ಸಿಡ್ನಿ: ಪ್ರವಾಸಿ ನ್ಯೂಜಿಲೆಂಡ್ ವಿರುದ್ಧ ನಡೆದ ಮೂರು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ 3-0 ಅಂತರದ ಕ್ಲೀನ್ ಸ್ವೀಪ್ ಗೆಲುವು ಬಾರಿಸಿರುವ ಆಸ್ಟ್ರೇಲಿಯಾ ತಂಡವು, ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ () ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿರುವ ಭಾರತಕ್ಕೆ ಸಡ್ಡು ಹೊಡೆದಿದೆ. ನ್ಯೂಜಿಲೆಂಡ್ ವಿರುದ್ಧ ಎಲ್ಲ ಮೂರು ಪಂದ್ಯಗಳನ್ನು ಗೆದ್ದಿರುವ ಆಸೀಸ್ ಪೂರ್ಣ 120 ಅಂಕ ಕಲೆ ಹಾಕಿದೆ. ಇದುವರೆಗೆ ಆಡಿರುವ 10 ಪಂದ್ಯಗಳಲ್ಲಿ ಏಳು ಗೆಲುವಿನೊಂದಿಗೆ ಒಟ್ಟು 296 ಅಂಕಗಳನ್ನು ಸಂಪಾದಿಸಿದೆ. ಅಗ್ರಸ್ಥಾನದಲ್ಲಿರುವ ಭಾರತ ಎಲ್ಲ ಏಳು ಪಂದ್ಯಗಳನ್ನು ಗೆದ್ದು ಒಟ್ಟು 360 ಅಂಕಗಳನ್ನು ಪಡೆದಿದೆ. ಭಾರತಕ್ಕಿಂತಲೂ ಆಸೀಸ್ ಕೇವಲ 64 ಅಂಕಗಳ ಹಿನ್ನಡೆಯಲ್ಲಿದೆ. ಇಲ್ಲಿ ಭಾರತ ಹಾಗೂ ಆಸೀಸ್ ತಲಾ ಮೂರು ಸರಣಿಗಳಲ್ಲಿ ಭಾಗವಹಿಸಿದೆ ಎಂಬುದು ಗಮನಾರ್ಹವೆನಿಸುತ್ತದೆ. ಭಾರತ ತನ್ನೆಲ್ಲ ಪಂದ್ಯಗಳನ್ನು ತವರಿನಲ್ಲೇ ಆಡಿದ್ದು, ಇನ್ನಷ್ಟೇ ನೈಜ ಸವಾಲು ಎದುರಾಗಬೇಕಿದೆ. ಹೊಸ ವರ್ಷದಲ್ಲಿ ನ್ಯೂಜಿಲೆಂಡ್ ಪ್ರವಾಸ ಕೈಗೊಳ್ಳುತ್ತಿರುವ ಭಾರತ ಎರಡು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಭಾಗವಹಿಸುತ್ತಿದೆ. ಇಂಗ್ಲೆಂಡ್ ಹಾಗೂ ಆಸ್ಟ್ರೇಲಿಯಾ ನಡುವಣ ಆ್ಯಶಸ್ ಟೆಸ್ಟ್ ಸರಣಿಯೊಂದಿಗೆ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ಗೆ ಚಾಲನೆ ದೊರಕಿತ್ತು. ಅಲ್ಲದೆ ಐದು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ 2-2ರ ಸಮಬಲ ದಾಖಲಿಸಿರುವ ಆಸೀಸ್ 56 ಅಂಕಗಳನ್ನು ಪಡೆದಿತ್ತು. ತದಾ ಬಳಿಕ ಪಾಕಿಸ್ತಾನ ವಿರುದ್ದ ತವರಿನಲ್ಲಿ ನಡೆದ ಎರಡು ಪಂದ್ಯಗಳ ಟೆಸ್ಟ್ ಸರಣಿಯನ್ನು ಗೆದ್ದು ಮತ್ತಷ್ಟು 120 ಅಂಕಗಳನ್ನು ಸಂಪಾದಿಸಿತ್ತು. ಇನ್ನೊಂದೆಡೆ ಶ್ರೀಲಂಕಾ ಪ್ರವಾಸದಲ್ಲಿ 1-1ರ ಅಂತರದ ಸಮಬಲ ದಾಖಲಿಸಿರುವ ನ್ಯೂಜಿಲೆಂಡ್, ಆಸ್ಟ್ರೇಲಿಯಾ ಸರಣಿಯಲ್ಲಿ ಗೆಲುವು ದಾಖಲಿಸುವಲ್ಲಿ ವಿಫಲವಾಗಿರುವುದರಿಂದ ಒಟ್ಟು 60 ಅಂಕಗಳೊಂದಿಗೆ ಐದನೇ ಸ್ಥಾನದಲ್ಲಿದೆ. 2021 ಜೂನ್ ತಿಂಗಳ ವೇಳೆಗೆ ಅಗ್ರ ಎರಡು ಸ್ಥಾನಗಳನ್ನು ಹೊಂದಿರುವ ತಂಡಗಳು, ಇಂಗ್ಲೆಂಡ್ನಲ್ಲಿ ನಡೆಯಲಿರುವ ಫೈನಲ್ನಲ್ಲಿ ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಪಟ್ಟಕ್ಕಾಗಿ ಪರಸ್ಪರ ಸೆಣಸಲಿದೆ. ಐಸಿಸಿ ಅಂಕಪಟ್ಟಿ ಇಂತಿದೆ: 1. ಭಾರತ: ಅಂಕ: 360, ಸರಣಿ: 3, ಪಂದ್ಯ: 7, ಗೆಲುವು: 7, ಸೋಲು: 0, ಡ್ರಾ: 0. 2. ಆಸ್ಟ್ರೇಲಿಯಾ: ಅಂಕ: 296, ಸರಣಿ: 3, ಪಂದ್ಯ: 10, ಗೆಲುವು: 7, ಸೋಲು: 2, ಡ್ರಾ: 1. 3. ಪಾಕಿಸ್ತಾನ: ಅಂಕ: 80, ಸರಣಿ: 2, ಪಂದ್ಯ: 4, ಗೆಲುವು: 1, ಸೋಲು: 2, ಡ್ರಾ: 1. 4. ಶ್ರೀಲಂಕಾ: ಅಂಕ: 80, ಸರಣಿ: 2, ಪಂದ್ಯ: 4, ಗೆಲುವು: 1, ಸೋಲು: 2, ಡ್ರಾ: 1. 5. ನ್ಯೂಜಿಲೆಂಡ್: ಅಂಕ: 60, ಸರಣಿ: 2, ಪಂದ್ಯ: 5, ಗೆಲುವು: 1, ಸೋಲು: 4, 6. ಇಂಗ್ಲೆಂಡ್: ಅಂಕ: 56, ಸರಣಿ: 2, ಪಂದ್ಯ: 6, ಗೆಲುವು: 2, ಸೋಲು: 3, ಡ್ರಾ: 1. 7. ದಕ್ಷಿಣ ಆಫ್ರಿಕಾ: ಅಂಕ: 30, ಸರಣಿ: 1, ಪಂದ್ಯ: 4, ಗೆಲುವು: 1, ಸೋಲು: 3, ಡ್ರಾ: 0. 8. ವೆಸ್ಟ್ಇಂಡೀಸ್: ಅಂಕ: 0, ಸರಣಿ: 1, ಪಂದ್ಯ: 2, ಗೆಲುವು: 0, ಸೋಲು: 2, ಡ್ರಾ: 0. 9. ಬಾಂಗ್ಲಾದೇಶ: ಅಂಕ: 0, ಸರಣಿ: 1, ಪಂದ್ಯ: 2, ಗೆಲುವು: 0, ಸೋಲು: 2, ಡ್ರಾ: 0.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2QvF6dP
