲಿಯೇ ಇದನ್ನು ಮಾಡಲಾಗುವುದು ಎಂದು ಕಂಪನಿಯ ಅಧಿಕಾರಿಗಳು ತಿಳಿಸಿದ್ದಾರೆ. ಇನ್ನು ಆಕ್ಸ್ಫರ್ಡ್ ವಿಶ್ವವಿದ್ಯಾಲಯ ಅಭಿವೃದ್ಧಿಪಡಿಸುತ್ತಿರುವ ಲಸಿಕೆಯ ಪ್ರಯೋಗ ಶೀಘ್ರವೇ ಭಾರತದಲ್ಲಿಯೂ ಪ್ರಯೋಗ ಆರಂಭಿಸಲಿದೆ.
from India & World News in Kannada | VK Polls https://ift.tt/2D4Qwke
