ನ್ಯೂಯಾರ್ಕ್: ಇರಾನ್-ಅಮೆರಿಕಾ ನಡುವಿನ ಬಿಕ್ಕಟ್ಟಿನ ಬಗ್ಗೆ ತಮ್ಮ ಫೇಸ್ಬುಕ್ ಖಾತೆಯಲ್ಲಿ ಹಾಸ್ಯ ಚಟಾಕಿ ಹಾರಿಸಿದ್ದ ಭಾರತ ಮೂಲದ ಅಮೆರಿಕಾದ ಪ್ರಾಧ್ಯಾಪಕರೊಬ್ಬರನ್ನು ಕಾಲೇಜು ಕೆಲಸದಿಂದ ಕಿತ್ತು ಹಾಕಿದೆ. ಕಾಲೇಜಿನ ಮೌಲ್ಯ ಮತ್ತು ಸಂಸ್ಕೃತಿಗೆ ಚ್ಯುತಿ ತರುವಂತೆ ತಮ್ಮ ವೈಯಕ್ತಿಕ ಫೇಸ್ಬುಕ್ ಖಾತೆಯಲ್ಲಿ ಪೋಸ್ಟ್ ಹಾಕಿದ್ದಕ್ಕೆ ಅಶೀನ್ ಫನ್ಸೆಯವರನ್ನು ಕೆಲಸದಿಂದ ವಜಾಗೊಳಿಸಲಾಗಿದೆ ಎಂಬುದಾಗಿ ಬ್ಯಾಬ್ಸನ್ ಕಾಲೇಜು ಹೇಳಿದೆ. ಕಳೆದ ವಾರ ಹಾಕಿದ್ದ ಪೋಸ್ಟ್ಗೆ ಪ್ರಾಧ್ಯಾಪಕರು ಕ್ಷಮೆ ಕೇಳಿದ್ದು, 'ತಿಳಿ ಹಾಸ್ಯವನ್ನು ಬೆದರಿಕೆಯಾಗಿ ಪರಿಗಣಿಸಲಾಗಿದೆ' ಎಂದು ವಿಷಾದ ವ್ಯಕ್ತಪಡಿಸಿದ್ದಾರೆ. ಇರಾನ್ ಮತ್ತು ಇರಾನ್ ಸಂಸ್ಕೃತಿಗೆ ಸಂಬಂಧಿಸಿದ ಪ್ರಮುಖ ಸ್ಥಳಗಳನ್ನು ದಾಳಿಗೆ ಗುರಿಯಾಗಿಸುವ ಡೊನಾಲ್ಡ್ ಟ್ರಂಪ್ ಟ್ವೀಟ್ಗೆ ಸಂಬಂಧಿಸಿದಂತೆ ಅವರು ಈ ಪೋಸ್ಟ್ ಹಾಕಿದ್ದರು. ಅಂತರಾಷ್ಟ್ರೀಯ ಕಾನೂನಿನ ಪ್ರಕಾರ ಸಾಂಸ್ಕೃತಿಕ ಕೇಂದ್ರಗಳ ಮೇಲೆ ದಾಳಿ ಮಾಡುವುದು ಯುದ್ಧಾಪರಾಧ. ಈ ಹಿನ್ನೆಲೆಯಲ್ಲಿ ಟ್ರಂಪ್ ಹೇಳಿಕೆ ನೀಡಿದ್ದರೂ ಅಲ್ಲಿನ ಸರಕಾರ ಮಾತ್ರ ದಾಳಿ ಮಾಡುವುದಿಲ್ಲ ಎಂದಿತ್ತು. ಇದೇ ವೇಳೆ ಅಶೀನ್ ಫನ್ಸೆ, ಇರಾನ್ ಕೂಡ ಮಾಲ್ ಆಫ್ ಅಮೆರಿಕಾ, ಕರ್ದಾಶಿಯನ್ಸ್ ಮನೆಗಳಂತೆ ಅಮೆರಿಕಾದ 52 ಕೇಂದ್ರಗಳನ್ನು ದಾಳಿಗೆ ಗುರುತಿಸಬೇಕು ಎಂದಿದ್ದರು. ಆದರೆ, "ಫೇಸ್ಬುಕ್ನಲ್ಲಿ ನನ್ನ ಗೆಳೆಯರಿಗೆ ಮಾಡಿದ ಈ ಹಾಸ್ಯವನ್ನು ಜನರು ಬೇಕೆಂದೇ ತಪ್ಪಾಗಿ ಅರ್ಥೈಸಿದ್ದಾರೆ," ಎಂಬುದಾಗಿ ಫನ್ಸೆ ಅಲವತ್ತುಕೊಂಡಿದ್ದಾರೆ. ನಾನು ಕಾಲೇಜು ನನ್ನ ಅಭಿವ್ಯಕ್ತಿ ಸ್ವಾತಂತ್ರ್ಯವನ್ನು ಬೆಂಬಲಿಸಬಹುದು ಮತ್ತು ಸಮರ್ಥಿಸಿಕೊಳ್ಳಬಹುದು ಎಂದುಕೊಂಡಿದ್ದೆ ಎಂಬುದಾಗಿ ತಿಳಿಸಿದ್ದಾರೆ. ಆದರೆ ಕಾಲೇಜು, “ಹಿಂಸಾಚಾರ ಮತ್ತು ಧ್ವೇಷಕ್ಕೆ ಕಾರಣವಾಗುವ ಯಾವುದೇ ರೀತಿಯ ಬೆದರಿಕೆ ಮಾತುಗಳು ಅಥವಾ ಕ್ರಿಯೆಗಳನ್ನು ಖಂಡಿಸುತ್ತದೆ,” ಎಂದು ಹೇಳಿದೆ. ಜೊತೆಗೆ ಅವರನ್ನು ಕೆಲಸದಿಂದ ಕಿತ್ತು ಹಾಕಿದೆ. ಈ ಮೂಲಕ ಇರಾನ್ ಅಮೆರಿಕಾ ಸಂಘರ್ಷದಲ್ಲಿ ಪ್ರಧ್ಯಾಪಕರೊಬ್ಬರು ಕೆಲಸ ಕಳೆದುಕೊಂಡಿದ್ದಾರೆ.
from India & World News in Kannada | VK Polls https://ift.tt/3a5BSoT
